Ñwaè' Maêk 1
1
1Nsuŋ Mbòŋmboŋ kuu Jisòs Krǎis ce e yu Muu Nyʉ̀ à kɛ̀' embe na. 2A saŋ mbe ŋwà' Àsayà ce ŋwɛ̀ ncep ntuu Nyʉ̀ enɛ̂,
“M be tuu ya ŋwɛ̀ ntuu tɛ e du entombì nè wɛ̀,
dù kupshi nduunjì nè wɛ̀.
3Ŋwɛ̀ mò' ce fuŋ à ntee rìŋ a ce làa enɛ̂,
‘Kupshi nè nduunjì nè Tatâ,
nashi tɛ yi ba kùyɛɛ.’ ”
4Jǒn ŋwɛ̀ bàptir bèe à m nyɛɛ à ntee rìŋ, a ce fè'shi enɛ bèe a kupse, ma' yàp buu bbebep tɛ a baptir wowèe, tɛ Nyʉ̀ bo fòosi wowèe. 5Běe à to' Jùdiyà ba běe à rlà' Jɛ̀rusalɛ̀m bsìp a m dù à ryu' yuu ce e m ce fè'shi. Wowèe a m ce suŋ yàp buu bbebep, e ce bàptir wowèe njep rdip Jodàn. 6Jǒn à m yar bcɛ̀' ce a m ba' nè mnyǒr kàmɛ̂l, a cʉʉ ŋgùp nyàa njep mbùu. Vi byee à ba mŋguu ba blù. 7E m ce fè'shi a ce làa enɛ̂, “Ŋwɛ̀ mò' be vʉ̀ embe mɛ̌ njì ce e tʉr ŋger a caa mɛ̀. Àde' m ghɛɛtè à rbà'shi vi bkʉ̀ blaba' ka'. 8M ce bàptir wèe nè mdip, geewa'a e be bàptir yi wèe ba nè Yʉ' Rara.”
9À m ba à nfè' anà Jisòs à natǐ à rla' Nasarɛ̀t ce à ŋgòŋ Galèlê, à du a yɛ Jǒn, e baptìr ye njep rdip Jodàn. 10Jisòs à ka' kù fʉʉ enjep rò, a yɛ àmbò rbuu li mʉ'tì, a ker yɛ àmbò Yʉ' Rara yi ce sùu mbe yě ndù àmbò bèŋ wa'a. 11Njèndoŋ à laa embe bùu enɛ̂, “A wɛ̀ muu wà ce m kòŋ sê. M ce yu' rbòŋ nè wɛ̀ sê.”
12E ka' kù fʉʉ enjep rò, Yʉ' yi ku lor ye a du àgho à ntee rìŋ. 13E m cu àfo à mnòŋ mŋkyèe, Satàn à ce mòoshi ye. Mnyǎa à rìŋ vi m ba à dì' anà, bcìndap Nyʉ̀ vi ce kè'ni ye.
14À m ba à nfè' ce a m koo Jǒn a fa à shaŋ, Jisòs à du à ŋgǒŋ Galèlê, a ce fè'shi Nsuŋ Mbòŋmboŋ yì Nyʉ̀ nè bèe. 15E m ce làa nè bèe enɛ̂, “Nfè' à ghɛɛ, kʉʉ Nyʉ̀ yi yu àtʉtʉ sè'ni, kupse nè, ma' yè buu bbebep, byemi Nsuŋ Mbòŋmboŋ.”
16Jisòs à ka' ce jɛ̀r àwǎa rdip rgòr ce à ŋgǒŋ Galèlê, a yɛ Saimʉ̀n ba nfʉr yì ce Andrù, ce a m ba ŋgàa ŋkoo nca, àmbò a ce mà' rraa njep rò. 17E laa nè wowèe enɛ̂, “Vʉ̀ nè fa mɛ̌ mbùu, tɛ m gee wèe tɛ wèe ba ŋgǎa ŋkoo nca ce be ba ba bèe.” 18E ka' làa wa'a, wowèe a ku lɛ map mraa cà, a du a yě mbùu. 19E ka' dù mʉcàr, a ker yɛ Jɛ̂ms, ba Jǒn ce a m ba boo Sɛbɛ̀di mbe keŋ, a ce tʉʉshi map mraa. E kɛ' wowèe. 20Wowèe a ma'shì yàp ta ce Sɛbɛ̀di a yi ŋgǎa mfà' wèe mbe keŋ, a du a yě mbùu.
