Luka 22
22
Ngewa ya vilongozi a Ayahudi
(Matayo 26:1-5; Mariko 14:1-2; Johana 11:45-53)
1 #
Kul 12:1-27
Tsʼikukʼuu ya Pʼasaka yakala yifika phephi, tsʼiku zirizo ndizo aryazo mikahe yotsʼitiywa hamira. 2Makuhani abomu na alimu a shariya achikala anatsakula njira ya kumuulagira Jeso, ela ni áogopha atʼu tu.
Juda unakubali kumuguza Jeso
(Matayo 26:14-16; Mariko 14:10-11)
3Ndo Shetani wamuphenya Juda aihiwaye Isikariyoti, mumwenga wa aratʼu ahumwa a Jeso kumi na airi. 4Juda achendadzila na makuhani abomu na abomu arinzi a Hekalu dzulu ya jisi vyokala undaaonyesa Jeso. 5Na ao achihamirwa, na acherekezana naye kumuripha pʼesa achiahendera vivyo. 6Juda achikubali, na ndo achanza kutsakula nafasi mbidzo ya kwaonyesa Jeso photsʼikalapho duu ra atʼu.
Jeso unadzibambanya ause tsʼikukʼuu
(Matayo 26:17-25; Mariko 14:12-21; Johana 13:21-30)
7Ndo tsʼiku ya kwanza ya tsʼikukʼuu ya mikahe yotsʼitiywa hamira, ukati urio mwanagonzi wa Pʼasaka nikutsinzwa, yafika. 8Ndo Jeso waalagiza Pʼetero na Johana maneno gaga. Waamba, “Endani mukahubambanyire vyakurya vya tsʼikukʼuu, kwa hata hudze huryeni.” 9Na ao achimuuza vivi, “Vyakurya vya tsʼikukʼuu, unahenza hukavibambanyephi sino?” 10Yiye achiaamba, “Endani vivi hata muchikala munaphenya phapho Jerusalemu, mundaonana na mutumia yendakala utsukula chirenje cha madzi. Muchimona, mutuweni hata ndani ya nyumba yondakwendaphenya, na mwenye undakala yu mumo. 11Yiye mwenye muchimona mwambeni, ‘Mwalimu udzihwamba hudze hukuuze kukala, ni chiphicho chicho chumba chondarya tsʼikukʼuu phamwenga na sino ahumwae?’ 12Naye undamonyesa chumba chibomu gorofani, murimo chila chitʼu chipangwatʼo kare phatʼuphe. Hʼaya mwanze kubambanya leu mumo.” 13Ndo Pʼetero na Johana achenda, achendaona chila chitʼu chisawa dza vyokala Jeso udziaambira, na achanza kujitʼa leu ra tsʼikukʼuu.
Shuhuli ya Bwana
(Matayo 26:26-30; Mariko 14:22-26; 1 Akorito 11:23-25)
14Saa ya leu yiriphofika, Jeso wakwendaphenya na achirya phamwenga na ahumwae. 15Ndo Jeso achiaamba, “Nákala nichigaaza muno gaga ga kurya tsʼikukʼuu yiyi phamwenga namwi nichikala tsʼidzangwe kushononeswa hata kufa. 16Ninamwambira jeri, tsʼindayirya kahiri tsʼikukʼuu yiyi hata maanaye yimanywe kuko Ufalumeni kwa Mulungu.”
17Chisha, Jeso achihwala chikombe cha divai, achimulavira mumvera Mulungu na achiaamba, “Hwalani chichi chikombe cha divai, na munwe na kusazirana hata mosi. 18Maana, ninamwambira mino, tsʼindanwa divai kahiri hata Ufalume wa Mulungu udze.” 19Na achihwala mukahe nao, achilavya mumvera kwa Mulungu, chisha achiumega-mega, achiapʼa na achiaamba, “Uu ni mwiri wangu, urio ninaulavya kwa dzulu yenu. Ndo hwalani murye, na kalani muchihenda vivi kunikumbikira.” 20#Jer 31:31-34Chisha dza vivyo vyenye kahiri, ariphomala kurya chilaliro achiapʼa chikombe cha divai na achiaamba, “Chikombe chichi cha divai chinaonyesa Lagano Iphya ra Mulungu na atʼu, rihakikishwaro ni milatso yangu yondamwagwa kwa dzulu yenu.
21 #
Zab 41:9
“Ela manyani kukala, yendaniguza mimi u phamwenga naswi vivi huryavyo. 22Mimi Mutʼu yelaa dzulu nindakwendaulagwa dza Mulungu arivyodzila. Ela undamanya mwenye yiye mutʼu yendaniguza mimi.”
23Phapho ahumwae achanza kuuzana ao kwa ao dzulu ya ni yuphiye kati yao yekala undahenda neno riro.
