San Lucas 24
24
Ti Panagungar ni Jesus
(Mat. 28:1-10; Mar. 16:1-8; Jn. 20:1-10)
1Iti umuna nga Aldaw ti lawas, nakasapsapa a napan dagiti babbai iti tanem ket intugotda dagiti bangbanglo nga insaganada. 2Nadanonda a naitulid ken naikkaten ti bato a nangserra iti ruangan ti tanem, 3isu a simrekda ngem dida nasarakan ti bangkay ni Apo Jesus.#3 Awan ti ni Apo Jesus iti dadduma a manuskrito. 4Nagtatakderda sadiay a masmasdaaw gapu iti daytoy. Pagammoan, nagparang iti sibayda ti dua a lallaki a makasisirap ti kawesda. 5Iti napalalo a butengda, nagdumogda ngem kinuna dagiti lallaki kadakuada: “Apay a birokenyo kadagiti natay ti tao a sibibiag? 6Awan#Mat. 16:21; 17:22-23; 20:18-19; Mar. 8:31; 9:31; 10:33-34; Luc. 9:22; 18:31-33. ditoy, ta napagungaren.#6 Awan ti awan ditoy, ta napagungaren iti dadduma a manuskrito. Lagipenyo nga idi adda idiay Galilea, imbagana kadakayo 7a masapul a mayawat ti Anak ti Tao kadagiti managbasol, mailansa iti krus ket agungar iti maikatlo nga aldaw.”
8Nalagip dagiti babbai ti sinao ni Jesus. 9Pimmanawda iti tanem ket napanda impadamag amin dagitoy kadagiti sangapulo ket maysa nga adalan ken kadagiti dadduma pay a kakaduada.
10Da Maria Magdalena, Juana ken Maria nga ina ni Santiago ken dadduma pay a babbai ti nangipadamag kadagitoy kadagiti apostoles.
11Ngem impagarup dagiti apostoles a sarsarita laeng ti imbaga dagiti babbai, ket dida namati kadakuada.#11 Iraman ti dadduma a manuskrito ti bersikulo 12: Uray no kasta, nagtaray ni Pedro a napan iti tanem. Nagrukob ngem dagiti lupot laeng ti nakitana. Kalpasanna, nagawid a masmasdaaw iti napasamak.
Agpadlaw ni Jesus kadagiti Adalan nga Agpa-Emaus
(Mar. 16:12-13)
13Iti dayta met la nga aldaw, magmagna ti dua nga adalan a mapan iti maysa a barrio a managan Emaus. Nasurok a sangapulo ket maysa a kilometro ti kaadayo ti Emaus manipud Jerusalem. 14Sarsaritaenda dagiti amin a napasamak. 15Kabayatan ti panagsarsaritada, immasideg ni Jesus ket nakikuyog kadakuada. 16Nakitada ngem kasla nakullaapan dagiti matada ket dida nailasin ni Jesus.
17“Ania ti pagsarsaritaanyo bayat ti pannagnayo?” kinuna ni Jesus. Nagsardengda a malidlidayan.
18“Sikan sa laeng ti sangaili iti Jerusalem a di makaammo kadagiti napaspasamak sadiay kadagiti napalabas nga aldaw!” kinuna ti maysa nga agnagan Cleofas.
19“Ania a napaspasamak?” sinaludsod ni Jesus.
“Dagiti naaramid ken ni Jesus a taga-Nazaret,” insungbatda. “Maysa a profeta daytoy a tao nga imbilang ti Dios ken amin a tattao a mannakabalin iti amin a sao ken aramidna. 20Inyawat dagiti panguloen a papadi ken agtuturaytayo ket naikeddeng a matay iti krus. 21Ninamnamami nga isu ti mangwayawaya iti Israel! Wen, ket saan la a dayta, maikatlo nga aldaw itan manipud pannakapasamak dagitoy. 22Maysa pay, pinagsiddaawdakami ti sumagmamano kadagiti babbai a kaduami. Sinapsapada ti napan iti tanem, 23ngem dida kano nasarakan ti bangkayna. Nagsublida a nangipadamag a nagparang pay kadakuada dagiti angheles a nangibaga a sibibiag kano ni Jesus. 24Napan ti sumagmamano kadagiti kakaduami iti tanem ket napaneknekanda a pudno amin ti kinuna dagiti babbai, nupay dida nakita ni Jesus.”
25“Nagnengnengkayon!” kinuna ni Jesus kadakuada. “Nagrigatkayo ketdin a mamati kadagiti sinao dagiti profeta! 26Saan aya a masapul a sagabaen ti Cristo dagitoy, sakbay a sumrek iti gloriana?” 27Ket impalawagna kadakuada dagiti bambanag maipapan kenkuana kas masarakan kadagiti amin a Sursurat manipud kadagiti libro ni Moises ken dagiti sursurat dagiti amin a profeta.
