Dehet deng Apan-kloma ki in Dadi ka 2
2
1Nini ela, Ama Lamtua Allah koet nal apan-dapa kua, nol apan-kloma kia, nonool un isin nas totoang.
2Un koet hidis totoang, kon ola ka tom nol leol itu la, Un tene. 3Nini ela, leol itu la daid leol in tene dui, deng lelo-leol tenga las. Un ator ela meman, le eta Un koet hidis totoang son nam, Un tene se leol itu la. 4aAma Lamtua Allah in koet apan-dapa kua nol apan-kloma kia ka, un dehet ta ela.
Ama Lamtua Allah koet biklobe nol bihata
(Matius 19:4-6; Markus 10:4-9; Korintus mesa la 6:16; 15:45, 47; Efesus 5:31-33)
4bDedeng AMA LAMTUA Allah halas-sam mana le koet apan-dapa ku nol apan-kloma kia ka, 5-6muik kai ina in nuli lo, undeng Un niung ulan lo bii. Dedeng na suma muik salbuta man puti deng dale kia, le tao ngoe apan-kloma kia. Nol muik atuli in daek klapa lo bii. 7Hidi kon AMA LAMTUA Allah kat nal dale bubuit, le daken daid atuli. Hidim Un huu tamang hngasa laok se atuling na deng ilu ka, kon un nuli meman.
8Hidi nam, AMA LAMTUA Allah daek klapa mesa se dale Eden, se halin leol saken. Hidim Un bel atuling na le daad se klaap na dale. 9Se klaap na, Un mul kai ina banan mamo-mamo son, man atuli li bisa kaa oen isin man fala banan nas. Un kon mul kai ina dua man hnika ngas bakisan se klaap na hlala ka. Eta atuli li kaa kai ina mesan na isin na lam, un haup in nuli napiut. Mo eta atuli li kaa deng kai isin mesan na lam, un taan nal ol man banan nol ol man daat ta.
10Muik palun mesa man baa puti deng klaap na. Palun na baa fanga aat. 11Un fanga mesa la, ngala Pison. Fanga na baa keo papmes dale Hawila, man muik lil-mea mamo. 12Se na muik lil-mea isin, muik kai ina man uin na bui bingis, nol muik baut kaloe'. 13Palun na fanga dua la, ngala Gihon. Fanga na baa keo papmes dale Kus.#2:13: Hmunan nu dale ni ngala ‘Kus’. Halas ni, dale na ne dale Etiopia, nol dale Sudan, maan dua nias ne Afrika halin leol-saken. 14Un fanga tilu la, ngala Tigris. Fanga ni daid toon, deng dale Asyur#2:14: Dale Asyur ram halas ni ngala, ‘Irak’. halin leol-saken. Un fanga aat ta, ngala Efrat.
15Ama Lamtua Allah bel atuling na daad se Eden le doha-tinang klaap na babanan. 16Hidim Un hid atuling na noan, “Ku boel kaa kai isin saa tuun deng totoang kai ina in se klaap ni dalen nias. 17Mo muik kai ina mesa, man ku boel kaa isin na lo. Na kai ina in tek puting ol man banan nol ol man daat ta. Eta ku kaan nam taon elola ko ku mate.”
18Hidi nam AMA LAMTUA Allah aa pait noan, “Eta atuling ni sii nuli sii-siing ngam banan lo. Tiata Auk le daek belen tapa mesa, man tatai nol una.”
19-20Dedeng na, AMA LAMTUA Allah dauk dale, le daek hmukit ti beas bakun, nol tilu-kee kas. Hidim Un kil nol hmukit tas nol tilu-kee nas laok bel atuling na, le halin nam un ngali oen ngalan nas. Kon nam atuling na ngali hmukit tas nol tilu-kee nas, mesa-mesam nol un ngala. Mo un esa haup tapa, man tom nol una lo bii.
21Hidi kon AMA LAMTUA Allah tao atuling na le un niin nala. Nikit un niin nala kon, Ama Lamtua kat un seen blapas sas mesa, hidim kulis tema papa la pait. 22Deng seen na, Un daken daid bihata mesa. Hidim Un tapa bihatang na lako bel atuling nga. 23Net bihatang na kon, atuling nga tek noan,
“Eli le! Ni halas-sam tom nol au!
Un seen na banansila el auk seen ni kon.
Nol un sisin na kon banansila el auk sising ngia.
Undeng un daid deng biklobe lia, tiata auk ngali un ngala ka noan ‘bihata’.”#2:23: Se dais Ibranin nam, biklobe li noken ‘ish’. Nol bihata li ‘isha’. Tiata se nia, oen kuti dais noan “isha (bihata) daid deng ish (biklobe).”
24Undeng na, biklobe li musti nang un ina-aman nas,
le lako nuil koo-dalen mes nol un sapa-bihatan na,
ta oen duas butu-kil apa daid mes son.
25Dedeng na, oen duas lulit, mo oen duas nataka taan in mae ki lo.
Nke Ahọpụtara Ugbu A:
Dehet deng Apan-kloma ki in Dadi ka 2: heg
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011, Wycliffe Bible Translators, Inc. All rights reserved.