San Marcos 2
2
Jesuu woun ãb khapá jʉser khitʉm monaautarr
(Mt. 9:1-8; Lc. 5:17-26)
1Jesuu mag woun monaaupʉitarr khur khãai khapancha khaba nʉm ee, phobor Capernaum anʉmʉg majim aajem. Mag mawia barbaimaawai sĩi phobor eem khʉʉnau i barbaimam khakhapdo joisijim anaabá. 2Mag amachdeu i deg pabaichem khaug athaawai aig bee thʉnʉmua õor pom pos sĩi puertdi igaaum magwe phẽu thʉnʉisijim anʉm. Jesuu mag pos thʉnʉm khʉʉnag Ẽwandam iek jaau sĩejim aajem. 3Mag nʉm ee õor jayapam khʉʉnau woun ãb khapá jʉser khitʉmta pa bʉʉrkham gaai jiir aibeejierram aajem. 4Mag aibeewi Jesús sim aar mag woun wai dubaag ẽkha naajim aajem; pari mag puertdi igaau õor phẽu thʉnʉm khurau pod ierrag wai dubju khaba aawai, ʉ̃gthaa diheu ʉ̃r waaidʉtkhawia, chi Jesús sim ʉ̃rʉʉ diheu magar auwi, chi pa bʉʉrkham gaai jʉ̃gadau jʉ̃khanaa mag chi khapá jʉser khitʉm eeg jiir burrpʉijierram anaabá, Jesús sim aigcha, amach aaunaan monaaupʉiju khaphʉ narr aawai. 5Jesuu amau mag khĩirju nʉmjã khaphʉ sĩerr aawai chi khapá jʉser khitʉmʉgta, —Pʉ pekau thum ya mua chugpaabapʉimgui ajim anʉm.
6Mamʉ mag iekhabarm ũrwia Ẽwandam iek jawaag ithee chi machnaan aig narr khʉʉnau amach wir aigpai, 7“¿Ma chijãg wounta Ẽwandam dau na mag khaigba i jũur iekha sĩma? Ãba Ẽwandamau khabam chan maach pekau chugpaa auba aajem” ajierram anʉm. 8Mamʉ amau amach odegpai mag khĩirju nʉmjã Jesuu khaphʉ sĩerr aawai amag, —¿Pãrau khanthee pãach odeg jãg khaigbata khĩirju nʉma? ajim anaabá. 9¿Wa mag pekau chugpaabarmjã dau daau ooba naawai pãrau khĩirjuawai chadcha phithurg chukhu thumaam khʉʉnau mag iekhaju aai nʉm a nʉwa? Mamʉ mua irig, “Phiidʉwia pʉch pa bʉʉrkham ãbamʉg phe auwia petá” akhiin, õrau amach daúacha ooju, i monaau sĩsi wa monaauba khãijã ich mag sĩsim. Magua pãrau mʉ denjo chan cha mua jawaagpamjo abajugui ajim anʉm. 10Mamʉ mʉch chi Emkhooi Iewaa Ẽwandamau ich juapá deetarrau chadcha mʉg jẽb gaai õor pekaujã chugpaaju aai chirʉm pãrag khap amkhĩir, mua pãrag oopikhimgui ajim anʉm.
11Magnaa chi khapá jʉser khitʉmʉgta, —Phiidʉwia, pʉch put ãbamʉg juurwia, pʉch diig petá ajim anʉm.
12Magbaawai ag bʉrre chadcha phiidʉwia, ich wai beetarr pa bʉʉrkham dʉi ich putpa ãbamʉg phe auwia, thumaam khʉʉn dakhĩir nem moná dawag oberbaadejim anaabá. Mag oberbaadem oowi aig narr khʉʉn dauderraa nʉisijim anʉm. Mag nʉm iekhau Ẽwandam tho iekhamamua, “Ẽwandam, ag na marau bʉ̃ʉrjã mʉg nem ooba aajemta ĩsta chadcha pua marag pʉch jua theeg oopibarm. Pʉchta chadcha chi jua thierriu Ẽwandam” anaajim aajem, irig jeeumamua.
