Lukas 12
12
Mangilag Kam tu Tolay hide a Magware-ware
(Mateo 10:26-27)
1Nikuna magdemáttan u libu-libu a tolay ay mágkegegemmakan di dán u balang essa nide dipo tu káppal nu tolay. Kinagi ni Jesus tu disepulus na hide, “Magingat kam tu págpaalsa a gággamitán nu Pariseo hide; u gusto ko a kagiyán ay mapagpakunware hide. 2Awan ti netagu a awan lumitaw sakay awan ti sekreto a awan matukuyan. 3Kanya maski ni ánya kinagi moyay tu kadihaman ay masaneg labe itod tu demlag. Sakay ni ánya man u iyanasas moy tu disalad nu bilay ay matukuyan labe itod nu atanan tolay.”
U Dapat a Kantingan
(Mateo 10:28-31)
4“Kagiyán ko nikam, barkada ko hide, dyan kam manteng tu mágbabono hide. Dipo u maare dila a bunuwán ay u bággi nu tolay sakay awan dán hide ti iba a kaya a gimetan.” 5Kagiyán ko nikam ni deya u dapat moy a kantingan: kantingan moy u Diyos dipo kattapos na a mamuno, siya la u tehhod a kapangyariyan a máng-but tu tolay ti impiyerno. Tandaan moy, u Diyos la u dapat moy a kantingan!
6“Awan beman u limma a dignás ay melako la ti duwwa a sentabos? Pero maski essa tu kadignássan ay awan hide páppabayan nu Diyos. 7Maske i buuk moye ay nabilang na dán a atanan. Kanya dyan kam manteng dipo mas mahalaga kam tu Diyos nan u dignás hide.”
U Págpakapospos ni Cristo
(Mateo 10:32-33; 12:32; 10:19-20)
8“Sakay kagiyán ko be nikam, ni deya man u awan mángkasanike nikán tu atubang nu katolayan ay awan be siya ikasanike nu Anak nu Tolay tu atubang nu anghel hide. 9Pero ni deya man u mángpamen nikán tu atubang nu katolayan ay ipamen ko be tu atubang nu anghel hide nu Diyos.
10Sakay ni deya man u magupos ti kontara tu Anak nu Tolay ay mapatawad. Pero u magupos ti madukás tu Banal a Ispirito ay awan mapatawad.
11Kapag ni inyangay dikam tu sinagoga oni tu atubang nu puno hide sakay tu tehhod hide a mataas a katungkulan para akusaan dikam, dyan kam mabalisa tu itábbeg moy oni u ánya man a kagiyán moy, 12dipo ti odasan itona, u Banal a Ispirito u mangtoldu nikam ni ánya u dapat moy a kagiyán.”
U Baka-bakán a Pággipun tu Kayamanan
13Te essa a lállake a atoy tu kákpalan a nagkagi ni Jesus ti konna he, “Maisto, kagbiyan ped a iyutus tu wadi ko a paghatiyan midán u mana me.” 14Pero timmábbeg siya, “Deya beman u nangatád nikán ti karapatan a magin huwes oni manghate tu mana moy?” 15Sakay kinagi na nide a atanan, “Magingat kam tu atanan a kalase ni kakutidan; dipo u tunay a biyag nu essa a tolay ay awan masukat tu kakpal nu yaman na.”
16Káttapos ay inyistorya ni Jesus u essa a talinhaga, “Tehhod a essa a mayaman a makpal a naane tu mula na. 17Kaya nakagi na tu sadile na, ‘Ánya wád i gimitán kuway? Awanák dán ti pagdáttonan ti naane kuwáy hide! 18Tukoy ku dán! Ipahábba ko u págsalansanan ko hide sakay manggimiták ti mas dakál. Sakay hed ku hod a idátton i naane kuwáy hide sakay tu agum ko hide a kabiyagen.’ 19Sakay kagiyán ko ti sadile kuwáy, masuwertiyák dipo makpalák dán a kabiyagan! Awanák dán kula-kulangán mentaras biyagák! Kanya magpakasarapák dálla a makán kanán sakay makán inuman.
