OODEZHECHEGAWINEWAH 15
15
1Ahnind dush enenewug kahpeöonjebahjig emuh Judæaïng oogekekenooähmahwahwaun enewh wejekewaëmaun, Kishpin, kekenoowahje‐kishkezhegahzoosewag debishkoo kahenahkoonegagoobunan Moses, kahween kegahbemahjeëgooseem.
2Uhpe dush Paul kuhya Barnabas kahkeche‐ahgoonwatahwahwaud kuhya kahkeche‐guhnoonahwaud enewh, keënahkoonegawug enewh Paulun kuhya Barnabasun kuhya ahnind pakaunezenejin, cheëzhahnid emuh Jerusaleming chekuhgwajemahnid enewh apostleün kuhya katezenejin oo‐oo kuhgwadwawin
3Uhpe kahmezissekahgoowaud enewh anuhmeähnejin uhneähpesuhkahwaud, oogeshahbooshkahnahwah Phenice kuhya Samaria, pahbahdebahjemahwaud enewh mayuggezenejin keähnuhmeähnid: oogekeche‐moojegezeähwaun dush kuhkenuh wawejekewaïndenejin.
4Uhpe dush kahtuhgwishenoowaud ewede Jerusaleming, keöodahpenegoowaud dush enewh anuhmeähnejin, kuhya enewh apostleün, kuhya enewh katezenejin, oogedebahdooduhnahwah kuhkenuh enewh uhyeëen kahezhechegawaud keweedookahgoowaud enewh Kesha‐Muhnedoon.
5Kepuhsegwewug dush ahnind kahPhariseewejig duhyabwayandungig, keëkedoowaud, chenunduhwandahgwudenig chekekenoowahje‐kishkezhegahzoonid, chekahgaun-zoomemind cheguhnuhwanduhmenid Moses ootebahkoonegawin.
6Egewh dush apostleüg kuhya katezejig kemahwunjeëdewug chenahnahgahdahwanduhmoowaud oo‐oo.
7Uhpe dush kahkeche‐ahgoonwatahdewaud, Peter kepuhsegwe, oo‐oo dush keënaud, Enenewedoog wejekewaëmahdoog, kekekandahnahwah ewh maweshah Kesha‐Muhnedoo kewuhwanahbuhmid neen nindooning egewh mayuggezejig cheöonjenoonduhmoowaud ewh minwahjemoowine‐ekedoowin, chedabwayanduhmoowaud dush.
8Kesha‐Muhnedoo dush, owh kakandung enewh oodaemaun, oogedebahjemaun ewh minwandahgoozenid, ewh kemeenaud enewh Keche‐Oojechaugwun, debishkoo kahezhemeenenung;
9Kah dush pekinoong oogedoodahwahseen dush ween kenuhwind, kepeenetood oodaëwaun dabwayanduhmoowin oonje.
10Wagoonash dush wanjekuhgwatebanemag Kesha‐Muhnedoo, chenahbekahwagwah egewh kekenooahmahgunug ewh nahbekahwahgun kahkushketoosigwah kooseminahbuneeg chepemewetoowaud kuhya kenuhwind kahkushketoosewung?
11Kedabwayandahmin dush ewh ooshahwanjegawining owh Tabaningad Jesus Christ cheweoönjebemahjeëgooyung kenuhwind, debishkoo wenuhwah.
12Me dush kuhkenuh egewh mahyahwunjeëdejig kepezaunuhbewaud, kebezindahwahwaud dush enewh Barnabasun kuhya Paulun, kedebahdooduhmenid kahezhemahmaundahwejegad owh Kesha‐Muhnedoo magwa ayahwaud mayuggezejig wenuhwah keähnookeewaud.
13Bahnemah dush kahishquah‐kekedoowaud, James oogeguhnoonaun, oo‐oo keënaud, Enenewedoog wejekewaëmahdoog, bezinduhweshig:
14Simeon oogewahweendaun ewh Kesha‐Muhnedoo netum kepemoowuddissaud enewh mayuggezenejin, cheoondenaud enewh ahnishenahban kadabwayanduhmenejin oodezhenekahzoowin.
15Me nahsaub akedoomahgudenig oodekedoowinewaun egewh aunwahjega‐wenenewug; debishkoo azhebeëgahdag.
16Nahguch dush ningahpiskaub menuhwah dush ningahoozhetoon oodahnuhmeä‐weguhmig owh David, kahkahwesamahguk; nayaub dush ningahoozhetoon kahbahnahduk, kuhya ningahaunjetoon:
17Egewh ashkoonindjig enenewug chenundoonawahwaud enewh Tabaninganejin, kuhya kuhkenuh egewh mayuggezejig, wahyahweendungig nindezhenekahzoowin, ekedoo owh Tabaningad owh azhechegad kuhkenuh oonoo uhyeëen.
18Kesha‐Muhnedoo ookekandaunun kuhkenuh oodahnookewinun pahahkoomahje‐uhkeewung.
19Nindenahkoonega dush, chemegooshkahjeähsewungwah egewh mayuggezejig kahquakekahbahwetahwahjig enewh Kesha‐Muhnedoon:
20Chemahjebeähmahwungwah dush, chemewetoowaud enewh muhnedookawine‐weneëgoowinun, kuhya peshegwahdezewin, cheäumwahsigwah dush kabenawabenegahzoonejin kuhya misquee.
