Luka 20
20
Lofelo eoka ya Isosha sha Yesu
1Lise limɔi aekesäk’Inde bato nda ndakɔ ya Mungu, la anangoeläk’iyo Mboli Ilau, kanga ebieti la baekesi ba Bikela la biange loosh’Inde, 2iyo loonga lande mbo— Kambesak’iso, ¿Otokelaka njasɔ-bi la sini isosha? ¿Ale to ndai oyasof’Aɛ isosha-si? 3Inde lomutola lau mbo— Imi imɔ nd’atofel’ino lofelo; kambesaka’mi to; ¿Lilufi lia Yoane moni, liaäkä lia Use, kwa lia bato? 5Iyo angɛnɛ lotafelakana, mbo— Eya mbo toonga mbo liaka elia Use, limɔ Inde koonga lasu mbo— ?Eokao, monito otiaimelak’inde? 6Nde toonga mbo— Elia bato, limɔ batotina batokushel’iso batalɛ, eoka basoimela mbo Yoane aaka Bɔtɔndɔli. 7Iyo lomutoela Yesu mbo batiluwe olo asokwi la liao. 8Yesu loonga lau mbo— La Imi imɔ angokambes’ino isosha esitokela’mi la njasɔ-bi.
Bombila wa Balɔi babe
9Limɔ Inde loakola ndotela bato ebombila-bo. Oto ɔmɔi alɔɔ̈kɔ̈ elanga ya tuma inde lomachela balɔi elanga, limɔ inde lɔkɛ yese yasi okaumwa omao. 10Ayäkä mbile ya eula ya tuma, inde lotoma bɔkɔwa ende balɔi mbo bafaefek’inde tuma twa elanga yande, kongo ko balɔi lokuchak’inde, iyo losaya bɔkɔwa besamba wawa. 11Limɔ Inde lotomel’iyo bɔkɔwa wasi, iyo lokuchak’imɔ ko inde, iyo lokeel’inde sɔni, iyo losay’inde besamba wawa. 12Liasi imɔ, inde lotoma ewa asatɔ, iyo loswel’Inde bafwa, iyo loilya inde lousa loa elanga. 13Limɔ ngɛnɛ wa elanga loonga mbo— Yekelaka nd’iye? Yetomaka wana wami ebosamomu, eluwa batolites’inde. 14Kongo ko ɛnɛ̈kɛ̈ balɔi wɛnɛ wana iyo loongana mbo— Oyo ende bosangesi wa botiko, toolek’inde mbo botiko boyaleke ewasu. 15Ongoma iyo loumbol’inde lousa loa elanga, iyo lool’inde. ¿Ngɛnɛ wa elanga ekeelaka balɔi moni? 16Eyaka nde la atosɛɛsɛlɛsɛ balɔi ana la efaka bato basi elanga yande. Okäkä bato ongoma, iyo loonga mbo— Loyalëke ongoma! 17Nde Yesu lowɛlɛ iyo bonono, Inde mbo— Ongoma to, litina moni lia lioi-li eliatomökö nda Lokasa (loa Mungu) mbo—
Litalɛ lina elisofeka baswi,
Liao lisoswomo nda botö wa ndakɔ?
18Boto oyatokwa likulya nda litalɛ-li, inde kounya; liao likwa likolo lia boto, liao komiak’inde kwa fututi. 19Kanga ebieti la baekesi ba Bikela lokotaka ndoundes’Inde ko nda mbile-ao kongo ko iyo lowänga bato eoka iyo lolüwa mbo Yesu asotombol’iyo nda bombila-bo.