20Pero kinagi nu Diyos nikuna, ‘Awan ka ti tukoy! Ti iye be a gibi ay matay ka! Kándeya nadid a meangay i inhanda muwe hide para ti sadile muwe?’” 21Káttapos ay kinagi ni Jesus, “Konna hina u sapitán nu tolay a makán puhunan ti kayamanan para tu sadile na. Pero mahirap labe tu pangileng nu Diyos.”
U Pánnalig tu Diyos
(Mateo 6:25-34)
22Kinagi pa ni Jesus tu disepulus na hide, “Kaya kagiyán ko nikam: dyan kam mabalisa tu makan para mabiyag kam oni tungkul tu damit a mesulot moy, 23dipo mas mahalaga u biyag nan tu makan sakay u bággi nan tu damit. 24Ilingan moy i wákwake hide: awan hide mágmula oni mággapas sakay awan hide ti salansan pero páppakanán hide nu Diyos. Hikam pa beman wád u awan alagaan nu Diyos? Mas mahalaga kam nan u manok hide! 25Sakay deya nikam u makapang-paatakdug tu biyag na maskin essa la a odas dipo la tu kákkabalisa? 26Ni awan moy ngane dán magimet iye hide a kabadit a bagay, bakin mabalisa kam pa tu agum a bagay? 27Ilingán moy dálla u bulaklak hide tu parang sakay isipán moy ni kodya hide a lumagu. Awan hide mágtrabaho oni mággimet ti badu de. Pero iye i kagiyán kuwáy nikam, maski ti Solomon a pinakamayaman tu itod ay awan nangsulot ti kapareho ti kaganda nu bulaklak hide tu parang. 28Ni u lamon dán hide a biyag nadid sakay ni ilaw ay tutudán ay pospusán nu Diyos, hikam pa beman wád u awan na pospusán a baduwan? Tunay ti kabadit u pánniwala moy nikuna! 29Kanya dyan kam mabalisa tu pakán ehyok moy ti makan sakay mainom moy, 30dipo tukoy nu Ama moy ti langet a kailangan moy iye hide a atanan. Iye hide u bagay a páppospusán nu tolay hide a awan ti pánniwala tu Diyos. 31Kanya pilitán moy a paghariyan kam nu Diyos, sakay iyatad na nikam u atanan a kailangan moy hide.”
U Kayamanan a Awan Mamawan
(Mateo 6:19-21)
32“Hikam a disepulus ko hide, dyan kam manteng, maski sasangan kam la dipo gugusto nu Diyos a kaguman nakam tu kahariyan na. 33Ilako moy u kabiyagen moy hide sakay iyatád moy tu mágkahirap hide u naglakuwan moy! Tánni makaipun kam ti kayamanan ti langet. U maipun moy hod a kayamanan ay awan magdadate one maubu-ubus sakay awan ti makasasáddáp a mágtakaw sakay awan makuta-kutam. 34Dipo ni hadya u kayamanan moy ay katoy bi hod u pusu moy.”
U Tagapagserbi Hide a Lagi a Nakahanda
35Sakay kinagi pa ni Jesus, “Pirme kam a humanda sakay pirme moy a paggangatán u simbuwan moy hide. 36Humanda kam a konna tu alipin hide a maguhay tu kássole nu amo de a gábwat tu kasalan, tánni ni dumemát siya sakay tumoktok ay mabukasan de a agad u pintuwan. 37Pinagpala u alipin hide a demáttan na a awan tidug sakay nakahanda tu káddemát nu amo de. Kagiyán ko nikam, pággetnudan na hide tu lamisaan sakay serbiyan na hide mentaras a kuman hide. 38Pinagpala hide ni demáttan na hide a nakahanda, maskin dumemát man siya tu bállog nu gibi oni kaldiwan. 39Pero tandaan moy iye, ni tukoy la nu makábbilay ni ánya a odas a dumemát u mágtakaw ay awan dán siya mátdug tánni awan makasáddáp u mágtakaw tu bilay na. 40Dapat kam be a pirme a handa, dipo u Anak nu Tolay ay dumemát tu odas a awan moy asa-asaan.”
