Luka 18
18
Tʼadi ya gungu na mulamuli
1Chisha, Jeso waatarira ahumwae tʼadi yiyi kwaonyesa kukala, ni seti avoye ukati wosi photsʼikuluphukwa. 2Jeso waamba, “Kwakala mulamuli mumwenga mudzi umwenga yekala kʼamogopha Mulungu, hebu kumumanya mutʼu. 3Na mudzi uo vivyo, kwakala kuna muchetʼu gungu mumwenga yekala achimwendera yiye mulamuli kʼano nyinji na kumwamba, ‘Nihehera nipate haki yangu yophokwa ni mudawa wangu.’ 4Ndo tsʼiku nyinji zachira na yiye mulamuli achikala kʼenzi kumuhehera yiye gungu. Ela musindikizowe achaza mwakwe moyoni achiamba, ‘Hata niripho mimi tsʼimogopha Mulungu hebu kumumanya mutʼu, 5ela nindamuhehera vivyo yuyu muchetʼungwa, kwakukala, unadza achiniyuga, na nitsʼiphohenda vivyo, bee undaenderera kudza phapha kwenda-kwenda hata musindikizo ganitsose gago gakwe!’ ”
6Ndo Jeso achenderera kwamba, “Chikala yiye mulamuli mui tu waona ni baha amuhehere yiye muchetʼungwa kwa hata wakala unenda achimuvoya gago kwenda, 7ndo akale Mulungu kʼandaahehera atʼu oatsagula, ario anamuririra usiku na mutsana? Akale undaaumirirya atʼu achimuririra? 8Ninamwambira mino, undaahehera maruru. Ela hata garipho maneno ga hivyo, nikale mino Mutʼu yelaa dzulu nichiuya kahiri duniani, nindakudzaona atʼu ondakala acheri kunikuluphira?”
Tʼadi ya Mufarisayo na mutosi wa kodi
9Jeso waambira tʼadi yiyi atʼu okala anadzona anahenda ga haki, na anaaphurya anjine. 10Yiye waamba, “Kwakala alume airi okwenda Hekaluni kwendavoya. Mumwenga wakala ni Mufarisayo, na yiye munjine wakala ni mutosi wa kodi.
11“Yiye Mufarisayo wakwendaima achivoya chimoyomoyo kwamba, ‘Ninakulavira mumvera Mulungu, kwakukala, mimi tsʼinga dza atʼu anjine ario ni anyangʼanyi, adambi, azembe, na hebu hata tsʼinga dza yuyu mutosi wa kodi. 12Mino ninafunga kʼano mbiri kwa juma, na ninalavya sadaka na fungu ra kumi ra pato rangu.’
13“Ela yiye mutosi wa kodi waima kʼanda, na hata kʼalolere dzulu mulunguni atsʼiphokala wagwira hama kwa utsungu tu na achiamba, ‘Mulungu, nonera mbazi, mimi ni mwenye dambi.’
14 #
Mat 23:12; Luk 14:11 “Ndo ninamwambira jeri, yiye mutosi wa kodi wauya mudzini achikala uphokerwa ni Mulungu dza mwenye haki. Ela yiye munjine yiye kʼaphokererwe ni Mulungu dza mwenye haki, mana, chila adziunulaye undaudzwa nyuma, na adziudzaye nyuma undaishimiwa.”
Jeso unaahatsʼa anache adide
(Matayo 19:13-15; Mariko 10:13-16)
15Tsʼiku mwenga, atʼu ámurehera Jeso anache adide kwa hata aabandikire mikonoye aahatsʼe, na ahumwa ariphoaona aratʼu atʼu oareha, achiagombera. 16Ela Jeso yiye achiaiha ende kwakwe aratʼu anache na achiaamba ao ahumwae vivi, “Mutsʼiazize ao anache, aricheni adze kwangu, mana, Ufalume wa Mulungu ni wa atʼu ario dza aa anache. 17Ninamwambira jeri, mutʼu yeyosi yetsʼi kuluphiro dza ra mwanache mudide, kʼandaphenya kwenye Ufalume uo.”
