OODEZHECHEGAWINEWAH 8
8
1Saul dush keweedookahzoo uhpe kahnesemind enewh Stephenun. Ewh dush uhpe kekeche‐mekinjeähwug egewh anuhmeähjig ewede Jerusaleming kahahyahjig; keëzhesuhswashkahwahwug emuh anegookekummegaug Judæa kuhya Samaria duhzhe uhkee, egewh atuh apostleüg kahween.
2Ahnind dush manoo‐ahnuhmeähjig oogemahjewenahwaun enewh Stephenun, oogekeche‐mahwemahwaun dush.
3Saul dush oogekuhgwahnesugge‐mujje‐doodahwaun enewh anuhmeähnejin, kepeendega emuh anduhching wegewauming, kahtuhkoonaud dush enewh enenewun kuhya enewh equawun, oogeähsaun emuh kebahquahoode‐weguhmigoong.
4Egewh dush kahsuhswashkahwindjig kepahbahkuhgequawug anegookookummegaug uhkee, kedebahdooduhmoowaud ewh ekedoowin.
5Me dush uhpe keëzhaud owh Philip ewede Samariäïng duhzhe keche‐oodanaung, kekuhgekemaud dush enewh ahnishenahban, kedebahjemaud enewh Christun.
6Kuhkenuh dush egewh ahnishenahbag mahmahwe oogebezindahnahwah oonoo uhyeëen kahekedoonid enewh Philipun, kahnoondahwahwaud kuhya kahwahbunduhmoowaud enewh mahmaundahwejegunun kahezhecheganid.
7Egewh muh wahnezejig muhnedoog, kahkeche‐pepahgewaud, oogesahgejenuhwashkahwahwaun nebewah enewh kahkekishkahgoowahjin, nebewah dush kahneboowahpenajig, kuhya kahahchahoosajig, kenoojemooähwug.
8Kekeche‐duhgoomahgud moojegezewin emuh keche‐oodanaung.
9Keähyah suh pazhik enene, Simon azhenekahzood, kuhyet ewede oodanaung kahduhzhe‐chesuhkeegoobunan, kemahmahkahdanemegood enewh Samariäing duhzhe ahnishenahban, keëdezood chekeche‐ahpetandahgoozid:
10Mesuh oonoo kuhkenuh kahbezindahwahwahjin, agahsheëjig kuhya kache‐ahyahahwejig, oo‐oo keëkedoowaud, Mahbuh enene ahwe ookeche‐mushkahwezewin owh Kesha‐Muhnedoo.
11Oogebezindahwahwaun dush, kemahmahkahdanemahwaud kechesuhkeenid.
12Uhpe dush kahdabwatahwahwaud enewh Philipun kedebahdooduhmenid enewh uhyeëen dabandahgwukkin emuh oodoogemahwewining owh Kesha‐Muhnedoo, kuhya oodezhenekahzoowining owh Jesus Christ, kebaptizooähwug, kuhkenuh enenewug kuhya equawug.
13Kuhya dush ween Simon kedabwayandum: uhpe dush kahbaptizooïnd, oogeweejewaun dush enewh Philipun, kemahmahkahdandum dush, uhpe kahwahbundung enewh mahmaundahwejegunun kuhya kekenoowahjechegunun kahezhecheganid.
14Uhpe dush egewh apostleüg ewede Jerusaleming kahahyahjig kahnoonduhmoowaud ewh Samariaïng duhzhe enenewun keöodahpenuhmenid ewh oodekedoowin owh Kesha‐Muhnedoo, oogeëzhenahzhahwahwaun enewh Peterun kuhya enewh Johnun cheëzhahnid ewede:
15Uhpe dush kahtuhgwishenoowaud, oogeähnuhmeätuhmahwahwaun, enewh Keche‐Oojechaugwun cheähyahwahnid:
16(Kah muh muhshe oogeöodissegoosebuneen ahweyah: me atuh kebaptizooïndwah emuh oodezhenekahzoowining owh Tabaningad Jesus.)
17Me dush këezheneenjetuhwahwahwaud me dush kahezhe‐oodahpenahnid enewh Keche‐Oojechaugwun.
18Uhpe dush Simon wahyahbundung ahwagwan kahezheneenjetahgoogwan enewh apostleün kemeenah enewh Keche‐Oojechaugwun, oogewemeenaun shooneäun.
19Oo‐oo keëkedood, Meezheshin kuhya neen maunduh kushkeäwezewin, ahwagwan kaëzheneenjetahwugan cheoodahpenaud enewh Keche‐Oojechaugwun.
20Peter dush oo‐oo oogeënaun, Guhnuhwanim keshooneäum chegenishwahnahdezeyun, ewh keënanduhmun chewekishpenuhchegahdag oomeegewawin owh Kesha‐Muhnedoo shooneäh oonje.
21Kah kuhnuhga kedebandahgoozese oo‐oo ezhetwahwining: kah muh quuhyukwussenoon keda enahsuhmuhbid owh Kesha‐Muhnedoo.
22Aunwanindezoon dush maunduh kemujje‐ezhewabezewin, kuhya ahnuhmeätow owh Kesha‐Muhnedoo, koonemah kegahwabenuhmahgoo ewh kahenanduhmoomahguk keda.
23Kekekanemin suh ewh ahyahyun emuh kuhgwahnesuggandahgoozewining, kuhya chedebandahgoozeyun emuh mujjeühyeëewishing.
24Me dush kenuhquatuhwaud owh Simon, oo‐oo keëkedood, Ahnuhmeätuhmahweshig owh Tabaningad, kuhnuhga cheöodissegoosewaun oonoo kahekedooyag.
25Uhpe dush kahkuhgequawaud, kahdebahdooduhmoowaud oodekedoowin owh Tabaningad, keëzhekewawug ewede Jerusaleming, oogedebahdoodahnahwah ewh minwahjemoowin emuh nebewah oodoodanahwewaung egewh Samaritanug.
26Philip dush oogeguhnoonegoon enewh oodangenemun owh Kesha‐Muhnedoo, oo‐oo keëgood, Puhsegween, shahwuhnoong ezhaun meekunaung anebemoosawaud egewh Gazaïng azhahjig, Jerusaleming oonjemahjahwaud, anduhzhe‐buhgwuhduhkummegaug.
27Kepuhsegwe dush kuhya keühnemahjah: benuh dush, pazhik Ethiopiaïng duhzhe enene, owh eunuch kachetwahwezenejin oobuhmeetahgunemun owh Candace oodoogemahquamewaun egewh Ethiopianug, kahguhnuhwanduhmahwaud kuhkenuh ooshooneähmene, kepeëzhahgoobunan ewede Jerusaleming, cheähnuhmeäud,
28Nayaub dush keühnekewa, kenuhmuhduhbe dush emuh ootahbauning magwah dush keähgindung oodaunwahjegawin owh Esaias.
29Me dush Keche‐Oojechaug oo‐oo oogeënaun enewh Philipun, Pashoo ezhaun, cheweeduhbemud emuh ootahbauning.
30Philip dush ewede keühpuhtoo anduhzhe ahyahnid, oogenoondahwaun dush ahginduhmenid oodaunwahjegawin owh Esaias, oo‐oo dush keëkedood, Kenesetootaun nuh ewh aginduhmun?
31Ween dush keëkedoo, Ahneen kaöonjenesetootuhmaunbaun, ahweyah enene kekenooähmahwesig? Oogeënaun dush enewh Philipun chepoozenid emuh otahbauning cheweeduhbuhmegood dush.
32Ewh oozhebeëgawin kahahgindung mesuh oo‐oo akedoomahguk, Keëzheweenah emuh kaduhzhe‐nesind debishkoo mahnishtahnishing; kuhya debishkoo azhemussit-tahgoozesig mahnishtahnisheens anuhsuhmenid enewh mwauzhwahegoojin mesuh kahezhetahwunesig:
33Emuh ootahbussandahgoozewining kemuhkummah oomenoo‐tebahkoonegoowin: ahwanan dush kadebahdoodung oodezhewabezewin? uhkeeng muh keöonjemahmujje-gahdane oobemahdezewin.
34Owh dush eunuch oogenuhquatuhwaun Philipun oo‐oo keënaud, Weenduhmooweshin, kepahgoosanemin, ahwananun oo‐oo anahjemahjin owh aunwahjega‐wenene? debahjindezoo nuh! gamuh nuh bakahnezenejin oodebahjemaun?
35Medush ketahwuneed owh Philip ewede oozhebeëgawining keöonjemahjetaud, kedebahjemootuhwaud anandahgoozenid Jesusun.
36Magwah dush uhneähpesekaud, ketuhgwishinoog emuh anduhzhe nebeekaug: owh dush eunuch oo‐oo keëkedoo, Mesuh maunduh nebee; wagoonan kaöonje‐baptizoomegoosewaun?
37Philip dush oo‐oo oogeënaun, Kishpin anegookoodaäyun ezhedabwayanduhmun, mahnoo kegahbaptizoomegoo. Ween dush oogenuhquatuhwaun, oo‐oo keëkedoo, Nindabwayanemah owh Jesus Christ oogwissemegood enewh Kesha‐Muhnedoon.
38Keëkedoo dush chenookishkahnid enewh otahbaunun; kepahkoobewug dush nuhyazh, Philip kuhya owh eunuch, oogebaptizooäun dush.
39Uhpe dush kahahgwahyahduhgahzewaud, Philip oogemahjeweenegoon enewh Oojechaugwun owh Tabaningad, kah dush menuhwah owh eunuch oogewahbuhmahseen; keühneähyahpesekah dush wahwezhandung.
40Philip dush kemekahwah ewede Azotusing: magwah dush uhnebemoosahdung kekuhgequa emuh kuhkenuh enewh oodanahwun, nahnauzh ketuhgwishing ewede Cesareaing.
Pilihan Saat Ini:
OODEZHECHEGAWINEWAH 8: OTW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
