Luke 13
13
1ဆၢကတီၢ်အဝဲနံၤ, ဘၠီၣ်အိၣ်ဝဲဒၣ်တနီၤလိ အစံးဘၣ် ယ့ၣ်ရှူးဘၣ်ဃးလါ ဘၠီၣ်ကၤလံၤလါဖွိတလိၣ်လိ စီၤပံၤလး မၤသ့းနီၢ်ဝဲလိ အဝဲဝီၤ လုၢ်ထီၣ်ပၤထီၣ်တၢ်လိ ကစၢ်ယွၤ အအိၣ်အဖၢမုၢ်အဂ့ၢ်နဲၢ်လိ.’ 2ယ့ၣ်ရှူးစံးဆၢ အဝဲဝီၤ, ‘မဲၢ်လိ ဘၠီၣ်ကၤလံၤလါဖွိတလိၣ်လိ, ဘၣ်တၢ်မၤသ့းအီၤလိ ကျဲၣ်ဒ့းန့ၤအဃိ, သုဆိကမွိၣ်မဲၢ်တၢ်အုၣ်အသးလိ အဝဲဝီၤ မဲၢ်ဘၠီၣ်တၢ်ဒဲးဘးဖွိအအၢၣ်နဲၢ်ဒံးဘၠီၣ်ကၤလံၤလါဖွိအဂၤတလိၣ်နဲၢ်ဧါ. 3တမဲၢ်ဘၣ်. ယစံးဘၣ်သုလိသုမဲၢ်တဃၤကွံၤလိ သုတၢ်ဒဲးဘးတလိၣ်ဘၣ်ဘျီး သုကသ့းသုဝဲကိးဂၤဒ့းဒ် အဝဲဝီၤသ့းဝဲအသိးလိ. 4ဘၠီၣ်တဆ့ဃီၣ်ဂၤလိအသ့းဝဲလိ တၢၣ်ဖးထိ ရှံလိၣ်လီၤပှီၤလိ အဖီခွိၣ်, တခိလဲၣ်. မဲၢ်သုဆိကမိၣ်လိ တၢ်မၤအသးတမံၤအံၤမဲၢ်တၢ်အုၣ်အသးလိ အဝဲဝီၤ အၢၣ်ဝဲသီဝဲ ဒွိၣ်နဲၢ်ဘၠီၣ်အဂၤတလိၣ်လိ အအိၣ်ပၤစၢၤလိ ဝ့ၢ်ယရူရှလ့ၣ်အပူၤနဲၢ်ဧါ. 5တမဲၢ်ဘၣ်ယစံးဘၣ်သုလိ သုမဲၢ်တဃၣ်ကွံၤလိသုတၢ်ဒဲးဘးတလိၣ်နဲၢ်, သုဝဲကိးဂၤဒ့း သုကသ့းဒ်သိး အဝဲဝီၤအသိးလိ.’ 6တုၤနုၤတဘျီး ယ့ၣ်ရှူးစံးဘၣ်အဝဲဝီၤလိ တၢ်ကတိၤဒိတထ့ၣ်အံၤလိ. ‘တဘျီလိ ဘၠီၣ်အတၤသၣ်လီၢ်အပူၤနဲၢ်, ချၢၣ်ဒၢၣ်အိၣ်သူၣ်လီၤအသးတခွိၣ်လိ. အဝဲဒၣ် လဲၤကွၢ်ချုးချၢၣ်ဒၢၣ်သၣ်လိ အလိၤလၢၤတထ့ၣ်နဲၢ်ဝဲနီတဖျၢၣ်ဘၣ်. 7လိတၢ်နံၤအဃိ, အဝဲဒၣ်စံးဘၣ်အပှၤပၢၤတၤသၣ်လီၢ်နဲၢ်, ‘ကွၢ်တကဲၢ်. လိသၢနံၣ်အတီၢ်ပူၤ ယဟဲဝဲဖဲအံၤဘျီး ကွၢ်ချုးချၢၣ်ဒၢၣ်သၣ်လိ ချၢၣ်ဒၢၣ်တခွိၣ်အံၤအလိၤ, ဘျီး ယတထ့ၣ်နဲၢ်ဝဲ နီတဖျၢၣ်ဘၣ်. ကူၤလီၤကွံၤအီၤတကဲၢ်. ဘၣ်မနီၢ်အဃိ ကဘၣ်အိၣ်နိးတၤဟီၣ်ခွိၣ်နဲၢ်လဲၣ်.’ 