Jesuu Leví ich dʉi eeurrtarr
(Mt. 9:9; Lc. 5:27-28)
13Jesuu Capernaum phobor ee mag woun monaautarr khur petajim aajem deeu Galilea thʉrrdoog. Mag mawia i barbaimaawai, ich aig jũrram khʉʉn phẽphẽeukhamua õor pos aadeewai, amag Ẽwandam iek jaaubaadejim aajem. 14Mag jaau sĩewi petaau jooi ãb Alfeo anʉm iewaa Leví anʉmta ooimajim anʉm. Mag Leví Romaam gobierno den debpaar jeeujem arr aawai õrau ichig debpaar phagaan beejem ag mes bigaau päar sĩejim anʉm. Mag oobaimaawaita Jesuu irig, “Mʉ dʉi marrau” abaawai, phiidʉwi, chadcha i dʉi petajim anaabá, i kha ogdʉba nʉrraag.
¿Khan jãgwia Jesús pekaupan dʉi thach khoojeejĩ?
(Mt. 9:10-13; Lc. 5:29-32)
15Biek ãb Jesús ich khapeen dʉi Leví di aig thach kho sĩejim aajem. Maig naajim aajem ĩchab ich Leví khapeen agjo gobierno den debpaar jeeujem khʉʉn. Maimua ĩchab õor khapan i ẽudee beetarr aawai amach khaibagau thʉ̃rphookham khʉʉnpa aig thʉnaajim aajem, Jesús dʉi ãbam mes gaai thach khoowai. 16Mag i makhʉʉn dʉi ãba thach kho sim aig fariseonaanau Ẽwandam iek jawaag chi machnaan dʉimua chi Jesús dʉi wenʉrraajerr khʉʉnagta jeeuchejierram anʉm:
—¿Jãga jãg pãar maestro sĩi debpaar jeeujem khʉʉn dʉi pekau pom sĩsidʉm khʉʉnpa ãba thach kho sĩ? ajierram anʉm.
17Mamʉ amau mag iekhabarm ũrwia Jesuu amag magjim anʉm:
—Kha monakha nʉm khʉʉnau chan doctor igba aajem. Mor masim khʉʉnta doctor iigjem. Mʉ chan bʉ̃ʉrjã pekau chukhu wajapha khitheem aajem khʉʉn jʉraanjã beeba, mʉʉn õor pekau pooma khitheem khʉʉn peerdʉ awaanta beejimgui ajim anaabá, khĩirjug iiur aumkhĩir. Maguata mag am pekau pom nʉmjã igba, am dʉi thach kho chirabahab ajim anʉm, amjã Ẽwandam denkha awaag.
¿Khan jãgwi Jesús khapeen sʉrkhaba aajeejĩ?
(Mt. 9:14-17; Lc. 5:33-39)
18Khãai ãb fariseonaan igar nʉm khʉʉn Juan chi õor por choomie khapeen dʉi thach khoba sʉrkha naajim aajem. Mag nʉm ee õrau Jesús sim aar wetwia irig maguimajierram anʉm:
—Fariseonaan igar nʉm khʉʉn maimua Juan khapeenjã sʉrkha nʉmta, ¿khan jãgwia pʉ dʉi wenʉrraajem khʉʉnta jãg sʉrkhaba nʉ? ajierram anʉm.
19Magbaa Jesuu amag magjim anʉm:
—Pãrau oowai, ¿chi jua pʉr sim woun onee ich ʉʉi dʉi thach kho nʉmich, irua õor ich jua pʉr nʉm ee thʉ̃rtarr khʉʉn sĩi beewia okhĩirjuu ohoodo naajẽ, sʉrkhaawai bʉ̃ʉrjã thach khoba? Magba aajem. 20Magua ich agjo mʉ dʉi wenʉrraajem khʉʉnjã sʉrkhaba nʉm. Am sʉrkhajuun, mʉg atag mʉ am jaaijo am dʉi chitʉm pʉr atham ed gayan chadau am amach khĩrauta sʉrkhawia ĩchab thachjã khoba nʉisip aju, gaai machgau. Mamʉ mʉʉgwaiwe chan am sʉrkhaju khaba nʉmgui ajim anʉm, agtha mʉ am dʉi chiraawai.
