LUK 15
15
Amahkhoam wah Saak
(Mt 18.12-14)
1Jâthenâng thãkho thâte ngale papi mihnyan heh Jisu ngin jêtatrãng jahmõang hokwah, 2phumma Farasi ngale Niemarang hethôte hehma ngatwah, “Are mihnyan pumma papi mihnyan hehmin rooeka ngale thin demnâng phhekchhah roamchhah eka!” 3Ephumma Jisu ma thinnâng are nginthakthôpa thôkoh wah:
4“Chenjô komin nekhuwah wathe nâng châthe saak lâcheittet, phumma ekowah wanthe memahkhoam ako - nema chenrêmin a? nema roak ekhu wan ekhu pa phemphhek phethien letma mahkhoam reka saak wanthe pa machoh chohlem elemchhoan en. 5Chenthu nema erepa mechohtetko, nyahrãng khuhah letma chhoakkhoko etoanpe en 6ngale humnâng engak pewên en. Erediko nema ne lemruchha ngale ne tok akhung wah mihnyan heh aroamma khôanroo letma thinnâng enga en, ‘Ngasaak pa mahkhoam wah ngakchoh ekang, erohwah nga nyahrãng khuhah ekang. Nãngkhu anga nga khuhah nâhah dangmênge!’ 7Ererãngrãng, Ngama nenâng thôkoh eka, roak ekhu waekhu hung lelitte mihnyan heh noma papi mihnyan wathe hungmelit ako rangkhethung nâng ajah khuhah nâhah dangeka.
Amahphe wah Ngunpha
8“Ngale chenjô komin dihiaknyu wathema ate ngunpha phaechhi kowah phathe memahphe ako - atema chenni rêmin a? Atema wentit toaklahma ate hum phangtang rulahma machoh chohlem elem a. 9Chenthu atema ere ngun pa mechoh tahko ate lemruchha heh ngale ate tok akhung wah mihnyan heh aroamma khôanroo lahma thinnâng enga a, ‘Ngama mahphetek ngunpa ngakchoh phumma nyahrãng khuhah nâhah dangekang. Nãngkhu anga nga khuhah nâhah dangmênge!’ 10Ererãngrãng, Ngama nenâng thôkoh eka, wathe papi mihnyan hungngak litko rangkhethung wah Joban ngintatte heh khuhah eka.”
Amahchhoan wah Chha
11Eredikomin Jisu ma ngatwah, “Mihnyan wathe nâng ate chha dela wanii dângwah. 12Naadiwa pumma atewa nâng ngatwah, ‘Ewa, athâng thângheh ngama chohthin thiak aman heh nganâng koh ehang.’ Ephumma atewa pumma chhepho wanii tungko ate chhahkhem ngale pitthin jolem chentôpa phênkohwah. 13Jâthe jânii diko naadiwa pumma ate thiak aman heh phangtang sengphe lahma ngun keplahma humwah chhoanwah. Hahtaang diaknâng chhoan lahma ate ngunpa bamet tamet phoangmet phewah. 14Atenâng chentô tongtong apa phangtang thôanmetphe wah. Erediko ere diakko nyahrãng rêmdong remwah, ngale atenâng ere phumma chenmin hotu dângwah. 15Ephumma erediak kowah mihwa wathe tânâng dekbi bîrãng hokwah, ngale ere mihwa pumma ate wak heh sokrãng chienwah. 16Atema wakchhah khôankho kowah phhekchhah pejû chhahhun dângwah, rohkomin atenâng henmejô chhahthuk ho. 17Khediko ate hungnâng hûlahma ngatwah, ‘Ewa wah dekbi bîchhahte heh lephang leleng choh phhekchhah wakeka, phumma nga aretheko rêmma chêmrii ekang! 18Ngama ewa tânâng wãnglekma ewa nâng ngawãng ang, “Ewa, ngama Joban ngale nangrãng nyahrãng pap lâmotek. 19Nga nangchhadâng khemtumek; nang ngewah wathe dekbi bîchhahte rãngrãng tumin thienhang.” ’ 20Ephumma cheplahma atewa tânâng ngakwâng wah.
“Ate humwah melâng taangnâng dângthuko ate wama lepkhêkat wah; atewa pa nyahrãng hungchhihwah, ngale chohchhoan kalahma ate chhako dekma khitka lahma chupjokwah. 21Chha pumma ngatwah, ‘Ewa,’ ‘Ngama Joban ngale nangrãng nyahrãng pap lâmotek. Ngale nga nangchhadâng khemtumek.’ 22Rohkomin atewa ma haaheh roolahma thinnâng ngatwah, ‘sitsiak!’ ‘Khetsen senthôan pa toanhû letma atenâng pohkoh en. Ate dekko dekkhepwah phengkohre en, ngale daphengmin phengkoh en. 23Erediko leetet tetthôan pa joat en, ngale phhekdong chhahdong demnâng kuhhoan e! 24Chenrãngma ngako are ngachhapa riichoan dângwah, rohkomin athângheh atea ahîn; atea mahchhoan dângwah, rohkomin athângheh lângakchohtek.’ Ngale ephumma thinma kuhhôanwah.
25“Ere sanpoatko khhepho chhapa pitnâng dângwah. Phumma pitwah ngakwângko, hum hunemnemko, atema nongtem lahma boang aloamte heh tatwênwah. 26Ephumma atema haa wathe roolahma chhienwah, ‘chenrãngma boangloam eka?’ 27Haa pumma dânthâng wah, ‘Nangnaa ngakhûera,’ ‘ngale nangwa ma lee thãchaanthôan pa joat eka, chenrãngma ngako atema ate chhapa senthemthem ngakchoh eka.’ 28Khhepho chhapa nyahrãng rinkhah lahma humnâng lehûwah; phumma atewa kalahma humnâng wãngro ngama roatsep katwah. 29Rohkomin atema wako ngatwah, ‘Sûtan, rangpâ pâtang ngama nangrãngma haa rãngrãng danglekma motek, ngale ngama chenthumin nangngin thatdânmih. Phumma nangma nganâng chenni thatkoh thanga? Kienjoat lohmemin nga lemruchha heh demnâng mathat jokphhek chhahthuk ehang! 30Rohkomin are nangchha pumma nangthiak aman heh phangtang senglahma dihiak phoangsengte heh demnâng thôanmetphê diko humnâng ngakhûera, phumma nangma atenâng thãchaanthôan leepa joatkoh eko!’ 31Awa ma dânthâng wah, ‘Echha,’ ‘Nanga roantang nga demkojû, ngale ngawah chentôpa nangthiak. 32Rohkomin khuhah nâhah boangloam ekipa nangnaa pa riichoan dângwah, rohkomin ade phumma lâhintah; atea mahchoan dângwah rohkomin ade phumma ate lângak chohtih.’ ”
Nke Ahọpụtara Ugbu A:
LUK 15: NOKTBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.