8လၢၤဘျီး ဘၠီၣ်ပၢၤတၤသၣ်လီၢ်စံးဆၢဝဲ, ‘တၢ်ဒွိၣ်ဧၢ, ပျဲအိၣ်ဒၣ်ကလိာ်အီၤထဲအအံၤတနံၣ်အံၤတကဲၢ်, ယကခူၣ်တၢ်ပူၤတရံးတံၢ်ပိၤအီၤဘျီး မၤပှဲၤအီၤလိ တၢ်အ့ၣ်လိ. 9သ့ၣ်နဲၢ်မဲၢ်သၣ်ထီၣ်တၤသၣ်လိ ခံတနံၣ်ဘျီး ကဂ့ၤဒွိၣ်ဒၣ်တၢ်တကဲၢ်လိ. မဲၢ်တသၣ်ထီၣ်ဘၣ်တခိ ကူၤလီၤကွံၤအီၤတကဲၢ်.’ 10ဘၣ်ဝဲမုၢ်အိၣ်ဘှံးနံၤတနံၤနဲၢ် ယ့ၣ်ရှူးသိၣ်လီၤသီလီၤတၢ်လိ ဘူၣ်ဘျီၣ်လိ အမဲၢ်တၢ်ဘါလီၢ်တဖျၢၣ်အပူၤလိ. 11ဘၠီၣ်မ့ၣ်ပှၢ်အိၣ်ဒၣ်ဖဲနံၤတဂၤလိ တၢ်နါဒိးအီၤဘျီး တၢ်ဆါဘၣ်ထီဃၤအီၤလိ တဆံဃိးနံၣ်အတီၢ်ပူၤလိ. အဝဲဒၣ် အပျိၢ်သကူးနီၢ်တုၤလိ ဆ့ထၢၣ်ဝဲလိၤလိၤတန့ၢ်ဘၣ်. 12ဘၠီၣ်မ့ၣ်ပှၢ်အိၣ်ဒၣ်ဖဲနံၤတဂၤလိ တၢ်နါဒိးအီၤဘျီး တၢ်ဆါဘၣ်ထီဃၤအီၤလိ တဆံဃိးနံၣ်အတီၢ်ပူၤလိ. အဝဲဒၣ် အပျိၢ်သကူးနီၢ်တုၤလိ ဆ့ထၢၣ်ဝဲလိၤလိၤတန့ၢ်ဘၣ်. 13အဝဲဒၣ် ပၤထီၣ်အစဒ့လိ အလိၤဘျီး တဘျီးဃီ, အဝဲဒၣ်အယီၢ်ဒ့ၣ်ပျိၢ်လိၤက့ၤဘျီးစံးပတြၢၤကစၢ်ယွၤလိ. 14ဘူၣ်ဘျီၣ်အခွိၣ် အသးထီၣ်လိ ယ့ၣ်ရှူးမၤဟါမၢ်နီၢ်တၢ်လိ မုၢ်အိၣ်ဘှံးနံၤအဃိလိ. လိ တၢ်နံၤအဃိ အဝဲဒၣ်ကတိၤထီၣ်တၢ်ဘျီး စံးဘၣ်ဘၠီၣ်ထီဖူၣ်ထီခၠၢတလိၣ်,‘မုၢ်နံၤမုၢ်သီအိၣ်ဝဲဒၣ်ဃုနံၤလိ ပဘၣ်ဖံးမၤတၢ်လိ. လိတၢ်နံၤအဃိ, ဟဲပကိးဝဲဖဲ မုၢ်နံၤမုၢ်သီတလိၣ်နဲၢ်လိ သုကဘၣ်တၢ်မၤဟါမၢ်သုအဂီၢ်နဲၢ်တကဲၢ်. မဲၢ်မဲၢ်လိ မုၢ်အိၣ်ဘှံးနံၤတနံၤနဲၢ် တဘၣ်မၤတၢ်တဂ့ၤ. 15ကစၢ်စံးဆၢဂ့ၤအီၤဘျီးစံးဝဲ, ‘ဘၠီၣ်ပၤမၤအသးလိၣ်ဧၢ, သုဝဲတဂၤဂ့ၤတဂၤဂ့ၤသုဘ့လီၤသုပွိၢ်မဲၢ်တမဲၢ် သုကသ့ၣ်ယီၤလိကပိၤပူၤဘျီး မိၤထီၣ်အီၤလိ တချၢဒ်သိးသုကဒွိးအိအီၤထံဖဲမုၢ်အိၣ်ဘှံးနံၤတမဲၢ်ဘၣ်ဧါ.’ 16ခဲနဲအံၤ, ဘၠီၣ်မ့ၣ်ပှၢ်လိ အမဲၢ်စီၤအၤဘြၤဟၣ်အစၢၤအသွဲၣ်အိၣ်ဝဲဒၣ်ဖဲအံၤတဂၤလိမုၣ်ကီၤလံၢ်ဖီၣ်ဃၤနီၢ်အီၤလိတၢ်စၢၣ်ဃၤအပူၤ, အိၣ်လ့တဆ့ဃိးနံၣ်လ့နဲၢ်လိ. ဘျီးဘၠီၣ်ဘၣ်မၤပူၢ်ဖျဲးထီၣ်ကွံၤအီၤလိအတၢ်စၢၣ်ဃၤအပူၤလိ မုၢ်အိၣ်ဘှံးနံၤနဲၢ်, တကြၢးတဘၣ်ဝဲဘၣ်.’ 17လိယ့ၣ်ရှူးအတၢ်စံးဆၢတထ့ၣ်အံၤအဃိ, အဒုၣ်အဒါခဲလုၤ အမံၤဆှးလီၤဂ့ၤပကိးအသး, မဲၢ်မဲၢ် ဘၠီၣ်ထီဖူၣ်ထီခၠၢခဲလုၤသးခူပကိးဝဲလိ ကယဲၢ်တၢ်မၤလီၤလိၢ်လီၤလၣ်လိ အမၤပၤစၢၤဝဲတလိၣ်အဃိနဲၢ်လိ. 18မၤသးဒ့းန့ၤဘျီး ယ့ၣ်ရှူးစံးဝဲ, ‘ကစၢ်ယွၤအဘီအမုၢ်နဲၢ်လီၤဂၤလါတၢ်မနီၢ်လဲၣ်. မဲၢ်မဲၢ်ယဘၣ်ထွိၣ်သတြီၤအီၤလိ မနီၢ်တမံၤလဲၣ်. 19မဲၢ်အလီၤဂၤလါသဘၣ်ချံတဖျၢၣ်လိ ဘၠီၣ်တဂၤဟံးန့ၢ်ဝဲဘျီး သူၣ်လီၤဝဲလိ အစံၤပူၤနဲၢ်လိ. တၢ်ချံနဲၢ်မဲထီၣ်ဘျီး ဒွိၣ်ထီၣ်, ဘျီးကဲၣ်ထီၣ်သ့ၣ်တခွိၣ်ဘျီး ထွိၣ်ဖွိလ့ၤဖွိတလိၣ်ဘှီၣ်ထီၣ်အသွံလိ အဒ့အကဆူးတလိၣ်အလိၤလိ. 20ယ့ၣ်ရှူးစံးသီတဘျီးဝဲ, ‘မဲၢ်ယကဒိလီၤကစၢ်ယွၤ အဘီအမုၢ်လိတၢ်မနီၢ်တမံၤလဲၣ်. 21မဲၢ်အလီၤဂၤလါ ကွိၣ်မံၤလိ ဘၠီၣ်မ့ၣ်ပှၢ်တဂၤဟံးနဲၢ်ဝဲ, ဘျီးကၠံၢ်ကၠါလုၢ်ဝဲလါကွိၣ်အကမူသၢသလီး တုၤအဖးထီၣ်ဝဲခဲလုၤလိ.’ 