Эге дөс 6
6
Кижи төрелгетенниң хай-бачыды
1Кижилер чер кырынга көвүдеп, олардан кыс уруглар төрүттүнүп турган.
2Кижилерниң кыстарының чаражын көргеш, Бурганның оолдары#Иов 1:6; 2:1; Ыд. ыр. 88:7 кымга кандыызы тааржырыл, оларны боттарынга кадайлар кылдыр шилип ап турганнар. 3Ынчан Дээрги-Чаяакчы мынча дээн: «Мээң тынгарган Сүлдем кижиге кезээде турбас; кижи анаа-ла эът-бот-тур#Ыд. ыр. 77:39. Ынчангаш ооң амыдыралының хуусаазы 120 чыл болзун#Ыд. ыр. 89:10». 4Бурганның оолдары кижилерниң кыстарын кадайланып аарга, олардан ажы-төл төрүттүнүп турар апарган үеден бээр, чер кырынга кончуг улуг-шыырак кижилер турган#Сан. 13:34. Олар бурунгу дүп шагның күштүг болгаш алдарлыг кижилери турган чүве-дир.
5Кижилерден үнүп турар каржы-бак чүүлдүң чер кырында хөйүн Дээрги-Чаяакчы көрүп каан. Оларның бүгү бодалдары үргүлчү-ле каржы-бак чүүлче угланган болган#У. ч. 6:18; Мф. 12:34. 6Дээрги-Чаяакчы чер кырынга кижини чаяап каанынга хараадап#1 Хаан. 15:10-11, сеткилиниң ханызындан хомудаан. 7Дээрги-Чаяакчы: «Чер кырында чаяап кааным кижилерниң шуптузун, олар-биле кады мал-маганны, аң-меңни, дээрниң куштарын узуткап каар мен; оларны бодарадып каанымга хараадап тур мен» – дээн. 8А Нойже Дээрги-Чаяакчы ээ көрнүр болган.
Бурганның Нойга айтыышкыны
9Нойнуң болгаш ооң үре-салгалының дугайында чугаа бо-дур.
Ной ол үениң салгалында актыг, чөптүг-шынныг кижи болгаш, Бурганга бүзүрелдиг, дыңнангыр чораан#Иов 1:1. 10Ной Сим, Хаам база Иафет деп үш оолдуг болган. 11А ол үеде чер кыры каржы-бак чоруктар-биле долган дээрзин Бурган эскерип каан чүве-дир. 12Чер кырының бужартаанын, шупту улустуң бузуттуг оруктар-биле чоруп орарын Бурган көрүп каан.
13Ынчангаш Бурган Нойга чугаалаан: «Черде чурттап турар кижилерниң амыдыралын үзүп каар мен, чүге дээрге оларның каржы-бак үүлгедиглери чер кырын долган-дыр. Оларны узуткап каар мен, олар-биле кады – бүгү черни база. 14А сен быжыг кипарис ыяш-биле бажың-хемеден кылып ал. Аңаа аңгы-аңгы кезектерден үзүктеп кылгаш, ишти-даштын чук-биле чаап аар сен. 15Ол бажың-хемениң узуну – үш чүс, дооразы – бежен, а бедии – үжен кыры дурту хемчээлдиг болзун. 16Сери биле хана аразынга кыры дурту хире хос чер турар кылдыр кылып аар сен. Эжиин кыдыынга кылып ал. Бажың-хемеге адаккы, ийиги база үшкү каъттардан кылып ал.
17А Мен черже суг халавын чорудупкаш, дээр адаанда бүгү-ле тынныг чүвени узуткап каар мен. Чырык черде чурттап турар амылыг чүве шуптузу өлүп каар. 18Сээң биле Мээң аравыста дугуржулга чарып тур мен. Сен бажың-хемеге оолдарың, кадайың база кенээттериң-биле кады олуруптар сен. 19Бодуңга бүгү-ле дириг амытаннарны эр-кыс эжеш кылдыр алгылап алыр сен. Олар сээң-биле кады дириг артар ужурлуг. 20Эжеш янзы-бүрү куштар, мал-маган болгаш өске-даа дириг амытаннар дириг артары-биле бажың-хемеже кирзиннер. 21Хөй янзы чемден ап ал – бодуңга болгаш оларга курлавырлап ал».
22Бурган канчаар айытканыл, Ной шуптузун шак-ла ынчаар күүсеткен.
Nke Ahọpụtara Ugbu A:
Эге дөс 6: TUV
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Институт перевода Библии, Москва, 2011