Luke 14
14
1တဘျီဖဲမုၢ်အိၣ်ဘှံးအနံၤတနံၤနဲၢ်, ယ့ၣ်ရှူးလဲၤလိ ဘၠီၣ်ဖၤရံၤရှဲအခွိၣ်အနၢ်အကျၣ်တဂၤအဟံၣ်ဒ်သိး အကအီၣ်တၢ်လါဘၠီၣ်ထီဖူၣ်ထီခၠၢတလိၣ်ကွၢ်ကိးသုၣ်အီၤလိ. 2ဘၠီၣ်လိ အစုၣ်ညွိးခီၣ်ညွိးတဂၤဟဲလိ ယ့ၣ်ရှူးအအိၣ် 3ဘျီး ယ့ၣ်ရှူးကတိၤထီၣ်တၢ်ဘျီး သ့းကွၢ်သရၣ်သိၣ်လိလ့ၤတၢ်သိၣ်တၢ်သီတလိၣ်, လါဘၠီၣ်ဖၤရံၤရှဲတလိၣ်, ‘တၢ်မၤဟါမၢ်ဂ့ၤတၢ်လိ မုၢ်အိၣ်ဘှံးနံၤနဲၢ်, ပတၢ်သိၣ်တၢ်သီဟ့အခွဲးမီဧါ. မဲၢ်တမဲၢ်တဟ့ဝဲလဲၣ်.’ 4လၢၤဘျီး အဝဲဝီၤ တစံးဆၢတၢ်နီတခါဘၣ်. ယ့ၣ်ရှူးဟံးဃၤဘၠီၣ်တဂၤနဲၢ်, မၤဟါမၢ်အီၤဘျီး မၢအက့ၤအီၤလိ. 5တုၤနုၤတဘျီ အဝဲ စံးဘၣ်အဝဲဝီၤ, ‘သုဝဲအကျၣ်တဂၤဂၤသုမဲၢ်အိၣ်လါဖွိခွါတဂၤမဲၢ်တမဲၢ် ပွိၢ်တဒုၣ်လိ အလီၤတ့ၤနုလိထံပူၤလိ မုၢ်အိၣ်ဘှံးနံၤနဲၢ်, မဲၢ်သုတထူးထီၣ်ဂ့ၤအီၤတဘျီဃီဖဲမုၢ်အိၣ်ဘှံးနံၤနဲၢ်ဘၣ်ဧါ.’ 6လၢၤဘျီး အဝဲဝီၤစံးဆၢဂ့ၤအီၤဘၣ်ဃးတၢ်ဂ့ၢ်တမံၤအံၤနဲၢ်တသ့းဘၣ်. 7ယ့ၣ်ရှူးပၤသူၣ်ပၤသးဝဲဒၣ်လိ ပှၤတမှံၤတပျီၤတနီၤဃုထၢတၢ်လီၢ်တၢ်ကျဲၣ်အဂ့ၤကတၢၢ်လိ အကဆ့နီၤဝဲအဂီၢ်,တၢ်အံၤဘျီးအဝဲဒၣ်စံးဘၣ်အဝဲဝီၤလိ တၢ်ကတိၤဒိတထ့ၣ်အံၤလိ. 8‘ဖဲနဘၣ်တၢ်ကွဲးနၤလိ ဘၠီၣ်တဂၤဂၤတၢ်ဖျီအမူးတမူးနဲၢ်, တဘၣ်ဆ့နီၤလိ တၢ်လီၢ်အဂ့ၤကတၢၢ်တဂ့ၤ. တၢ်ကမၤဘၣ်မွိအသးလိ ဘၠီၣ်အကါဒွိၣ်နဲၢ်နၤတဂၤဘၣ်တၢ်ကွဲပၤစၢၤအီၤနဲၢ်နဲၢ်လိ. 9ဘျီးဟံၣ်ကစၢ်လိအကွဲသုဝဲခံဂၤ ဟူၤနဲၢ်ကဟဲလိ နအိၣ်ဘျီး စံးဝဲ, ‘ပျဲအဝဲဒၣ်ဟံးန့ၢ်တၢ်လီၢ်အဝဲအံၤတကဲၢ် နဲၢ်လိ. တုၤနုၤတဘျီ နမံၤကဆှးလါ နကဘၣ်ဆ့နီၤက့ၤဝဲလိ တၢ်လီၢ်အဖုၣ်ကတၢၢ်လိ. 10မဲၢ်မဲၢ် ဖဲတၢ်ကွဲနၤနဲၢ်, လဲၤဘျီး ဆ့နီၤလိ တၢ်လီၢ်လိ အဖုၣ်ကတၢၢ်, ဒ်သိး ဟံၣ်ကစၢ်လိ တၢ်ကွဲနၤ တဂၤနဲၢ် ကဟဲလိ နအိၣ်ဘျီး စံးဝဲ, ‘မံဖီၣ်ဧိ, ဟဲထီၣ်ဆ့နီၤလိတၢ်လီၢ်အဂ့ၤတကဲၢ်.’ အနံၤဘျီး နကဒိးန့ၢ်တၢ်လၤတၢ်ကပီၤ လိပှၤတမှံၤအဂၤခဲလုၤ အမံၤညါလိ. 11တၢ်ဂ့ၢ်ဒ့းအ့ၤ ဘၠီၣ်တဂၤလၢ်လၢ်လိ အဆီၣ်လီၤအသးနဲၢ်, ကဘၣ်တၢ်ပၤထီၣ်ထီအီၤလိ.’ 12အနံၤဝံၤဘျီး ယ့ၣ်ရှူးစံးဘၣ်ဟံၣ်ကစၢ်လိ အတူၤလိၤအီၤတဂၤနဲၢ်, ‘ဖဲနကတဲၤကတီၤမုၢ်ဆါခိအတၢ်အီၣ်မဲၢ်တမဲၢ် ဟါအတၢ်အီၣ်နဲၢ်, နမံဖီၣ်တလိၣ် မဲၢ်ဂ့ၤ, နထီပုၢ်ဝဲၢ်တလိၣ်မဲၢ်ဂ့ၤ, နမုၢ်နခွါတလိၣ်မဲၢ်ဂ့ၤ, တၢ်ဂ့ၢ်ဒ့းအ့ၤအဝဲဝီၤ ကကွဲးခွိၣ်ခံဂ့ၤနၤ ဘျီးလိ ကျဲၣ်ဒ့းအ့ၤအပူၤ, နကဘၣ်တၢ်ဟ့ဘူးဟ့လဲနၤလိ တၢ်လိ နမၤဝဲအဃိနဲၢ်လိ. 13မဲၢ်မဲၢ်ဝဲဒ့းအ့ၤ, ဖဲနကတဲၤကတီၤတၢ်အီၣ်တၢ်အိအမူးနဲၢ်, ကွဲဘၠီၣ်ဖှီၣ်ဖွိယၤဖွိ, ဘၠီၣ်ဃ့းဘၠီၣ်ကွဲၣ်, ဘၠီၣ်ခီၣ်တဂ့ၤလါဘၠီၣ်မံၤဘျိၣ်တလိၣ်နဲၢ်တကဲၢ်. 14ဘျီးနကဘၣ်တၢ်ဆိၣ်ဂ့ၤနၤလိ. တၢ်ဂ့ၢ်ဒ့းအ့ၤ, အဝဲဝီၤဟ့ဆၢဂ့ၤနၤတသ့းဘၣ်. ဖဲဘၠီၣ်ဂ့ၤဘၠီၣ်ဝၣ်တလိၣ်ဂ့ၤထ့ဂ့ၤလိ တၢ်သ့း အဆၢကတီၢ်နဲၢ် နကဘၣ်တၢ်ဟ့ဘျုးဂ့ၤနၤလိ ကစၢ်ယွၤလိ.’ 15ဖဲဘၠီၣ်လိ အဆ့နီၤဖဲစီၤနီၤခွိၣ်အကျၣ်တဂၤနၢ်ဟူတၢ်ကတိၤအဝဲအံၤနဲၢ်, အဝဲဒၣ်စံးဘၣ်ယ့ၣ်ရှူး, ‘ဘၠီၣ်လိ အကဆ့နီၤအီၣ်တၢ်လိ စီၤနီၤခွိၣ်လိ ကစၢ်ယွၤအဘီအမုၢ်အပူၤတလိၣ်နဲၢ်, ဘၣ်ဆိၣ်ဂ့ၤဝဲထဲလဲၣ်ခိလဲၣ်.’ 16ယ့ၣ်ရှူးစံးဘၣ်ဝဲ, ‘တဘျီဘၠီၣ်တဂၤအိၣ်လါတၢ်အီၣ်အမူးဖးဒွိၣ်တမူးဘျီး အဝဲဒၣ်ကွဲနီၢ်ကွဲသ့းဘၠီၣ်လိ. 17ဖဲတၢ်အီၣ်အမူးအခါတုၤဂီၤနဲၢ်, အဝဲဒၣ်ဆှၢလီၤ အခ့အပှၤဒ်သိး အကစံးဘၣ်ဘၠီၣ်လိ အဘၣ်တၢ်ကွဲအီၤတလိၣ်, ‘ဟဲဘၣ်တကဲၢ်, တၢ်ခဲလုၤအိၣ်ကတဲၤကတီၤအသးလ့.’ 18လၢၤဘျီး အဝဲဝီၤ ကိးဂၤဒ့း, တဂၤဘၣ်တဂၤ, ဟ့ထီၣ်အတၢ်ဂ့ၤတၢ်ကျိၤလိၣ်လိ တၢ်ကပလၢ်လီၤကွံၤအီၤ အဂီၢ်လိ. ဘၠီၣ်အဆိကတၢၢ်တဂၤစံးဘၣ်တၢ်ခ့တၢ်ပှၤ, ‘ယပှ့ၤစံၤတလီၢ်, ဘျီး ယကဘၣ်လဲၤကွၢ်အီၤလိ. ဝံသးစူၤဘၣ်ယၤတကဲၢ်. 19ဘၠီၣ်အဂၤတဂၤ စံးဝဲ, ‘ယပှ့ၤပွိၢ်ယဲၢ်စူၢ်, ဘျီးယကလဲၤမၤကွၢ်အီၤခဲနဲအံၤလိ. ဝံသးစူၤဘၣ်ယၤတကဲၢ်.’ 20ဘၠီၣ်အဂၤတဂၤစံးဝဲ, ‘ယဖျီလ့ယသးဝံၤသီဝဲလိ. လိတၢ်နံၤအဃိ ယဟဲဝဲတသ့းဘၣ်.’ 21တၢ်ခ့တၢ်ပှၤက့ၤခွိၣ်ခံဂ့ၤဘျီး စံးဘၣ် အကစၢ်လိ တၢ်မၤအသးဒ့းအ့ၤခဲလုၤလိ. ဟံၣ်ကစၢ်အသူၣ်ဒွိၣ်သးဖျိးဘျီး စံးဘၣ်အခ့အပှၤ, ဟးထီၣ်ကမ့းကမွိလိ ဝ့ၢ်အကျဲၣ်မုၢ်ခွိၣ်ဘျီး ကျဲၣ်ဖွိတလိၣ်လါ ဟဲက့ၤကိးဘၠီၣ်ဖှီၣ်ဘၠီၣ်ယၤ, ဘၠီၣ်ဃ့းဘၠီၣ်ကွဲၣ်, ဘၠီၣ်မံၤဘျိၣ်, ဘျီးဘၠီၣ်ခီၣ်ဒ့ဟးဂီၤတလိၣ်နဲၢ်တကဲၢ်. 22တယံၤဘၣ်ဘျီးတၢ်ခ့တၢ်ပှၤနဲၢ်စံးဝဲ, ‘တၢ်ဒွိၣ်ဧိ, ဒ်နမၢလီၤနကလုၢ်အသိးနဲၢ်, တၢ်မၤလိထီၣ်ပှဲၤထီၣ်လ့အီၤလ့. လၢၤဘျီးတၢ်လီၢ်လီၤဟိဒံးဝဲလိ.’ 23လိတၢ်နံၤအဃိ ကစၢ်စံးဘၣ်အခ့အပှၤ, ‘လဲၤလိ ဒူသဝီကျဲၣ်မုၢ်ဒွိၣ်ဘျီး ကျဲၣ်ဖွိတလိၣ်ဘျီး မၢဘၠီၣ်ဟဲဒ်သိး ယဟံၣ်ကပှဲၤအဂီၢ်နဲၢ်တကဲၢ်. 24ယစံးဘၣ်သု, ဘၠီၣ်လိအဘၣ်တၢ်ကွဲအီၤတလိၣ်တလ့ၣ် ကွၢ်ဘၣ်ဟါအတၢ်အီၣ်နီတဂၤဘၣ်.’ 25ဘၠီၣ်ထီဖူၣ်ထီခၠၢဖးဒွိၣ် လဲၤဟူၤပကိး ယ့ၣ်ရှူးလိ. အဝဲဒၣ်ဃၣ်ဂီၤအသးလိ အအိၣ်, ဘျီး စံးဘၣ်အီၤ. 26ဘၠီၣ်တဂၤလၢ်လၢ်လိ အဟဲလိ ယအိၣ်နဲၢ်, မဲၢ်တမဲၢ်လိ အဝဲဒၣ်အဲၣ်ယၤဒွိၣ်နဲၢ်အပၢ်လါ အမွိၢ်, အမါလါ အဖွိအလ့ၤတလိၣ်, အထီပုၢ်ဝဲၢ်ခွါတလိၣ်ဘျီး အထီပုၢ်ဝဲၢ်မုၣ်တလိၣ်, ဘျီး အနီၢ်ကစၢ်ဒၣ်ဝဲနဲၢ်နဲၢ်ဘၣ်ဘျီး, ကဲၣ်ယခ့ယပှၤတသ့ဘၣ်. 27ဘၠီၣ်တဂၤလၢ်လၢ်လိ အတဝ့အထူၣ်စုညါဒၣ်ဝဲဘျီး ပိၤယခံနဲၢ်, ကဲၢ်ယခ့ယပှၤတသ့းဘၣ်. 