Awˬ hkuiˉ puiˍ ve li‸ 15
15
Gʼuiˬsha Aˍbranˍ hta‸ ka ti‸ te ve
1Oˇ ve hkʼaw‸ nawˉ Aˍbranˍ lehˬ, zuh‸ maˆ ve awˬ hkʼaw lo Gʼuiˬsha tawˇ yaw piˇ ve awˬ hkawˇ hta‸ gʼa kaˇ ve yoˬ. Gʼuiˬsha kʼoˆ ve, Aˍbranˍ-oˬ, taˇ kawˆ. Ngaˬ nawˬ hta‸ ha‸ shaˉ taˍ leh uiˍ jaˇ ve la‸ shawnˍ piˇ laˇ tuˬ yoˬ.
2Aˍbranˍ kʼaw‸ yaw hkʼaw‸ leh kʼoˆ ve, Jawˇmawˇ Gʼuiˬsha-oˬ, nawˬ lehˬ ngaˬ hta‸ aˬ hto‸ ma la‸ shawnˍ piˇ laˇ tuˬ ve le. Ngaˬ lehˬ yaˇ teˇ gʼaˇ ka‸ maˇ cawˬ. Ngaˬ ve awˬ shinˉ gʼa caˇ tuˬ ve chaw lehˬ, Daˍmaˍsehˆ venˇ yaˇ Eˇlaˍsaˍ ceh tiˉ cawˬ ve yoˬ. 3Nawˬ lehˬ, ngaˬ hta‸ yaˇ teˇ gʼaˇ ka‸ maˇ piˇ laˇ. Chi hta‸ pa taw ngaˬ ve awˬ ceˬ teˇ hpaˍ lehˬ, ngaˬ ve awˬ shinˉ hta‸ gʼa caˇ tuˬ yoˬ, teh‸ kʼoˆ piˇ ve yoˬ.
4Oˇ htaˇ, Gʼuiˬsha ve tawˇ hkawˇ yawˇ geh gaˬ la leh kʼoˆ ve, Eˇlaˍsaˍ lehˬ nawˬ ve awˬ shinˉ hta‸ gʼa caˇ tuˬ ve maˇ heˆ. Nawˬ ve awˬ shinˉ hta‸ gʼa caˇ tuˬ ve chaw lehˬ, nawˬ ve yaˇ paˍ yoˬ, teh‸ kʼoˆ piˇ ve yoˬ. 5Gʼuiˬsha yawˇ hta‸ yehˬ awˬ baˬ hpawˇ lo shiˍ tawˆ-e leh kʼoˆ piˇ ve, Mvuhˇ naw ma hkʼoˆ lo chiˇ nyi leh meu‸ keu shiˍ teˇ hpaˍ hta‸ gʼaw nyi-o. Nawˬ ve awˬ ceuˬ awˬ hkʼaˇ teˇ hpaˍ lehˬ, oˇ ve hkʼa shuˍ maˇ jaˇ tuˬ yoˬ, teh‸ kʼoˆ piˇ ve yoˬ.
6Oˇ htaˇ, Aˍbranˍ Gʼuiˬsha hta‸ yonˍ ve yoˬ. Yawˇ yonˍ ve pa taw Gʼuiˬsha yawˇ hta‸ nyi ma cawˇ ve yoˬ.
7Gʼuiˬsha yawˇ hta‸ kʼaw‸ kʼoˆ piˇ ve, Ngaˬ lehˬ nawˬ hta‸ Baˍbuˍlonˍ mvuhˇmiˬ Uˉraˆ venˇ hkʼaw shiˍ tawˆ la leh mvuhˇmiˬ awˬ suhˉ chi hta‸ piˇ laˇ ve Jawˇmawˇ Gʼuiˬsha hpeh‸ ve yoˬ, teh‸ yawˇ hta‸ kʼoˆ piˇ ve yoˬ.
8Aˍbranˍ kʼoˆ ve, Jawˇmawˇ Gʼuiˬsha-oˬ, mvuhˇmiˬ chi nawˬ ngaˬ hta‸ piˇ laˇ peuˬ ve hta‸ ngaˬ hkʼaˬ hkʼe te shiˍ hpeh‸ tuˬ le, teh‸ kʼoˆ piˇ ve yoˬ.
9Gʼuiˬsha kʼaw‸ kʼoˆ ve, A sha‸ shehˆ hkʼaw‸ gaˬ peuˬ ve nuˇ ma teˇ hkeh, aˉ che‸ teˇ hkeh leh yawˬ teˇ hkeh, peuˬ leh aˉ pui kʼaˍ teˇ hkeh leh guˇ teˇ hkeh ngaˬ geh yuˬveu laˇ-oˆ, teh‸ kʼoˆ piˇ ve yoˬ. 10Yawˇ lehˬ, awˬ ceuˬ oˇ ve teˇ hpaˍ hta‸ yuˬ laˬ leh, nuˇ ma leh awˬ nu ve ceˇ teˇ hpaˍ hta‸ awˬ kʼaw ji teˇ hkʼaˇ hteˇ lehˍ jeˆ hkoˆ leh teh taˍ ve yoˬ. Ya‸ hkʼaˇ, ngaˆ teˇ hpaˍ hta‸ yawˇ maˇ jeˆ hkoˇ piˇ. 11Naˬ beuˬ ngaˆ teˇ hpaˍ ya‸ la ve teˇ yanˇ, Aˍbranˍ gʼa‸ kʼoˬ piˇ ve yoˬ.
12Mvuhˇ nyi kʼehˬ la ve teˇ yanˇ, Aˍbranˍ kawˆ jaˇ leh zuh‸ muiˉ kʼa sheˬ ve yoˬ. 13Oˇ htaˇ Gʼuiˬsha Aˍbranˍ hta‸ kʼoˆ piˇ ve, Nawˬ ve awˬ ceuˬ awˬ hkʼaˇ teˇ hpaˍ lehˬ, shu ve mvuhˇmiˬ hkʼaw gʼa ca chehˇ tuˬ yoˬ. Yawˇ hui lehˬ awˇ ha hkʼaw‸ hkʼa gaˬ shu ve awˬ ceˬ gʼa te tuˬ yoˬ. 14Ya‸ hkʼaˇ, yawˇ hui hta‸ awˬ ceˬ te tcuh ve chaw hui hta‸ ngaˬ kʼaw‸ ciˍ yanˍ piˇ tuˬ yoˬ. Oˇ ve hkʼaw‸ nawˉ, yawˇ hui lehˬ hpu shi mawˇ jeˬ maˇ maˇ yuˬ leh gʼa tawˆ kʼai tuˬ yoˬ. 15Nawˬ lehˬ, a sha‸ mawˇ jaˇ htaˇ hkʼa gaˬ gʼa te‸ chehˇ peuˬ hkʼaw‸ nawˉ, gawˬ lehˍ ve hkʼaw gʼa suh-e tuˬ yoˬ. 16Awˬ lawn kʼo, haiˬ jaˇ ve Aˍmawˇriˆ chaw hui hta‸ ngaˬ maˇ gʼa‸ kʼoˬ piˇ sheˬ ve ceh ceh, nawˬ ve awˬ ceuˬ awˬ hkʼaˇ teˇ hpaˍ awˇ co-e hkʼa gaˬ shu ve awˬ ceˬ gʼa te chehˇ tuˬ yoˬ. Oˇ ve hkʼaw‸ nawˉ, yawˇ hui choˬ kaˬ lo gʼa kʼaw‸ la tuˬ yoˬ, teh‸ kʼoˆ piˇ ve yoˬ.
17Mvuhˇ nyi lo‸-e leh naˆ ho‸ la ve teˇ yanˇ, jeˆ hkoˇ taˍ ve shaˍ teˇ hpaˍ awˬ kaˍ lo awˬ gʼeuˆ ba ve aˬ miˍ mvuhˇ hkʼawˇ teˇ dawˇ te toˇ chehˇ ve yoˬ. 18Oˇ kaˬ lo Gʼuiˬsha Aˍbranˍ hta‸ ka ti‸ te leh kʼoˆ piˇ ve, Eˇjiˇtu‸ miˬ tcuhˉ hta‸ te leh Uˉhpaˍ raˆ iˉ kaˆ lawˬ lo hkʼa gaˬ, awˬ kaˍ lo cawˬ ve, 19Keˍniˆ, Keˍraˍziˆ, Kaˍdaˍmawˇniˆ, 20Hiˇtiˆ, Hpeˍraˍziˆ, Yeˍhpenˍ, 21Aˍmawˇriˆ, Hkaˍnaˍniˆ, Giˇgaˍshiˆ, Yeˍbuˇsiˆ, chaw hui ve mvuhˇmiˬ chi hkʼa peu-eˬ, nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ piˇ laˇ tuˬ yoˬ, teh‸ kʼoˆ piˇ ve yoˬ.
Pilihan Saat Ini:
Awˬ hkuiˉ puiˍ ve li‸ 15: LHBE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lahu Bible Edited © Thailand Bible Society and Bible Society of Myanmar, 2010, 2020.