Awˬ hkuiˉ puiˍ ve li‸ 17
17
Awˬ guiˬ meuˇ shoˍ piˇ ve
1Aˍbranˍ a sha‸ 99 hkʼaw‸ gaˬ ve teˇ yanˇ, Gʼuiˬsha yawˇ geh laˬ leh kʼoˆ piˇ ve, Ngaˬ lehˬ kanˇ paˆ uiˍ ve Gʼuiˬsha hpeh‸ ve yoˬ. Ngaˬ ve tawˇ hta‸ na yuˬ leh hteˇ ve cawˇ ve kanˉ hta‸ ceh tiˉ te-o. 2Ngaˬ nawˬ hta‸ ka ti‸ shaˉ caˆ te leh nawˬ hta‸ awˬ ceuˬ awˬ hkʼaˇ maˇ maˇ cawˬ la piˇ tuˬ yoˬ, teh‸ yawˇ hta‸ kʼoˆ piˇ ve yoˬ. 3Aˍbranˍ lehˬ, miˬ chaˇ hkʼoˆ boˆ taˍ ve yoˬ. 4Gʼuiˬsha yawˇ hta‸ kʼaw‸ kʼoˆ piˇ ve, Ngaˬ nawˬ hta‸ ka ti‸ chi hkʼe te ve yoˬ. Nawˬ lehˬ, chaw ceuˬ maˇ maˇ ve awˬ pa hpeh‸ la tuˬ yoˬ. 5Chi teˇ pawˆ nawˬ ve awˬ meh lehˬ, Aˍbranˍ#17:5 Chi lehˬ mvuh ve awˬ pa teh‸ kʼoˆ gaˇ ve yoˬ. ceh tiˉ maˇ heˆ-o. Nawˬ ve awˬ meh lehˬ, Aˍbraˍhanˍ#17:5 Chi lehˬ, chaw maˇ maˇ ve awˬ pa teh‸ kʼoˆ gaˇ ve yoˬ. teh‸ gʼa kʼaw‸ meh ve yoˬ. Awˬ lawn kʼo, ngaˬ nawˬ hta chaw ceuˬ maˇ maˇ ve awˬ pa hpeh‸ la piˇ tuˬ yoˬ. 6Ngaˬ lehˬ nawˬ ve awˬ ceuˬ awˬ hkʼaˇ hta‸ maˇ la piˇ tuˬ yoˬ. Yawˇ hui teˇ hpaˍ hpaˍ jawˇmawˇ gʼa te tuˬ yoˬ. Nawˬ ve awˬ ceuˬ awˬ hkʼaˇ teˇ hpaˍ maˇ jaˇ leh, chaw ceuˬ lonˉ teˇ ceuˬ hpeh‸ la tuˬ yoˬ.
7Ngaˬ lehˬ nawˬ ve Gʼuiˬsha leh nawˬ ve awˬ ceuˬ awˬ hkʼaˇ teˇ hpaˍ ve co co taiˍ taiˍ Gʼuiˬsha hpeh‸ tuˬ yoˬ. Nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ te piˇ taˍ ve ka ti‸ shaˉ caˆ hta‸ hkʼaˬ htaˆ ka‸ ngaˬ ha‸ shaˉ taˍ tuˬ yoˬ. 8Chi beu‸ nawˬ hkehˉ chaw te chehˇ taˍ ve Hkaˍnanˍ mvuhˇmiˬ chi ve hkʼa peu-eˬ nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ piˇ laˇ tuˬ yoˬ. Ngaˬ lehˬ yawˇ hui ve Gʼuiˬsha hpeh‸ tuˬ yoˬ, teh‸ kʼoˆ piˇ ve yoˬ.
9Gʼuiˬsha Aˍbraˍhanˍ hta‸ kʼaw‸ kʼoˆ piˇ ve, Nawˬ awˬ to leh nawˬ ve awˬ ceuˬ awˬ hkʼaˇ teˇ hpaˍ teˇ co peuˬ teˇ co ngaˬ ve ka ti‸ shaˉ caˆ hta‸ gʼa ha‸ shaˉ taˍ ve yoˬ. 10Nawˬ leh nawˬ ve awˬ ceuˬ awˬ hkʼaˇ hawˉ hkʼaˆ paˍ hkʼa peu-eˬ awˬ guiˬ meuˇ gʼa shoˍ ve yoˬ. 11Chi ve lehˬ, ngaˬ huiˉ maˬ awˬ kaˍ lo teh taˍ ve ka ti‸ shaˉ caˆ awˬ heˆ hpeh‸ ve yoˬ. 12Ya‸ nyi hkʼaw‸ nawˉ kʼo, yaˇ paˍ teˇ gʼaˇ le le paw la peuˬ hkʼaw‸ nawˉ hiˉ nyi gaˬ ve kʼo, awˬ guiˬ meuˇ gʼa shoˍ ve yoˬ. Nawˬ hui ve yehˬ hkʼaw paw la ve awˬ ceˬ maˇ kʼoˆ, vuiˬ yuˬ taˍ ve awˬ ceˬ maˇ kʼoˆ, teˇ gʼaˇ le le hta‸ chi hkʼe gʼa te piˇ ve yoˬ. 13Chi hkʼe te ve lehˬ, ngaˬ ve ka ti‸ shaˉ caˆ nawˬ hui awˬ hkʼaw lo co co taiˍ taiˍ cawˬ chehˇ ve hta‸ hpeu‸ maˍ laˇ ve awˬ heˆ hpeh‸ ve yoˬ. 14Awˬ guiˬ meuˇ maˇ shoˍ ve hawˉ hkʼaˆ paˍ hkʼaˬ ve teˇ gʼaˇ hta‸ maˇ kʼoˆ, ngaˬ ve chaw teh‸ kʼaw‸ shawˍ tuˬ ve maˇ heˆ. Awˬ lawn kʼo, yawˇ lehˬ ngaˬ ve ka ti‸ shaˉ caˆ hta‸ te luˬ ve chaw hpeh‸ ve pa taw yoˬ, teh‸ kʼoˆ piˇ ve yoˬ.
15Gʼuiˬsha Aˍbraˍhanˍ hta‸ teˇ pawˆ kʼaw‸ kʼoˆpiˇ ve, Ya‸ nyi hkʼaw‸ nawˉ, nawˬ ve awˬ miˇ ma hta‸ Saˍrehˇ#17:15 Chi lehˬ ca beu ca hkʼaiˉ ve teh‸ kʼoˆ gaˇ ve yoˬ. teh‸ taˇ kʼaw‸ kuˬ. Yawˇ hta‸ Saˍraˇ#17:15 Chi lehˬ nanˇ hawˉ hkanˇ ma teh‸ kʼoˆ gaˇ ve yoˬ. teh‸ gʼa kʼaw‸ kuˬ ve yoˬ. 16Ngaˬ yawˇ hta‸ awˬ bon na‸ piˇ leh yawˇ yaˇ paˍ teˇ gʼaˇ paw la tuˬ yoˬ. Ngaˬ yawˇ hta‸ awˬ bon na‸ piˇ leh, yawˇ lehˬ chaw ceuˬ teˇ hpaˍ ve awˬ e hpeh‸ la tuˬ yoˬ. Yawˇ ve awˬ ceuˬ awˬ hkʼaˇ teˇ hpaˍ awˬ hkʼaw lo jawˇmawˇ maˇ maˇ tawˆ la tuˬ yoˬ, teh‸ kʼoˆ piˇ ve yoˬ.
17Aˍbraˍhanˍ lehˬ miˬ chaˇ hkʼoˆ lo kʼaw‸ boˆ taˍ ve yoˬ. Yawˇ gʼuiˬ yawˬ jaˇ leh, A sha‸ 100 hkʼaw‸ gaˬ peuˬ ve chaw geh yaˇ paˍ teˇ gʼaˇ cawˬ la gʼa tuˬ sheˬ ve laˇ. A sha‸ kawˇ chi hkʼaw‸ gaˬ peuˬ ve Saˍraˇ htawˇ, yaˇ paˍ teˇ gʼaˇ paw la gʼa tuˬ sheˬ ve laˇ, teh‸ yawˇ ve nyi ma hkʼaw dawˇ chehˇ ve yoˬ. 18Yawˇ Gʼuiˬsha hta‸ kʼoˆ piˇ ve, Aˬ hto‸ ma pa taw, nawˬ Iˉshaˍmeˍlaˆ hta‸ ngaˬ ve awˬ shinˉ maˇ piˇ tcuh gaˇ ve le, teh‸ kʼoˆ ve yoˬ.
