Kejadian 7
7
Banyu baꞌah ganal
7:1-24
1Lalu Allah bapirman lawan Nuh, “Ayu babuatan ka dalam parahu, ikam, bini ikam, anak-anak wan minantu-minantu ikam. Sualnya ikam haja nang Ku-lihat bujur di antara urang-urang di jaman ini. 2Matan samunyaan binatang nang kada haram bawa pitu pasang, laki wan bini. Sadangkan binatang nang haram bawa sapasang-sapasang haja, laki wan bini. 3Kaya itu jua, satiap janis burung bawa pitu pasang, laki wan bini sakira kada habis di saluruh bumi. 4Sualnya pitu hari lagi Aku handak manurunakan hujan labat nang kada sing ampihan salawas ampat puluh hari ampat puluh malam, wan Aku handak mabinasaakan samunyaan makhluk nang sudah Kujadiakan di bumi.” 5Lalu digawi Nuh ai samunyaan nang disuruhakan Allah ka sidin.
6Wayah banyu baꞌah ganal maninggalamakan bumi, umur Nuh anam ratus tahun.
7Lantaran handak baꞌah tu, Nuh, bini sidin, lawan anak-anak sidin lawan minantu-minantu sidin babuatan ka dalam parahu tu. 8Lalu datangan ai sapasang-sapasang matan samunyaan janis binatang nang kada haram lawan nang haram, burung-burung lawan samunyaan binatang nang marayap di bumi, 9babuatan ka parahu mandapati Nuh nang kaya nang disuruhakan Allah. 10Imbah pitu hari, datang ai banyu baꞌah ganal nang maninggalamakan bumi. 11Pas Nuh baumur anam ratus tahun, di bulan nang kadua, hari nang kapitu walas, tabungkasan samunyaan sumber-sumber banyu nang ada di dalam tanah. Banyu-banyu nang ada di langit gin saling darasan baguguran ka bumi. 12Turun ai hujan nang sing labatan, kada sing ampihan ampat puluh hari ampat puluh malam. 13Damintu jua, Nuh, bini sidin, lawan anak-anak sidin nang bangaran Sim, Ham, wan Yapet, lawan minantu-minantu sidin babuatan ka dalam parahu tu. 14Umpat jua babuatan sagala janis makhluk nang hidup, sagala binatang liar, sagala binatang inguan, sagala janis binatang nang bahalar, lawan sagala janis binatang nang marayap. 15Samunyaan nang banyawa datangan sapasang-sapasang babuatan ka dalam parahu tu mandapati Nuh. 16Nang babuatan tu laki bini satiap janis binatang, nang kaya disuruhakan Allah lawan Nuh. Imbah itu, ditukup Allah lawang parahunya. 17Ampat puluh hari ampat puluh malam hujan labat sampai maninggalamakan bumi. Banyunya batinggi tarus lalu parahu tu timbul, taangkat tinggi matan tanah. 18Banyunya batambah banyak, batinggi tarus manguasai bumi, lalu timbul ai parahu tu di atas banyu. 19Banyunya daras banar batambah tarus sampai tinggalaman gunung-gunung nang tinggi nang ada di saluruh bumi. 20Banyunya batinggi tarus sampai pitu miter tingginya di atas puncak-puncak gunung. 21-23Maka matian ai sabarataan makhluk hidup nang banyawa, nang bahinak, nang bagarak di bumi, burung-burung, binatang liar, binatang inguan, sagala binatang nang marayap, nang bakariapan di bumi, tamasuk manusia jua. Maka Nuh haja nang masih hidup lawan samunyaan nang ada lawan sidin dalam parahu tu. 24Banyunya manguasai bumi, kada sing surutan salawas 150 hari.
Nke Ahọpụtara Ugbu A:
Kejadian 7: BJN
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Pioneer Bible Translators