28Idi makaasidegdan iti ili a pagturonganda, impadlaw ni Jesus a kasla adayo pay ti papananna. 29Ngem inggawidda. “Makidaguskan kadakami,” kinunada, “ta sumipngeten.”
Iti kasta, nakidagus kadakuada. 30Idi addada iti panganan, innala ni Jesus ti tinapay, binendisionanna, ket pinispisina sana inted kadakuada.
31Naluktan ti panagkitada ket nailasindan nga isu ni Jesus. Ngem nagpukaw ni Jesus iti imatangda.
32Kinunada iti maysa ken maysa, “Isu met la gayam a kasla bumarbara ti riknata itay makisasao kadata iti dalan kabayatan ti panangipalpalawagna kadagiti Sursurat!”
33Nagrubbuatda a dagus ket nagsublida idiay Jerusalem. Nasarakanda dagiti sangapulo ket maysa nga adalan a naguurnong sadiay agraman dagiti dadduma a kakaduada.
34“Pudno a nagungar ti Apo!” kinunada. “Nagparang ken ni Simon.”
35Impadamag met dagiti dua ti napasamak idi addada iti dalan agraman ti pannakailasinda iti Apo idi pinispisina ti tinapay.
Agparang ni Jesus kadagiti Adalanna
(Mat. 28:16-20; Mar. 16:14-18; Jn. 20:19-23; Ara. 1:6-8)
36Madama nga ipadpadamagda dagitoy idi kellaat a nagparang ni Jesus a mismo kadakuada. “Kappia koma ti adda kadakayo,” kinunana kadakuada.#36 Awan ti Kappia…kinunana kadakuada kadagiti dadduma a manuskrito.
37Napalalo ti buteng ken kigtotda ket impagarupda nga al-alia ti kitkitaenda. 38Iti kasta, kinuna ni Jesus kadakuada, “Apay a mariribukkayo? Apay nga agduaduakayo? 39Kitaenyo dagiti im-ima ken saksakak. Siak a mismo! Sagidendak ket mapaneknekanyo. Awan lasag ken tulang ti espiritu, ngem adda kaniak kas makitayo.”#39 Saan nga iraman dagiti dadduma a manuskrito ti bersikulo 40: Idi sasawenna daytoy, impakitana kadakuada dagiti ima ken sakana.
41Dida pay la mamati gapu iti napalalo a ragsak ken siddaawda. Iti kasta, sinaludsod ni Jesus kadakuada, “Awan lat' makan ditoy?”
42Inikkanda iti tinuno nga ikan. 43Inawatna sana kinnan iti imatangda.
44Kalpasanna, kinunana kadakuada, “Dagitoy dagiti imbagbagak kadakayo idi addaak pay laeng iti arpadyo. Masapul a matungpal amin a naisurat maipapan kaniak iti Linteg ni Moises, kadagiti sursurat dagiti profeta, ken kadagiti Salmo.”
45Linuktanna ti isipda tapno maawatanda dagiti Sursurat ket kinunana kadakuada, 46“Daytoy ti naisurat: ‘Masapul nga agsagaba ti Cristo ken agungar iti maikatlo nga aldaw. 47Iti naganna, maikasabanto kadagiti amin a nasion, manipud Jerusalem, ti mensahe maipapan ti panagbabawi ken pannakapakawan dagiti basbasol.’ 48Dakayo ti makasaksi kadagitoy. 49Ita,#Ara. 1:4. #49 Awan ti Ita kadagiti dadduma a manuskrito. ibaonko kadakayo ti inkari ni Amak. Dikayo ngarud pumampanaw iti siudad agingga iti maawatyo ti pannakabalin nga aggapu sadi langit.”
Ti Yuuli ni Jesus sadi Langit
(Mar. 16:19-20; Ara. 1:9-11)
50Kalpasan#Ara. 1:9-11. daytoy, impan ni Jesus dagiti adalanna iti ruar ti siudad. Idi dimtengda idiay Betania, ingngatona dagiti imana sana binendisionan ida. 51Idi bembendisionanna ida, pimmanaw iti imatangda ket nayuli sadi langit.
52Nagdaydayawda kenkuana ket nagsublida a siraragsak idiay Jerusalem. 53Kanayon nga addada iti Templo nga agdaydayaw iti Dios.
Pilihan Saat Ini:
San Lucas 24: RIPV
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1996 Philippine Bible Society