21Wowèe a m dù ba' à rla' Kàpanùm. À ka' ba nyʉ̀ mmbomntaa Nyʉ̀, Jisòs à ku niŋ mbe ndàp rloo, a kɛ' a ce yɛ'ni bèe. 22Bèe anà a m bɛ̀ɛ li ryɛ'nì njobè' li m ba àmbò li ŋgǎa ryɛ'ni mncir ka', li m tʉr ŋger. 23Ŋwɛ̀ mò' à m ba mbe ndap rloo anà ce yʉ' bebep yi m ba njep ye. Yʉ' ana yi m waa, a laa enɛ̂, 24“Habai, Jisòs ce à rla' Nasarɛ̀t, yuu ce à ce ròo ese wèr yu ba kɛ? Wɛ̀ vʉ̀ à ryʉshi wèr a? M rìŋ njɛ̀ɛ ŋwɛ̀ ce à yu. À yu ŋwɛ̌ nrara ce e lò ese Nyʉ̀.” 25Jisòs à lapnì yʉ' anà enɛ̂, “Cu nyaŋ! Fʉʉ enjep ye!” 26Yʉ' bebep ca yi m nyɛr ŋwɛ̀ anà a ma' à nshè, a waa, a fʉʉ enjep ye. 27Bèe anà a bɛɛŋgèr, a ce bipshi a wǎp mʉ enɛ̂, “Yu ba njɛ̀ɛ kɛ ce yi koni na?” Wowèe a m làa enɛ̂, “Cena yu ryɛ'nì ce rfi ce li tʉr ŋger mo'. E ce làa nè byʉ' bbebep vi ce yu'ni nè ye.” 28Yi ka' ba wa'a, bèe a yu' yì nsuŋ à bdì' bsìp à ŋgǒŋ Galèlê.
29Jisòs wèe a m fʉʉ embe Ndàp Nyʉ̀, a ka' kù fʉʉ wa'a, e lor Jɛms ba Jǒn a wowèe a du mbe ndàp mbe Saimʉ̀n ba Andrù. 30Malu yì Saimʉ̀n à noŋ mbe bkuu, tu yi ce luu ye. A ka' kù niŋ wa'a, wowèe a suŋ Jisòs. 31E du a koo ye à bò, a naa mbekì, mbɛp cà à bornì, e kɛ' a ce fɛ̀r byee nè wowèe.
32À ka' ba à mbùuŋkùr anà, bèe mo' a vʉ nè ŋgàa byaŋ ba bèe ce byʉ' mnyʉ̌mkà' vi m niŋ njep wowèe, a vʉ àgho à ryɛ Jisòs. 33Bèe wɛɛwɛ efa là' anà a vʉ a tɛɛ njep ncʉ̀ʉndʉ̀'. 34E gee bèe magòr ce a m ce yaŋ byaŋ njɛ̀ɛ jɛɛ jɛ̀ɛ jɛɛ, a ke'sè, a ker fʉshi byʉ' mnyʉ̌mkà' enjep bèe magòr. E m shè enɛ byʉ' anà vi fa làa yuu ka' njobè' vi m rìŋ njɛ̀ɛ ŋwɛ̀ ce e yu.
35À ka' ba à mʉ ŋgàptʉ' sê, Jisòs à nyɛɛ a du à dì' mo' ce bèe a m ba ka', a gee rloo àfo. 36Saimʉ̀n ba bèe ce a wowèe a m ba, a fʉʉ a ce ròo ye. 37A ka' yɛ ye, a laa nè ye enɛ̂, “Ŋwɛ̀ wɛɛwɛ ce ròo wɛ̀.” 38E laa nè wowèe enɛ̂, “Sèe du à mla' mo' tɛ m du fè'shi àfo foŋ. A yuu ce mɛ̀ m vʉ̀ àtu mo.” 39Awɛ Jisòs à ce jɛ̀shi à ŋgǒŋ Galèlê, a ce fè'shi à mndap rloo, a ce fʉshi byʉ' mnyʉ̌mkà' enjep bèe.
40Ŋwɛ̀ msàasì mò' à m vʉ̀ a yɛ Jisòs, a gʉ'shi njep yě tìi, a loo ye, a laa enɛ̂, “Wɛ̀ ka' kôŋ, à gee m ke'sè, ba nrara.” 41Jisòs à koosìmnse nè ye, a naa bo a joo ye àgho, a laa enɛ̂, “M kòŋ wa'a. Kè'se, ba nrara.” 42E ka' làa wa'a, msàasì mi ku lo ye efa nyòr, e ba nrara. 43E ka' ce dù, Jisòs a ciisì nè ye enɛ̂, 44“Yɛ̂, fa suŋ ŋwɛ̀ ka'. Dù duŋshi yò nyor nè ŋwɛ̀ taŋshi taŋshì embe Ndàp Nyʉ̀, gee taŋshì ce Musìs à m làa enɛ ŋwɛ̀ yaŋ msàasì gee tɛ bèe a bo rìŋ enɛ ŋwɛ̀ anà à kè'se nà.” 45Geewa'a ŋwɛ̀ ca à dû, a kɛ' a ce suŋ yuu anà nè bèe à bdì' wɛɛwɛ. Nsuŋ ca à m gèe Jisòs à ker ce fʉʉ à mʉ̀ bèe ka'. E m ce cu à rìŋ, bèe a ce vʉ̌ à bdì' wɛɛwɛ, a ce yɛ ye àfo.
Nke Ahọpụtara Ugbu A:
Ñwaè' Maêk 1: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.