IRPHUTNA 4
4
Kaina le Abela
1Khanchu Adama’n a dôngma Evi kha a’rpôlpuia an râi tâka, “Rengpa changpuina zârin nâipasal ki nei ta,” a tia. A’rhming khom Kaina a phuaa. 2Kha zoiin Abela a hong suak nôka. Abela chu belra enkolpu sin a thoa, Kaina chu loi sin thopua a om ta. 3Khanchu inhnunga chu hiang hin a hong ni tâka, Kaina’n a loimâna thil, Rengpa makunga darh hrangin a hong chôia. 4#Heb 11.4 Abela khomin a belra pâl laia a martak le a suak masatak a hong chôia. Khan, Rengpa’n Abela leh a thilinhlan kha a lôma. 5Kaina le a thilinhlan kha chu lôm maka. Khanchu Kaina chu a sate’n a ning an mur pe tâka, a hmêl kha an khukhak tâka. 6Khanchu Rengpa khan Kaina kuanga khan, “Ithoa mo ni ning a inmur? Ithoa mo ni hmêl a inkhu tâk? 7Thil ni tho insa’n chu lôm ni ihlo hrang mo ni ma? Ni tho’n sa no’n chu sual chu mikot kôla a iom chian a ni: a nuam lam chu nangma nang inhnê hi a nia, a chunga thu ni inei hrang a ni,” a tia.
8 #
Mt 23.35; Lk 11.51; 1 Joh 3.12 Kaina’n a sangpa Abela kuang, “Loia fe ei ti” a tia. Khanchu hiang hin a nia, loia an om laiin a sangpa Abela kha a’rsualpuia, a thatpai tâka. 9Kha zoiin chu Rengpa’n Kaina kuang, “Ni sangpa Abela kha khôn mo a om tâk?” a tia. Khan ama khan “Inhre ma ung, ki sangpa enkolpu mo ni ni sôn,” a tia.
10 #
Heb 12.24
Khanchu Rengpa’n, “Itho mo hiang sin hi teh ni tho tâka? Ni sangpa thisen irhâi khan irnêng ata a ni hong insam kêng. 11Khasikin, irnêng, ni kut ata ni sangpa thisen dong hrang a bâi lei ângtu ata hi khosâl tong ni ta; 12irnêng ni tuk khomin a satna kha nang pe phal ta no nia; irnênga chaninvâi le inlêng hong ni ta ni ti,” a tia.
13Khan, Kaina’n Rengpa kuang, “Ni ni ihremna hi a sate’n a natinsatin, tuang zoi no ning. 14A vuan hin irnêng chung ata ni nin hnotsuak tâka, ni mithmu phâk loina ithuprûkin om ta ki ti, irnênga hin inlêng le chaninvâi ki hong ini hrang a ni ta; khanchu hiang hin ni a ta, mi tukhomin an ni hmupu dôrin ni that an ti,” a tia. 15Khanchu Rengpa’n, “Khaang kha ni nih tâkin chu tukhom Kaina thatpu tak chu a bâk sari’n a chunga phuba la an ti,” a tia. Khanchu mi’n an hmu khoma an that loina hrangin Rengpa’n Kaina kha a’rsinsia tâka. 16Khanchu Kaina kha Rengpa kuang ata a suaka. Eden nisua tiang Nod rama khan a om tâka.
Kaina irchihai
17Khan, Kaina’n a dôngma a pôla, khanchu an inrâia, Enoka an neia. Khan, khua a chuana, a khua irhming khom a nâipa irhming chôiin Enoka a tia. 18Khan Enoka’n nâipasal Irada a neia, Irada’n nâipasal Mehujaela a neia, Mehujaela’n nâipasal Methusaela a neia, Methusaela khan nâipasal Lameka a neia. 19Khanchu, Lameka’n dôngma inhni a neia, inkhat irhming chu Adaii a nia, inkhat nôk chu Zillaii, a ni. 20Khan Adaii leh khan Jabala an neia, ama chu puan ina om ngaihai sa vâi ngaihai irchibul a ni. 21A sangpa irhming chu Jubala a nia, ama hi chu perkhuang le theihle tum theihai irchibul a ni. 22Zillaii khomin Tubal-kaina, dâr le thîr hriamhrei tinrêng incher ngaitu a neia; khan Tubal-kaina farnu chu Naamaii a ni. 23Khanchu Lameka’n a dôngmahai kuang khan,
“Adaii le Zillaii haio, ki’rhâi inhre unglân:
Lameka dôngmahaio, ki thu’nsîr hi irngai roi,
A nin phop sikin mi ki thata,
A ni vîk irdul sikin ruatharte ki ithat a ni.
24 #
Mt 18.22
Kaina phuba kha a bâk sariin an lâkin chu,
Lameka phuba chu a bâk sômsari le sariin an ilâk ngêt hrang kêng,” a tia.
Setha le Enoka
25Khan, Adama’n a dôngma a’rpôlpui nôka, nâipasal an nei nôka, a’rhming chu Setha a iphua a ni: “Pathianin Abela irthûla a ni ipêk a ni, Kaina’n a lei thatpai tâk sikin,” a tia. 26Khan, Setha khomin nâipasal a neia, a’rhming khom Enosa a phuaa. Kha rengata chu mihaiin Rengpa irhming an lei isâm phut a ni ta.
Nke Ahọpụtara Ugbu A:
IRPHUTNA 4: HRACLBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.