ᐅᐸᓓᑭᔅ ᒫᑎᐤ 18
18
ᐊᐌᓇ ᒥᔭᐗᒋ ᑭᔅᑌᓕᑖᑯᓯᑦ?
(ᒫᕐᒃ 9:33–37; ᓘᒃ 9:46–48)
1ᐁᑯᔅᐱ ᑭᔅᑭᓄᐊᒪᐙᑲᓇᒃ ᑮ ᐯᒋ ᓈᑌᐗᒃ ᒋᓴᓴ, ᐁ ᐃᑗᒋᒃ, ᐊᐌᓇ ᒥᔭᐗᒋ ᑭᔅᑌᓕᑖᑯᓯᑦ ᑭᒋᑭᔑᑳᐎ ᐅᑭᒫᐎᐎᓂᒃ?
2ᒋᓴᔅ ᒫᑲ ᑮ ᓇᑐᒣᐤ ᐊᐱᔅᑕᐙᔑᔕ, ᑌᑖᐎᒡ ᐁ ᐃᑕᓯᓕᒋ ᒫᑲ ᑮ ᐊᓓᐤ, 3ᑮ ᐃᑗᐤ ᒫᑲ, ᑖᐺ ᑭᑦ ᐃᑎᓇᐗᐤ, ᑮᔥᐱᓐ ᐁᑳ ᑴᔅᑳᑎᓯᔦᑴ, ᓀᔥᑕ ᓇᔅᐱᑕᐌᒀᐌ ᐊᐱᔅᑕᐙᔑᔕᒃ, ᓇᒪᐎᓚ ᑭ ᑳ ᐱᑐᑳᓇᐗᐤ ᑭᒋᑭᔑᑳᐎ ᐅᑭᒫᐎᐎᓂᒃ᙮ 4ᐁᐗᑯ ᐅᒋ ᐊᐌᓇ ᑫ ᑕᐸᑌᓕᒥᑎᓱᑴ ᑖᐱᔅᑯᒡ ᐊᐗ ᐊᐱᔅᑕᐙᔑᔥ, ᐁᐗᒀᓇ ᒥᔭᐗᒋ ᑭᔅᑌᓕᑖᑯᓯᑦ ᑭᒋᑭᔑᑳᐎ ᐅᑭᒫᐎᐎᓂᒃ᙮ 5ᐊᐌᓇ ᒫᑲ ᑫ ᐅᑎᓈᑴ ᐯᔭᒃ ᐅᐅ ᑐᐎ ᐊᐱᔅᑕᐙᔑᔕ ᓂᑦ ᐃᔑᓂᑳᓱᐎᓂᒃ, ᓂᓚ ᓂᑦ ᐅᑎᓂᒃ᙮
ᐁ ᑯᒋᐋᑲᓂᐎᑦ ᐊᐌᓇ ᑭᒋ ᒪᒋᑐᑕᒃ
(ᒫᕐᒃ 9:42–48; ᓘᒃ 17:1–2)
6ᒫᑳ ᐊᐌᓇ ᑫ ᐗᓂᑐᑕᐙᑴ ᐯᔭᒃ ᐅᐅ ᐊᐯᔅᑕᐙᔑᔕ ᑳ ᑖᐺᔦᓕᒥᓕᒋ, ᐊᐙᓯᑌ ᑲᑕ ᒥᓨᔑᓂᓕᐸᓐ ᐱᓂᐳᒋᑲᓐ ᐊᓯᓂᔭ ᑭᒋ ᐊᑯᓛᑲᓂᐎᓕᒋ ᐅᒀᔮᒃ, ᐁᑯ ᒫᑲ ᑭᒋ ᓂᔅᑖᐸᐌᑦ ᐃᑕ ᐁ ᑭᔥᑳᔭᐙᓕᒃ ᑭᒋᑲᒦᒃ᙮ 7ᑲᑕ ᑲᒀᑕᑭᓯᒪᑲᓐ ᐊᔅᑭ ᒪᒋ ᐋᔨᑎᐎᓇ ᐅᒋ! ᐌᓴ ᑫᒋᓈᔥ ᒪᒋ ᐋᔨᑎᐎᓇ ᑲᑕ ᐅᑎᒋᐸᓕᐗ; ᒫᑲ ᑲᑕ ᑲᒀᑕᑭᓯᐤ ᐊᓇ ᐃᓕᓕᐤ ᑳ ᐅᒋ ᐅᑎᒋᐸᓕᒃ ᒪᒋ ᐋᔨᑎᐎᓐ!