U Tapat sakay u Awan-Tapat a Alipin
(Mateo 24:45-51)
41Káttapos ay nagtanung ti Pedro, “Panginoon, kinagi mo beman i talinhagaan iye para nikame oni para tu atanan?”
42Timmábbeg u Panginoon, “Ni deya u tapat sakay malalake a alipin ay siya i páng-intregaanay nu amo na tu kasabilay na hide ni tehhod siya a angayan. Siya i nakabahalaay a mangatád ti makan tu agum hide a utusan tu tama a odas. 43Pinagpala iye a alipin ni demáttan siya nu amo na a gággimitán na u atanan a tarabaho na. 44Tandaan moy i kagiyán kuwáy, dipo tapat siya a alipin ay siya u pangintregaan nu amo na tu atanan a kabiyagan na. 45Pero ni awan tapat u alipin ay kagiyán na tu sadile na a, ‘Malay palla a sumole u amo ko.’ Sakay sapulan na a bálbággán u agum hide a alipin a lállake pate u bábbey hide sakay mágkakanán siya sakay máglalasingán. 46Dumemát u amo na tu odas a awan na asa-asaan sakay tu odas a awan na tukoy. Kaya ipisan siya nu amo na tu tolay hide a masassuwayan a parusaan.”
47“U alipin a makatukoy tu gusto a ipagimet nu amo na pero nagpabaya sakay awan na sinunud ay makatanggap ti madágge a parusa. 48Pero u alipin a awan palla makatukoy tu gusto nu amo na, sakay nakagimet ti madukás ay maparusaan pero magaan la. U pinagkatiwalaan ti makpal ay te panagutan tu mas makpal a bagay.”
Mamághiwewalay u Sabilay
(Mateo 10:34-36)
49Nadid, kinagi ni Jesus tu disepulus na hide, “Kayaák a ummangay ti munduwáy ay para mangtawed ti parusa nu Diyos tu tolay hide. Sakay nakwa ay magsapul dan u parusa de konna tu essa a apoy a maggangat dan! 50Pero bagu iye mangyare ay magdanasák pa ti dakál a hirap. Mabalisaák dán mentaras awan palla iye matupad. 51Ti isip moy bemane ay immangayák ti lutaáy para mangatád ti kapayapaan? Kagiyán ko nikam, bakán a kapayapaan i tawed kuwáy nan u pamágsasena nu tolay hide. 52Sapul nadid ni tehhod a limma a tolay tu sabilay ay mamághiwewalay hide, u tállo ay kontara tu duwwa sakay u duwwa ay kontara be tu tállo. 53U ama kontara tu anak na a lállake, awan magkasundu u máttama sakay u máttena sakay konna bi hod u mamágkatugngan hide.”
Kodya tam a Matukuyan u Mangyare hide Nadid a Panahun
(Mateo 16:2-3)
54Káttapos ay kinagi ni Jesus tu tolay hide, “Kapag ketan moy a madiklam i sahámman ay kagiyán moy dán a maguden sakay konna ngane hod u mangyare. 55Sakay ni magabagat dán ay kagiyán moy a magsinag, kaya konna ngane hod u mangyare. 56Hikam a mapagkunware hide! Malalake kam a mangbasa tu tanda hide ti lutaáy sakay ti langet, bakin awan moy mabasa u tanda hide nu Diyos a mangyare dán nadid a panahun?”
Mákpagkasundu tu Kadima
(Mateo 5:25-26)
57“Bakin awan moy matukuyan ni ánya tamaay? 58Mara ni te mángdimanda niko, mákpagkasundu ka tu nángdimanda niko mentaras te panahun pálla dipo makay pilitán naka a iyatubang tu huwes. Sakay iyatád nakam tu mágbantay tu págpiresuwan sakay ipepireso kam. 59Kagiyán ko niko, awan ka makaluwas ti hod mentaras awan mo mabayaden u atanan nu kasalanan mo.”
Pilihan Saat Ini:
Lukas 12: MBJC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Pahanan Agta New Testament © Philippine Bible Society and Wycliffe Bible Translators, Inc., 2017.
