मर्कूस 1

बप्तिस्मा देन बारो यूहन्नाको सन्देश

(मत्ती. 3:1-12; लूक. 3:1-18; यूह. 1:19-21)

1परमेश्वरको लौंणा, येशू ख्रीष्टके बारेमे अच्छो समाचार जा प्रकारसे सुरु होतहए: 2यशैया, अगमबक्तासे लिखो भओ किताबमे, परमेश्वर अपन लौंणा, ख्रीष्टसे कही,

“मए मिर खबर पुगान बारो आदमीके तेरो अग्गु-अग्गु पठामंगो,

बा आदमीनके ताहीं डगर तयार करैगो।

3जंगली इलाकामे एक आदमी अइसो चिल्लत रहए,

प्रभुके आगमनके ताहीं अपनएके तयार करके डगर सुधारओ, जौनसे हुइके बा आबैगो।”

4जौन खबर पुगान बारोके बारेमे यशैया लिखी, बो बप्तिस्मा देन बारो यूहन्ना रहए, जो जंगली इलाकामे बैठत रहए। बो आदमीनसे कही, “पाप करन छोडके परमेश्वर घेन घुमओ, और बप्तिस्मा लेओ ताकी परमेश्वर तुमर पाप क्षमा करए।” 5यहूदिया परदेशके सबए आदमी और यरूशलेमके आदमी निकरके, जंगली इलाकामे यूहन्नाको परचार सुननके ताहीं गए। जब बे अपन-अपन गलत कामके स्वीकार करीं तओ यर्दन नदीयामे बप्तिस्मा लइं। 6बप्तिस्मा देन बारो यूहन्ना ऊँटको बारसे बिनो भओ साधारण कुर्ता लगात रहए, और करह्याँओँमे खालको फेटा बाँधत रहए, और टिंण्हा और बनको सहात खात रहए। 7बो अइसे परचार करी, “जौन मोसे पिच्छु आबैगो, बा मोसे बहुत शक्तिशाली हए। हियाँतक, कि मए बाके अग्गु जा लायकको फिर नाए हओं कि मए बाको अइसो नोकर बनपामओं, जौन जुताको तनी खोलनको काम करत हए। 8मए तुमके पानीसे बप्तिस्मा दओ हओं। पर बा तुमके पबित्र आत्मासे बप्तिस्मा देबैगो।”

येशूको बप्तिस्मा और परीक्षा

(मत्ती. 3:13-17; 4:1-11; लूक. 3:21-22; 4:1-13)

9बे दिनमे जब बप्तिस्मा देन बारो यूहन्ना बप्तिस्मा देत रहए, तओ येशू गालील परदेशके नासरत गाउँसे आओ, और यूहन्नासे यर्दन नदीयामे बप्तिस्मा लइ। 10पानीसे निकरके आतए खीना येशू स्वर्ग उघरो देखी, और पबित्र आत्माके कबुतरके रुपमे अपन उपर उतरत देखी। 11तओ स्वर्गसे परमेश्वरको अबाज आओ, “तए मिर प्यारो लौंणा हए, तोसे मए गजब खुसी हओं।”

12तओ पिच्छु पबित्र आत्मा, येशूके तुरन्त जंगली इलाकामे लैगओ। 13बा शैतानसे परीक्षा पाएके चालिस दिन जंगली इलाकामे रहो। बा जंगली जानबर सँग रहो, और स्वर्गदूत येशूको सेवा सत्कार करीं।

चेलनको बुलावाट

(मत्ती. 4:18-22; लूक. 5:1-11; यूह. 1:35-42)

14कुछ दिन पिच्छु, बप्तिस्मा देन बारो यूहन्ना पकणिगओ, और जेलमे पणिगओ, तओ पिच्छु परमेश्वरको राज्यके बारेमे आदमीनके अच्छो समाचार परचार करत येशू गालील परदेशमे आओ। 15येशू कही, “परमेश्वर जौन समय तोकी रहए, बो ढिँगै आइगओ हए। पाप करन छोडके परमेश्वर घेन घुमओ, और अच्छो समाचारमे बिश्वास करओ।”

16एक दिन जब येशू गालील समुन्दरके ढाहो-ढाहो जात रहए, तओ बा सिमोन और बोको भइया अन्द्रियासके समुन्दरमे जार डारत देखी, काहेकी बे मछरेहा रहएं। 17येशू बिनसे कही, “आओ और मिर चेला बननके ताहीं मिर पिच्छु लागओ। अभएतक त तुम मछ्री पकणत रहओ, पर अबसे मए तुमके सिखामंगो, कि आदमीनके मोएमे बिश्वास करनके ताहीं कैसे लान हए।” 18बे तुरन्त अपनो मछ्री मारन बारो काम छोडके येशूके चेला बननके ताहीं येशूके पिच्छु लग्गए। 19जब येशू थोरी अग्गु बढो तओ औ दुई भइयनके नैयाँमे जार थिगरत देखी, जौन जब्दियाके दुई लौंणा याकूब और यूहन्ना रहएं। 20येशू बिनके देखिखिनक कही, “आओ और मिर चेला बनओ।” और बे अपन दौवा जब्दियाके कमैयन्के सँग नैयाँमे छोडके, बाके चेला बनन्के ताहीं बाके सँग चलपणे।

भुत लागो भओ आदमी

(लूक. 4:31-37)