28သုဝဲအကျၣ်တဂၤမဲၢ်ကူၣ်ထီၣ်ဖးလီၤလိ အဘှီၣ်ထီၣ်တၢၢ်ဖးထိတဖျၢၣ်နဲၣ် အဝဲကဆ့နီၤဆိဝဲ, ဘျီးဒွးကွၢ်ဝဲအပှ့ၤကလံၤကလီၤတ့ၤထဲလဲၣ်ခိဘျီး ဒ်သိး အကထ့ၣ်ဘၣ်ဝဲလိ အကမၤဝဲတုၤလိ အကတၢၢ်အဂီၢ်အစ့ၣ်လၢတလၢနဲၢ်ကဘၣ်မၤဝဲလိ. 29အဝဲမဲၢ်တမၤဒ့းန့ၤဘျီးပၤလီၤဝဲ လၢၢ်ခီၣ်ထံးဝံၤ အလီၢ်ခံ ဘှီၣ်ဝံၤဂ့ၤအတၢၢ်ဖးထိတသ့ဘၣ်သတးဘျီ, ဘၠီၣ်ကိးဂၤဒ့းလိ အထ့ၣ်ဘၣ်တၢ်မၤအသးတလိၣ်ကန့ၤဘၣ်ဖၣ်လဲအီၤလိ. 30အဝဲဝီၤကစံးဝဲ, ‘ဘၠီၣ်တဂၤအံၤစးထီၣ်သူၣ်ထီၣ်တၢ်လၢၤဘျီး မၤဝံၤဂ့ၤဝဲ တသ့းဘၣ်.’ 31စီၤပၤတဂၤမဲၢ်ဟးထီၣ်ဘျီး ဘၠီၣ်အဂၤတကလၣ် ဒ်သိးအကဒူးစီၤပၤအဂၤတဂၤလိ အဟဲ ထီဒါအီၤအိၣ်လါဘၠီၣ်အဂၤခံကလၣ်နဲၢ်, အဝဲဒၣ်ကဆ့နီၤဆိဘျီး ကွၢ်ဆိကမိၣ်ဘၣ်ဃးအဂံၢ်အဘါလိ အကကွၢ်လွိၤသးအမံၤလိ စီၤပၤအဂၤတဂၤ အဂီၢ်အိၣ်တအိၣ်လဲၢ်အဂ့ၢ်နဲၢ်လိ. 32အဝဲအဂံၢ်အဘါ မဲၢ်တအိၣ်နဲၢ်, ကဆှၢလီၤဝဲကလူးစိၤတၢ်ကစီၣ်တလိၣ်ဒ်သိး အကထ့ၣ်လွိၤအသးလါစီၤပၤအဂၤတဂၤနဲၢ်ဖဲအအိၣ်ဒံးလိ ကျဲၣ်ဖးထိအဖၢမုၢ်, ဘျီး ကကတိၤတၢ်ဘၣ်ဃးတၢ်ဃူတၢ်ဖှိၣ်အဂ့ၢ်နဲၢ်လိ. 33ယ့ၣ်ရှူးမၤကတၢၢ်တၢ်ဂ့ၢ်တမံၤအံၤဘျီး စံးဝဲ, ‘ဒ့းန့ၤအသိး မဲၢ်တမဲၢ်လိ သုဟ့လီၤကွံၤတၢ်လိ အအိၣ်လါသုခဲလုၤဘၣ်ဘျီး, သုကဲၣ်ထီၣ်ယခ့ယပှၤတသ့းနီတဂၤဘၣ်. 34အံသၣ်နဲၢ် မဲၢ်တၢ်လိ အဂ့ၤလိ. လၢၤဘျီးအံသၣ်အဟီမဲၢ်ဟါမၢ်ကွံၤနဲၢ်, တၢ်မၤဟီထီၣ်ဂ့ၤအီၤကသ့းဝဲဒ်လဲၣ်ခိ. 35လိဟီၣ်ခွိၣ်အဂီၢ် မဲၢ်ဂ့ၤဟီၣ်ခွိၣ်ညၣ်ထ့ၣ်အဂီၢ်မဲၢ်ဂ့ၤ, အဘျုးအဖှိၣ်တအိၣ်နီတမံၤဘၣ်. ဘျီးဘၠီၣ်စူးကွံၤအီၤလိ. ဘၠီၣ်အိၣ်လါ အနၢ်လိ အနၢ်ဟူတၢ်သ့နဲၢ် မ်အဒိကနၣ်တၢ်တကဲၢ်.
Pilihan Saat Ini:
Luke 14: ktpv-rv
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
