Genesis 12
12
Abram Harannu aha, Kanan ukkom
1Amu Yawe Nug anukka Abram amegppa nai imu ana malom. “Na ahan, wan nahip imu uuna, na tiin laippu, laipad ele uuadna, wan laa, da na ippunidkkul amu, na amuppa ukke! 2Amu da heppi, na buɗunad ag appatna, huu okkainab, ɠagattag ele daaglag. Da na itittak ena ele medakkul. Na onin okkai humappi, na laala itittak ena madakkut. 3Danab aun laa na itittak ena medakku, da nug itittak ena medakkul, amge danab aun laa na eheɗ laa awaknu anak waappa daakkutnu akku amu, da nug eheɗ laa awaknu anak waappa daakkunu akkul. Wanppanu huu oh ag nahip-ppa itittak ena aoglag,” awa aum.
4Anam amunu, Abram nug maɗ 75 dayaya, Yawe matu aum bia, nug Haran aab uua ugekke, Lot nug ele gopiɗ. 5Abram, nug wau Sarai, aria nug awag bekka Lot, nuhikkud daup danab Harannu diiom, amu keeke oh Harannu awom ele amu, nug amu oh diie, ahan Kanan wanppa goppig.
6Gona tewona, Abram nug ukka ukka, Sekem aabppa noum. Aab Sekem guguittak, appa, Morenu ad ok dayom amu, nug appa batom. Haen amuppa Kanan danab ag ele wan amuppa daappig. 7Anam daye amu, Yawe Nug Abram gumitta na, amegppa aum. “Da wan imu oh na buɗun madakkul,” awa aum. Anam a amu, aben amuppa Yawe Nug Abram gumitta ukkom amunu, Abram nug Yawe noobppa dup noa binag mekkunu qaɗab qeum.
8Nug qaɗab qewowa amu, nug aha noa, wan qauko ele, Betelnu laih kaɗag uɗitteppanu daatte, nug appa ukkom. Nug peh lag nuhig aab aɗit Betel, Ai ele gamalahppa qappe, Betel am laih qaban uɗitteppanu daye, Ai am laih kaɗag uɗitteppanu dayom. Aben amuppa ele Abram nug qaɗab qa, Yawe noobppa dup noa binag maama, nug Yawe unuqittom. 9Abram nug anam hewowa, nug Negeb gokkunu baula aha ukkom.
Abram Isip ukkom
10Amu haen amuppa enug haen wan amuppa ba dayom. Enug haen amuam naɗi beum amunu, Abram nug aha, Isip wanppa nakok daakkunu ukkom. 11Nug ukka, Isip gukkuitta, nug Sarai amegppa aum. “Da doottem, na am ah ena, iɗun tuqaknab ele 12amunu, geha Isip danab ag na anidna, ag inam akkulag. ‘Nug Abram wau,’ akkulag. Ag anam anana amu, ag da iuppeg mauhkkul, amge na am iitta. 13Anam amunu, na inam appe dooglag. ‘Abram nug am da awal,’ aon akkut. Na anam akkut, amu dimppa ag nahipnu hena, dahilppa kobol eheɗ ii hemana. Da heppeg ii mauhpa,” awa aum.
14Aria, Abram Isip wanppa ukka te, Isip danab ag Abram wau Sarai, nug am ah ena, iɗu tuqaknab ele anidppig. 15Anidna amu, Paro ehanittak anuqak danab ag Paro amegppa Sarainu inam appig. “Nug amu ah enanag,” aon appig. Ag anam anana, ⌊Paro he,⌋ ag Sarai omalna, Paronu lag enanagnab, amuppa goppig. 16Omalna ukkaeg amu, Paro nug Abram keeke kuɗum Sarainu nob ena mettom; doɗ iɗu iɗu, amuam sipsip, makau, donki anig, dawai ele, amu kamel ele. Nug maɗi nid maɗi ah ele mettom.
17Paro nug Abram wau Sarai nug wau daakkunu nug laug enanagppa he omalna goppig, diig amunu amu, Yawe Nug Paro, amu nuhikkud danab ah nug laugppa daappig ele oɗe nau digdig mattom. 18Oɗe anam matte amu, Paro nug Abram onigppa e uɗie, nug aum. “Na aɗinu dahilnu inam heme? Aɗinu na Sarainu, ‘Ah am dahil,’ ii ame? 19Aɗinu na da amelppa, ‘Nug am da appinal,’ ame amunu, da nug dahil ah daakkunu aomi? Antte! Ah nahip iikku daatte. Aoppe ukkeɗ!” awa aum. 20Paro anam awowa amu, nug maɗi nid nuhikkud, ag Abram, nug wau, amu nuhig keeke oh ele omaladna gona, Isip tomppa uuadkkulagnunab aum.
Pilihan Saat Ini:
Genesis 12: NB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2022, Wycliffe Bible Translators, Inc. All rights reserved.