LUKE 2
2
Jesu Intet
(Mt 1.18–25)
1Augustus Rengkalen changlai Roman Rengram shunga mi rakip mija mazet manhlutna sik ṭongpek inkhat aleinei. 2Hiva ahma inkeipen mija teina hi a-om pha, Syria ram a vaikarôn kha Quirinius leikae. 3Mi rakip ama ama khōpui et a rahming kakhum leikase hei.
4Joseph Galilee ram a Nazareth khōpuia inphut Judea ram a Reng David intetna Bethlehem kajōna leikase. Joseph hi David sōn achang jâra khana khan aleikase kae. 5Ama’n a-ompui sik a aṭong intep puinu Mary leh rahming kakhum le’nṭhōi hei. Amanu achung leikahrik jo, 6Anmani Bethlehema antlung pha, Mary sik a nai neina sik pha katluk jo. 7Khana ahma inkei sapase inkhat amatet jo, pōn vâng akatōma ranthlai sâkna shunga amanje jo, anmani sik hme tlungna inn leirōk mak a kae.
Ngeva leh Kemōng Kakhemhei
8Khava ram a khan hleipuk a kemōng kakhem he’n jân a ankemōng anhngâk a leika-om hei. 9Anhnenga Rōngpu ngeva kha jōng inlâra, Rōngpu lûrna khan anchunga ara-âng manvâr hei. Anmani kaṭihêr jo hei, 10tâk ngeva khan anhnenga ati, “Ṭimak ruh! Mi rakip sik a inpâkna kalentak ṭong kaṭha kha kajōng rôn pek chei. 11Tuningtak hin David khōpuia nankahuk inhringpa Christa Rōngpu kha jōng inte jo. 12Nangni chîkna sik kha hi kae: naite inkhat ranthlai sâkna shunga pōn vâng antakatōma antamanje nanvahmu sik.”
13Khava laitak khan manhret manloa marvân ngeva remi katamtak khava ngeva kha leh jōng inlâr heia, Pathen choi ka-ânna hla hi ansak:
14“Marvân chung inshângpena Pathen kha lûr rasoh,
khana raleia amalung tlaina mihei chunga lung mōngna kha om rasoh!”
15Marvân ngevahei kha marvânting an-inlesō pha, kemōng kakhemhei kha inkhat leh inkhat inbe hei, “Eini Bethlehema vase rih, Rōngpu tamanthei me omchen kasōk hei hi va-en rih.”
16Khava jâra anmani inrangtak a kase heia Mary leh Joseph khana naite ranthlai sâkna shunga pōn vâng a’ntōm kha anvahmu hei. 17Kemōng kakhemhei khan ama anhmu pha, ngeva’n naite chungchânga aleihri hei kha anmanthei jo hei. 18Khanga kemōng kakhemhei ṭonghri kathei rakip in anmandon-hla et jo. 19Mary in khavahei seng kha amalunga avon ṭhak hei khana khahei chunga inritak a mandonna anei hei. 20Ngeva’n ahri pek hei kapōa antahmu leh antathei hei seng jâra khan kemōng kakhemhei khan Pathen manpâkna hla ansak a inle jo hei.
Jesu Rahming Phō
21Kani vekhat sōa, naite kha vuntan sik ahongtluk jo pha, shunga avon mak hma ngeva’n aleihripeksa rahming, Jesu tia anphō joa kae.#Lev 12.3; Lk 1.31
Bek-inna Jesu Antatōksōt
22Moses Dân ṭongpek dungjuia mantheng sōtna nunchen katlo sik Joseph leh Mary sik a pha kha hong katluk jo. Khava jâra anmani’n naite kha Jerusalema Rōngpu hneng tōk sik a anṭhōi jo,#Lev 12.6-8 23Rōngpu dân inzet dungjuia: “Hma inkeipena a’nte pase rakip Rōngpu hneng tōk sik kae.”#Sōk 13.2,12 24Rōngpu dân dungjuia, vaṭhu 2 a-emak leh phervate 2 akatōk sik a anmani leikase hei.
