Matayo 9
9
1KOKO aokondel’a wato, ko aofenda lieke, ko aoya nd’onanga bokande mongo. 2Ko bala, baoloyela bonto ondokaki nkangi ea nkataana, aoletama nda ntange; ko aki Yesu oene imeezo ekiyo, aokel’ondokaki nkangi ea nkataana, Bona, salangana, otungwa lima baoyi’obe bakawe. 3Ko bala, bakoci b’enkanda bamo baokela nd’etema’ekiyo, Bont’one aosaola Nzakomba isaola. 4Yesu aolea nkai ikiyo, ko akela, Lokanela baoyi’obe nd’etema’ekinyo lae? 5Nkina nkele, Otungwa lima baoyi’obe bakawe; la nkele, Betswa ko kenda; oleki ikao nd’etefeelo na? 6Lolo nd’ewela wae lea Bona ow’onto ale la mpamba nd’okili wae atungol’anto lima baoyi’obe, (aokela bonto owa nkangi ea nkataana), Betswa, ambola ntange ekawe, ko kenda nd’ilombe ikawe. 7Koko aolemala, aocwa nd’ilombe ikande. 8Aki bitukuluku bi’anto oene, baolok’ooma, ko baomemya Nzakomba okaaki banto mpamba ea eleng’ene.
9Ko aleka Yesu lim’eko, aolena bonto, lina likande Matayo, akokit’ase nd’itenela ifut’iyo mpuci: ko aolokela, Onkim’emi. Aolemala, ko aolokima.
10Aki Yesu okit’ase nda mesa nd’ilombe, joi line likelamaki, bala, batakanyi ba mpuci l’ant’obe bauke baoy’okit’ase l’ende l’akimi’akande. 11Aki Bafalusi oene ngoko, baokela bakimi’akande, Bolaki’okinyo ale toma ende la batakanyi ba mpuci l’ant’obe lae? 12Lolo aki Yesu ookaka, akela, Banto bakema bolo ntabelaka nkanga e’ete; lolonde bandoka nkangi. 13Lolo lokende wae jekele ncina ea baoyi’ane, Emi ndang’isei, afa mbeka; emi nciyaki oeta bandeji, lolonde bant’obe.
14Nkako bakimi ba Yoane baoy’el’ende, bakela, Iso la Bafalusi tokila toma bekila beuke, lolo bakimi’akawe bafokile lae? 15Yesu aolakela, Balongo ba wengi owa waji bakesela la lokeseli nd’ekeke ekit’ase ende l’iyo? Lolo ekeke ifoya, endimana wengi lim’el’iyo, mpanga bakile toma. 16Nk’onto oak’ebolo ea eto e’aeyoko nd’onkoto w’ojwela; eto e’aeyoko endilami nda lilusu ifokanjola bonkoto w’ojwela, ko lilusu jofula. 17Ko ntabilaka basanga b’aeyoko nda bikucu bia kalakala; nyango bikucu bifooza, ko basanga bafutele, ko bikucu biofitana; lolonde bilaka basanga b’aeyoko nda bikucu bi’aeyoko, ko basanga la bikucu baofongama.
18Nko end’osangel’iyo baoyi’ane, bala, chef emo ea sunagoga aoya okusamela, akela, Bona’okami ow’omoto aokita nd’iwa: lolo yaka yafya likata likawe el’ende, ko ifoika. 19Ko Yesu aolemala, aolokima, ende l’akimi’akande. 20Ko bala, bomot’omo oki la nkangi, balongo bakande balekaki années jom l’ife, aoya nd’afeka’akande, ko aofomwa bonkoto’okande: 21akelaki nd’otema’okande, Ayaka mpomwa bonkoto’okande kika, njifoika. 22Lolo Yesu aokengwana, ko aoloena, akela, Bona, salangana, imeezo ekawe eokoikya. Ko bomoto aika lima heure eko. 23Aki Yesu ootswaka nd’ilombe ya chef ea sunagoga aene bandula mponge, ko la bant’auke bayotongole, 24aolakela, Limana; bonol’one ow’omoto atawe; lolo eci nd’ais’ilo. Ko iyo baoloseka kye. 25Aki banto oozama, ende aolotswa, ko aolokita nda likata; ko bonolu aoetswa. 26Koko lokumo ja joi liko jolongwana nd’ese eko euma.
27Aki Yesu oiman’eko, baende bafe bawei’aiso baolokima, baobeleza, bakela, We, bona owa Dawidi, otok’iso isei. 28Aki’nd’otswaka nd’ilombe, bawei’aiso baoy’el’ende; ko Yesu aolauola, Limeza nde wae nkambeya bolemo’one? Iyo baolokela, Onde, Nkolo. 29Nkako aofomwa baiso’akiyo, akela, Joi likelam’el’inyo eleng’el’imeezo ekinyo. 30Ko baiso’akiyo baolifwa. Yesu aolasangela, akela, Bala, talosangelake bont’omoko joi line nye. 31Lolo iyo baolola, ko baocwa okumyaka lokumo lokande nd’ese eko euma.
32Ko andol’iyo, bala, baoloyela bonto owa lokisi oki la demona. 33Aki demona olola, bonto owa lokisi aotefela: ko bitukuluku bi’anto baokamwa, bakela, Kilo, tene ngone nda Yisalaele. 34Lolo Bafalusi baokela, Aozaka bademona la bokulaka owa bademona.
35Koko Yesu aokenda nda bise la benanga beuma nkaana, ayolak’anto nda basunagoga, ko ayongoza bosako w’olotsi wa likulaka, ko ayoiky’anto nkangi ya bilenge biuma la tongoi ta bilenge biuma. 36Aki’nd’ene bitukuluku bi’anto, aolaokel’isei, nd’ewela wete baolen’elo, ko baofalangana ngole mpate ifa la wesanyi. 37Nkako aosangela bakimi’akande, Emukelo eonyenga nsosolo, lolonde basali baf’auke. 38Nd’ewela eko, loonda Nkolo ea emukelo wae asokoza basali nd’emukelo ekande.
Nke Ahọpụtara Ugbu A:
Matayo 9: NTMN58
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Bonkanda Wa Nzakomba W’aeyoko © Aliiance Biblique de la RD Congo, 1958.