मर्कूस 10

बेहा और छुटपत्तरके बारेमे शिक्षा

(मत्ती. 19:1-9)

1येशू अपन चेलन सँग कफर्नहुम गाउँ छोडके बे यहूदिया परदेश हुइके चलपणे और यर्दन नदीयाके दुस्रे घेन गए। फिर एक औ भिड बाके ठिन इकट्ठा भइ, और बा अपन रितिके अनुसार बिनके फिर शिक्षा देनलागो। 2फरिसीनको समुह बाके ठिन आएके बाके जाँच करनके पुँछीं, “का मोशाकी ब्यवस्थामे एक आदमीके अपनी बैयरके छुटपत्तर देन ठिक नाए हए?” 3येशू बिनके जबाफ दइके कही, “मोशा तुमके छुटपत्तरके बारेमे का ब्यवस्था दइ हए?” 4बे कहीं, “मोशा एक आदमीके अपनी बैयरके छुटपत्र लिखन और बोके छोडनके अनुमति दइ हए।”

5तओ येशू उनसे कही, “मोशा जा अनुमति तुमर ताहीं ब्यवस्थाके रुपमे लिखी, काहेकी तुम जिद्दी रहओ। 6पर सृष्टिको सुरुमे परमेश्वर सबकुछ बनाइ, और मनैके ‘लोग और बैयर’ करके बनाइ। 7जहेमारे परमेश्वर कहात हए, कि ‘एक लोग और बैयर बेहा करत हएं, बे बेहा पिच्छु अपन अइयादौवाके सँग बैठत नाए होत हएं। 8और बेहा करनसे अग्गु बे दुई शरीर होत हएं पर बेहाके पिच्छु बिनके परमेश्वर एकए आदमी जैसो मानत हए।’ 9तभीमारे जौनके परमेश्वर एकए सँग जोडी हए, कोइ फिर आदमी बिनके अलग नाए करए।”

10तओ पिच्छु, जब येशू चेलनकेसँग इकल्लो रहए, तओ बे बासे जाके बारेमे पुछीं। 11येशू बिनके जबाफ दइ, “जौन अपनी बैयरसँग छुटपत्तर करके दुस्रे सँग बेहा करैगो, बो बिनके बिरुद्धमे व्यभिचार करैगो। 12और अगर बैयर अपनो लोगा सँग छुटपत्तर करके दुस्रेसे बेहा करैगी कहेसे बो व्यभिचार करैगी।”

बालकनके येशूको आशीर्वाद

(मत्ती. 19:13-15; लूक. 18:15-17)

13फिर आदमी छोटे बालकनके, येशू बिनके उपर हात धरके आशीर्वाद देबए करके येशूके ठिन लाइं, पर चेला बिनके डाँटी। 14तओ जा देखके येशू गुस्साइगओ और उनसे कही, “छोटे बालकनके मेरे ठिन आनदेओ, बिनके मत् रोकओ, काहेकी परमेश्वरको राज्य उनके ताहीं हए, जौन जे बालका कता बिश्वासयोग्य और नम्र हएं। 15नेहात्तओ, मए तुमसे कहात हओं, जौन आदमी बालकनके कता अपनएके परमेश्वरको राज्यमे नाए सौँपत हए, कहेसे बे बाको राज्यमे बक आदमी नाए बनपामंगे।” 16और बा बालकनके गोदीमे लैके बिनके उपर अपन दहिना हात धरके शक्तिशाली आशिष दइ।

धनी आदमी और स्वर्गको राज्य

(मत्ती. 19:16-30; लूक. 18:18-30)

17और जैसियए येशू अपन चेलनके सँग फिरके यात्रा करन सुरु करी, एक आदमी येशू ठिन दौरत आओ और आदर देनके ताहीं घुपटा पणो और बासे पुछी, “हे महान गुरु, मए का काम करओं, कि परमेश्वर मोके कभी फिर नाश नाए होन बारो जीबन देए?”

18येशू बोके जबाफ दइ, “जब तए मोसे कहात हए कि, ‘मए महान हओं’ जा बातमे तिर मतलब का हए? पुरा रुपसे कोइ महान नाएहए, पर केबल परमेश्वर इकल्लो महान हए। 19तए परमेश्वरको आज्ञाके जान्तएहए, जैसेकी हत्या नाएकरनो, व्यभिचार नाएकरनो, नाएचुरानो, झुठो गवाही नाएदेनो, कोइके धोखा नाएदेनो, अपन दौवा और अइयाके आदर करनो।”

20तओ बो आदमी येशूसे कही, “महान गुरु, जा त सब मए मेरे किशोर अवस्थासे पालन करत आओ हओं।”

