Medhetethi 49
49
Yayqoobi Ba Nayta anjuwa
1Hessafe guye, Yayqoobi ba adde nayta xeegidi, “Sinthafe hananaba taani hintew odana mela ha shiiqite” yaagis.
2“Hinteno Yayqooba nayto,
issife shiiqidi si7ite;
hinte aaway Isra7eeley odeysa hayzite.
3“Robeela, ta bayra na7aw,
neeni ta wolqaa; ta minotethas koyruwa;
neeni bonchonka wolqanka ubbaafe aadhasa.
4Neeni haatha mela, eqidason de7aka;
ne ishata bolla bayratethi new bessena.
Neeni ne aawa hiixan keyadasa;
ne aawa arsa tunisadasa.
5“Simooninne Leewey ishata;
enti banta mashsha makallatethas denthoosona.
6Enti banta hanquwan adde wodhidosona,
banta amuwa kunthanaw boorata gaadiya qanxidosona.
Yaaniya gisho, taani enta zoretan gelike;
enta shiiquwanka uttike.
7Enta wolqaama hanqoy
enta wozanaa iitatethay baadetidaba gido.
Taani, enta Yayqooba asa giddon laallana.
Isra7eele biittan dharcana.
8“Yihuda,#49:8 Yihuda: Yihuda guussay Ibraawetho doonan galata guussu. ne ishati nena galatana;
Ne kushey ne morketa qoodhe oykana;
Ne aawa nayti new hokidi ziggana.
9Yihudaa, neeni wodala gaammo;
Ta na7aw, neeni shankafe wodhi simmidi,
cogotidi zin7ida gaammo mela.
Nena bochanaw danda7ey baawa.
10Merinaw haareysi yaana gakanaw
kawotetha xam7ay,
Yihuda kushepe keyenna;
kawotethati iyaw kiitetana.
11I ba hariya woyne bolla,
ba hare mara dooretida woyne bolla qachana;
I ba ma7uwa suuthi daaniya woyne ushshan meeccana.
12Iya ayfey woyne ushshafe aadhidi dulkana;
iya achay xaamatape aadhidi booxana.
13“Zabloni abba doonan daana;
I abba doonan markabeti eqiya bessi gidana;
iya zaway Sidoona gakana.
14“Yisakoori mino hare mela,
caanata giddon zin7ees.
15Shin I ba shempiya bessay lo77o gideysanne
ba biittay ufayseysa gideysa be7iya wode,
caana tookanaw ba hashiya ziqi oothidi,
aylletetha ooso oothana.
16“Daaney#49:16 Daane: Daane guussay Ibraawetho doonan Pirda guussu. Isra7eele zerethafe issuwa gidiya ba asa bolla pirdana.
17Daaney oge gaxan de7iya shoosha mela,
Para shuquliya dukidi,
para toggidaysa guye yeggiya gope mela.
18“Abeeti Godaw, taani ne ashuwa naagayis.
19“Gaade, bonqeysati qohana;
shin I enta geedo kaallidi oykana.
20“Aseera biittay orde;
I kawotas lo77o kathi immana.
21“Niftaalemey qashetonna yeda de7iya,
lo77o marata yeliya gen7e mela.
22“Yoosefi haatha matan toketidi,
dere bolla zaa7ida, ayfey kumida woyne mela.
23Dongen dukeysati iya bolla dendana;
banta dongiyan dukishe iya gooddana.
24Shin Yayqooba Xoossa wolqan,
Isra7eele henthanchuwa naaguwan,
iya dongey mino, iya qesey xaala gidana.
25Ne aawa Xoossay nena maaddana.
Ubbaa Danda7iya Xoossay,
Bolla salo anjuwan,
Garsa ciimmuwa anjuwan,
mehenka yelonka nena anjana.
26Ne aawa anjoy benipe minnidi de7iya zumata anjuwafeka,
merinaw de7iya deretape bentiya ufaysiya anjuwafeka aadhees.
Haysi ubbay Yoosefa huuphen,
ba ishata giddon kaapo gideysa liiphen shempo.
27“Biniyaamey bonqiya suudhume;
ba olidaaba wonta mees;
ba di77idabaa omarsi shaakees” yaagis.
28Haysati tammanne nam7u Isra7eele sheeshata. Enta aaway enta huuphen huuphen entaw bessiya anjuwa anjishe entako gidabay haysa.
Yayqooba Hayquwa
29Hessafe guye, I enta haysada yaagidi kiittis; “Taani ta mayzatan gahetana hanayis. Tana Hite addiya Efroona gaden de7iya gongoluwan ta aawata matan moogite. 30Hessika, Kanaane biittan, Maammire matan de7iya, Makifeelan de7iya gongoluwa. He gongoloy Abrahaamey moogoos Hite addiya Efroonape iya gadiyara shammida duufuwa. 31Abrahaameynne iya machiya Saara, Yisaaqinne iya machiya Irbiqa yan moogetidosona. Taani qassi Liyaka yan moogas. 32He gadeynne iyan de7iya gongoloy Hitetape shametidaysa. Tana yan moogite” yaagis.
33Yayqoobi, ba nayta kiitaa ongidaape guye ba tohuwa ba hiixan shiishi ekidi, ba mayzatan gahetis.
Pilihan Saat Ini:
Medhetethi 49: GFBLVF
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Word for the World International and The Word for the World Ethiopia