Matthew 5
5
Yhevethoko
1Süze Pu thümakro-o ngo südie ta cejüthu-o khota, mo Pu kho ba küyice Pu müthaküyiko Pu ce khori. 2Sidie Pu Pu ta taga sü puko mütha küsü hibi. 3Rüpü celaco kütsakhuko yhevetho, kükrenamoli tüyo küde-e süko sü zo tina. 4Krayo kütiko yhevetho, kükrenamoli süko ulü luyi zoto tina. 5Ulü kümünüko yhevetho, kükrenamori süko cejüo püh uzü thi zoto tina. 6Kümatho dzüh phu küthüri kümüri thiyo kütiko yhevetho, kükrenamoli süko u küchukühi ngozoyi to tina. 7Phikümüzhe küneko yhevetho, kükrenamoli süko phikümüzhe ngo zoyi to tina. 8Thülü kümüsako yhevetho, kükrenamoli süko Jihova ngo zoto tina. 9Vetho küthiko yhevetho, kükrenamoli süko yisü Jihova nune lie ci zoto tina. 10Kümatho dzühvena thilinyi kütako yhevetho, kükrenamoli tüyo küde süko zü zo tina. 11A na mipo neko mushüh, müthimünyi mo kücezü lünyi po püh neko mütsuyo lize neko yhevetho; 12Nenü mo nenü müzüriyite, kükrenamoli tüyo ne zhokhro ve shüh zoto tina, mi süsü bi thazü neko mhuzü sadzüküseko ri mushüh süri zo tina.
Mütsa mo küve
13Neko-e cejüo tsa-o zo; eli mütsa zori pu külhü müdi va lize dipüh püh süo va mülhü layi veta? Süo pu küve pühri di ta die mipo kügü püh zürhüh küdü küva zota to. 14Neko cejü küveo zo, cejüthu yo küba rüna mi pu ngomo tayi lhozo; 15Mi me müto püh mürhakhro mori metobüh bayo dü mayo, sülize celü kübako mütü va nve bayo. 16Süsü bi mipo ne mhatho küve ngo die tüyo küba neko Po Jihova za thikümüleyi küto na ne küve po vekrü zoyite.
Thüzho dzüh kümütha zü
17I thüzhoo mo sadzühküseko zü thi müdi va tozu die vori küti neko lüta hite, I süko thi müdi va mori thi tsüh sü to küvori zo. 18Süze I neko ce potü süto, Tü mo cejü dita kümothe mo mha hiko pühri thitsühyi kümothe, thüzhoo lü tü sü küve mori züco ne pühri mhapühceri di tayilho. 19Süna thüma kühopühri zü khaküsüko dolü künyithoo zori varhü die süh mi mütha yo lize tüyo küdelü pu yisü künyithoo thi tato. Eli, thüma kühopühri süko müdzi tso die süh mi müthayo lize tüyo küdelü pu yisü künyetho-o thito. 20Süti-omoli, I neko ce po süto, neko kümatho po lüsiküseko mo Phariseeko kümatho yezüyi zo kümosa, neko mhapüh dori thi die tüyo küde lü lüküyi di zo.
Lükhu lüda dzüh kümütha
21Thazü popüh kümüta; No mi dokhri sü, mo kühopühri küdokhrimi sheti-olü pu müjo va küto kümüprühlü ba küta neko ri se bate. 22Süri I nekoce potü süto, thüma kühopühri mhacomhala küdilü pu sazüh züra yo pu nümo, mori pulü rüdayo lize pue shetilü pu müjo küva kümüprühlü bate. Mo thüma kühopühri pu sazühzürami yisü ‘raca’ puco mhama pühri di süziyo lize pue mülhiko kühulü pu kümüprühbate; süri thüma kühopühri ‘No kümüloo’ zidie po lize pu Gehenna mezalü pu kümüprüh bate. 23Süna no mhapüh kürüsucelü vo küzüce n sazühzürami n yo künyo küba nsa lüyi lize. 24N mha khapüh kürüsüba-o mhuzülü ma die tala vo n sazühzüra süo züh vetho thiva müra die la vori n rüsu thi mosü. 25No n yo kenyo küzüo zühdie sholü küta lü küzühve mhayite; molize n yo künyo küzüo n tüpüh sheti küzhoo belü sü, mo küzho süo n tüpüh pu mhu küzhoo belü sü die küzho süo po n tüpüh küdücelü süva ri se lhomo. 26I nce potü süto, no vo die presa daprane pühri shu tsova kümothe no sülüno pariyi lho ta zoto.
