OODEZHECHEGAWINEWAH 25
25
1Uhpe dush Festus kahtuhgwishing emuh duhnuhkewining, nasoogoonuhgudenig, Cæsareaïng keöonjemahjah keëzhah dush ewede Jerusaleming.
2Me dush uhpe owh keche‐sahsahgewejega‐wenene kuhya egewh nahgahnezejig Jewyug oogebahtahmahwaun enewh Paulun, kepahgoosanemahwaud.
3Kuhya keënahwaud cheweedookahgoowaud chepeenemind enewh Paulun emuh Jerusaleming, keähkahmahwaud emuh meekunaung chenesahwaud.
4Festus dush kenuhquatum, cheguhnuhwanememind enewh Paulun emuh Cæsareaïng, kuhya dush ween tebenuhwah gagah zhuhyegwah weëzhaud ewede.
5Mahnoo dush egewh kachetwahwezejig keenuhwah anduhcheyag, ningahuhneweejewegoog, cheähnahmemag mahbuh enene, kishpin gagoo kahmujjeëzhechegagwan.
6Uhpe dush kahduhnezid emuh ahyahnid metahsoo-kezhik ahwahshema, keëzhah emuh Cæsareäïng; wuhyahbunenig dush nuhmuhduhbid emuh tebahkoonede‐wuhbewining keëkedoo Paulun chepeenemind.
7Uhpe dush tagwishing, egewh Jewyug kahoonjebahjig emuh Jerusaleming kekewetuh‐kahbahwewug, keëzhebahtahmahwaud enewh Paulun nebewah kagwahnesuggandahgwukkin mujjeëzhewabezewinun, kah dush kekushkeöosewug chewahbundahewawaud ewh dabwawaud.
8Ween dush kekuhnooduhmahzoo oo‐oo keëkedoo, Kahween kuhnuhga ningemujje‐doodunse ootebahkoonegawinewah egewh Jewyug, kah kuhya ewh ahnuhmeä‐weguhmig, kah kuhya ningemujje‐doodahwahse owh Cæsar.
9Festus dush, keënandung cheminwanduhmooäud enewh Jewyun kenuhquatum oo‐oo dush oogeënaun enewh Paulun, Kegahezhah nuh ewede Jerusaleming, ewede cheduhzhe‐tebahkoonegooyun oonoo azhebahtahmegooyunin, anahsuhmuhbeyaun?
10Me dush oo‐oo keëkedood owh Paul, Nenebow emuh anahsuhmeähyahnig Cæsar ootebahkoonega‐wuhbewin; me emuh anandahgoozeyaun chetebahkoonegooyaun; kahween ningemujje‐doodahwahseeg egewh Jewyug, keen azhepuhgukkanduhmun.
11Kishpin kemujjeëzhechegawaunan, gamuh keëzhechegawaunan gagoo kaöonjenesegooyaun, kahween nindahgoonwatunse chenebooyaun: kishpin dush kuhnuhga gagoo oonoo uhyeëen ahyahsenook azhebahtahmewaud mahmig, kahween ahweyah enene enandahgoozese chepuggedenuhmoowaud neyow. Ningahtebahkoonegoo emuh anahsuhmuhbid owh Cæsar.
12Me dush kahguhnoonaud owh Festus enewh kekedoo‐wenenewun, oogenuhquatuhwaun, Kegeëkid nuh chetebahkoonegooyun emuh anahsuhmuhbid owh Cæsar? mahnoo kegahezhahnun owh Cæsar.
13Gomah menik duhsuhgoonuhguk owh keche‐oogemah Agrippa kuhya Bernice ketuhgwishenoog emuh Cæsareäïng chepeähnuhmekahwahwaud enewh Festusun.