Tajiri mumwenga
(Matayo 19:16-30; Mariko 10:17-31)
18Chilongozi mumwenga wa Chiyahudi wamuuza Jeso achimwamba, “Mwalimu mudzo, ninihendedze mino hata ndo niupate uo uzima uphya wa kare na kare?” 19Jeso achimuuza naye achimwamba, “Kwadze unaniiha mudzo? Kʼakuna ariye mudzo, atsʼiphokala Mulungu tu bahi. 20#Kul 20:14; Kʼumb 5:18; Kul 20:13; Kʼumb 5:17; Kul 20:15; Kʼumb 5:19; Kul 20:16; Kʼumb 5:20; Kul 20:12; Kʼumb 5:16Ukale unagamanya gano malagizo ga Mulungu gaambago, ‘Utsʼizinge, utsʼiulage, utsʼiiye, utsʼilavye ushaidi wa ulongo, na aishime abayo na ameyo’?” 21Yiye achiamba, “Gago gosi bee ninagamanya, na nidzigatuwiriza hangu utana wangu.” 22Jeso ariphosikira gago achimwamba, “Uwe ucheri kukosa kuhenda chitʼu chimwenga tu. Kaguze chila chitʼu uricho nacho na pʼesa zondapata wagavye achiya. Uchihenda vivyo, undakala udzidziikira mbeko mulunguni, hʼaya chidzako udze unituwe.” 23Ela yiye mutʼu ariphosikira gago, washononeka, mana, wakala ni tajiri muno.
24Jeso ariphomona unashononeka, waamba, “Heka ni vikomu muno kwa matajiri kuphenya Ufalumeni kwa Mulungu! 25Kʼaviidimikika ngamia kuchira na tʼundu ya tsʼinzano, na kʼaviidimikika muno yenye tajiri kuphenya Ufalumeni kwa Mulungu.” 26Aratʼu atʼu ariphosikira gago achiuza achiamba, “Bee, ni ani sambi aidimaye kutivywa?” 27Jeso achiudzidza achiamba, “Gotsʼiidimwa ni atʼu, Mulungu unagaidima.”
28Pʼetero naye achimuuza vivi, “Sino vidze? Kwani vivyo hwaricha midzi yehu huchikutuwa!” 29Jeso achiaamba, “Ninamwambira jeri, mutʼu yeyosi yericha mudzi wao, muchewe, nduguze, avyazie hebu anae kwa dzulu ya Ufalume wa Mulungu, 30undaphokera manji muno kuchira gogaricha ukati uu, na chisha akale na uzima uphya wa kare na kare kwenye uo urumwengu udzao.”
Jeso unasema lwa hahu dzulu ya chifoche na kufufukakwe
(Matayo 20:17-19; Mariko 10:32-34)
31Jeso waausa kʼanda aratʼu ahumwae kumi na airi achendaamba, “Sirikisani! Vivi hunakotʼa kwenda Jerusalemu, na kuko chila chitʼu choandikwa ni agomvi a Mulungu dzulu ya mimi Mutʼu yelaa dzulu, chindachimizwa. 32Maana, mimi nindakwendalaviwa kwa atʼu a makabila manjine, na ao andanihenda chinyago, anihendere maneno ga waibu, na anilatsʼire mahe. 33Ao andanipiga vibokʼo, na chisha aniulage, ela tsʼiku ya hahu yichifika, nindafufuka.” 34Phapho ao ahumwa achililikana, ela kʼaamanyire chokala chinagombwa ni Jeso, mana, ujeri wa maneno gago kʼaaumanyire.
Jeso unamuphoza mutʼu yetsʼona
(Matayo 20:29-34; Mariko 10:46-52)
35Jeso ariphokala unatapira mudzi wa Jeriko, mutʼu mumwenga yekala kʼaona, wakala usegere njira bomu unavoya-voya achirao. 36Ariphosikira duu ra atʼu rinachira, wauza vivi, “Kudzegwani asena?” 37Ao atʼu achimwamba, “Ni Jeso muchina Nazareti unachira rero.” 38Ndo yiye achigomba kwa laka ra dzulu achiamba, “Nonera mbazi Jeso mutʼu wa mudzungu wa Daudi!” 39Aratʼu atʼu okala a mbere achimugombera na achimwamba anyamale, ela yiye hata achikaza kugomba kwa laka ra dzulu kwamba, “Nonera mbazi Jeso mutʼu wa mudzungu wa Daudi!” 40Jeso ariphosikira gago waima, achilagiza areherwe kwakwe. Ndo yiye mutʼu yetsʼona ariphofiswa phephi, Jeso achimuuza achimwamba, 41“Unahenza nikuhenderedze?” Yiye mutʼu yetsʼona achimuudzidza achimwamba, “Bwana, ninavoya nipate kona.” 42Jeso achimwamba, “Ona! Kuluphiroro ridzikuphoza.” 43Phapho kare yiye mutʼu yetsʼona achiona, achimutuwa Jeso na kuno unamulika Mulungu. Aratʼu atʼu osi ariphoona gago, achimulika Mulungu nao.
Nke Ahọpụtara Ugbu A:
Luka 18: CHIDUR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye