YOHAN 1
1
Taküm O
1Tetenzük nung O liasü, aser O Tsüngrem den liasü, aser Oji Tsüngrem liasü. 2Tetenzük dang pa Tsüngrem den liasü. 3Kechisarena pa ajanga adok, aser kechisa yangluogo, pa medenibo kecha meyanglu. 4Pa dak taküm liasü,#1.4: mesüra teyanglubatem pa ajanga taküm angu. aser takümji meimchir tesangwa liasü. 5Tesangwa jagi ammang nung sangwar aser ammangi aji kodanga mesepdaktsütet.
6Tsüngrem nungi yokba nisung ka liasü, pa tenüng Yohan. 7Pa ajanga ajaki amangtsü asoshi tesangwa indang kuli agütsütsü pa kuli asütsü aru. 8Pa tesangwaji masü, saka tesangwa atemaji kuli agütsütsü pa aru. 9Chichiba tesangwa kobai nisung shia sangwatsür, pa atangji alimai arua liasü. 10Pa alima nung liasü aser alimaji pa ajanga adok aji saka alimai pa memeteti liasü. 11Pa pei nübur dangi aru, saka pei nüburtemi paji magizük. 12Saka shirisa pa agizükogo, oda shiri pa tenüng nung amang parnok nem Tsüngrem Chirtem akümtsü pai ain agütsü. 13Parnok azü nungi maso, shi-i mulungba agi maso, mesüra nisungi mulungba agi maso saka Tsüngrem nungi aso.
14Aser Oji shi aküm aser taochi aser ochi agi sünga asenok rongnung ali, Tebu ajaso Chir ama pa sentsüwangshi onoki angu. 15Yohani pa atema kuli asü, aser pai ayimtena ashi, “Shiba atema ni shia liasü ibaji pa, shiba kü sülen arur pa kü dang tama aküm, kechiaser pa kü dang nungi mezüng liasü.” 16Kechiaser pa teperiba nungi asenok ajaki taochi madak taochi shilem lemzük; 17kechiaser Mosa ajanga ozüng agütsü; saka taochi aser ochi Yisu Khrista ajanga aru. 18Nisung shingaia Tsüngrem kecha südanga munguka, saka Ajaso Chir shiba Tebu teku nung lir pai pa jungkai adoktsüogo.
Yohan Baptitsüba Kuli
(Mat. 3.1-12; Mar. 1.1-8; Luk. 3.1-18)
19“Na shiba?” ta pa dang asüngdangtsü asoshi kodang Yihuda nungertemi Yirusalem nungi pa dangi putirtem aser Levitem yok, Yohan kuliji ya liasü. 20Pai ya ajang ajanga nangzüka ashi, “Ni Khristaji masü.” 21Parnoki pa dang asüngdang, “Ajangla na shiba? Na Elija asü” Pai langzü, “Ni masü.” Parnoki pa dang asüngdang, “Na ainkarji#1.21: Ainkarji: Tetezü Mesia arutsü asoshi tesangoktsür ka arutsü ta parnoki amanga liasü. asü?” Pai langzü, “Ainkarji ni masü.” 22Anungji parnoki pa dang asüngdang, “Ajangla onok tenyartem dang langzütettsüsa na shiba? Nai ne sasa ne indang kechi-a ta ashir?” 23#Isa. 40.3 Pai langzü, Isaia ainkari ashiba ama:
“Kibuba lenkong metong metonga yangluang,
ta arem nung kati ayimtenba olaji ni.”
24Farisitem nungia parnok kar yok, 25aser parnoki pa dang asüngdang, “Na Khrista-a masü, Elija-a masü, aser ainkarjia masü süra, ajangla nai kechiba baptitsür?” 26Yohani parnok dang langzü, “Ni tzü nung baptitsür, saka nenok rongnung ka noktaka lir shiba nenoki meshiteter; 27paji kü sülen arudagi. Pa tsüngsem lisü salatsü ni metemsü.” 28Yohani baptija alidak, Yordan külen Bethani nung itemi atalok.
Tsüngrem Sanchanu
29Asüngji pa dangi Yisu aruya pai angu aser ashi, “Alima temenen bener aoba Tsüngrem Sanchanu ajiang! 30Kü sülen nisung ka arudar shiba kü dang tama kechiaser pa kü dang mezüng liasü ta shiba indang ni ashi ibaji pa. 31Nia pa memeteti liasü, saka pa Israel madang jungkai adokdaktsütsü asoshi ni tzü nung baptija aru.” 32Yohani kuli agütsü aser ashi. “Tanela posü ka ama kotak nungi alu aser pa dak atemba ni angu. 33Ni pa memeteti liasü, saka shibai tzü nung baptitsü ni yok pai kü dang ashi, shiba madak Tanela aluya aser lia ngudir, pai Tanela Temeshi nung baptitsütsü. 34Ibai Tsüngrem Chir ta ni nguogo aser kuli agütsür.”
Mezüng Nütsüngtem
35Ano tananüji Yohan pa nütsüng ana den noktaka liasü, 36Pai Yisu süia angu aser ashi, “Tsüngrem San Chanu ajiang!” 37Pa nütsüng ana jagi pa nungi aji angashi aser parnoki Yisu sülen anitak. 38Aser Yisui tejak meyipdang, parnok pa sülen anitakba ngua parnok dang asüngdang, “Nenoki kechi bushir?” Aser parnoki pa dang langzü, “Rabbi (Tetezü tesayur) na kong alir?” 39Pai parnok dang ashi “Arung aser nenoki angutsü.” Anungji parnok aru, aser pa kong alir aji angu aser panüji parnoki pa den ali, aji pezü baji shi liasü. 40Yohani jembiba angashir Yisu sülen anitakba ana rongnungji kabo Simon Peter tenu Andria liasü. 41Pai tamasa tedi Simon ngua pa dang ashi. “Onoki Mesia (Mesia tetezü Khrista) nguogo.” 42Pai pa Yisu dangi anir aru. Yisui pa dak repranga ashi, “Na Yona chir Simon. Ne tenüng Kefa tetezü agi lung ta ajatsü.”
Filip Aser Nathanel Ajaba
43Asüngji Yisui Galili oya liasü, aser pai Filip angu. Yisui pa dang ashi, “Kü Sülen anitakang.” 44Filipji Andria o Peter tena aliba Bethsaida yimti nungi liasü. 45Filipi Nathanel angu aser ashi, “Yosef chir Nazaret nunger Yisu, shiba indang Mosa Ozüng kaket nung aser ainkartemi zülu onoki pa nguogo.” 46Aser Nathaneli pa dang ashi, “Nazaret nungi langka tajung adoktettsü ama?” Filipi pa dang langzü, “Arung aser ajiang.” 47Yisui Nathanel pa dangi aruba ngua pa dang ashi, “Tekülak maliba chichiba Israel nunger ka ajiang!” 48Nathaneli pa dang asüngdang, “Nai kechi koda ni metet?” Yisui pa dang langzüa ashi, “Filipi na majadang, na mungudong kübok alidang ni na angu.” 49Nathaneli Yisu dang langzüa ashi, “Tesayur, na Tsüngrem Chir, Na Israel nunger Chuba.” 50Yisui pa dang ashi, “Ni na mungudong kübok angu ta ni ne dang ashi nung nai amanger asü? Item dangi tuluba nai angutsü.” 51#Lip. 28.12 Aser Yisui pa dang ashi, “Atangji ni nenok dang shidi, anüng lapoker Tsüngrem tenyartem Nisung Chir madak atuba aser aluba nenoki angutsü.”
Nke Ahọpụtara Ugbu A:
YOHAN 1: AONAGABSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Ao Naga C.L. Bible
© Bible Society of India, 2004.
Used by permission. All rights reserved worldwide.