Abụ Ọma 41
41
Abụ Ọma 41
Abụ Ọma nke dịrị onyeisi abụ. Abụ Ọma Devid.
Ekpere onye ọrịa
1Ndị a gọziri agọzi ka ha bụ ndị nwere uche na-eleta ndị ogbenye;
Onyenwe anyị na-azọpụta ha nʼoge nsogbu.
2 Onyenwe anyị ga-echebe ha, debekwa ha ndụ;
ọ ga-eme ka ihe na-agara ha nke ọma nʼala ahụ,
ọ gaghị arara ha nye nʼọchịchọ ndị iro ha.
3 Onyenwe anyị na-elekọta ha mgbe ahụ na-esighị ha ike,
meekwa ka ahụ dị ha mma.
4Ekwuru m sị, “O Onyenwe anyị, meere m ebere;
gwọọ m, nʼihi na emehiela m megide gị.”
5Ndị iro m na-esite nʼiro ha ekwu okwu megide m
na-asị, “Olee mgbe ọ ga-anwụ ka aha ya laa nʼiyi?”
6Mgbe otu nʼime ha bịara ịhụ m,
ọ na-ekwu okwu ụgha, ma obi ya na-achịkọta ihe nkwulu;
mgbe ahụ ọ na-apụ, ga kọsaa ya.
7Ndị niile kpọrọ m asị na-agbarịta izu megide m;
ha na-echekwa echiche ọjọọ banyere m, na-asịrịta onwe ha:
8“Ọrịa ọjọọ adakwasịla ya;
ọ gaghị esite na ihe ndina ya bilie ọtọ ọzọ.”
9Ọ bụladị ezigbo enyi m,
onye m tụkwasịrị obi,
onye mụ na ya na-eso erikọ nri m,
ebiliela imegide m.
10Ma gị, O Onyenwe anyị, meere m ebere,
mee ka ahụ sie m ike ọzọ, ka m nwee ike kwụghachi ha ụgwọ.
11Amaara m na ihe banyere m na-atọ gị ụtọ nʼobi,
nʼihi na i kwebeghị ka ndị iro m nwee mmeri nʼebe m nọ.
12Nʼihi ikwesi ntụkwasị obi m, ị na-akwagide m,
mee ka m nọrọ nʼihu gị ruo mgbe ebighị ebi.
13Otuto dịrị Onyenwe anyị, Chineke nke Izrel,
site nʼebighị ebi ruo ebighị ebi.
Amen na Amen.
Nke Ahọpụtara Ugbu A:
Abụ Ọma 41: BIU
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Baịbụlụ Nsọ nʼIgbo Ndị Ugbu a™
Ndị Biblica, Inc. degharịrị ya nʼafọ © 1980, 1988, 2019, 2020
Ọ bụ ndị Biblica, Inc. nyere ikike idenye amaokwu ndị a.
Ikike a dị nye ndị Biblica, Inc. nʼụwa niile.
――――――
Igbo Contemporary Bible™
Copyright © 1980, 1988, 2019, 2020 by Biblica, Inc.
Used with permission. All rights reserved worldwide.