21Magnaa, —Pãade khĩirjubat ajim anʉm. Pãraun chadcha pãach jooinau jaaujerrjo thach khoba sʉrkha nʉm. Mamʉ pãrau jãg mua iek iiur jaau chirʉmjã khõsinaa agjo warrgarm khĩirjug chi jooijã agtha khõsi wenʉrrʉmʉn, magan mag khĩirjugan sĩi put iiur auwia jũrr khajũa jooi gaai phẽekhabarmjota sĩsim. Ãbmua khãijã put iiuriu khajũa jooi gaai phẽekhakhiin, mag put iiur i pächdʉbaademua chi kha sim ee thʉrrdʉbaadeeu warag ich warr sĩerr khãaijã nem wäg sĩsiju. Magua chi mʉ iek ʉkha simua chan mʉg iek iiur mua jaau chitʉmjã ʉkhanaa pod amach jooin ijã agjo ʉʉrkhaju khaba simgui ajim anʉm. 22Wa magbam khai, vino õrr achpamkhĩir nemheu jooi den thũrkha sim ee pʉbarmjota aju: Chi vino õrr achpabaadeewai, chi nemheu jooiraa sĩewai, ãwatba jẽgdʉbaadee chi vinojã ãrbaadem dʉi chi nemheujã ya tag serbiiba sĩsiju. Maguata vino õrr achpamkhĩran, agjo nemheu iiur eeta pʉajemgui ajim anʉm amag.
Jesuu khan nemta jua ʉ̃ʉijem ed wauju aai sĩ a jaautarr
(Mt. 12:1-8; Lc. 6:1-5)
23Khãai ãb jua ʉ̃ʉijem ed Jesús ich khapeen dʉi trigodo ee dich wetumua chi khapeenau trigo phierr ahaug wetmajim aajem. 24Mag trigo phierr nʉm oowia Moiseeu Ẽwandam iek phã pʉatarr wajapcha ʉʉrkhaajem khʉʉnau Jesuug, —Pʉde oobá: Jua ʉ̃i nʉm ed aawai bʉ̃ʉrjã phidkhaju khaba nʉmta pʉ khapeenau jãg trigo phierrnaa kho wenʉrrʉmwai ajierram anʉm. ¿Pua chan khaugbahab ajierram anʉm, jãgpai phierr nʉmjã nem pom eeu nʉm dʉi ãba sim?
25Magbaa jũrr Jesuu amag magjim anʉm:
—Mamʉ ¿khani mʉ khapeenau khaigba abar? Magan ¿pãrau chan Ẽwandam iek phã sim gaai thʉ̃ʉrwai bʉ̃ʉrjã khaugbata aajeeb, rey David khakhitarrau ich khapeen dʉimua amach jãsoo aphobaadee pan khotarr? 26Pãrau khaphʉ nʉmgui ajim anʉm, warr Abiatar phadnaan porkha sim jaar David ich khapeen dʉi Aai i jeeujem deg dubwia ag ee pan ofrendajo Ẽwandam ithee wai narr khopʉitarr. Mag pan parhoobam khʉʉnau khoju khaba, ãba phadeupaita khoju aai sĩejim anaabá. Mag sĩerrta ichdeujã khowi ich khapeenagjã deejimgui ajim anʉm amag. Mamʉ mag khotarr paarjã Ẽwandamau am chig abajim.
27Jesuu amag mag iekhawi ichdeupai deeu ũmaai amag magjim anʉm:
—Jua ʉ̃ʉijem edan, ʉu õordam jua ʉ̃i wenʉrramkhĩirta Ẽwandamau deejim; mamʉ mag nʉm chan mag jua ʉ̃ʉijem ed sʉrkha wenʉrrʉm gaaimuata maach ʉu wenʉrrʉm anʉm khabam. 28Maguata mʉch chi Emkhooi Iewaa mʉg jẽb gaaijã iek theeg chirʉmuata thumaam khʉʉnag khan nemta wauju aai nʉ a jaauju aai chirʉmgui ajim anʉm, jua ʉ̃ʉijem ed awiajã.
Nke Ahọpụtara Ugbu A:
San Marcos 2: noaA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011, Wycliffe Bible Translators, Inc. All rights reserved.