Abụ Ọma 52
52
Abụ Ọma 52
Abụ Ọma nke dịrị onyeisi abụ. Abụ maskil Devid. Nke o bụrụ mgbe Doeg onye Edọm gara gwa Sọl sị, “Devid gara hụ Ahimelek nʼụlọ ya.”
Ihe na-eche ndị ajọ omume
1Gịnị mere i ji na-anya isi nʼihe ọjọọ, gị nwoke dị ike?
Gịnị mere na ogologo ụbọchị niile, ị na-anya isi,
gị onye Chineke na-eleda anya?
2Ire gị na-atụ atụmatụ ịla nʼiyi;
ọ dị ka agụba dị nkọ,
gị onye na-ebi ndụ aghụghọ.
3Ị hụrụ ihe ọjọọ nʼanya karịa ihe ọma,
ị hụrụ okwu ụgha nʼanya karịa eziokwu. Sela
4O onye ire aghụghọ!
Ị hụrụ okwu ọbụla nke na-emegide mmadụ nʼanya.
5Nʼezie, Chineke ga-akwatu gị ruo mgbe ebighị ebi.
Ọ ga-ejide gị, dọpụta gị site nʼụlọ ikwu gị,#52:5 Ya bụ, ebe obibi ya
ọ ga-ehopukwa gị site nʼala ndị dị ndụ. Sela
6Ndị ezi omume ga-ahụ ya tụkwaa egwu;
ha ga-achị ya ọchị na-asị,
7“Ugbu a, lee nwoke ahụ,
onye jụrụ ime Chineke ebe mgbaba ya.
Ọ tụkwasịrị obi ya na akụnụba ya nke dị ukwuu.
O sitekwara na ibibi ndị ọzọ ghọọ onye dị ike!”
8Ma adị m ka osisi oliv,
nke na-eto na-awasa nʼụlọnsọ ukwu Chineke.
Ana m atụkwasị obi m nʼịhụnanya Chineke,
nke na-adịgide ruo mgbe niile ebighị ebi.
9Aga m eto gị ruo mgbe niile ebighị ebi nʼihi ihe i mere;
aga m eto gị nʼihu ndị gị dị nsọ.
Olileanya m ga-adị nʼime aha gị,
nʼihi na aha gị dị mma.
Nke Ahọpụtara Ugbu A:
Abụ Ọma 52: BIU
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Baịbụlụ Nsọ nʼIgbo Ndị Ugbu a™
Ndị Biblica, Inc. degharịrị ya nʼafọ © 1980, 1988, 2019, 2020
Ọ bụ ndị Biblica, Inc. nyere ikike idenye amaokwu ndị a.
Ikike a dị nye ndị Biblica, Inc. nʼụwa niile.
――――――
Igbo Contemporary Bible™
Copyright © 1980, 1988, 2019, 2020 by Biblica, Inc.
Used with permission. All rights reserved worldwide.