Kʼani dzulu ya ubomu
24 #
Mat 18:1; Mar 9:34; Luk 9:46 Kwalairira kʼani kati ya ao ahumwa a Jeso, dzulu ya ni yuphiye kati yao aonewaye kukala, ni mubomu kuchira anzie osi. 25Ndo phapho Jeso achiaamba, “Afalume a mataifa anaatawala atʼu na chiguvuguvu, na vilongozi ao ahenza kwihiwa, ‘Asena a anatsʼi.’ 26#Mat 23:11; Mar 9:35#Mat 20:25-27; Mar 10:42-44Ela mwimwi kwenu tsʼivyo hivyo, itsʼiphokala yiye mubomu kati yenu naakale dza mudide kamare kuriko mosi, na yiye ariye ni chilongozi, naakale dza muhendikazi. 27#Joh 13:12-15Kwani mubomu ni ani sambi? Akale ni yuyatʼu asagalaye kutariza leu, hebu ni yuyatʼu mulavi wa leu? Photsʼi tanga-tanga, ni yuyatʼu asagalaye kutariza leu! Ela hata garipho ga hivyo, mino ni phapha kati yenu kumuhikirahikira dza muhendikazi.
28“Mwimwi ndimwi mudzisagala nami ukati wosi wa majezo gangu gojezwa, 29na ninamupʼa widimi na ufalume mwimwi, dza viratʼu vyenye nirivyohewa widimi na ufalume ni Baba, 30#Mat 19:28kwa hata murye na munwe nami kwangu Ufalumeni, na musagale vihini vya utawala, mutawale mbari kumi na mbiri za Iziraeli.
Jeso unasema chimbere kukala Pʼetero undamutina
(Matayo 26:31-35; Mariko 14:27-31; Johana 13:36-38)
31“Simoni, Simoni! Sirikisa! Shetani uhenzezwa ni Mulungu amuheze mosi kwa hata amanye kuluphiro renu dza mutʼu aphetʼavyo matsere, akagaika hicheye na wiswa kʼanda. 32Ela nidzikuvoyera mino kwa hata utsʼiuye nyuma. Ela yiye Shetani achimala kukuheza na uchiuya kwangu, ajenge nduguzo a chiroho nao.” 33Pʼetero yiye achimuudzidza achimwamba, “Bwana, mimi ni kwete hata kumba ni kufungwa nifungwe nawe, na hata kumba ni kufa nife nawe vivyo.” 34Jeso yiye achimuudzidza achimwamba, “Ninakwambira mino uwe Pʼetero, usiku wa rero jogolo kʼarindaika photsʼipho uwe kukala udzinitina kʼano tʼahu!”
Ukati wa ndai
35 #
Mat 10:9, 10; Mar 6:8, 9; Luk 9:3; 10:4 Chisha Jeso waauza ahumwae vivi, “Ukati niriphomuhuma mukasumurire Nguma Mbidzo photsʼipho pʼochi, mukʼoba, hebu virahu, mukale mwakala na haja na chitʼu na muchichikosa?” Ao achimuudzidza achimwamba, “Ngʼo, hata chimwenga kʼahukosere.” 36Ndo Jeso achiaamba, “Bee, vivi mwenye pʼochi naayitsukule, na mwenye mukʼoba naye, naahende dza vivyo. Yetsʼina upanga, naaguze kotire apate pʼesa akagule umwenga. 37#Isa 53:12Maana, ninamwambira mino, gago Maandiko ga Mulungu gaambago, ‘Waikwa duu mwenga na atʼu ai,’ ni seti nigachimize mimi, na garatʼu goandikwa dzulu yangu, ga phephi na kuchimira vivi.” 38Ahumwae achiamba, “Bwana phapha phana miri kare.” Jeso yiye achiaamba, “Yinausa shuhuli yiyo.”
Jeso unavoya mulima wa Mizeituni
(Matayo 26:36-46; Mariko 14:32-42)
39Jeso wauka Jerusalemu na dza yirivyokala adaye, achenda mulima wa Mizeituni, na ahumwae achimutuwa. 40Ariphofika kuko, waamba ahumwae vivi, “Kalani phapha mudzivoyere kukala mutsʼiphenye majezoni.” 41Chisha achiaricha, achenda chihezo cha mutʼu kujeza dziwe rikafika, achimitʼa mavindi na achivoya vivi: 42“Baba, richikala ni henzoro, niusira yiyi shenene yonipangira. Ela hata vivyo henda uhenzavyo uwe, tsʼihivyo mimi nihenzavyo.” 43Phapho malaika kulaa mulunguni achimulairira kudzamutiya moyo. 44Shenene bomu yokala unayo yamuhenda akaze kuvoya, na mvukuhi dza madwena ga milatso, zichanza kumulaa na kujera hata photsʼi.#22:43-44 Nakala nyinji za mwanzo-mwanzo kʼazina mafungu gaga ga 43 na 44.
45Ariphomala mavoyoge, waauyira ahumwae, na achendaaona aphotserwa kwa shenene bomu. 46Jeso achiauza vivi, “Kwadze murere? Lamukani muvoye, kwa hata mutsʼidze mukaphenya majezoni.”