Bosɔmbi wa Kaisala
20Iyo lowɛlɛ Yesu baiso lamao iyo lotoma tɔtɔmbi ebakwekeläkä bato ba momongo ebatoyalaila baoi bande mbo ko l’eoka ya lioi, iyo kowamb’Inde ende oyo w’isosha la likomyi ako Komanda. 21Eba lofel’Inde mbo— Boekesi, tosolüwa mbo otoongaka la mbo otoekekesa ko yao ebiengani chaa la oitokwelakwela bɔmbɔ wa boto nde otoekekesa mboka ya Mungu la wewe; 22¿Losoengana lasu ofaefa Kaisala bɔsɔmbi, kwa angofa? 23Kongo ko Yesu loleembela bɔlɔwäne wau, Inde loonga lau mbo— Tambaka’mi lofalanga. 24¿Lole la bolendela wa ndai la lisɔni lia ndai? Iyo mbo— Eya Kaisala. 25Yesu loonga to lau mbo— Eokao, inolaka to ende Kaisala ko eya Kaisala, inolaka ende Mungu ko eya Mungu. 26Batiakɔkɔlɔk’imɔ ndound’Inde nda lioi lina oso wa bato nde iyo lomwaala limutoli liande, iyo loyalaka tau.
Litɛmwi nda Liwa
27Limɔ bamɔi ba BaSadoke loya end’Inde ebaitoimela litɛmwi nda liwa; iyo lofela Yesu mbo— 28Boekesi, Mɔsɛ nd’atelak’iso lokasa mbo, boloo ewa la wali ani atiote wana, limɔ etungani atosangola lotika loa boloo mbo aoteleke boloo wana. 29Baäkä nde batolome bosambale, bana ba sango ɔmɔi; boloo wau losɔngɔ wali la inde lowa, angwɛnɛ wana, 30limɔ ewa ambale losangola lotika, 31la ewa asatɔ ko ongoma, iyo bosambale ko ongoma nde batiote wana; 32limɔ otomali lowa liili. 33¿Eokao, nda litɛmwi nda liwa, otomali atoyala wali wa ndai, eoka iyo batotina bosambale basɔngɔ̈kɔ̈ ko inde?
34Yesu loonga lau mbo— Bana ba wenda-bo batosɔngɔ la batosɔngɔmɔ, 35kongo ko ebaondu nde ndoiyela wenda ona la litɛmwi nda liwa, iyo ana baitosɔngɔ la baitosɔngɔmɔ; 36la batikɔkɔlɛ imɔ ndowa liasi, eoka bengani bakitomo; bende bana ba Mungu eoka mbo bende bana ba litɛmwi nda liwa.
37Ko Mɔsɛ angɛnɛ nd’aluwesäk’iso nda lokasa loande loaso loa Isasandu mbo ebasowa batotɛmwa nda liwa; omao inde loonga mbo Ngɛnɛ Mungu wa Abalayama, Mungu wa Isaka, Mungu wa Yakobo. 38Ati to Mungu wa ebawi, kangä wa ebale la liwawi, eoka end’Inde batotina bale la liwawi. 39Limɔ bamɔi ba baekesi ba Bikela lomutoel’Inde mbo— Boekesi, oongi nde lioi lilau finɛ, 40eoka batiatendeläkä imɔ ofel’Inde lofelo ango lɔmɔi. 41Limɔ Yesu loonga lau mbo— ¿Monito batoonga mbo Masiya ende wana wa Dawidi? 42eoka Dawidi angɛnɛ nda Lokasa loa Bɛɛlɛ loonga mbo—
Ngɛnɛ loonga la Ngɛnɛ wami mbo—
Yalaka se nda bosamba wami wa olome,
43Kond’atosɛlɛ’mi baiyani baɛ ose ya batindi baɛ kwa esolo. 44Ongoma Dawidi lotang’Inde mbo Ngɛnɛ; ¿Ale to wana wande imɔ la moni? 45Nda batoi ba bato batotina Inde loonga la baeki bande mbo— 46Lambaka batikasa ebalɛmbi okɛndɛkɛndɛ la bisinda bisa la mbo balamolomoko nda baongo la mbo bafomoko kangala ya betoli oso nda bisɔngɔmɛlɔ la bilela ya oso nda bilambɔ. 47Batɔɔsɔkɔ ndakɔ ya ebawelu olome; la batosombolaka basomboli ba yumwa ko la bolimbake wau. Nde belafomoko se la likuchi lioeta.
Nke Ahọpụtara Ugbu A:
Luka 20: NTKE58
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Le Nouveau Testament in Kele (Lokele) © British and Foreign Bible Society, 1958, 2019.