8ᐁᐗᑯ ᐅᒋ ᑮᔥᐱᓐ ᑭᒋᒋ ᓀᔥᑕᐱᑯ ᑭᓯᑦ ᓈᔦᑕᐌᓕᑕᒥᐃᑯᔭᓀ, ᒪᓂᔕ, ᐌᐱᓇ ᒫᑲ ᐊᐙᓯᑌ ᒥᓨᔑᓐ ᑭᒋ ᐱᑐᑫᔭᓐ ᐱᒫᑎᓯᐎᓂᒃ ᐁ ᒫᔅᑭᐸᓕᔭᓐ ᓀᔥᑕᐱᑯ ᐁ ᒫᔅᑭᓯᔭᓐ, ᐃᔥᐱᔥ ᑭᒋ ᐋᔮᔭᓐ ᓂᔓ ᒥᒋᒋᔭ ᓀᔥᑕᐱᑯ ᓂᔓ ᒥᓯᑕ ᑭᒋ ᐃᔑ ᐌᐱᓂᑳᐎᔭᓐ ᑳᑭᑫ ᐃᔥᑯᑌᒃ᙮ 9ᑮᔥᐱᓐ ᒫᑲ ᑭᔅᑭᔑᒃ ᓈᔦᑕᐌᓕᑕᒥᐃᑯᔭᓀ, ᐗᓚᐎᐱᑕ, ᐌᐱᓇ ᒫᑲ: ᐊᐙᓯᑌ ᒥᓨᔑᓐ ᑭᒋ ᐱᑐᑫᔭᓐ ᐱᒫᑎᓯᐎᓂᒃ ᐁ ᐯᔭᑾᒃ ᑮᔅᑭᔑᒃ, ᐃᔥᐱᔥ ᐁ ᓂᔑᑭ ᑭᔅᑭᔑᑾ ᑭᒋ ᐃᔑ ᐌᐱᓂᑳᐎᔭᓐ ᒪᒋ ᐃᔥᑯᑌᒃ᙮
ᓇᔅᐱᑐᐌᐎ ᐋᑕᓗᑳᓐ ᐁ ᐋᓕᒧᒫᑲᓂᐎᑦ ᐊᓂᐃ ᒫᓂᔥᒑᓂᔕ ᑳ ᐗᓂᔑᓂᓕᒋ
(ᓘᒃ 15:3–7)
10ᔮᒀᒥᓰᒃ ᐁᑳ ᑭᒋ ᐋᑕᐌᓕᒣᒃ ᐯᔭᒃ ᐅᑯ ᑳ ᐋᐱᔅᑌᓕᑖᑯᓯᒋᒃ; ᐌᓴ ᑭᑦ ᐃᑎᓇᐗᐤ, ᑭᒋᑭᔑᑯᒃ ᐅᑦ ᐁᓐᒐᓕᒥᐙᐗ ᒧᔕᒃ ᑲᓇᐙᐸᒥᒣᓕᐗ ᓄᑖᐎᔭ ᑭᒋᑭᔑᑯᒃ ᑳ ᐃᑖᓕᒋ᙮ 11ᐌᓴ ᐃᓕᓕᐎᑯᓯᓵᓐ ᑮ ᐯᒋ ᐃᑐᑌᐤ ᑭᒋ ᐱᒫᒋᑖᑦ ᐊᓂᐁᓕᐤ ᑳ ᐗᓂᑎᓂᓕᒃ᙮
12ᑖᓐ ᐁᑌᓕᑕᒣᒃ? ᑮᔥᐱᓐ ᐃᓕᓕᐤ ᐋᔭᐙᑦ ᒥᑖᑐᒥᑕᓇᐤ ᒫᓂᔥᒑᓂᔕ, ᐯᔭᒃ ᐁ ᐃᑕᓯᓕᒋ ᒫᑲ ᐗᓂᔑᓂᓕᒋ, ᓇᒪ ᓈ ᓇᑲᑌᐤ ᐊᓂᐃ ᔖᑭᑖᑐᒥᑕᓇᐤ ᓀᔥᑕ ᔖᑭᑖᑐᔖᑉ, ᓀᔥᑕ ᐃᑐᑌᐤ ᐁ ᐃᔑ ᐗᒋᐗᓂᓕᒃ ᑭᒋ ᓈᓇᑕᐙᐸᒫᑦ ᐊᓂᐃ ᑳ ᐗᓂᔑᓂᓕᒋ? 13ᑮᔥᐱᓐ ᒫᑲ ᒣᔅᑲᐙᒋ, ᑖᐺ ᑭᑦ ᐃᑎᓇᐗᐤ ᐊᐙᓯᑌ ᑲᑕ ᐅᒋ ᒥᓚᐙᑕᒻ ᐊᓂᐃ ᒫᓂᔥᒑᓂᔕ, ᐃᔥᐱᔥ ᐊᓂᐃ ᔖᑭᑖᑐᒥᑕᓇᐤ ᓀᔥᑕ ᔖᑭᑖᑐᔖᑉ ᐁᑳ ᑳ ᐗᓂᔑᓂᓕᒋ᙮ 14ᐁᑯ ᑖᐱᔅᑯᒡ ᓀᔥᑕ ᓇᒪᐎᓚ ᓇᑕᐌᓕᑕᒻ ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ, ᐯᔭᒃ ᐅᐅ ᑳ ᐋᐱᔅᑌᓕᑖᑯᓯᓕᒋ ᑭᒋ ᓂᔑᐗᓈᑎᓯᓕᒋ᙮
