मत्ती 23

मोशाको नियम कानुन सिखान बारे और फरिसी समुहनके चेतावनी

(मर्क. 12:38-39; लूक. 11:43,46; 20:45-46)

1तओ येशू भिडसे और अपन चेलनसे अइसे कही: 2“मोशाको नियम कानुन सिखान बारे और फरिसीनको समुह अधिकारके साथ मोशाको नियम कानुनकी व्याख्या करत हएं। 3जहेमारे बे तुमसे जो कुछ कहात हएं, बहे करीयओ और मनियो, पर बे जो करत हएं, बो मत् करओ; काहेकी बे शिक्षा देत हएं पर बोको पालन नाए करत हएं। 4बे अपनए स्वयं कानुनके पालन करनके कोसिस नाए करत हएं, बे सब प्रकारके नियम बनात रहएं, जौनके पालन करन आदमीनके ताहीं कठिन हए।

5बे अपन सब काम आदमीनके दिखानके ताहीं करत हएं, काहेकी बे अपन माथो और हातमे मोशाको नियम कानुन लिखो पट्टी बाँधत हएं, और अपन लत्तामे लम्बो झालर बनात हएं। 6भोजमे बे महत्वपूर्ण ठिहामे बैठन मन पणात हएं, और यहूदी सभाघरमे मुख्य-मुख्य आसन, 7बजारमे अभिबादन ढुणत हएं और आदमी महान गुरु कहामएं करके मन पणतहएं।

8पर कोइ तुमसे ‘महान गुरु,’ नाए कहामएं, काहेकी तुमर महाट्टर एकए हए, और तुम सब बिश्वासी भइया-बहिनियाके बराबर हओ। 9अपन दौवाके छोडके कोइके फिर धर्तीमे दौवाको पदको आदर मत् दियओ काहेकी परमेश्वर तुमर एकए दौवा हए जौन स्वर्गमे हए। 10तुम कोइसे ‘मालिक’ मत् कहियओ, काहेकी तुमर एक मालिक ख्रीष्ट इकल्लो हए। 11तुम मैसे जो सबसे बडो हए, बो तुमर सेवक बनए। 12जौन अपनएके बडो बनएहए, बो छोटो हुइहए, और जौन अपनएके छोटो बनएहए, बो बडो हुइहए।”

कपटीनके बिरुद्धमे चेतावनी

(मर्क. 12:40; लूक. 11:39-42,44,52; 20:47)

13“हे मोशाको नियम कानुन सिखान बारे और फरिसीनको समुह, कपटीयओ, परमेश्वर तुमके दण्ड देहए! काहेकी तुम आदमीनके, स्वर्गके राज्यमे प्रबेश करनके अनुमति नाए देत हओ, नए त तुम अपनए बोमे घुसत हओ, नए घुसन बारेके घुसन देत हओ। 14हे मोशाको नियम कानुन सिखान बारे और फरिसीनको समुह, कपटीयओ, परमेश्वर तुमके दण्ड देहए! काहेकी तुम बिधुवनको घर लुटत हओ, और तुम अपनएके धर्मी दिखानके ताहीं लम्बो-लम्बो प्राथना करत हओ जहेमारे दुस्रे आदमीनसे जद्धा तुमके दण्ड मिलैगो।

15हे मोशाको नियम कानुन सिखान बारे और फरिसीनको समुह, कपटीयओ, परमेश्वर तुमके दण्ड देहए! काहेकी तुम एक जनैके अप्नो धर्ममे लानके ताहीं हर ठाउँ घुमत हओ और जब बो तुमर सिखाओ भओ बातमे बिश्वास करत हए, तओ जैसे तुम अपना हओ अइसीयए बोके फिर दुई गुणा जद्धा नरकमे जान योग्य बनाए देत हओ।

16अन्धरा अगुवओ, परमेश्वर तुमके दण्ड देहए! काहेकी तुम कहात हओ, ‘कोइ यरूशलेमको मन्दिरको कसम खएहए तओ कुछु नाए हुइहए, पर यरूशलेमको मन्दिरको सोनोको कसम खएहए तओ फरक पणतहए।’ 17मुरख और अन्धरओ, कौनछो बडो हए? ‘सोनो’ कि ‘सोनोके पबित्र बनान बारो यरूशलेमको मन्दिर?’ 18‘कोइ वेदीको कसम खात हए तओ कुछु नाए होत हए, पर बो उपर धरो भओ भेँटीको कसम खात हए तओ फरक पणतहए।’ 19ए अन्धरओ, कौनछो बडो हए? ‘भेँटी’ कि ‘पबित्र करन बारो वेदी?’ 20जहेमारे वेदीको कसम खान बारे, वेदी और वेदी उपर भए सबए चीजको कसम खातहएं। 21और जौन यरूशलेमको मन्दिरको कसम खात हए, बो यरूशलेमको मन्दिर और बो भितर बैठन बारो परमेश्वरको कसम खात हए। 22स्वर्गको कसम खान बारो परमेश्वरको सिंहासनको और बो उपर बिराजमान होन बारोको कसम खात हए।