14Nebewah dussoogoon kahahyahwaud, Festus oogeweenduhmoowaun enewh keche‐oogemaun kahezheähyahnid enewh Paulun, oo‐oo keëkedood, Ahyah suh pazhik enene kahnuhguhnegood enewh Felixun minjemahpenegahzood:
15Me suh enewh kahbahtahmahwahjin Jewyug ookeche‐sahsahgewejega‐wenenemewaun kuhya katezejig uhpe keähyahyaun emuh Jerusaleming kenundooduhmahwewaud chenahneboomug.
16Oo‐oo dush ningenuhquatuhwaug, Kahween ezhechegasewug egewh Romanug wepuggedenahwaud ahweyah enenewun cheneboonid, bahnemah atuh owh bahyahtahind kemechewahbuhmaud enewh bahyahtahmegoojin, kuhya kepuggedenuhmoowind chekuhnooduhmahdezood, debahdoodung ewh mujjeëzhechegawin azhebahtahmind.
17Uhpe dush kahpetuhgwishenoowaud oomah, kazhetena wahyahbung ningenuhmuhdub emuh tebahkoonewa‐wuhbewining, ningeëkid dush chepeenind owh enene.
18Uhpe dush kahpuhsegwenid enewh bahyahtahmegoojin, kahween oogeëzhebahtahmegooseen oonoo uhyeëen kahenanduhmaun:
19Oogeëzhebahtahmahwaun ahnind kuhgwadwawinun tebenuhwa oodezhetwahwinewah, kuhya kahezheähyaud pazhik enene Jesus azhenekahzood, kahneboopun, me enewh Paul kahenahjin, bemahdeze.
20Kah dush ningekekanduhse kaëzhekuhgwadwayaun oonoo doowah kuhgwadwawinun, mesuh kahoonje‐kuhgwajemug, kishpin ananduhmoogoobunan cheëzhaud ewede Jerusaleming, ewede dush cheduhzhe‐tebahkoonind oonoo uhyeëen.
21Uhpe dush Paul kahekedood chetebahkoonegood enewh Augustusun, ningeënahkoonega cheguhnuhwanemind nahnauzh kushketooyaun cheëzhenahzhahwug emuh ahyahnid Cæsarun.
22Me dush Agrippa oo‐oo keënaud enewh Festusun, Nindahminwandum kuhya neen chenoonduhwug owh enene. Keëkedoo dush owh owh Festus, Wahbung kegahnoonduhwah.
23Wuhyahbung, uhpe kahtuhgwishing Agrippa, kuhya Bernice, emuh kechetwahwandahgoozewining, kuhya dush kahpeendegawaud emuh kaduhzhe‐bezinduhmoowaud, kuhya egewh keche‐menesenoo‐oogemaug, kuhya egewh nahgahnezejig emuh keche‐oodanaung, Festus keëkedoo chepeenind owh Paul, me dush kahezhepeenind.
24Festus dush keëkedoo, Keche‐oogemah Agrippa, kuhya kuhkenuh enenewedoog menik anduhcheyag oomah kewahbuhmahwah mahbuh kahoonje‐guhnoozhewaud kuhkenuh egewh waqueenoojig Jewyug ewede Jerusaleming kuhya oomah, ewh keëzhepepahgewaud ewh kayahbe chebemahdezesig.
25Uhpe dush kahmekahwug kuhnuhga gagoo keëzhechegasig kaöonjeneboogoobun, kuhya dush ween egoo keëkedood chetebahnoonind emuh anahsuhmuhbid Augustus, ningeënahkoonega cheëzhenahzhahoond ewede.
26Kah dush gagoo nequuhyukwanduhse kaëzhebeähmahwug nindoogemaum. Mesuh kahoonjepeenug anahsuhmuhbeyun keen keche‐oogemah Agrippa, bahnemah kekuhgwajemind, gagoo nindahgekekandaun keëzhebeëgayaun.
27Kahween tahoonesheshinsenoon nindenandum cheëzhenahzhahwug owh kabahquahegahzood, pwah‐wahweenduhmahgayaun ewh wanjeähnahmemind.
Pilihan Saat Ini:
OODEZHECHEGAWINEWAH 25: OTW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
