Actes 19
19
Pɔɔl bí Eefeesi
1Ŋyunti ŋun Apooloosi nìn bí Kɔrantee, ní Pɔɔl dīń kitiŋ kin bí ajoon puee ki bāań Eefeesi. Niin ní u ká Kriisitoo yab biba, 2ki bālifì-bi yii: «Ni nín fōō ki kííyee, ni fōō Circir Famaaa?» Ní bi kíí-u yii: «Timbi kaa kpáàa gbìl̄ bi sòon̄ Unimbɔti Fam pu gba ní kaa nín fōō-mì.» 3Ní Pɔɔl bālifì-bi yii: «Mimmee, dinyiŋfaldi dilal ní bi fùl̄-ni ní?» Ní bi kíí-u yii: «Yoowaneesi yal ní ti fùl̄.» 4Niinee ní Pɔɔl kíí-bi yii: «Yoowaneesi nyiŋfàltam sá ki tīī bin fá bi-kpitiiyee ní. U nìn tùkù samaa yii bí dāá fōō un làá dāá dāan̄ úǹ boonee kí kíí: an dàkà yii Yeesu#19.4 Kpèè Maat 3.11, Maar 1.4,7-8.» 5Bi gbìl̄ an bɔtee, ní ki yāntì bi fùl̄-bi nnyim ti-Dindaan Yeesu yindi pu. 6Ní Pɔɔl dū u-ŋalii ki páaǹ bi-pu. Niinee, Circir Fam kpákatìń bi-pu, ní bi kíǹ ki bíi sòoǹ isooncaan ki nàatī Unimbɔti bɔti. 7Bininjab gbanti nìn bàn̄ binib saalaa nì bili nyɔkɔm.
8Niinee ní Pɔɔl ŋá iŋmal ita ki kíǹ ki bí kukpafidiin ki mɔ̀tīi sòoǹ ki cántí-bi Unimbɔti Beel bɔti, án nín làá ŋá pu ní ú ŋmā-bee. 9Ama biba nìn pɔ́ɔkì bi-pɔbiliŋ, kaa là kí fōō kí kíí, ní ki bí ki sòoǹ ki bíiĺ ti-Dindaan bɔti samaa nimbiin. Niinee ní Pɔɔl yíkì bi-cee, ki kpáaǹ Kriisitoo yab ki kākatì ní ki kíǹ ki dàkà-bi Unimbɔti bɔti ŋwiin kamaa Tranusi sukuliun. 10U nìn dàkā-bi míǹ áli abin ali. An di yāntì Juuda yab nì Greeki yab bin nìn kóò Asii tiŋkinee kɔkɔ ŋúń ki gbìl̄ ti-Dindaan bɔti.
Sikeefa jipɔmbi bɔti
11Unimbɔti nìn dì Pɔɔl pu ki ŋáań maamaacikpaambi. 12Di sá yii Pɔɔl ŋaabikaaa, u-wampeeŋkaati tiba ní bi yaa nìn cáań ki gbēē bibunliibee, iween nìn càntī-bi, ní arasiniibi mun nìn nyēē bi-pu. 13Binyɔɔdambi biba nìn bí ki sá Juuda yab, ki yìiǹ ki cāantí bin cáá arasiniibee. Bi mun nìn mākaǹ kí yíiń ti-Dindaan Yeesu yindi kí jà arasiniibi. Bi nìn lī yii: «Nì Yeesu un pu Pɔɔl sòoǹee yindi pu ní m bí yii ní nyā.» 14Sikeefa, Juuda yab saraaŋakpiliu ubɔ jipɔmbi biluli di nìn ŋáań mimmee. 15Ní arasiniiyee fātìi kíí-bi yii: «Man nyí Yeesu ki nyí Pɔɔl mun. Kin ni mun fáà, ni sá bilab?» 16Niinee, uninja un pu arasinii kēe ŋàan̄ ki cìb̄-bi, ní ki pɔ́ɔkiǹ bi-kɔkɔ, ki yāntì bi sáǹ mpɔn ki nyáń dicindi gbantin nì dicancaŋgbeel nì tiweendi. 17Juuda yab nì Greeki yab bin nìn kóò Eefeesee kɔkɔ nín gbìl̄ mimmee, ní tifaandi kɔ́-bi ní bi mɔ̀tīi tìì ti-Dindaan Yeesu yindi tinyool. 18Bin nìn fōō ki kííyee tikpil nìn dòoń samaa nimbiin ki bìitī tin bi nìn ŋáaǹee pu. 19Bi-kansikin tikpil bin nìn ŋáań tikpaŋkpantiilee nìn cáań bi-gbɔnti tin bi nìn cáa ŋáań tikpaŋkpantiilee ki wùn̄ ŋŋmi samaa kɔkɔ nimbiin. Bi dāa kàan̄ ki kpēēyee, an sá animbil jitɔmbi kutukub imuŋku ili nì saalaa ní bi nìn dūu dá tigbɔn gbanti#19.19 animbil jitɔmbi: kpèè Maar 6.37 nì tin bi ŋmàn̄ kugbɔŋu faaku taapuee.. 20Míǹ ní ti-Dindaan bɔti gbītì an kɔkɔ ki báaǹ inyaan mpɔn.