Jeso unagwirwa
(Matayo 26:47-56; Mariko 14:43-50; Johana 18:3-11)
47Jeso ariphokala ucheri kugomba, duu ra atʼu rokala rilongozwa ni Juda mumwenga wa aratʼu kumi na airi, rakudza. Juda achimusengerera phephi Jeso kwa amudonere. 48Ela Jeso yiye achimwamba, “Juda, unanonyesa mimi Mutʼu yelaa dzulu kwa atʼu aa anigwire kwa kunibusu?” 49Aratʼu ahumwae ariphoona maneno gokala ganahendeka, achiamba, “Bwana, hwaanze ano?” 50Na mumwenga wao achimutema upanga muhendikazi wa kuhani mubomu achimutosa sikirore ra kulume. 51Phapho Jeso achiaamba, “Hʼai hʼai hʼai! Nagasire.” Achiritsola riro sikiro ra yiye mutʼu achiribandika kahiri phatʼuphe, na achimuphoza.
52Chisha Jeso achiaamba vivi ao makuhani abomu, abomu a arinzi a Hekalu na atumia okala akudzamugwira, “Vidze, mudzikudza na myundu na magundu munigwire dza kwamba mimi nákala ninahenza nipinduwe sirikali? 53#Luk 19:47; 21:37Samba nákala nichikala namwi chila tsʼiku Hekaluni, na heka kʼamunigwirire kuko? Bee hʼayani mwimwi asena ni ukati wenu, ukati wa dziza ritawale naro.”
Pʼetero unamutina Jeso
(Matayo 26:57-58; Mariko 14:53-54, 66-72; Johana 18:12-18, 25-27)
54Ndo ao phapho ámugwira Jeso, achiuka naye kwenda nyumbani kwa kuhani mubomu. Pʼetero achiatuwa, ela wakala u nyuma kure vichache. 55Kuko ndani ya boma kwakala kukutwʼa moho, na atʼu achikala asegere phapho anawoha. Ndo Pʼetero naye achendaphenya na achisagala nao. 56Muhendikazi mumwenga wa chiche ariphomona Pʼetero usegere phephi na phapho mohoni, wamukotʼorera matso achiamba, “Mutʼu yuyu ukala u phamwenga na Jeso naye.” 57Ela Pʼetero yiye achitina achiamba, “Uwe muchetʼungwa uwe, mino tsʼimumanya mutʼu yiye.” 58Kwimaima vichache, mutʼu munjine achimona Pʼetero na achiamba, “Uwe nawe u mumwenga wa atʼu a Jeso.” Ela Pʼetero yiye achiudzidza achiamba, “Uwe baye uwe, tsʼimi mumwenga wa atʼue mino!” 59Rinachira saa mwenga hivi, mutʼu munjine achidina kwamba, “Hakika yuyu ukala u phamwenga na Jeso jeri, mana, ni Mugalilaya naye.” 60Ela Pʼetero achiamba, “Uwe baye uwe, mino tsʼirimanya hata riro ugombaro!”
Na phapho kare phokala hata unagomba gago, jogolo richiika. 61Bwana Jeso achigaluka achimulola Pʼetero, naye Pʼetero achikumbikira garatʼu gokala udzambirwa ni Bwana kukala, “Rero richikala jogolo kʼaridzangwe kwika, undanitina kʼano tʼahu uwe.” 62Phapho Pʼetero achilaa konze, achendarira muno.
Jeso unahendwa chinyago na kupigwa
(Matayo 26:67-68; Mariko 14:65)
63Aratʼu atʼu okala anamwimirira Jeso, ámupiga na kumuhenda chinyago. 64Ao ámufunga zuzu. Achimupiga na kwanza kumuuza vivi, “Ni ani yedzikupiga? Hebu hwambire!” 65Na achimwamba maneno manji ga kuhakana.
Jeso unaphirikwa mbere za ngambi
(Matayo 26:59-66; Mariko 14:55-64; Johana 18:19-24)
66Kuriphocha, ngambi ya atumia áonana phamwenga, ambapho makuhani abomu na alimu a shariya ákudza. Jeso achirehewa mbere za yiyo ngambi yao. 67Na ao achimwamba vivi, “Hwambire chikala uwe ndiwe yiye Kʼirisito.” Ela Jeso yiye achiaamba, “Hata nikamwambira kʼamundanikuluphira, 68na chisha hata nikamuuza kʼamundaniudzidza. 69Ela kwanzira vivi, mimi Mutʼu yelaa dzulu nindasagala mukono wa kulume wa Mwenyezi Mulungu.”
70Phapho osi achiamba, “Ndo uhenza wambe uwe u Mwana wa Mulungu!” Yiye achiamba, “Mwimwi munaniamba ni yiye.” 71Phapho ao achiamba, “Kʼahutakiya ushaidi unjine kahiri, siswi enye hudzimusikira achidzamba ni Mwana wa Mulungu.”
Nke Ahọpụtara Ugbu A:
Luka 22: CHIDUR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye