Matayo 17
17
Yesu Akindoa Elimo Etongo
1Yana ano masu masamano, Yesu abea Petɛlo, na Yakobo, na Yoane mwanange eYakobo. Akɛ na bu a diko dimono monɛne, oko bo buki pɛ. 2Iyo akindoa elimo etongo a boso bobu. Boso bonde bodaka na bolailai bomodika-busa. Bisenja binde bipua kanga bopɛɛ mɛnɛ. 3Mose na Elia basaboloja a boso bobu, na basola na Yesu. 4Pɛtɛlo abala na Yesu bo, Kumu, modi mojɔ mopele bo so bodae ya. Okapala, kina napike maako masato; dikina diwɛ, ditongo diMose, na ditongo koko diElia. 5Yana abalaka yo boa, eyembi ebolailai ebahua oko bohua. Na kɔpi emana a eyembi bo, Iyo adi Mwana ’mbi ongɛnjɔ; nadi na nde sepi. Mohokeani. 6Aka bo kɔpi emina, bacingami bakwa nase, maso mabu a kpɔtɔ, na baluluma na bɔ. 7Yesu ko adoa, ababanda, na abala na bu bo, Angɔni; t’odaeni oko na bɔ. 8Yana adipoa bo miso, banɛ oko Yesu yo buki pɛ, pɛpɛ okina otongo.
9Yana atitaka bo a mono, Yesu ababekea bo, Yɛni botɔndɔ moto mojɔ mo’mi no nɛ, oko adi Mwana ’Moto pɛ bopeta ngɔ a bogwa. 10Bacingami bamohɔjɔ bo, Basɔni babalaka bo Elia adi bopeta doa mojɔ moye? 11Yesu abasɔmbeja bo, Elia abwani bodoa soti a bobɔngeja ngando jisusu. 12Mbi ko natɔndɔkɔ no bo Elia adoa ehele, bato ko baimombetea, na bakɔ ai yo o apalaka bo. Bâdingoja Mwana ’Moto koko boa. 13Oko boa bacingami bacingea bo abalaka na bu a mojɔ moYoane Mobatisi.
Yesu Aheleja Mwama-Momi
14Amea bo a esika edaka emumu ebato, okina momi adoa ai Yesu, atita na magbunda a boso bonde na abala bo, 15Kumu, ikea mwamomi ombi wa. Apekaka na lisiesie, na adi na jɔɔlɔ enɛnɛ, Akwaka ta mosa na madiba mandɛli-mandɛli. 16Mbi nadoi na nde ai bacingami bawɛ, ibo ko pɛ bobwana bomoheleja a yogo. 17Yesu amosɔmbeja bo, Elulu ye epeliti ejimeli, na edi elaboake. Mbi nadi boyeyoa na nu ekoka? Nadi bohɔnɔ mijɔ minu ekoka? Doani na mwana ai mbi. 18Yesu alemoa na mwembo mobe, na momana ai yo; na mwamomi ahela oko bohela. 19Yana adaka Yesu yo buki, bacingami bande badoa ai yo na bamohɔjɔ bo, Iso bobwaniti bomeja mwembo mobe cina eye? 20Yesu abala na bu bo, Cina bo ejimeli enu ehɛliti. Mbi nabalaka na no bo, Akɔki no da na ejimeli o adi mongua mosinape, ka obwanini bobala na mono mu bo modonge ya a bokɛ a esika etongo, na modi bodonga; na odini bohɔnɔ ngando jisusu. 21Elimo ye emwembo ko edi bomana oko a mojɔ mobo’nga na ekia edia.
Mojɔ moBogwa na Bo’ngɔ BoYesu
22Iyana adalaka bo a Galile, Yesu abala na bu bo, Badi bokaba Mwana ’Moto a mɔmɔ mabato babe. 23Badi bomowa, iyo ko ângɔ a busa bomasato, Ibo badaka na wa enɛnɛ a mojɔ momina.
Yesu Na Tako eTempelo
24Amea bo a Kapalanauma, baputeja batako etempelo badoa ai Pɛtɛlo na bamohɔjɔ bo, Mokoja onu aputaka tako etempelo? 25Iyo ajima, Ee. Yana akwea yo a ndako, Yesu ajeba mojɔ mua modaka a molema monde, na abala bo, Simona, wɛ olɛkɛ bo? Bakumu bangondo ye baputejaka bana babu bɛnɛ tako, isa midoa? 26Pɛtɛlo amosɔmbeja bo, Oko midoa. Yesu abala na nde bo, Isa edi boa, bana bataputa. 27Pe mojɔ, botapalaka bo bobakejae kɛlɛ. Kɛ adumbe bobɔ a madiba, osa ko owoe swi omɔci. Okamohwa a madiba, dipoa monɔkɔ monde na ônɛ ekenge elikonja ena. Tomba du na ôbapa a mojɔ mosu na wɛ.
Nke Ahọpụtara Ugbu A:
Matayo 17: NTNG61
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Alliance Biblique de la R. D. Congo