ᐃᔅᐱ ᐁ ᐗᓂᑐᑕᒃ ᑭᒋᔖᓐ
15ᓀᔥᑕ ᒫᑲ ᑮᔥᐱᓐ ᑭᒋᔖᓐ ᐗᓂᑐᑖᔅᑫ, ᓇᑕᐎ ᐎᑐᒪᐤ ᑳ ᐃᔑ ᐗᓂᑐᑖᔉ ᑭᓚᐗᐤ ᐁ ᓂᔑᔦᒃ ᐱᑯ: ᑮᔥᐱᓐ ᒫᑲ ᐱᔑᒋᐃᔅᑫ ᑭ ᑮ ᑲᔥᑭᐊᐤ ᑭᒋᔖᓐ᙮ 16ᒫᑲ ᑮᔥᐱᓐ ᐁᑳ ᐱᔑᒋᐃᔅᑫ, ᐁᑯ ᓇᑕᐙᐸᒻ ᐁ ᐎᒉᐎᔉ ᐯᔭᒃ ᓀᔥᑕᐱᑯ ᓂᔓ ᑯᑕᑭᔭᒃ, ᐅᑐᓂᐙᒃ ᓂᔓ ᓀᔥᑕᐱᑯ ᓂᔅᑐ ᐅᑎᐹᒋᒧᐗᒃ ᒥᓯᐌ ᑳ ᐃᑣᓂᐗᒃ ᑭᒋ ᐋᔨᒋᑖᓂᐗᓂᓕᒃ᙮ 17ᑮᔥᐱᓐ ᒫᑲ ᐁᑳ ᐱᔑᒋᐋᑌ ᐊᓂᐃ ᐎᑕᒫᐎᒃ ᒫᒪᐎᐋᔭᒥᐋᐗᒃ; ᒫᑲ ᑮᔥᐱᓐ ᐁᑳ ᐱᔑᒋᐋᑌ ᒫᒪᐎᐋᔭᒥᐋᐗ, ᑳᔮᒻ ᑖᐱᔅᑯᒡ ᑳ ᐋᓉᔦᓕᑕᒃ ᐃᓕᓕᐤ ᓀᔥᑕ ᐸᑉᓕᑳᓐ ᑭ ᑳ ᐃᑌᓕᒪᐤ᙮
ᑫᒀᓐ ᐁ ᒫᑯᐱᑕᒧᐌᒃ ᓀᔥᑕᐱᑯ ᐁ ᐋᐸᐊᒧᐌᒃ
18ᑖᐺ ᑭᑦ ᐃᑎᓇᐗᐤ, ᑫᒀᓐ ᑫ ᒫᑯᐱᑕᒧᐌᑴ ᐅᑕ ᐊᔅᑮᒃ ᑲᑕ ᒫᑯᐱᒋᑳᑌᐤ ᑭᒋᑭᔑᑯᒃ: ᑫᒀᓐ ᒫᑲ ᑫ ᐋᐸᐊᒧᐌᑴ ᐅᑕ ᐊᔅᑮᒃ ᑲᑕ ᐋᐸᐃᑳᑌᐤ ᑭᒋᑭᔑᑯᒃ᙮
19ᒥᓇ ᑭᑦ ᐃᑎᓇᐗᐤ, ᑮᔥᐱᓐ ᓂᔓ ᐁ ᐃᑕᔑᔦᒃ ᑖᐱᔅᑯᒡ ᐃᑌᓕᑕᑾᐌ ᐅᑕ ᐊᔅᑮᒃ ᑫᒀᓕᐤ ᑫ ᓇᑐᑕᒫᒋᒃ, ᑲᑕ ᑐᑕᒫᑯᐗᒃ ᓄᑖᐎᔭ ᑭᒋᑭᔑᑯᒃ ᑳ ᐃᑖᓕᒋ᙮ 20ᐌᓴ ᐃᑕ ᓂᔓ ᓀᔥᑕᐱᑯ ᓂᔅᑐ ᒥᔭᐗᒋᐃᑐᑕᐌ ᓂᑦ ᐃᔑᓂᑳᓱᐎᓂᒃ, ᐁᑯᑕ ᓀᔥᑕ ᓂᓚ ᑫ ᐃᑖᔮᓐ᙮
ᐊᓇ ᐊᑐᔅᑫᓛᑲᓐ ᐁᑳ ᐁ ᑮ ᑭᑎᒫᑫᓕᑖᑯᓯᑦ
21ᐁᑯ ᐱᑕᕐ ᐱᐁᒋ ᓈᑖᑦ, ᑮ ᐃᑗᐤ ᒫᑲ, ᑌᐯᓕᒋᑫᔭᓐ, ᑖᓐᑕᑡᐤ ᑫ ᐌᐯᓕᑕᒪᐗᒃ ᓂᒋᔖᓐ ᐁ ᐗᓂᑐᑕᐎᑦ? ᐱᓕᔥ ᓂᔂᔀᐤ ᓈ?