Rügü rüzü hino küti
27No rügü rüzü sü süzidie popüh küma neko seyi ta zoe; 28Süri I neko ce po süto, thüma kühopühri thünomi püh müho die süpü peyo lize pu lüno süpü züh mhaküsü thiva zo. 29Süsübi die mhaceno nmhü nzaco nthi müsü tayo lize n moyono süo khi kügü vate; kükrenamoli, nmo mütü kügü püh mezalü sü küva ceri nmoyo zatho püh müdi küva veku. 30Mhaceno, nbe nzaco nthi müsü tayo lize, n yono süo da kügü vate; kükrenamoli nmo mütü püh mezalü kügü küva ceri nmoyo zatho püh müdi küva veku.
Thünothüpu kükho küva hino küti
31Süze thüma kühopühri pu cemi khava to lize pukha küva lüsi püh pu prüte, zi küti po püh müzü. 32Süri, I nekoce po süto, thüma kühopühri kürügükürüzü na zo kümo sa pu cemi khava lize pu püh kürügükürüzülü süva zo; mo kühopühri pu khaküva pü yi lize pu ri kürüzü thi tazo.
Rüshüh hino küti
33Süsari, no kücezü po rushühta mori; n Nyepo-oce n zü khaküsüko thitsühyite; zidie thazü küramiko celü popüh kümüta nekori seyita zo. 34Eli, I nekoce po süto, mhapühri po rushüh hi; türi po rüshüh hi; süosü Jihova küdeba zo kütina: 35Mori, cejüri po rushüh hi; kükrenamoli, süosü Jihova phekhra-o zo tina, mori Jerusalem ripo rushüh hi; süosü Küde küzhoo nade zo tina. 36Mori, no npi ripo rushüh hi; kükrenamoli no thüpitha pri pühri thi mütü, mori thi müga ri yilho tina. 37Süri n zü ‘I’ zilize ‘I’ ziyi mo ‘MO’ zilize ‘MO’ ziyi; modie sü zü ta lize süko küsüo celü pari tazo.
Khüpo khüle thihi no küsü
38Mhü püh khü mhü püh, hu püh khü hu püh, zi püh kümüta neko ri se bata zo. 39Eli, I nekoce po süto, thüma küsümi müsüh thihi; süzi kütao mori thüma kühopühri n bro n zaco vü lize, kükreco ri kürüh püh prüte. 40Mo, thüma kühopühri n bola khiyi ta nyi die thüzhoolü künyo sü ta lize n khü ri rhüpüh prü vate. 41Süze thüma kühopühri n kümu thi die n züh maldo püh vo to ta lize, pu züh maldo küna ri vovate. 42Mha khapüh nce shoyo kütimi prüte, mu nce lü thüpo mosü küvori-mi po müthu tala ta hite.
U ngomumi khrüyi moküsü
43No n sühzanumi khrüyi mo n ngomumi phi mütsüyite; süzi püh küma neko seyi tazo; 44Eli, I nekoce po süto, ne ngomumi khrüyi, mo galiphi püh ne rüphi kütimi prüyi, ne phimu yo kütimi na mha küve thiyi, n phimu die n müthimünyiyo kütimi na shoyite. 45Sülize, nekoe tüyo küba neko Poo nuneko thiyi küto na; Kükrenamoli Pün ace mütho püh küsümi rimo küvemi ri vasüyo, mo tü mürü püh küzüthomi ri kümomi ri prü süyo tina. 46Süzomoli, neko mi neko khrüyo kütiko libi khrüyo lize; neko dipüh zhokhro ba? Khazhonu kükhrümi ri süziyo zo mome? 47Mo ne ne sazühzürako libi küluyo lize; ne dipüh thi rükri kuyi ta. Khazhanu kükhrümi ri süziyo zo mo me? 48Süna, tüyo küba neko Po vezhosü küti bi die neko ri vezhosüyite.
Nke Ahọpụtara Ugbu A:
Matthew 5: NAG5BSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Chakhesang Chokri Naga New Testament © Bible Society of India, 2015. Used by permission. All rights reserved worldwide.