Enzũko 6
6
1Kandi omugulu abandu batsũka erikanya omo kihugo, kandi ibakabuta abana bʼobũkalĩ, 2abagala ba Nyamuhanga mobalangira abali bʼabandu ko bali babuya, neryo mobayĩmĩrya abakalĩ bosĩ abo basĩma. 3Neryo Omwami Mukulu mwabũga ati, Omũlĩmũ wage siendisyabya akakuba buhaka nʼomundu kera na kera, kusangwa naye nibya ni mubiri: kikaleka ebiro biwe ibyasyabya emyaka erĩgana nʼamakũmĩ abiri. 4NʼAbanefĩlĩ babya omo kihugo oko biro ebyo, kandi enyũma wʼaho, omugulu abagala ba Nyamuhanga bĩmaya oko bali bʼabandu, mobabutirabo abana. Aba babya bandu bʼamaka ba kera, abandu basĩkĩbawa.
5Neryo Omwami Mukulu mwalangira obubi bwʼabandu ibwamabya bungi omo kihugo, nʼakandi obuli bũlengekanĩa bwʼerĩganĩrya lyʼomutima wabo bwabya bubi busa-busa emigulu yosĩ. 6Neryo Omwami Mukulu mwayĩkũbya bomo busana nʼeribumba omundu omo kihugo, mokyamwĩta bũlĩge omo mutima wuwe. 7Neryo Omwami Mukulu mwabũga ati, Ngandĩsyaherya omundu oyo nabumba erĩlũa oko kihugo, omundu, nʼenyama, nʼebindu ebikakululuka, nʼesyonyonyũ syʼomo kyanya. Kusangwa namayĩkũbya bomo busana nʼeribumbabyo. 8Nĩkwa Noa mwabana erĩsĩmwa omo meso wʼOmwami Mukulu.
Noa nʼabana buwe basatu
9Aya wa masako wʼesyondengo sya Noa. Noa abya mundu utunganene, ĩnĩahĩkene omo syondengo siwe. Noa mwabya akalendera haguma na Nyamuhanga. 10Neryo Noa mwabuta bagala basatu, Semũ, Hamũ, na Yafetĩ. 11Neryo ekihugo ikyabiritsanda embere sya Nyamuhanga, nʼekihugo mokyũsũla nʼomwaga. 12Neryo Nyamuhanga mwalangira ekihugo, neryo, lebaya, ikyabiritsanda kusangwa abandu bosĩ ĩbabĩrĩyĩtsandĩrya emibere yabo omo kihugo.
Olulengo lʼobwato Noa abatsa
13Neryo Nyamuhanga mwabũga na Noa ati, Namayisoha eribuga abandu bosĩ; kusangwa ekihugo kyabĩrĩũsũla nʼomwaga busana nabo. Lebaya, ngandĩsyaheryabo haguma nʼekihugo. 14Uyibatsire obwato bʼomuti wʼegofere. Wasyahĩra omo bwato mwʼesyongonde, wasyahakabyabo enĩmba omwisi nʼeyĩhya. 15Ko wasyakola utya eribatsabo. Obuli bʼobwato bwasyabya emetere erĩgana nʼamakũmĩ ani, nʼobugali bwabo emetere amakũmĩ abiri nʼeyĩsatu, nʼobuli bwʼendata emetere ĩkũmĩ nʼeyĩsatu. 16Wasyahĩra erĩdĩrĩsa oko bwato, obuli bwalyo ni nusu yʼemetere erilola endata. Olũyĩ lʼobwato wasyahĩralo omo ndambi yabo; wasyahĩramo manyũmba asatu, eyʼahisi, eyʼakabiri endata nʼeyʼakasatu endata. 17Neryo nage, lebaya, ngaleta erigunga lyʼamagetsi oko kihugo, erĩherya, ebyosĩ ebikahumula ebiri nʼengebe omwisi wabyo eyĩkwa oko bũtũkũ. Obuli kindu kiri omo kihugo kyasyahola. 18Nĩkwa nasyĩmanĩa endagano yage haguma nawe. Nawe wasyingira omo bwato, uwe, nʼabagala bawe, nʼomũkalĩ wawe, nʼabakalĩ bʼabagala bawe. 19Neryo obuli kindu kyʼomubiri ekiriho, ulete bibiri-bibiri ebyʼobuli kihanda omo bwato erĩteyabyo ibikinahumula haguma nawe. Byasyabya ebyʼobulume nʼebyʼobũkalĩ. 20Oko syonyonyũ omuhanda wasyo, nʼoko syonde ngʼomuhanda wasyo, nʼoko buli kindu kikakululuka oko kitaka ngʼomuhanda wakyo, bibiri-bibiri, ebyʼobuli muhanda byasyasa kuwe erĩteyabyo bibyeho. 21Neryo wasyayĩmĩrya emihanda yosĩ yʼakalyo akakalibawa, nʼeriyikumakumirako, byasyabya kalyo busana nawe na busana nasyo. 22Neryo Noa mwakola atya, ngoko Nyamuhanga amuhana.
Nke Ahọpụtara Ugbu A:
Enzũko 6: KB80
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Bible in Kinandi © Bible Society of the Democratic Republic of Congo, and Bible Society of Uganda, 1980.