21Moses muh mawezhah oodahyahwaun emuh anduhching oodanah enewh dabahjemegoojin, ahginjegahdanewun oodoozhebeëgawinun anduhsoo aunwabe‐kezheguk emuh ahnuhmeä‐weguhmigoong.
22Medush keminwanduhmoowaud egewh apostleüg kuhya katezejig, mahmahwe kuhkenuh anuhmeähjig, cheëzhenahzhahwahwaud enewh enenewun kahweedookahgoo wahjin ewede Antioching mahmahwe enewh Paulun kuhya enewh Barnabasun; Judas owh kahtuhgoo‐weenzood Barsabas, kuhya Silas, nahgahnezegig emuh anduhshewaud egewh wejekewaëmaug:
23Kemahjebeähmahgawug dush enewh muzzeneëgunun, kamahjetoonid, oo‐oo keëzhebeëgawug; Egewh apostleüg kuhya katezejig kuhya wejekewaëmaug ooduhnuhmekahwahwaun enewh wejekewaëmaun mayuggezenejin ewede Antioching kuhya Syriaïng kuhya Ciliciaïng:
24Ningenoondahmin gooshah, ahnind nenuhwind ahyahyaung kahoonjebahjig kemegooshkahjeënagwah enewh ekedoowinun, uhnegahahwaud enewh kejechaugoowaun, oo‐oo keëkedoowaud, Kenundahwandahgoozeem chekekenoowahje‐kishkezhegahzooyag, kuhya cheguhnuhwanduhmag ewh tebahkoonegawin? kah wekah ningeënahsenahnig oo‐oo cheëzhekuhgekemenagwah:
25Ningeminwandahmin, kemahoonjeëdeyaung mahmahwe enahkoonegayaung, cheëzhenahzhahoomoonenuhgoog kahwahwanahbuhmindjig enenewug kahweejewahjig enewh suhyahgeüngejin Barnabasun kuhya Paulun.
26Enenewug kahnuhneezaunesetoojig oobemahdezewinewah oonje oodoonoozoowin owh Tabanemenung Jesus Christ.
27Ningeëzhenahzhahwahnahnig dush Judas kuhya Silas, cheweenduhmoonagwah nahsaub uhyeëen emuh oodoonewaung.
28Oogeminwandaun suh owh Keche‐Oojechaug kuhya nenuhwind ningeminwandahmin, chepemoondahegoosewag nahwuj kwasegwungin mewunekaunun, me dush atuh oonoo nandahwandahgwukkin uhyeëen;
29Chemeejesewag ewh meejim kahsahsahgewetuhmoowindwah muzzeneneeg, kuhya misque, kuhya kabenawabenindjig ooweyausewah, kuhya chemewetooyag pezhegwahdezewin: kishpin mewetooyag oonoo kegahmenoojegam. Keduhnuhmekahgoom.
30Uhpe dush kahpuggedenindwah, kepeëzhahwug emuh Antioching: uhpe dush kahmahwunjeähwaud enewh ahnishenahban, oogemeenahwaun ewh mahjebeëgun:
31Uhpe dush kahahginduhmoowaud, kemoojeganduhmoog ewh aungwahmetahgoozewin oonje.
32Judas kuhya Silas, keäunwahjega‐wenenewewug, kekuhgekemahwaud dush enewh wejekewaëmaun nebewah ekedoowinun, kuhya dush kesoongekahbahweähwaud.
33Wanebik kahduhnezewaud ewede, oogepuggedenahmahgoowaun enewh wejekewaëmaun emuh pezaunewawining cheëzhahnid enewh apostleün.
34Ahnoo keminwandum owh Silas kayahbe cheähyaud ewede.
35Paul dush kuhya Barnabas kuhya nebewah ahnind bakahnezejig keduhnezewug emuh Antioching kekenooähmahgawaud kuhya kedebahdooduhmoowaud ewh oodekedoowin owh Kesha‐Muhnedoo.
36Goomahpe dush anduhsoogoonahguk Paul oo‐oo oogeënaun enewh Barnabasun, Umba menuhwah mahjahdah cheähwemahwuddissungwah kejekewaënahnig anduhsing oodanahwun kahduhzhe‐debahdooduhmung Tabaningad oodekedoowin, cheähwewahbuhmungwah, nuhmunj azhebemahdezewahgwan.
37Barnabas dush keënandum cheühneweejewegoowaud enewh Johnun, kahtuhgoo‐weenzoonejin Marcus.
38Kah dush keminwanduhse owh Paul cheühneweejewegoowaud enewh kahnuhguhnegoowahjin ewede Pamphyliaïng, kah dush oogeühneweejewegoosewaun emuh ahnookewining.
39Apeech dush kekeche‐ahgoonwatahdewaud, kepuh-kaëdewug: Barnabas oogeühneweejewaun enewh Marcusun, keënahshe dush ewede Cyprusing.
40Paul dush oogewahwanahbuhmaun enewh Silasun, kemahjah dush, kahezheähnuhmeätahmahgood enewh wejekewaëmaun cheshahwanemegood enewh Kesha‐Muhnedoon.
41Keühneëzhah dush emuh anegookookummegaug Syria kuhya Cilicia, kepahpahsoongekahbahweäud kuhkenuh dabandahgoozenejin emuh ahnuhmeähwining.
Pilihan Saat Ini:
OODEZHECHEGAWINEWAH 15: OTW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