22ᒋᓴᔅ ᐃᑌᐤ, ᓇᒪᐎᓚ ᐱᓕᔥ ᓂᔂᔀᐤ ᐱᑯ ᑭᑦ ᐃᑎᓐ; ᒫᑲ, ᐱᓕᔥ ᓂᔂᓱᒥᑕᓇᐗᐤ ᓂᔂᔅ᙮ 23ᐁᐗᑯ ᐅᒋ ᑭᒋᑭᔑᑳᐎ ᐅᑭᒫᐎᐎᓐ ᐃᔑᓈᑾᓐ ᑖᐱᔅᑯᒡ ᐯᔭᒃ ᑭᒋᐅᑭᒪᐤ, ᐁ ᐎ ᐊᑭᑕᒸᑦ ᐃᔥᐱᔥ ᑫ ᑎᐸᐊᒫᑯᔅᐸᓐ ᐅᑦ ᐊᑑᔅᑫᓛᑲᓂᒪ᙮ 24ᐃᔅᐱ ᒫᑲ ᒥᐋᒋ ᐊᑭᑖᓱᑦ, ᐯᔭᒃ ᑮ ᐯᑐᐗᐤ ᑫ ᑎᒪᐊᒫᑯᔅᐸᓐ ᒥᑖᑡᐤ ᑭᒋᒥᑖᑐᒥᑕᓇᐤ ᑖᓕᓐᑕ: 25ᒫᑲ ᐁᑳ ᑫᒀᓕᐤ ᐁ ᐋᔮᑦ ᑭᒋ ᑎᐸᐊᒫᑫᑦ, ᐅᑦ ᐅᑭᒫᒪ ᑮ ᐃᑕᔓᐌᓕᐗ ᑭᒋ ᐊᑖᐙᑲᓂᐎᑦ, ᓀᔥᑕ ᐎᐗ, ᓀᔥᑕ ᐅᑦ ᐊᐙᔑᒥᔕ, ᓀᔥᑕ ᒥᓯᐌ ᑳ ᐃᔑ ᐋᔮᑦ ᑭᒋ ᐅᒋ ᑎᐸᐊᒫᑯᑦ᙮ 26ᐊᓇ ᐊᑑᔅᑫᓛᑲᓐ ᒫᑲ ᑮ ᐸᑭᔑᓐ ᐁ ᐅᑎᑕᐲᔅᑕᐙᑦ, ᐁ ᐃᑗᑦ, ᑌᐯᓕᒋᑫᔭᓐ, ᐁᔑᓇᐋᐃᓐ ᐁᑯ ᒫᑲ ᒥᓯᐌ ᑫ ᑎᐸᐊᒫᑖᓐ᙮ 27ᐁᑯ ᐊᓇ ᐊᑑᔅᑫᓛᑲᓐ ᐅᑦ ᐅᑭᒫᒪ ᑭ ᑭᑎᒫᑫᓕᒥᑯ, ᑭ ᐋᐸᐅᑯ ᒫᑲ, ᓀᔥᑕ ᑭ ᐌᐯᓕᑕᒫᑯ ᒥᓯᐌ ᐅ ᒪᓯᓇᐃᑲᓐ᙮
28ᒫᑲ ᐁᐗᑯ ᐊᑑᔅᑫᓛᑲᓐ ᑮ ᐗᓚᐎᐤ, ᑮ ᒥᔅᑲᐌᐤ ᒫᑲ ᐯᔭᒃ ᐎᒋᐊᑑᔅᑫᓛᑲᓇ, ᑫ ᑎᐸᐊᒫᑯᔅᐸᓐ ᒥᑖᑐᒥᑕᓇᐤ ᔔᓕᐋᓈᐱᔅᑯᔕ; ᑮ ᐅᑎᑎᓀᐤ ᒫᑲ, ᐁ ᓴᑭᑯᑕᔅᑴᓈᑦ, ᐁ ᐃᑖᑦ ᒫᑲ, ᑎᐸᐊᒫᐎᓐ ᑫ ᑎᐸᐸᒪᐎᔭᐸᓐ᙮ 29ᐎᒋᐊᑑᔅᑫᓛᑲᓇ ᒫᑲ ᑮ ᐸᑭᔑᓂᓕᐗ ᐅᓯᑎᒃ, ᑭ ᓇᑐᑕᒫᑯ ᒫᑲ, ᐁ ᐃᑎᑯᑦ, ᐁᔑᓇᐙᐃᓐ, ᐁᑯ ᒫᑲ ᒥᓯᐌ ᑫ ᑎᐸᐊᒫᑖᓐ᙮ 30ᓇᒪᐎᓚ ᒫᑲ ᐎ ᑐᑕᒻ: ᒫᑲ ᑮ ᓇᑕᐎ ᐌᐱᓀᐤ ᑭᐸᐅᑐᐎᑲᒥᑯᒃ, ᐹᑎᒫ ᑮ ᑎᐸᐊᒥᓕᒋ ᐅ ᒪᓯᓇᐃᑲᓐ᙮ 31ᐃᔅᐱ ᒫᑳ ᐎᒋᐊᑑᔅᑫᓛᑲᓇ ᐎᐋᐸᑕᒥᓕᒋ ᑳ ᑐᒋᑳᑌᓕᒃ, ᓈᔅᐱᒡ ᑮ ᒥᒋᓚᐌᓯᓕᐗ, ᑮ ᐯᒋ ᐎᑕᒪᐌᓕᐗ ᒫᑲ ᐅᑦ ᐅᑭᒫᒥᓕᐗ ᒥᓯᐌ ᑳ ᑐᒋᑳᑌᓕᒃ᙮ 32ᐁᑯ ᒫᑲ ᐅᑦ ᐅᑭᒫᒪ, ᐃᔅᐱ ᑳ ᑮ ᓇᑐᒥᑯᑦ, ᑮ ᐃᑎᑯ, ᐅ ᑭᓚ ᒪᒋ ᐊᑑᔅᑫᓛᑲᓐ, ᑭ ᑮ ᐌᐯᓕᑕᒫᑎᓐ ᒥᓯᐌ ᑭ ᒪᓯᓇᐃᑲᓐ, ᐁ ᑮ ᐸᑯᓭᓕᒥᔭᓐ: 33ᓇᒪ ᓈ ᑭ ᑳ ᑮ ᑭᑎᒫᑭᓇᐗᑖᔾ ᑮᒋᐊᑑᔅᑫᓛᑲᓐ ᑖᐱᔅᑯᒡ ᑳ ᐃᔑ ᑭᑎᒫᑭᓈᑖᓐ? 34ᐅᑦ ᐅᑭᒫᒪ ᑭ ᑭᓯᐙᓯᓕᐗ, ᑮ ᐸᑭᑎᓂᑯ ᒫᑲ ᐅᓇᓀᑳᒋᐃᐌᐗ ᐅᒋᒋᓖᒃ, ᐹᑎᒫ ᑮ ᑎᐸᐊᑫ ᒥᓯᐌ ᑳ ᐃᔑ ᒥᓯᓇᐃᑫᑦ᙮
35ᐁᑯ ᓀᔥᑕ ᓄᑖᐎ ᑭᒋᑭᔑᑯᒃ ᑳ ᐃᑖ ᑫ ᐃᔑ ᑐᑖᑖᒃ, ᑮᔥᐱᓐ ᐁᑳ ᑭᑌᐃᐙᒃ ᐅᒋ ᐌᐯᓕᑕᒪᐌᑾᐌ ᑭᒋᔖᓂᐙᐗᒃ ᐁ ᐗᓂᑐᑖᑖᑾᒃ᙮
Pilihan Saat Ini:
ᐅᐸᓓᑭᔅ ᒫᑎᐤ 18: MCNT91
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The text of the Bible in Moose Cree is in the public domain.
Moose Cree New Testament © Canadian Bible Society, 1991.