21येशू जा आदमीके ताहीं सच्चो प्यार महसुस करी जैसियए येशू बोके देखी और कही, “एक और बात हए जो तोके करन जरुरी हए। जो कुछ तिर सँग हए बोके बेँचके रुपैया गरीब आदमीके दे। अगर तए अइसे करैगो, तओ तिर ठिन स्वर्गमे धनसम्पति होबैगो। तओ फिर आएके मिर चेला बननके ताहीं मिर पिच्छु लाग।” 22जब बो आदमी येशूके जा बात कहात सुनी, तओ बो दुखी हुइके गइ भओ, काहेकी बक सँग बहुत धनसम्पति रहए।

23और आसपिस देखके येशू अपन चेलनसे कही, “धनी आदमी परमेश्वरको राज्यमे घुसन बहुत अग्ठो हए।” 24येशूकी कहीभइ बातमे चेला अचम्मो मानीं। तओ येशू फिरसे उनसे कही, “मिर प्यारे भइयओ, धनसम्पति उपर भरोसा करन बारेके परमेश्वरको राज्य भितर घुसन महा अग्ठो हए। 25एक ऊँटके, सुइको भारसे भितर घुसन सजिलो हए, पर एक धनी आदमीके ताहीं परमेश्वरको राज्यमे जान बहुत अग्ठो हए।”

26जब चेला जा सुनीं तओ बे बहुत अचम्मे भए और एकदुस्रेसे कहीं, “उइसो हए कहेसे कौनके परमेश्वरको राज्यमे घुसनके ताहीं बचाओ जएहए?”

27येशू बिनके देखके कही, “आदमीके ताहीं जा असम्भब हए पर परमेश्वरके ताहीं नाएहए, काहेकी परमेश्वरके ताहीं त सब बात सम्भब हए।” 28पत्रुस बासे कही, “हमर का होबैगो? हम तिर चेला बननके ताहीं सब बात छोडदएहएं।” 29-30येशू चेलनसे कही, “नेहात्तओ मए तुमसे कहात हओं, चेला होनके ताहीं और अच्छो समाचारको घोषणा करनके ताहीं, जौन अपन घर, या ददाभइयनके, दिदी-बहिनियाके, अइयादौवाके, लौंणालौंणीयाके या जगहा जमिनके छोड दइ हए, बो जा सतावटके सँगएसँग बहुत चीज पएहए जैसेकी, औ ददाभइयनके, दिदी-बहिनीया, अइयादौवा, लौंणालौंणीया अइसियए करके औ फिर। और आन बारो समयमे तुमके कभी फिर नाश नाए होन बारो जीबन मिलैगो। 31पर बहुत जो हबए पहिले हएं, बे समयमे पिच्छु होमंगे, और जो कोइ हबए पिच्छु हएं, बो समयमे बे अग्गु हुइहएं।”

येशू अपने मरनके बारेमे तिसरो चोटी बताइ

(मत्ती. 20:17-19; लूक. 18:31-33)

32येशू और बाके चेला यरूशलेम सहर घेन जात रहएं, और येशू बिनके अग्गु-अग्गु नेगत रहए। चेला बहुत अचम्मे भए, कि बा हुवाँ जात रहए जहाँ बहुत आदमी बाके बिरोध करि रहएं, और दुस्रे आदमी जौन बाके सँग रहएं, बिनके जा बातको डर रहए, कि यरूशलेम सहरमे बाको का होबैगो। फिर येशू अपन बाह्र जनै चेलनके एक घेन बुलाएके अपने उपर आन बारो दुखके बारेमे कही, 33“देखओ, हम यरूशलेम सहर घेन जात हएं। हुवाँ मए, आदमीको लौंणा मुखिया यहूदी पुजारी और मोशाको नियम कानुन सिखान बारेके ठिन सौँपो जएहओं, और बे मोके मृत्युदण्ड देहएं, और गैर-यहूदी आदमीनके हातमे सौँपदेहएं। 34और बे मोके गिल्ला करंगे मोके थुकंगे और मोके कोर्रा लगाएके मारङगे। पर तीन दिनमे, मए फिर जिन्दा हुइ जामंगो।”

याकूब और यूहन्नाको बिन्ती

(मत्ती. 20:2-28)

35जब्दियाके दुई लौंणा, याकूब और यूहन्ना येशूके ठिन आएके कहीं, “महान गुरु, हम तुमसे जो माँगंगे तुम हमर ताहीं करदियओ करके हमर इच्छा हए।” 36येशू उनसे पुँछी, “तुमर ताहीं मए का करदेमओं करके तुमर इच्छा हए?” 37बे बासे कहीं, “जब तए महिमामे शासन करन सुरु करैगो, तओ हमए अपन सँगमे शासन करनके अनुमति दिए। एक तिर दहिना घेन और दुस्रो तिर दिब्रा घेन।” 38तओ येशू उनसे कही, “तुम का मागत हओ सो तुम नाए जानत हओ। का तुम बो दुख सहिपएहओ जो मोए सहन पडैइया हए? जैसी मए मारो जामंगो का उइसीयए तुम फिर मरनके तयार हओ?” 39बे येशूसे कहीं, “हम तयार हएं।” तओ येशू उनसे कही, “तुमके सताओ जाबैगो जैसे मोके सताओ जएहए। तुमके मारो जएहए जैसे मोके मारो जाबैगो। 40तहुँफिर, मोके जा फैसला करनके अधिकार नाए हए, कि मिर दहिना और दिब्रा घेन कौन सम्मानको ठिहा पाबैगो। पर परमेश्वर अपन चुनेभए आदमीनके ताहीं बे ठिहनके तयार करीहए।” 41जा सुनके दशौ चेला याकूब और यूहन्नासे गुस्साइगए। 42तओ येशू बिनके अपने ठिन बुलाएके कही, “तुम जानत हओ, कि जौन आदमी जा दुनियामे सासक माने जातहएं, बे अपने अधिकार अपने अधीनमे भए आदमीनके उपर अधिकार जमानके ताहीं करत हएं। बिनके अगुवा अपनी बात मनानके ताहीं बिनके उपर अधिकारके चलात हएं। 43पर तुम बिनके जैसो मतहोबओ। बल्कि तुम मैसे जौन अगुवा बनन चाँहत हए, बोके एकदुस्रेक सेवा करन चाहो। बो जौन दुस्रेके अगुवाइ करन चाँहत हए, बोके एक सेवक कता सबको सेवा करनपणो। 44और तुम मैसे जौन बडो होनके इच्छा करत हए, बो सबको सेवक बनए। 45मए अइसो जाकेमारे कहात हओं काहेकी मए आदमीको लौंणा, दुस्रेकी सेवा करनके ताहीं जा दुनियामे आओ हओं। मए जाकेमारे नाए आओ, कि दुस्रे मिर सेवा करएं। मए आदमीनके बिनके पापनसे मोल तिरके छुटानके ताहीं अपन जीबन देनआओ हओं।”

अन्धरा बारतिमै अच्छो भओ

(मत्ती. 20:29-34; लूक. 18:35-43)

46यरूशलेम जात समय, येशू और चेला यरीहो सहरमे आए। जैसे येशू और बिनके चेला और बहुत आदमीनकी एक बणी भिड यरीहो सहरमे छोडके जात रहए, तओ एक बारतिमै नाउँको अन्धरा भिखारी डगर किनारे बैठो रहए जो तिमैको लौंणा रहए। 47जब बो आदमीनसे सुनी, कि येशू जो नासरत गाउँको हए, येशू जहे डगरसे जाए रहो हए, तओ बो जोणसे चिल्लाएके कहान लागो, “हे येशू, राजा दाऊदको सन्तान#10:47 राजा दाऊदको सन्तान जाको वास्तबिक अर्थ “दाऊदको लौंणा” हए, मिर उपर दया कर।”

48तओ बहुत बोके चुप लाग करके डाटीं। तओ बो औ जोडसे चिल्लाएके कहान लागो, “हे येशू दाऊदको लौंणा, मिर उपर दया कर।” 49जब येशू बक बात सुनी, तओ बा रुकिगओ और आसपासके आदमीनसे बोके लानके ताहीं कही। और बे बा अन्धरा आदमीके अइसे कहीके बुलाइं, “खुसी हो, उठ, येशू तोके बुलातहए।” 50फिर अन्धरा आदमी अपनो बाहिरको कुर्ता फेकके बो तुरन्त उठीगओ और येशू ठिन गओ। 51येशू बोसे कही, “तए का चाँहत हए, मए तिर ताहीं का करओं?” बो अन्धरा आदमी बासे कही, “महान गुरु, मए चाँहत हओं, कि मए देख पामओं।” 52तओ येशू बोसे कही, “मए तोके अच्छो कर रहो हओं काहेकी तए मोए मे बिश्वास करत हए। तभीमारे अब तए घर जाए सकत हए।” तओ बो तुरन्त देखन बारो भओ, और डगरमे येशूके पिच्छु-पिच्छु नेँगन लागो।

Pilihan Saat Ini:

मर्कूस 10: THRNT

Sorotan

Berbagi

Salin