Lk 3
3
Yohannes Ndu-Bodo ayëdan mbëmbë foe
Mt 3,1-12; Mk 1,1-8; Yoh 1,19-28
1A mbu awom ai tana ya edzoe Kaiser Tiberius#3,1Lukas atil na esye Yesus yatari asu akode si-ndon. Asu te akad bia e bod ya bëngabë bëlë edzoe abog te., Pontius Pilatus adzoege Yudea, Herodes atoa ndzoe ya Galilea, manyaṅ woe Filip adzoege nkòṅ nnam Iturea ai Trakonitis, Lusanius adzoege Abilenes, 2Annas ban Kaifas bëtoa bëfada bënen, ndò ebug Zamba engasò abë Yohannes mòn Zakarias a nkod-nnam. 3Angakë a nkòṅ nnam Yordan osë, abendëge ṅduan avëṅan asu evaa minsëm, 4akyaè anë ntilan a kalara bibug bi profèt Isaias na: Kiṅ e mod abam a nkod-nnam: Koman zen Nti, limëṅan mëzen moe, 5mbimbiṅ osë wayi dzalëban, nkol osë ai nkol tòg wayi dzòdiban, nkòt zen wayi bò tëtëlë, e hom bikondog omana senëban. 6Abog te mod osë ayi yen akode Zamba#3,6Is.40,3-5 . 7Angabë adzoo ai e bod bëngamana bugi na bazu duuban abë nyè na: A mvòṅ nyòò, za alëb mina na mitub olun wazu? 8Wuman bibuma bi avëṅan, të miakèè na miadzo a minnëm mian na: bibëlë esya, ṅnyè anë Abraham. Amu makad mina na Zamba anë dzam bò na bòn bëbyali Abraham a e ngòg nyi. 9Ovon ombëmë ya a ndi ele. Ele esë enë të wum mbëmbë ebuma, atsig dzò, awoa dzò a ndoan. 10Minkunda mingasili nyè na: Bizu hm bò ya? 11Nyè ai bò na: E mod abëlë biwòman bibè, avaag e nyò abëlë ki; e nyò ki abëlë bidi abòòg fë dzam dëda. 12Bënòṅò bë ntòlò bò fë bëngazu duuban abë nyè, bò ai nyè na: A Nti, dze biayean bò? 13Nyè ai bò na: Të miayed mòni alodo abim layean. 14Bëzimbi bëngasili nyè na: Mfa waan ki, bibò ya? Nyè ai bò na: Të miabò bingat; të miasòman a nkòt; tòban mintag ai maan man. 15Mbol bod bëyanga, bëlaṅëdan fë adzo Yohannes a minnëm miaban, na yë ṅnyè anë Kristus ana, 16Yohannes nyè ai bò bësë na: Ma, madu mina a mëndim. E nyò anë ngul alodo ma azu; masëki nyè dzam suli nkòl ngob. E nyòlò te ayi mina du a Mfufub Nsisim ai a ndoan. 17Abëlë esëgëzë a mò, abò nsëṅ woe mfuban ete, akoan ngòn a mëngunda moe, bivula mbiè ayi digi a e ndoan enë të dim. 18Angabë akada bod mbëmbë foe ai abui mam mëfë nala. 19Angakòṅan ai Herodes, ndzoe nnam, etòm Erodiada, nga manyaṅ ai asu bëbe bë mam bësë Herodes angabë abòòg, 20adugan bag e di a yob, ndò angafèd Yohannes a mimbog.
Ṅduan Yesus
Mt 3,13-17; Mk 1,9-11
21Angabò na, eyòṅ bod bësë bëza duuban ha, ndò Yesus nyè fë angaduuban; eyòṅ akogëlan ha, ndò yob wayaaban, 22Mfufub Nsisim angasus nyè a nyòl, atoa ha anë obëṅ, kiṅ esò fë a yob na: Wa onë ndindiṅ mòn wama, wa mafuu nnëm.
E nda-bod ya Yesus angatye ete
Mt 1,1-17
23Eyòṅ Yesus atarigi esye dzie, atoa dzam bò mimbu mëwom mëlè, bëdzo na mòn Yosef#3,23Lukas akë kui ai Nlaṅ abonde nda-bod Yesus abë Adam. Mateus atëbë abë Abraham., man Eli, 24man Mattat, man Levi, man Melki, man Yannai, man Yosef, 25man Mattatias, man Amos, man Nahum, man Esli, man Naggai 26man Maat, man Mattatias, man Semein, man Yosek, man Yoda, 27man Yoanan, man Resa, man Zorobabel, man Salatiel, man Neri, 28man Melki, man Addi, man Kozam, man Elmadam, man Er, 29man Yesus, man Eliezer, man Yorim, man Mattat, man Levi, 30man Sumeon, man Yuda, man Yosef, man Yonam, man Eliakim, 31man Melea, man Menna, man Mattata, man Natam, man David, 32man Yesse, man Yobed, man Boaz, man Sala, man Naason, 33man Aminadab, man Admin, man Arni, man Esrom, man Fares, man Yuda, 34man Yakob, man Isaak, man Abraham, man Tara, man Nakor, 35man Seruk, man Ragao, man Falek, man Eber, man Sala, 36man Kainam, man Arfaksad, man Sem, man Noe, man Lamek, 37man Matusala, man Enok, man Yaret, man Maleleèl, man Kainam, 38man Enos, man Set, man Adam, man Zamba.
Nke Ahọpụtara Ugbu A:
Lk 3: NTE12
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
MKPAMAṄ AMVOE Nouveau Testament en langue Ewondo © Bible Society of Cameroon, 2012.