Yela 6
6
Nɛn waa lɔ wekpeɡa ta chae wesoŋa
Kooro Devid yel
1N Naa Korowii,
bɛ ɡel he baah di
hé pwaah mɛ,
bɛ ɡel he baah di kohona
hé tɛr n deŋne.
2N Naa Korowii, n ɡwɛɡrɔ,
n poori, na n sum.
N hoɡa bini bwa
dɛ wee mɛ, chaah mɛ.
3N bwadabii bwa
dɛ wee mɛ taeh.
N Naa Korowii, saŋ besoo
he ba cha mɛ nɔ?#Jɔn 12:27
4N Naa Korowii, ba lɛɛ mɛ.
Che he nyina
aa wola jaɡa dɔe la ta,
dɛ́ lɛɛ mɛ le seo ta.
5Nɛn sewaa,
waa he waa lii kpa.
Umee dɛɛ kpɛɛre
lalabwɛ ɔ?
6N pɛmɔ dɛ ba koh,
jwaana bɛlbwaa n sinii
ɛɛ yɔɔ mɛ kalaŋ ta,
dɛɛ pweh n kapuri bwa!#Luk 22:45
7Maa na kɛrɛdɛ kpa,
wii dɔma aa ɡela
mɛɛ wi nomanta.
8Wechɔɡ-ɛɛra, hé le n sie!
N Naa Korowii, no n wii.
9O no n suna wii,
wɛɛ sɛh n bee.
10Sihiih ɛɛ kpo n dɔma bwaa
ba bwara yɔr,
ásɛ Korowii ɡel ba berɛ,
dɛ́ den kpɔ baŋaɡola kaa.
Nke Ahọpụtara Ugbu A:
Yela 6: mzw
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.