21तओ येशू और बाके चेला कफर्नहुम सहरमे गए। जब दुस्रो पबित्र दिन आओ, यहूदी सभाघरमे घुसके येशू शिक्षा देन लागो। 22और बे येशूको शिक्षामे अचम्मो मानी, काहेकी बा बिनके मोशाको नियम कानुन सिखान बारो आदमी जैसो नाए, पर अधिकार साथ सिखात रहए। 23बहेबेरा, यहूदी सभाघरमे भुत लागो एक आदमी रहए। 24बो अइसे कहात चिल्लान लागो, “हे नासरत गाउँको येशू, तुम हमके काहे परेसान करत हओ? का तुम हमके सत्यानाश करन आए हओ। मए तुमके चिनत हओं, तुम परमेश्वरको पबित्र सेवक हओ, जो परमेश्वरके घेनसे हओ।”

25येशू अइसे कहात बो भुतके डाँटी, “चुप लाग, और बोसे निकरजा।” 26तओ भुत बो आदमीके जोडसे हलाइ और जोडसे चिल्लाएके बो आदमी मैसे निकरीगओ।

27तओ यहूदीको प्राथना करन बारो ठाँउमे जितनो आदमी रहएं सब जनै अचम्मो मानीं, और बे अइसे कहात आपसमे बात करन लागे, “जा कौन मेलको शिक्षा हए, हम कभु फिर कोइके अइसो अधिकारसे शिक्षा देत नाए सुनेहएं। हियाँतक, कि जा भुतनके डाँटत हए तओ बे मानजात हएं।” 28तओ बे औ आदमीनके जा बातके बारेमे बताइं, और जल्दी येशूको चर्चा गालील परदेशके चारौ घेन फैलीगओ।

बहुत बिमारी अच्छे भए

(मत्ती. 8:14-17; लूक. 4:38-41)

29येशू और बाके चेला यहूदी सभाघरसे निकरतए खीनक सिमोन पत्रुस और अन्द्रियासके घरमे गए, याकूब और यूहन्ना फिर सँगमे रहएं। 30बो बेरा सिमोन पत्रुसकी सास जाणोसे भरीपणी रहए। और कोइ येशूसे कही, कि सिमोन पत्रुसकी सास बिमार हए। 31येशू बक ढिँगै आएके बोको हात पकणके उठाइ, और बो तुरन्त ठिक हुइगइ, तओ बो येशूको सेवा करी।

32तओ बहे दिन संझाके, जब पबित्र दिन बितिगओ रहए, आदमी येशूके जौँणे बहुत बेमारिनके और भुत लागे भएनके ल्याइं। 33आदमीको बहुत बणी भिड सिमोन और अन्द्रियासके घरके बाहिर जम्मा हुइगइ। 34येशू कैयौं मेलके रोगसे ग्रस्त भए बहुत बिमारके अच्छो करी, और बहुत भुतनके निकारी। येशू भुतनके मस्कन नाए दइ काहेकी भुत येशूके चिने रहएं, कि येशू परमेश्वरको लौंणा हए।

एकन्तमे येशूको प्रार्थना

(लूक. 4:42-44)

35भोरभए येशू उठके बाहिर जंगली इलाकामे गओ, और बा परमेश्वरसे प्राथना करी। 36सिमोन और बाके सँग होन बारे देखीं, कि येशू हुवाँ नाए रहए, तओ बे येशूके ढुँणन गए। 37जब बे येशूके भेटीं तओ बे कहान लागे, “कफर्नहुम गाउँके बहुत आदमी तुमके ढुणरहे हएं।”

38तओ येशू बिनसे कही, “आओ, हम ढिँगैके औ गाउँमे जामएं ताकी हुवाँ फिर मए परचार करपामओं। काहेकी जहेके ताहीं मए दुनियामे आओ हओं।” 39तब्ही गालील परदेशके बहुत गाउँमे यहूदी सभाघरमे परचार करत और भुतनके निकारत येशू और बाके चेला गए।

येशू कोढ रोग लागेनके अच्छो करी

(मत्ती. 8:1-4; लूक. 5:12-16)

40एक दिन, एक कोढ रोगसे पिणित आदमी येशूके ठिन आएके घुँटो टेकी और अइसे बिन्ती करी, “तुमर इच्छा हए तओ मोके अच्छो करडारैगे, ताकी मए धार्मिक रिबाजके अनुसार शुद्ध हुइजाओं।”

41तओ दयासे भरके येशू अपनो हात फैलाएके कोढ रोग लागो आदमीके छुइ, और बोसे कही, “मए इच्छा करत हओं, कि तए अच्छो हुइजा।” 42बहे समयमे बोको कोढ रोग हटीगओ, और बो अच्छो हुइगओ।

43तओ येशू कोढ रोगसे अच्छो भओ आदमीके कडा चेतावनी दइ और अइसे कहिके तुरन्तए पठाइ, 44“देख, तए कोइसे मत् कहिए, कि मए तोके अच्छो करो। और यहूदी पुजारी ठिन जा, ताकी बे तोके जाँचएं और तए अच्छो भओहए करके बे कहामएं। तओ मोशाको आज्ञा अनुसार, बलिके रुपमे जानबरको बलिदान चढा और सब आदमी पता पामएं, कि तए शुद्ध भओ हए।” 45तओ पिच्छु बो कोढ लागो आदमी चलोगओ, और बो बहुत आदमीनके बताइ, कि येशू बोके अच्छो करीहए। तभीमारे, येशू सहरमे खुल्ला रुपमे आदमीनके बीचमे नाए जाएपाइ। नगरसे बाहिर, बा अइसो ठाउँमे रहए जहाँ एकौ मनै नाए रहएं। तहुँफिर बहुत ठाउँसे आदमी बाके ठिन आतए रहे।

Pilihan Saat Ini:

मर्कूस 1: THRNT

Sorotan

Berbagi

Salin