23हे मोशाको नियम कानुन सिखान बारे और फरिसीनको समुह, कपटीयओ, परमेश्वर तुमके दण्ड देहए! काहेकी तुम पुदिना और सुँप और जीराको दसंस देत हओ, पर नियम कानुनके गहिरो बिषयके बारेमे, अर्थात् न्याय, दया और बिश्वासयोग्यताके छोडदएहओ; तुमके दसंस देन बारो काम करनके रहए, और सँगए-सँग जे महत्वपूर्ण चीजके फिर वास्ता करनके रहए। 24हे अन्धरा अगुवओ, तुम छोटे नियमके पालन करनके बारेमे बहुत होसियार हओ; जैसेकी, तुम कुछु पिन बारी चीजसे मक्खीके दुर भगात हओ, पर खास आज्ञाके तुम नाए मानत हओ, जो ऊँटके घिँचनो कता हए!

25हे कपटी मोशाको नियम कानुन सिखान बारे और फरिसीनको समुह, परमेश्वर तुमके दण्ड देहए! काहेकी तुम अइसे बर्तन हओ, जौन बाहिर घेन सफा हए, पर भितरसे हबए फिर घिनौनो हए। बे अइसे हएं कि, अपनए अपनएके अच्छे आदमीके जैसे देखत हएं। पर अपने मनमे, बे लोभ और स्वार्थसे भरे हएं। 26हे अन्धरा फरिसीनको समुहओ, तुम पहिले कटोरा और थरियाके भितर सफा करओ, तओ बिनके बाहिर घेन फिर सफा होबए।

27मोशाको नियम कानुन सिखान बारे और फरिसीनको समुह, तुम कपटीयओ! परमेश्वर तुमके दण्ड देहए, काहेकी तुम चुना लागएभए गड्डा कता हओ, जो बाहिर अच्छो दिखात हए, पर भितर घेन मरे आदमीनके हड्डा और सब अशुद्धसे भरे होत हएं। 28अइसियए तुम फिर बाहिर आदमीनके अग्गु धर्मी दिखात हओ, पर भितर कपटी और अधर्म कामसे भरेहओ।”

दोषको दण्ड

(लूक. 11:47-51)

29“हे कपटीयओ! मोशाको नियम कानुन सिखान बारे और फरिसीनको समुह, परमेश्वर तुमके दण्ड देहए! काहेकी तुमर पुर्खा जौन परमेश्वरको अगमबक्तनके मारीं, तुम बहे अगमबक्तनको चिहान बनात हओ और धर्मी मनैनको चिहानके सजात हओ। 30और कहात हओ, ‘अगर हम अपन पुर्खनके समयमे हुइते तओ हम अगमबक्तनको खुन बहानमे उनके सँग सहभागी नाए हुइते।’ 31अइसियए तुम अपनए साबित करत हओ, कि नेहत्तओ तुम बे आदमीनके पिढीके हओ जौन अगमबक्तनके हत्या करि रहए। 32मोके पता हए, तुम अपनए बे पापके पुरा करन बारे हओ जैसी तुमर पुर्खा सुरु करि रहएं।

33साँपके बच्चओ, तुम नरकको दण्डसे कैसे बचैगे? 34जहेमारे देखओ, मए तुमर ठिन अगमबक्ता, और बुद्धिमान आदमी और मोशाको नियम कानुन सिखान बारेनके पठामंगो; और तुम बिन मैसे कित्तोनके मार डारैगे और तुम कित्तोनके क्रूसमे टाँगैगे; और कित्तोनके अपनो यहूदी सभाघरमे पैना मरैगे, और एक गाउँसे दुस्रे गाउँमे रब्टाबैगे। 35पृथ्वीमे बहाएभए सबए धर्मी जनको खुन, निर्दोष हाबिलको खुनसे लैके बेरेक्याहको लौंणा जकरियाको खुन तक, जित्नो धर्मी मनैनको हत्या पबित्र भवन और बेदीके बीचमे भओ, बे सबएनको हत्या करोभओ दण्ड तुमके मिलैगो। 36नेहात्तओ, मए तुमसे कहात हओं, जा सब हत्याको सजाय जहे पिढीके आदमीनके उपर पणैगो।”

येशू यरूशलेमके ताहीं बिलाप

(लूक. 13:34-35)

37“यरूशलेम सहरके आदमी, हे यरूशलेम सहर! तए जौन अगमबक्तनके मारडारो हए, और तेरे ठिन पठाए भएनके तए पत्थरसे मारत हए, बहुत चोटी मए चाँहत रहओं, जैसी मुर्गी अपन बच्चानके डख्माके तरे सुरक्षा करत हए, उइसी मए फिर तिर बालकनके बटोरनके इच्छा करो, पर तए नाए चाहो। 38देखओ, तुमर घर तुमर ताहीं उजणो पणो हए। 39काहेकी मए तुमसे कहात हओं, कि अब जब तक तुम जा नाए कहाबैगे कि,

‘धन्य हए बो, जौन प्रभुके अधिकारके साथ आतहए’ तबतक तुम मोके फिर कभी नाए देखैगे।”

Pilihan Saat Ini:

मत्ती 23: THRNT

Sorotan

Berbagi

Salin