Johana 2
2
Jeso unahenda daliliye ya kwanza ya kwangalaza
1Tsʼiku ya hahu, kwakala na nyambura mudzi wa Kana kuko jimbo ra Galilaya. Ameye Jeso wakala u phapho, 2na Jeso naye wakala u phapho nyamburani phamwenga na anafunzie, mana, ákala adzambirwa. 3Ndo phapho divai yasira, na Maryamu achimutuwa mwanawe Jeso achendamwamba, “Baba, divai yisira!” 4Jeso achimuudzidza achimwamba, “Mayo, gago tsʼigo gehu, mana, ukati wangu opangirwa ni Mulungu kʼaudzangwe.” 5Ela phapho Maryamu achiaamba ao ahendikazi, “Rorosi rondaambwa ni Jeso, hendani.”
6Phapho phákala phana masimikiro mabomu mahandahu ga mawe, garigo chila simikiro rakala riudzala madaba mane, hebu matsano. Gago gákala gadziikwa phapho kwa kutuwiriza jadi za Chiyahudi za kudzitakasa. 7Ndo Jeso achiaamba ao ahendikazi, “Gaudzazeni madzi gago masimikiro,” na ao achigaudzaza tele-tele. 8Chisha achiaamba, “Hʼaya hekani machache mukamuphirikire yiye mubomu wa nyambura.” 9Madzi gago gákala gagaluka divai. Ndo mubomu wa nyambura ariphotsumbula yiyo divai, kʼayimanyire kokala yilaa. Ela ao ahendikazi oheka gago madzi ákala anamanya. Phapho mubomu wa nyambura achimwiha muloli 10achimwamba, “Kawaida mutʼu ausaye shuhuli waanza kulavya divai mbidzo mwanzo hata atʼu achitosheka, ndo akalavya yiriyo tsʼiyo mbidzo. Ela uwe ninaona udziyiika yiyo divai mbidzo hata vivi!”
11Yiyi ndiyo dalili ya kwanza ya dalili za Jeso za kwangalaza, na wayihenda kuko mudzi wa Kana, jimbo ra Galilaya, na phapho achionyesa ubomuwe, nao anafunzie achimukuluphira.
12 #
Mat 4:13
Gariphochira gago, Jeso wauka phamwenga na ameye, nduguze a chilume na anafunzie, achenda hata Kaparinaumu, ariko ásagala tsʼiku chʼachʼe.
Jeso unarema Hekalu ritsʼihendwe chete
(Matayo 21:12-13; Mariko 11:15-17; Luka 19:45-46)
13 #
Kul 12:1-27
Tsʼikukʼuu ya Ayahudi ya Pʼasaka phokala yi phephi, Jeso wakwenda Jerusalemu, achendaphenya boma ra Hekaluni. 14Mumo, waona atʼu okala anaguzirana ngʼombe, magonzi na ngiya manga, na okala anavunzirana pʼesa asegere mwao mezani. 15Jeso achihwala ngʼongo, achizisuka chikoto, na achialavya konze ya Hekalu phamwenga na magonzi na ngʼombe zao. Achizimwaga zizo pʼesa za okala anavunzirana, na achizipetula-petula zizo meza zao. 16Chisha, aratʼu okala anaguza ngiya manga achiaamba vivi, “Aa auseni phapha. Mutsʼiyihende chete nyumba ya Baba!” 17#Zab 69:9Ndo gariphochira gago, anafunzie achikumbikira gáandikwa Maandikoni ga Mulungu kukala, “Mimi vivyo niyihenzavyo nyumbayo Mulungu, bee vindanirya.”
18Vilongozi a Ayahudi anjine átsukirwa na achimuuza Jeso vivi, “Kwani undahenda dalili yani yondahwonyesa kukala, Mulungu wakuhuma jeri uhende maneno gano?” 19#Mat 26:61; 27:40; Mar 14:58; 15:29Jeso achiaudzidza achiaamba, “Ribitʼeni Hekalu riri, nami nindariunula kwa tsʼiku tʼahu.” 20Phapho ao Ayahudi achimwamba, “Hekalu riri rojengwa myaka mirongo mine na mihandahu, wambadze uwe kukala, undarijenga kwa tsʼiku tʼahu?”
21Ela Jeso yiye wakala unagomba dzulu ya Hekalu ririro ni mwiriwe. 22Ndo ariphokudzafufulwa kulaa kuzimu, ahumwae achikumbikira kukala, wakala udzigagomba gago, na achigakuluphira Maandiko ga Mulungu, na garatʼu maneno gokala Jeso achigagomba.
23Jeso ariphokala u tsʼikukʼuuni ya Pʼasaka kuko Jerusalemu, atʼu anji ámukuluphira ariphoona zizo dalilize za kwangalaza arizozihenda. 24Ela Jeso kʼaatuwire gao, mana, wakala unaamanya atʼu osi vivyo arivyo. 25Yiye wakala kʼatakiya kwambirwa ni mutʼu dzulu ya atʼu, mana, wakala unagamanya lwazu-lwazu maazo gao.
Nke Ahọpụtara Ugbu A:
Johana 2: CHIDUR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye