मत्ती 19

बैयरके छुटपत्र नाए देन बारो शिक्षा

(मर्क. 10:1-12)

1जा बात कहिके येशू गालीलसे यर्दन नदीया पार यहूदिया परदेशको मुलक घेन गओ। 2तओ बहुत बणी भिड येशूके पच्छु लागी और बा बे आदमीनके अच्छो करी। 3फरिसीनको समुह बाके ठिन आएके बाकी जाँच करनके ताहीं बासे पुछीं, “का कोइ कारणसे बैयरसँग छुटपत्र करन उचित हए?” 4तओ बा कही,

“का तुम नाए पढे हओ, कि सृष्टिकर्ता बिनके सुरुसे ‘नर और नारी’ बनाइ हए,

5और कही, ‘जहेमारे आदमी अपन दौवा और अइयाके छोडके अपनी बैयरसँग मिलो रहतहए, और बे दुई जनै एक शरीर होमंगे।’

6बे अब दुई नाए, पर एक शरीर होत हएं। जहेमारे परमेश्वर जौनके एकए सँग जोडी हए, बिनके कोइ नाए छुटबाए।”

7फरिसीनको समुह येशूसे कहीं, “मोशा काहे छुटपत्र दइके बैयरके छोडनके अनुमति दइ?” 8येशू फरिसीनको समुहसे कही, “तुमर अटेरी मनके मारे मोशा बैयरके छोडनके अनुमति तुमके दइ हए। पर सुरुसे अइसो नाए रहए।

9मए तुमसे कहात हओं, जौन व्यभिचारके कारण बाहेक अपनी बैयर छोडके दुस्रे सँग बेहा करैगो, बो व्यभिचार करत हए, और जौन छुटिभइके बेहा करैगो, बो फिर व्यभिचार करत हए।”

10चेला बासे कहीं, “लोगा-बैयरको अइसो सम्बन्ध हए तओ त बेहा नाएकरनो असल हुइहए।” 11येशू उनके जबाफ दइके कही, “सब जा बचन ग्रहण नाए कर्पएहएं, केबल बेहीं अइसे कर्पएहएं जौनके परमेश्वर बो तरिकासे जिनके क्षमता प्रदान करिहए। 12काहेकी कोइ नपुंसक अइसे होत हएं, जौन जनमसे पैदा भए और कुछ नपुंसक अइसे हएं, जौनके आदमी नपुंसक बनाइं; और कुछ नपुंसक अइसे हएं जौनके स्वर्गके राज्यके ताहीं अपने आपके नपुंसक बनात हएं, बे जौन समझनमे सक्षम हएं।”

बालकनके आशीर्वाद

(मर्क. 10:13-16; लूक. 18:15-17)

13येशू बालकनके उपर हात धरके परमेश्वरसे प्राथना करदेहए करके आदमी बिनके ठिन ल्याइं। और चेला बे आदमीनके डाँटी।

14तओ येशू कही, “बालकनके मिर ठिन आनदेओ, बिनके मत् रोकओ। काहेकी स्वर्गको राज्य अइसिनको हए।” 15और बालकनके उपर हात धरके बा हुवाँसे गओ।

धनी जवान

(मर्क. 10:17-31; लूक. 18:18-30)

16बाके ठिन आएके एक जनै कही, “हे गुरु, मोके कभी फिर नाश नाए होन बारो जीबन पानके ताहीं का असल काम करन पणैगो?”

17बा बिनसे कही, “अच्छो का हए बोके बारेमे तुम मोसे काहे पुँछत हओ? अच्छो त एकए इकल्लो हए। पर तुम जीबनमे प्रबेश करन इच्छा करत हओ तओ, आज्ञापालन करओ।”

18बे येशूसे कहीं, “कौन-कौन?” येशू कही, “तए हत्या मत् करीए, तए व्यभिचार मत् करीए, तए चोरी मत् करीए, तए झुठो गवाही मतदिए।

19अपन अइयादौवक आदर करिए,

और अपन परोसीके अपनए कता प्रेम करिए।”

20बो जवान आदमी येशूसे कही, “जे सब त मए पालन करेपणे हओं। अब मोएमे का कमी हए?” 21येशू बोसे कही, “तए सिद्ध होनके चाँहत हए तओ, जाएके सब बेँचके दुखी और गरीबनके दे, तओ तए स्वर्गमे धन प्राप्त करैगो, और आएके चेला बननके ताहीं मिर पिच्छु लाग।” 22जब बो जवान जा बात सुनी, बो दु:खित हुइके गइ भओ, काहेकी बोके ठिन बहुत धनसम्पति रहए।

23और येशू अपन चेलनसे कही, “नेहात्तओ, मए तुमसे कहात हओं, स्वर्गके राज्यमे धनी आदमीके प्रबेश करन बहुत कर्रो पणैगो। 24फिर मए तुमसे कहात हओं, धनी आदमीके परमेश्वरको राज्य भितर घुसनसे बरु ऊँटके सुइके भारमे छिरन सजिलो हुइहए।”

25जा सुनके चेला गजब अचम्मो मानके पुछीं, “तओ कौन उद्धार पएहए?” 26येशू बिनके उपर नजर लगाएके कही, “आदमीसे त जा नाए हुइपएहए पर परमेश्वरसे सबकुछ हुइसकत हए।” 27तओ पत्रुस बासे कही, “देखओ हम सब चीज छोडके तुमर पिच्छु लागे हएं। हम का पएहएं?”

28येशू बिनसे कही, “नेहात्तओ, मए तुमसे कहात हओं, तुम जो मिर पिच्छु लागेहओ, नयाँ सृष्टिमे जब आदमीको लौंणा अपन महिमाके सिंहासनमे बैठैगो, तओ तुम बाह्र जानै फिर सिंहासनमे बैठैगे, और इस्राएल देशके बाह्र कुल उपर इन्साफ करैगे। 29हरएक जौन मिर नाउँके खातिर घर, ददाभइया और दिदी-बहिनीया और दौवा और अइया और लौंणालौंणीया और जग्हाजमिन छुणेहए, बो सओ गुणा पएहए, और कभी फिर नाश नाए होन बारो जीबनको अधिकार पएहए। 30तओ बहुत, पहिलो होन बारे पिच्छु हुइहएं, और पिच्छु होन बारे पहिलो हुइहएं।”

Pilihan Saat Ini:

मत्ती 19: THRNT

Sorotan

Berbagi

Salin