25Khava pha pase inkhat arahming Simeon inti Jerusalema leika-om. Ama Pathen kaṭit mikaṭha, Israelhei hukmanhringna sik ahngâk a aka-om inkhat kae. Rathla Intheng in ale’nṭhōipui 26khana Rōngpu ṭongtep Messiah kha ahmu mak kârseng akathimak sik a aleihri manchên pek. 27Rathla Intheng in hlam akeia, Simeon kha bek-inn shunga leikahlut jo. Khana naite Jesu sik dân tamadu omchen katlo sik a anu leh apa’n Bek-inn shunga anheiṭhōi manhlut pha, 28Simeon in naite kha akut vâng apoma Pathen achoi ka-ân:
29“Rōngpu tûnchu naṭongtep kha namathluk jo,
nasōk malung kamōnga namasōthei sik jo eng.
30Kahmit khet in nahuk manhringna kha kahmu jo,
31nang in mihring rakip hei hmaikunga naleimantluk kha:
32Jât-hlop hei hnenga nahlam malârna sik vâr inkhat,#Is 42.6; 49.6; 52.10
khana nami Israelhei lûrna kapek sik kha hi kae.”
33Naite chungchânga Simeon ṭonghri kha apa leh anu’n anmandon-hla joa kae, 34Simeon in mahâmṭhat apek heia Mary hneng ati, “Hiva naite hi Israel mi katamtak hei insuksetna leh hukmanhringna sik a Pathen takadei kae. Mi katamtak he’n achunga dōina ṭong antahri sik leh anlungria marûk a antamandon hei kaphôngsōt sik a 35Pathena inphut mêrchîkna inkhat akachang sik kae. Khana inrimna khan chemjâm kangeijap kapōa namalung akadôt sik kae.”
36-37Khava hmun a Asher phung hruia Phanuel sanu arahming Anna inti sânkathem kater renghmeinu inkhat leika-om. Ama’n kum 7 rōk puise aneia atûn kum 84 katluk jo. Amanu’n Bek-inn kha dahlon phung hêrmak; sûn leh jân Pathen akamukṭhak, buhngōi leh derna aneiṭhak a kae. 38Khava laitak amanu hong katlunga, Pathen achoi ka-âna, Pathen in Jerusalem akatlensōt sik kahngâk-hei hneng naite chungchâng ṭong kha ahria kae.
Nazareth Khōa An-inle
39Rōngpu dân dungjuia tlohlam kasōk seng kha anmani’n anchai jo pha, Galilee ram a an-inn omna Nazareth khōpuia inle jo hei. 40Naite kha hong kakhanga aratha hong kangara, singna kasip phet a, Pathen mahâmṭhatna khan a’nthōpui ṭhak a kae.
Jerusalem Bek-inna Naipang Jesu
41Akum katai Jesu nu leh pahei kha Rakan Kût pha Jerusalema kase ṭhak hei.#Sōk 12.1-27; Dân 16.1-8 42Jesu kum 12 atluk pha anngaia Rakan Kût a vakase hei. 43Rakan Kût kha a’nchai pha anmani an-innting he’nle jo hei. Tâk-kha naipang Jesu khachu Jerusalema anleidahlon jo. Anu leh apa’n hivahi leimanhret mak hei. 44Ama aloihei kâra le’nvei sik tia anleimandona, sûn nilun khanga kase jo hei, anmani’n an-innkōhei leh anṭhōnhei hneng anjong jo. 45Anmani’n anhmumak jo pha, akajong sik Jerusalema inle jo hei. 46Ni 3 tlûk ning Bek-inn shunga Jehudi ojahei kâra a’ntunga, arangei heia ṭong ader hei kha anvahmu sōt a kae. 47Ama’n kasing tak a ṭong amasôn hei kha akathei rakip in anmandon-hla joa kae. 48Anu leh apa’n anhmu pha, anmandon-hla a anu’n ahnenga, “Kasapa, heisa mo keini hneng hinga natlo? Napa leh ke’n nang malung inrimtak a kantajong che kae,” ati.
49Ama’n amasôn hei, “Heisa mo nangni’n kei nantajong eng? Kei kapa inna ka-om sik hi manhret mak chei mo?” 50Tâk-kha ama’n heimo ahrina ti anmani’n leimanhret mak hei.
51Khava jâra Jesu’n anu leh apa ṭong ajuina hmun Nazareth khōa anmani leh inṭhōia inle jo. 52Khana Jesu kha taksa leh singna kakhanga, Pathen leh mihring lungsetna achen a kae.#1 Sa 2.26; Ṭch 3.4
Nke Ahọpụtara Ugbu A:
LUKE 2: KOMRBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.