Fìkil fikil kɔ́ Eefeesi tiŋkin
21Tíǹ jítèe, ní Pɔɔl bíi màkà yii u làá dī Maseeduwaan nì Akaayi pú kí cù Jeerusaleem. U lī mimmee, ní ki bí yii, u yaa bàn̄ niinee, see ú cù Room mun. 22Ní u dū binib bili bin nìn bí u-cee ki tútúǹ-uee, Tiimootee nì Eeraasiti, ki dūu tú Maseeduwaan. Úǹ u-ba nìn gbíntìi kāl̀ Asii tiŋkin fiii. 23Ŋyunti gbantee fìkil fikil ubɔ nìn kɔ́ní Eefeesi tiŋkin ti-Dindaan saŋŋu pu. 24Di sá yii uninja ubɔ nìn bí, bi yíì-u Deemeetriyusi. Kijapaayee nìn cáá tikúti ki mɔ́ɔ̀ ŋwaadibiyaamu ki cáa nántíǹ diwaal Ariteemiisi diiku, ki nìn tìì u-tɔntɔnliibi bi mun ń nīn ŋáań ki kāntí ipaati tiŋan. 25Ní u kpáfì u-tɔntɔnliibi nì bin kɔkɔ pée tūǹ an tundee, ní ki bí-bi yii: «Ti-yab, kéè, ni-kɔkɔ nyí yii ti-tundi nee di yì ti-jimaa! 26Kéè, ni ká ki gbìl̄ Asii timmu kɔkɔn, an kaa sá Eefeesi ŋmaniŋma, Pɔɔl gbanti nín ŋúń ki dáaliń binib tikpil ki gíiǹní u-jandi pueeyaa! Pɔɔl ubaantee cáá yii inimbɔti in binib dū bi-ŋalii ki ŋée kaa sá inimbɔti. 27An sá mbusu ní, kun puee án làá yàntī baa làá nīn gíti tɔ́ ti-tundi nee. Áli gba, baa dāa gíti dù diwaakpaandi Ariteemiisi diiku kí yíiń tiba, ní diwaakpaandi gbanti din Eefeesi tiŋki nì duulinya timmu kɔkɔ nóóyee làá dāá ŋá fám!» 28Bi gbìl̄ an bɔtee, ní ki fōō diŋuul, ní ki kíǹ ki bíi tátí yii: «Eefeesi yab waal Ariteemiisi di sá diwaakpaandi!» 29Niinee ní dipɔɔbiildi kɔ́ kitiŋ kɔkɔn. Ní bi cúú Maseeduwaan yab Gaayusi nì Ariistaarki bin nì Pɔɔl nìn nōotée, ki yōoǹ-bi ki cáa cūnnì laakin samaa nìn kpáfée. 30Pɔɔl bàà nìn là kí cù niin samaa cee, ní Kriisitoo yab yíì. 31Áli u-bɔɔbi biba bin nìn sá Eefeesi kpilibee nìn túnní u-cee, bí gbàam̀-u ú taa dāan̄ samaayee kansikin. 32Dikpafil gbanti poonee, biba nìn tátí ki sòoǹ tiba, ní biba mun ŋúb́ tiba. An ŋá fìkil fikil, ní binib tikpil kaa kpáàa nyí kun pu ní bi baasii kpáfèe. 33Kunipaauee kansikinee biba nìn cūtìi ká Aleekisandir, ní Juuda yab téé-u ki nyántìń ú sòoǹ. Ní Aleekisandir yōoǹ ŋŋal ki téefì-bi bí ŋmīĺ ú bàà sòoǹ nì samaa. 34Ama bi nín dāa dūu béè yii u sá Ujuudajee, ní bi-kɔkɔ kpáfì ki tátí dicilpu áli tikúmɔn tili nyɔkɔm, ní ki cáá yii: «Eefeesi yab waal Ariteemiisi di sá diwaakpaandi!»
35Niinee ní ukpil ubɔ yāntì samaa ŋmíl̀, ní u bí yii: «Eefeesi yab, ŋma di kaa nyí yii Eefeesi tiŋki yab di kpèé diwaakpaandi Ariteemiisi din nyánní yilpu ki lítèe nì di-diiku? 36Ubɔ kaa ŋūǹ kí kpákáǹ an bɔti. Míǹ puee, kàl̄maan soooo, taa jìkìmaan tibɔti nee pu. 37Binib bin ni cáań nee, baa ŋá digaŋgam ubɔ kuwaadiin, kaa ti sīī ti-waal mun. 38Míǹ puee, Deemeetriyusi nì bitɔntɔnliibi bin bí u-ceeyee, ubɔ yaa ŋá-bi tibee, iwiin in bi sòoǹ tibɔtee bí, bibɔsoonliibi mun bí! Bí yíiń tɔb ibeeyiin kí sòoǹ. 39An yaa tí sá bikpilib bɔtaaa, ní bí kpāfì kí kpèè, kii bi nín pée ŋáań puee. 40Ama tin bāań díǹ neeyee làá yàntī bí lì yii ti là kí bīil̀ gɔmina. Di sá yii taa ŋūǹ kí lì kí dàkà kun pu ní ti kpáfì dooyee taapu.» 41U lī mimmee, ní ki bí yii báà ŋma ń nīn kùǹ.
Nke Ahọpụtara Ugbu A:
Actes 19: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.