मर्कूस 3

लुला हात भओ आदमी

(मत्ती. 12:9-14; लूक. 6:6-11)

1फिरसे एकचोटी, येशू एक यहूदी सभाघरमे गओ। हुवाँ एक आदमी रहए जौनक हात लुला रहए। 2फरिसीनको समुह जा देखन लागे, कि येशू लुला हात भओ मनैके पबित्र दिनमे अच्छो करपाबैगो कि नाए। ताकी बे बाके दोष लगाए पामएं। 3तओ येशू लुला हात भओ मनैसे कही, “सब आदमीनके बीचमे ठाण।”

4और बा उनसे कही, “का हमएं ब्यवस्था अनुसार पबित्र दिनमे, आदमीनको भलो करनके आज्ञा हए या खराब करनके? का हमएं कोइको जीबनके बचानकी आज्ञा हए या बोके मारनकी?” पर आदमी कछु फिर जबाफ नाए दइं।

5बिनको हृदयको कठोरतामे येशू गुस्साइगओ, और बा बिनके सबके देखके बहुत दुखी भओ और लुला हात भओ मनैसे कही, “अपन हात फैला।” बो हात फैलाइ और बक हात अच्छो हुइगओ। 6तओ फरिसीनको समुह बाहिर चलेगए और येशूके कैसे मारएं कहिके बे तुरन्त, राजा हेरोदके साथ देन बारे आदमीनके सँग बाके बिरुद्धमे सल्लाह करीं।

भिड येशूके पिच्छु लागी

(मत्ती. 12:15-16; लूक. 6:17-19)

7तओ पिच्छु, येशू अपन चेलनके सँग समुन्दरके किनारे गओ, और गालील परदेशसे, आदमीनकी बहुत बणी भिड येशूके पिच्छु लागी। 8यहूदिया परदेश, यरूशलेम सहर, इदुमिआ परदेश, यर्दन नदीयाके अगार घेनको क्षेत्र और टुरोस सहर और सिदोन सहरके आसपिसके क्षेत्र आदमीनको बहुत बणी भिड बाको अचम्मोको कामके बारेमे सुनन बाके ठिन आए। 9भिड बाके चिबदाबए नाए करके बा अपन चेलनसे अपने ताहीं एक नैयाँ तयार करन लगाइ। 10बा बहुतनके अच्छो करी, बहेमारे रोग लागेभए सब बाके छुमएं करके ढकेलीढकेला करत रहएं। 11जब भुत लागेभए आदमी बाके देखत रहएं, तओ येशूके अग्गु आदर देनके ताहीं घुपटा पणके चिल्लाएके अइसे कहान लागे, “तुम परमेश्वरको लौंणा हओ।” 12तओ येशू भुतनके कडा चेतावनी दइके कही, “आदमीनके मत् बतैयओ, कि मए कौन हओं।”

येशू बाह्र चेलाके छानी

(मत्ती. 10:1-4; लूक. 6:12-16)

13तओ पिच्छु, येशू डँगामे चढो, और बा जौनके अपनो चेला बनानके ताहीं छाँटी रहए, उन्हीनके बुलाइ, और बे बाके ठिन आए। 14तओ बा उन मैसे बाह्र जनैके छाँटी, और बिनके चुनेभए चेला होनके नियुक्ती करी। ताकी बे बाके सँगए-सँग रहिपामएं 15और बिनके भुत निकारन अधिकार फिर दइ। 16बे बाह्र चुनेभए चेला जेहीँ हएं: सिमोन, जौनको नाउँ बा पत्रुस धरी, 17जब्दियाके लौंणा याकूब और याकूबको भइया यूहन्ना, येशू बिनके बोअनर्गेस नाउँ दइ काहेकी बे गर्जनके समान रहएं। 18अन्द्रियास, फिलिप, बारथोलोमाइ, मत्ती, थोमा, अल्फयसको लौंणा याकूब, और थेदियस, सिमोन कनानी 19और यहूदा इस्करियोत, जौन कुछ साल पिच्छु येशूके धोखा दइ।

येशू और शैतान

(मत्ती. 12:22-32; लूक. 11:14-22)

20तओ येशू और बाके चेला अपने घरे गए। हुना इतनो बणी भिड जम्मा हुइगइ, कि बे खानु खानके फिर समय नाएपाइं। 21जब येशूके नातेदार जा सुनीं, तओ बे बिनके अपन घर लैजानके ताहीं आए। काहेकी येशूके नातेदार कहात रहएं, कि बाको दिमाक ठिकमे नाए हए।

22यरूशलेम सहरसे आएभए मोशाको नियम कानुन सिखान बारे आदमी कहीं, “येशूमे त शैतान हए। शैतान भुतनको मालिक हए, और बहेको मदतसे येशू भुतनके निकारत हए।”

23तओ येशू बिनके अपने ठिन बुलाएके कहानी कही, “नेहात्तओ, शैतान अपने भुतनके जानके ताहीं जबरजत्ती नाए करैगो। 24अगर कोइ राज्यमे, आदमी-आदमीनके बीचमे फुट हुइगओ कहेसे, बो राज्य जद्धा दिन नाए टिकपएहए। 25अइसियए करके, अगर कोइ घरके आदमीनमे लडाइ हुइगओ कहेसे, बे सँगए नाए रहिपए हएं। 26और अगर शैतान अपनी भुतके बिरुद्धमे लडाइ करैगो कहेसे बो टिकिनाए पएहए, पर बो अप्नएके बिनास करैगो।

27कोइ फिर आदमी, भुत हानी तगडो आदमीको घरमे घुसके बोको धनमाल नाए लुट पएहए, जब तक तगडो आदमीके बँधेहए नाए तबतक बोको घर नाए लुट पएहए।

28नेहात्तओ, मए तुमसे कहात हओं, आदमीनको सब गलत काम और परमेश्वर या कोइके बिरुद्धमे करीभइ बदनामके, परमेश्वर क्षमा करदेहए। 29पर पबित्र आत्माके बिरुद्धमे बदनाम करन बारेनके कभी फिर क्षमा नाए करैगो, पर बो हमेसाके ताहीं गलत कामको दोषी ठहरैगो।”

30काहेकी बे जा कहात रहएं, कि येशूमे भुत हए।

येशूक अइया और भइया

(मत्ती. 12:46-50; लूक. 8:19-21)

31तओ पिच्छु, येशूक अइया और भइया आए, और बाहिरए ठाणके बाके बुलान पठाइं। 32भिडके आदमी येशूके आसपिस बैठे रहएं और बे बासे कहीं, “देखओ, तुमर अइया और तुमर भइया तुमसे बात करनके चाँहत हएं।”

33येशू बिनके जबाफ दइके कही, “मिर अइया और भइया कौन हएं?”

34तओ बा अपने आसपिस देखके कही, “देखओ, जेहीँ हएं मिर अइया और भइया। 35काहेकी हरकोइ, जौन परमेश्वरको इच्छा पालन करत हएं, बेहीं मिर भइया, बहिनीया और मिर अइया हएं।”

Pilihan Saat Ini:

मर्कूस 3: THRNT

Sorotan

Berbagi

Salin