San Marcos 9
9
1Mag iekhamamua ĩchab, —Mʉ cha iekha chirʉm iekhau ãaur khʉʉn cha mʉ iek ũr nʉm khʉʉn chan mʉchta nem jua theeg thumaam khʉʉn Porkha beeju edamjo aadem oobam aigjã meebajugui a jaaumajim anaabá.
Jesús Moisés dʉi Elíapa iyʉʉ narr
(Mt. 17:1-13; Lc. 9:28-36)
2Mag ich khapeen ãaur khʉʉnag amach daúa ich oopiju jaautarr khur seis días nʉm ee Jesús durrsĩ pom sim gaai majim aajem. Mag ich mam dʉi õor thãrjuppai phe arrjim aajem. Makhʉʉn Pedro ajim aajem Santiago dʉi, maimua Juan. Mag wetwi ya durrsĩ gaai nʉmta amau oo nʉm dakhĩraa Jesús khĩir chaaupabaadejim anaabá. 3Magbaademua sĩi i mor gayam khajũa jũa sĩerrpa bʉ̃ʉnaa phuumjo aadejim anʉm ich bäpgau. Khajũa atcha bäphä magjo chan õrau bʉ̃ʉrjã jã auba aajem aajem. 4Magbaadem ee oowai warrgarm jooin Moisés dʉi Elíata iyʉʉ dʉnʉnʉihdʉ naajim aajem Jesús dʉi. 5Amachdeu mag oobaawaita Pedro iek irua Jesuug mag chirajim anʉm:
—Maestro, nem ajaug chi agamjo maar mʉig nʉm. Marau pãar ithee rãichdidam thãrjup eu deeju: ãb pʉ ithee, ãb Elías ithee, maimua ãb Moisés ithee.
6Mamʉ Pedroou Jesuug mag di eu deeju a iekhatarran, maan amach chi khapeenta jãphierr nʉm iekhau pod iekhajujã khaugba aawaita irua mag iekhajim anaabá. 7Mag am jãphierr nʉm ee, degolp sĩi edjã eemua jʉʉnthumie baug beewi, am joodʉ athaicheewai, sĩi ag ee ierr paaukhabaadejim anʉm. Magbarm ee woun iekjo, “Chamʉʉta mʉ Iewaa mʉchdeu jãsehne wai chitʉmʉugui” ajim anʉm, “õor peerdʉ aumkhĩir mʉchdeucha jʉr autarr. Irua nem jaau simta ipierraa abat” ajim anʉm. 8Maimua deeu chi jʉʉnthumie chukhu aadem ee, amau oowai i dʉi mag õor numí narr ooba, Jesús ich appaita oo dʉnʉm oojierram anaabá.
9Mag durrsĩe naawia jerag wedurumua Jesuu mag ich khapeen thãrjup ich dʉi arrtarr khʉʉnag amachdeu ootarrjã deeum khʉʉnag jaaupiba, sĩi amach thãar eepaita khaphʉ apijim aajem, ich chi Emkhooi Iewaa meewia deeu iiu phiidʉ nʉm ora.
10Magtarr aawai chadcha chi khapeenau bʉ̃ʉrjã õrag jaauba aajeejim aajem. Pari mag nʉmʉn wir aig amach eepain iyʉʉ nʉmua, —¿Ma khani maachig jaau sĩejimta mag i meewia deeu i iiu phiidʉju a sĩejĩma? aajeejim anaabá amach appai.
11Mag amach appai mamag nʉʉ awi alphin ichigcha, —¿Khan jãgwia Ẽwandam iek jawaag chi machnaanau jaauwai mag Ẽwandamau Cristo pʉiju na Elíata beeju aajẽ? a jeeujierram anaabá.
12-13Magbaawaita Jesuu amag, —Chadma, chi machnaanau jaaujemjo, Elíata nacha beema ajim anʉm. Pari mag i beeju jaautarran, mag Ẽwandamau pʉiju aajerr õrag nʉpi jaaumkhĩirta beeju jaaujim. Pari Elían ya udthurjim. Mamʉ mag i udthuurwai, Ẽwandam iek phã sim gaai jaau simjo, õrau i dʉi amachdeu ampierr awi warag i thõopʉijierram. Magtarr aawai ¿pãrau khĩirjuawai õrau mʉ dʉijã i dʉi atarrjo abaju khai ajim aajem, ich jãg Ẽwandam iek phã sĩsidʉm gaai mʉch chi Emkhooi Iewaa igwia wauju a jaau simjo?
Jesús khapeenau chaai mor eem mepeer pod jẽupʉiba arr
(Mt. 17:14-21; Lc. 9:37-43)
14Mag iyʉʉ wedurumua tagam ich khapeen nueve narr aig pachenaa oowai, õor pom warpham magwe phʉʉr thʉnʉm jãrrta Ẽwandam i jawaag chi machnaan garmua am dʉi ijẽjẽbkham oochejim aajem. 15Mag õor pom thʉnarr khʉʉnau amach dakhĩir Jesús barbaichem oophobaadee onegau i khĩirphee pochag phobaadewi i dʉi saludaa nʉmua, “Ʉuchata jãg pʉ barbaichem” ajierram anʉm. 16Mag chi machnaan garmua ich khapeen dʉi ijẽjẽbkham oobaicheewai, —¿Pãar khan iekta ig nʉma? ajim anʉm amag.
17Magbaa mag õor pos thʉnʉm eemua ãbmua magjim anʉm:
—Maestro, mua mʉch iewaa aibeejimgui ajim anʉm, i mor eem beneu pod iekhapiba sĩi ichʉp wai sĩewai, pʉrʉg warre jẽu werbamkhĩir. 18Mʉg khitʉm barbaadeewain sĩi jẽkhʉt bäjä aimaajem. Magbaademua sĩi isaphun bau aadem dʉi thet khierrpa kũkũerr khabaademua phithierrii aadeejemgui ajim anʉm. Mag bar nʉmua warag nem dau aauga pabaademgui ajim anʉm. Mua pʉ khapeenag jaaujim, amag mʉch chaai mor eem ben warre jẽupʉimkhĩir. Pari ni ãbmuajã podbajim a jaaumajim aajem.
19Magbaawai Jesuu ich khapeenagta magjim anaabá:
—Pãrau chan jãg chaai Ẽwandamau monaaupʉijujã khĩirjubata nʉm. Pãrau jãg Ẽwandam jua theeg simjã khĩirjubamjo nʉm, ¿ich jãgta sĩi mua ãwat chitaju aai chirʉ́ pãrau oowai? ajim anʉm. ¿Khan atchata pãrau mʉ pãach dʉi chitapim ig nʉma ajim anʉm, ajapcha ʉkhaag? Magnaa, Mag chaai mʉ aig aipidut ajim anaabá amag.
20Magbaawai chadcha chi chaai i aig aibeejierram aajem. Mag aipierrwai, chi chaai mor ee mag chi mepeer simua Jesús khĩir eerpa athaawai, sĩi eeupemjo ich beneu barbaademua warre jẽkhʉt bäjä aimajim anʉm. Mag bäjä aimaa sĩi parhooba bʉ thʉthʉg khabaadem dʉi ipegchoo isaphun bau aadejim anaabá. 21Ich dakhĩir magbaadeewaita Jesuu chi ayag, —¿Pʉ chaai jãg beneu barbaaderr ya dʉrrʉʉ sĩwi? ajim anʉm.
Magbaa chi ayau, —Jãan ich bʉ̃rʉʉ khitʉwe ich jãg baarjemgui ajim anʉm. 22Khar chará jãg barbaademua chi meperau õtdau eejã barpʉinaa do eejã barpäaijemgui ajim anʉm, i thõopäaig. Maagjeewaita mua pʉrʉg chaigpa chirʉmgui ajim anʉm. Pua ʉu i monaaupʉiju aai chirʉm khai, maar dau aug khaugwi mʉ chaai monaaubapʉi ajim anʉm irig.
23Magbaawai Jesuu irig, —¿Jãgwi mag pua mʉrʉg “ʉu i monaaupʉiju aai chirʉm khai” a sĩwi? ajim anʉm. Ar Ẽwandam gaaita ʉkha nʉm khʉʉn ithee chan bʉ̃ʉrjã phithurm nem chukhum. Maagwai puajã chadcha thãraucha ʉkhamʉn, pʉ chaaijã monaaubajup ajim anʉm irig.
24Magbaa chi ayau, —Muan chadcha ʉkha chirʉmgui ajim anʉm. Mamʉ pua mʉch chaai monaauju khĩirjugta ʉ̃rcha mʉrʉg khĩirjupibá ajim anʉm, warag Ẽwandamag ʉkhaag.
25Mag nʉm ee Jesuu oowai ich aig õor pom biirdʉdʉkham oobaawai chi chaai mor ee mepeer simʉgta meeurrau aadewi, —Mepeer, pʉchdeuta mʉg chaai jãg kach khĩsunaa meu meraa wai simgui ajim anʉm. Magnaa, Mʉ iekhau jopai chaai mor eemua oberbaad, maimua tag i mor ee dubaag khabamgui ajim anʉm.
26Mag Jesuu ichig meeurrau aadeewai chi mepeer wiiu a baubaadejim anaabá. Mag baubaademua chi chaai deeu ich beneu barbaadewi, jẽkhʉt bäjä aimawia, warre chi meemjo bʉ̃ʉrjã mimig chukhu apʉijim anʉm. Mag aig õor pom pos thʉnarr khʉʉnau amach dakhĩir mag chi thõmjo aadem oobaawai, “Chadcha ya meebaadebahab” anaajim anaabá. 27Mamʉ amau mag meebaadem anʉm ee, Jesuu chi chaai jua gaai pʉrnaa ʉ̃gthaag phiriu athajim anʉm. Mag ich jua gaai pʉrnaa phiriu athaawai dʉi phiidʉ warag bʉjãau dʉnʉisijim anaabá. 28Mag chaai mor eem mepeer jʉrpʉiwi ereubaadeeu, ya amach ap deg paaukhabaimaawai, iyʉʉ nʉmua Jesuug, —¿Khan jãgwi jãg chaai mor ee ben khaigbam wai sĩerr marau pod obeerpi aubajĩ? a jeeujierram anʉm chi khapeenau.
29Mag ichig jeeubaawaita, —Mua pãrag jaaukhimgui ajim anʉm: Jãg mepeer khĩir õor mor eemua jʉrpäaigan, jãan sĩi thachjã khoba ãba Ẽwandamagpai jeeu nʉʉ aawaita jʉrpäaijemgui ajim anʉm.
Pʉaba Jesuu chikhamnau ich thõoju jaautarr
(Mt. 17:22-23; Lc. 9:43-45)
30-31Maig naawia ereu phobaadewia Galilea durr dichjim aajem. Mamʉ Jesuu mag õrau ich pʉr auwi ich thõoju anʉmta ich khapeenag jaau sĩerr aawai amach nʉmjã õrag khaugpimapha sĩejim aajem. Mag jaaumamua amag maagjeejim anʉm:
—Mʉch chi Emkhooi Iewaan õrau chi thierrnaanag pʉr deeju. Mag pʉr deebaawai amau mʉ thõopʉiju. Mamʉ mag amau mʉ thõojup mamʉ, ag khur khãai thãrjup nʉm ee deeu iiu phiidʉjugui a jaaumajim aajem.
32Mamʉ amachig mag jaaumamjã pod i iekha sim khaugba aajeejim anaabá. Mag amachdeu pod khaugba aawai jewaag ẽkhaajeejim anʉm; mamʉ inagau awi ich mag jeeubajierram aajem.
Chijãata ʉ̃rʉʉcha aju aai sĩ a jaautarr
(Mt. 18:1-5; Lc. 9:46-48)
33Mag iyʉʉ wenʉrrʉmua phobor Capernaum anʉm ee barimajim aajem. Mag barwia ya deg paaukhabaimaawai ichdeu amag, —Maach khʉd ee daaig weduraawai pãar ¿khan ata iyʉʉ weduraa ajĩ? ajim anʉm.
34Mamʉ amachig mag jeeubaawai, chi khapeenau ni ãbmuajã i iek ʉkhaba, sĩi khĩuu nʉisijim anʉm, khʉd ee wedurumua chijãata amach eepai thumaam khʉʉn khãai ʉ̃rʉʉcha sĩ a chikham ipeer ahaug wedurarr khap. 35Mag ich iek ʉkhaba abaawai am na jẽkhʉt jupwi dʉi amach thum ich bigaau thʉ̃rkha auwia amag magjim aajem:
—Ãbmua khĩirjuawai ichta tagam khʉʉn khãaijã ʉ̃rpai am khõsi sim khai, magan ichta warag thumaam khʉʉn khãaijã serbiibachanaa sĩi ich khapeen chogkhaju aai simgui ajim anʉm.
36Magnaa chaaidam thʉ̃r auwia, am dakhĩir chi chaaidam jua ee jiir auwi amag magjim anʉm:
37—Mʉg chaai agtha ich juau paba aawai serbiiba khitʉmjo õor thʉnʉm thum mua khõsi chitʉm. Pãrau mʉ denjo mʉg khitheem ãb khãijã jãsenkhawia pãach di aig aumʉn magan pãrau mʉchchata khĩir jãsenkhabarmjo abarm ajim anʉm. Mag pãrau ʉdʉraa pãach aig mʉ baarpi nʉm aiguin magan pãrau mʉ Aaijã khõsi nʉmgui ajim anʉm, ichdeuta mʉ pʉitarr aawai.
Maach ichaaur khaba simʉn maach igar sĩewaiu a jaautarr
(Mt. 10:42; Lc. 9:49-50)
38Mag ũrwia Juanau, —Maestro ajim anʉm. Marau woun ãb oojim, mag wounau iekhamamua pʉ thʉ̃r thʉ̃rnaa õor mor eem mepeenag obeerpi jaaubaawai chadcha obeerpʉi maajeejim. Mamʉ maarjo pʉ dʉi nʉrraba aajemuata mag sĩewai marau irig tag õor mor eem mepeen jʉrkhʉʉipiba jaaujimgui ajim anʉm.
39Magbaa Jesuu amag, —¿Khanthee pãrau irig magjierrá ajim anʉm, ideu õor jua pʉrpiba? Mag wounau mʉ thʉ̃r gaaita mag õor monaau nʉrrʉm khai, magan irua wajaphata nem wau sim khabahab ajim anʉm, mʉ eugar khaigba jaauba. 40Maadeu nem wau nʉm oo simjã maach ichaaurjã khaba warag maach juapierr oo sim wounan, magan maan maach dʉi sĩewaiu ajim anʉm. 41Maimua ich agjo ãbmua khãijã pãar Cristo khapeen aawai pãrag nemdam bʉ̃rʉʉm khãijã deebarm wounan, Ẽwandamau agjo irig nem wajapham deeb khaba deeju a chirʉmgui ajim anʉm.
Nem khaigbam wau nʉmuan maach pekau ee burrpiejem
(Mt. 18:6-9; Lc. 17:1-2)
42’Pari magba ãbmua khãijã mʉ chaai mʉg mʉ iek ʉkha kherʉmta pekau ee burrpimʉn, Ẽwandam dʉita iekkhõr pooma sĩsiju. Mamʉ mag Ẽwandam dʉita iekkhõr paarpaju khãai, ichdeupai ich o gaai mokpor pomkham jʉ̃naa phũas ee baudʉkhiin ʉucha ajugui ajim anʉm. 43Maimua agjo pʉch juaupaita pʉ pekau waupi sim khai, ag garm jua warag warre thʉapbapʉi. Ideu pʉ jua bisi Ẽwandam aar barwiajã ʉu simgui ajim anʉm, pʉch jua numwe monakha khĩmie durr õtdau uu thõojã khaugba wejom ee maju arr khãai. [ 44Mam chan mag õtdau uu thʉnʉmjã bʉ̃ʉrjã thõba ni ag eem odomiejã khechaa khaugba sĩerrʉmgui ajim anʉm.] 45Wa pʉ bʉʉu khãijã agjo pʉ pekau ee burrpi sim khai, magan mag bʉjã warag thʉapbapʉi. Bʉ numwe monakha khĩmie durr maju arr khãai, Ẽwandam aar bʉ bisi oberwiajã ʉucha simgui ajim anʉm. [ 46Mam chan mag õtdau uu thʉnʉmjã thõba ni ag eem odomiejã khechba ich mag sĩerrʉmgui ajim anʉm.] 47Wa pʉ daúa khãijã pʉ pekau waupi sim khai, magan mag dau warag jẽubapʉi. Pʉch dau numwe monakha khĩmie durr Ẽwandamag pʉch barpʉipiju khãai, dau bese khãijã pʉʉta Ẽwandam denkha simʉn ʉucha simgui ajim anʉm. 48Mam khĩmie durr chan odomiejã khechaa khaugba ich mag domkha thʉnʉm dʉi mag õtdau uu thʉnʉmjã thõba ich mag sĩerrʉmgui ajim anʉm. Maguata muan pãragan, pekau waumaaugau dau chukhumjo oobamjonaa magʉm nem khaigbam wawaagjã jua chukhumjo abat a chirʉmgui ajim anʉm, bʉ̃ʉrjã wauba.
49’Mua pãrag mag chirʉmʉn, chikhamnau pãach thum pãar wajap dau aug waupiju aawaita mag chirʉmgui ajim anʉm. Mamʉ Ẽwandamau ʉdʉraa mag pãar dau aug waupi nʉmʉn, sĩi pãach ich dʉi chadcha ubʉ wenʉrrʉm khai a khap aagta magpi sim. [Pãar dʉi mag sim aig, nemek mod ãrm ugua pho sĩiujemjo, mag phithur wenʉrrʉm gaaimua warag pãarjã agjo ich dʉi ajapha wenʉrramkhĩirta pãar dʉi mag simgui ajim anʉm.] 50Thakharan chadcha nem wajaphamʉu. Mamʉ mag sim nakha aadekhiin, ¿khaíu magʉm thakhaar igju khai? ajim anʉm. Jãg thakharauta nem thum sĩpha apiejemjo abat, pãach khapeen dʉi nem wajapha wau nʉmua agdaujo thumaa khõinaa wenʉrraag a jaaumajim aajem.
Nke Ahọpụtara Ugbu A:
San Marcos 9: noaA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011, Wycliffe Bible Translators, Inc. All rights reserved.