19Gʼuiˬsha kʼaw‸ kʼoˆ ve, Oˇ hkʼe maˇ heˆ. Nawˬ miˇ ma Saˍraˇ yaˇ paˍ teˇ gʼaˇ paw la tuˬ yoˬ. Yawˇ hta‸ Iˉcaˆ #17:19 Chi lehˬ yawˇ gʼuiˬ ve teh‸ kʼoˆ gaˇ ve yoˬ. teh‸ nawˬ gʼa meh piˇ tuˬ yoˬ. Yawˇ leh yawˇ ve awˬ ceuˬ awˬ hkʼaˇ teˇ hpaˍ hta‸ ngaˬ co co taiˍ taiˍ yeˬ ve ka ti‸ shaˉ caˆ te piˇ tuˬ yoˬ. 20Iˉshaˍmeˍlaˆ awˬ pon nawˬ lawˬ hkawˉ ve awˬ hkawˇ hta‸ ngaˬ gʼa kaˇ peuˬ. Ngaˬ yawˇ hta‸ awˬ bon na‸ piˇ leh, yawˇ hta‸ awˬ ceuˬ awˬ hkʼaˇ maˇ maˇ cawˬ la piˇ tuˬ yoˬ. Yawˇ lehˬ jawˇmawˇ teˇ chi nyiˇ gʼaˇ ve awˬ pa hpeh‸ leh, yawˇ ve awˬ ceuˬ awˬ hkʼaˇ teˇ hpaˍ hta‸ chaw ceuˬ lonˉ teˇ ceuˬ hpeh‸ la piˇ tuˬ yoˬ. 21Ya‸ hkʼaˇ, nehˉ hkʼaw‸ chi teˇ yanˇ Saˍraˇ geh paw la tuˬ ve nawˬ ve yaˇ paˍ Iˉcaˆ awˬ hkʼaw lo, ngaˬ ve ka ti‸ shaˉ caˆ hta‸ ngaˬ te biˇ la piˇ tuˬ yoˬ, teh‸ kʼoˆ piˇ ve yoˬ. 22Gʼuiˬsha Aˍbraˍhanˍ hta‸ tawˇ yaw piˇ peuˬ hkʼaw‸ nawˉ yawˇ geh lo tawˆ kʼai ve yoˬ.
23Oˇ ve hkʼaw‸ nawˉ, Aˍbraˍhanˍ lehˬ yawˇ ve yaˇ paˍ Iˉshaˍmeˍlaˆ hta‸ maˇ kʼoˆ, yawˇ ve yehˬ hkʼaw paw la ve hawˉ hkʼaˆ paˍ teˇ gʼaˇ le le leh, vuiˬ yuˬ taˍ ve awˬ ceˬ paˍ teˇ gʼaˇ le le hta‸ maˇ kʼoˆ, Gʼuiˬsha kʼoˆ piˇ taˍ ve hkʼe, oˇ ve teˇ nyi tiˉ awˬ hkʼaw lo awˬ guiˬ meuˇ shoˍ piˇ ve yoˬ. 24Aˍbraˍhanˍyawˇ awˬ to awˬ guiˬ meuˇ shoˍ htaˇ, yawˇ ve a sha‸ 99 hkʼaw‸ gaˬ peuˬ leh, 25yawˇ ve yaˇ paˍ Iˉshaˍmeˍlaˆ lehˬ, a sha‸ teˇ chi shehˆ hkʼaw‸ gaˬ peuˬ ve yoˬ. 26Yawˇ huiˉ maˬ awˬ pa awˬ yaˇ leh, awˬ ceˬ paˍ hkʼa peu-eˬ teˇ nyi tiˉ awˬ hkʼaw lo, 27awˬ guiˬ meuˇ shoˍ ve hta‸ hkanˍ yuˬ ve yoˬ.
Pilihan Saat Ini:
Awˬ hkuiˉ puiˍ ve li‸ 17: LHBE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lahu Bible Edited © Thailand Bible Society and Bible Society of Myanmar, 2010, 2020.