22ယ့ၣ်ရှူးလဲၤတၢ်လိဝ့ၢ်ယရူၤရှလ့ၣ်အကျဲၣ်နဲၢ်, အဝဲလဲၤခီဂၤဝ့ၢ်တလိၣ်လါသဝီတလိၣ်, ဘျီး သိၣ်လီၤသီလီၤတၢ်လိ. 23ဘၠီၣ်တဂၤသ့းကွၢ်ဝဲ, ‘ကစၢ်ဧၢ, ဘၠီၣ်လိအကဘၣ်တၢ်အုၣ်က့ၤခီၣ်က့ၤအီၤအိၣ်ဝဲစှၤဂၤလိဧါ.’ ယ့ၣ်ရှူးစံးဆၢအဝဲဝီၤ, 24ဂုၢ်ကျဲးစၢၤလဲၤနုသုဝဲလိ ကျဲၣ်ဆၢၣ်အအံၣ်နဲၢ်တကဲၢ်. တၢ်ဂ့ၢ်ဒ့းအ့ၤ, ဘၠီၣ်အိၣ်ဘျၢၣ်သးကကျဲးစၢၤဝဲ, လၢၤဘျီး လဲၤနုဝဲတန့ၢ်ဘၣ်. 25တုၤဟံၣ်ကစၢ်ဂ့ၤထ့ဘျီး ကးဘံအမူတြဲၤလ့နဲၢ်, သုကအိၣ်ဆ့ထၢၣ်လိ တၢ်ချၢဘျီး ဖဲသုဒွိးသီၣ်မူတြဲၤဘျီး စံးသုဝဲ, ‘ကစၢ်ဧၢ, အွိးထီၣ်မူတြဲၤလိ ပဂီၢ်တကဲၢ်.’ အဝဲဝီၤ ကစံးဆၢသု, ‘သုဟဲလိဘျီၣ်နဲၢ် ယတသံညါသုဘၣ်. 26‘တုၤနုၤတဘျီ သုကစံးဆၢဝဲ, ပအီၣ်ပကိးတၢ်လါနၤဘျီ နသိၣ်လီၤသီလီၤတၢ်လိ ပဝ့ၢ်ပူၤလိ.’ 27လၢၤဘျီး အဝဲဒၣ်ကစံးဆၢသုအသီတဘျီ, ‘သုဟဲလိ ဘျီၣ်နဲၢ် ယတသံညါသုဘၣ်. သုဝဲလိၣ်လိ အမၤတၢ်အၢၣ်တၢ်သီလိၣ်ဧၢ, ဟးထီၣ်ကွံၤလိ ယအိၣ်တကဲၢ်.’ 28တုၤသုထ့ၣ်ဘၣ်စီၤအၤဘြၤဟၣ်, စီၤအံၤစဲး, လါ စီၤယၤကိာ်လါဝံခဲလုၤအိၣ်လိ ကစၢ်ယွၤအဘီအမုၢ်အပူၤ, ဖဲသုဝဲတခိသုဘၣ်ညိကွံၤသုလိ တၢ်ချၢနဲၢ်, သုကအိၣ်လါတၢ်ဟီၣ်တၢ်ယၢၤ, ဘျီးတၢ်မဲအ့ၣ်တဃံးဆံးဒိၣ်လဲၣ်. 29ဘၠီၣ်ကဟဲလိမုၢ်ထီၣ်မုၢ်နုၤ, လိကလ့းစိလါ ကလ့ၤထ့း, ဘျီးဆ့နီၢ်လိစီၤနီၤခွိၣ်လိ အကစၢ်ယွၤအဘီအမုၢ်အပူၤလိ. 30တုၤနုၤတဘျီ, ဘၠီၣ်လိအအိၣ်လိခံကတၢၢ်ခဲနဲအံၤတလိၣ်, ကအိၣ်ဂ့ၤဝဲလိတၢ်မံၤညါကတၢၢ်, ဘျီးဘၠီၣ်လိ အအိၣ်လိ တၢ်မံၤညါကတၢၢ်ခဲနဲအံၤတလိၣ်, ကအိၣ်ဂ့ၤဝဲလိခံကတၢၢ်လိ.’ 31တဘျီ ဖဲနံၤ, ဘၠီၣ်ဖၤရံၤရှဲတနီၤ ဟဲလိ ယ့ၣ်ရှူးအအိၣ်ဘျီး စံးဘၣ်အီၤ ,‘နကဘၣ်ဟးထီၣ်ကွံၤခဲနဲအံၤ, ဘျီး လဲၤလိ တၢ်လီၢ်တၢ်ကျဲၣ်အဂၤတလိၣ်, တၢ်ဂ့ၢ်မဲၢ်လိစီၤပၤဟ့ၤရိာ်အဲၣ်ဒိးမၤသ့းနၤအဃိနဲၢ်လိ.’ 32ယ့ၣ်ရှူးစံးဆၢအဝဲဝီၤ, ‘လဲၤစံးဘၣ် ထွံၣ်ဟီၣ်ခွိၣ်အဝဲနဲၢ်, ယနီဟါထီၣ်ကွံၤတၢ်နါတလိၣ်, ဘျီးမၤဟါမၢ်တၢ်ဆူးတၢ်ဆါတလိၣ်အံၤဘျီခီၣ်ဒၣ်, လိကဲဝိၤနံၤဘျီး သၢနံၤတနံၤနဲၢ် ယကမၤဝံၤယတၢ်ဖံးတၢ်မၤလိ. 33မဲၢ်ဒ့းန့ၤဘျီး, တနံၤအံၤ, ကဲဝိၤနံၤဘျီးလိ ခံတနံၤနဲၢ်, ယကဘၣ်လဲၤတၢ်လိ, တၢ်ဂ့ၢ်ဒ့းအ့ၤမဲၢ်တမဲၢ်လိ ဝ့ၢ်ယရူရှလ့ၣ်ဘၣ်ဘျီး, ဝံတဂၤတကြၢးဘၣ်တၢ်မၤသ့းအီၤလိ တၢ်လီၢ်နီတတီၢ်ဘၣ်. 34ယရူၤရှလ့ၣ်ဧၢ, ယရူၤရှလ့ၣ်ဧၢ, နမၤသ့းဝံတလိၣ်, ဘျီး ဘၠီၣ်စိၤတၢ်ကစီၣ်လိ ကစၢ်ယွၤဆှၢလီၤဝဲလိ နအိၣ်တလိၣ်နဲၢ်, နကွံၤသ့းအီၤလိလၢၢ်လိ. ဆၢကတီၢ်အိၣ်ဝဲအဘျီတလိၣ်အဘျီဖဲယသးအိၣ်ဖီၣ်ဃူနဘၠီၣ်ထီဖူၣ်ထီခၠၢတလိၣ်, ဒ်ဆီမွိၢ်ပှၢ်တဘ့ၣ်ဒွိးအိၣ်ဖှိၣ်အဖွိတလိၣ်လိ အဒံးဆံအဖီလၤနဲၢ်အသိး, လၢၤဘျီး နတပျဲယၤဘၣ်. 35ဘျီးလိတၢ်နံၤအဃိ, နတၢ်လုၢ်ဟံၣ်ကဘၣ်တၢ်လဲၤသဒါကွံၤအီၤလိ. ယစံးဘၣ်သု, တုၤလီၤဆၢကတီၢ်ဖဲသုစံးသုဝဲ, ‘မ်ကစၢ်ယွၤဆိၣ်ဂ့ၤဘၣ်ဘၠီၣ်တဂၤလိအဟဲလိ ကစၢ်အမံၤတကဲၢ်. အနံၤဘျီး, သုတထ့ၣ်ဘၣ်ယၤဘၣ်.’
Pilihan Saat Ini:
Luke 13: ktpv-rv
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
