ማርቆሳ 13
13
ፆሳ ኬይ ላለቶና አተና
(ማቶ 24:1-2፤ ሉቃ 21:5-6)
1የሱሲ ፆሳ ኬፈ ከይሽን፥ እያ ታማረታፐ እሶይ፥ “አስታማርያዉ፥ ሀ ሎኦ ሹቻነ ሀ ሎኦ ሹቻ ኬ በአይ!” ያግስ።
2የሱሲ ዛሪድ፥ “ሀ ግታ ሹቻ ኬ በአይ? ሀ ኬይ ሹች ሹቻ ቦላ ግምበትዳ መላ ላለቶና አተና፤ እስ ሹችካ አቶና ኡባይ ላለታና” ያግስ።
ዎደ ዉርሰ ማላታታ
(ማቶ 24:3-14፤ ሉቃ 21:7-19)
3የሱሲ ፆሳ ኬፈ ህን ባጋራ ሻማሆ ዙማ ቦላ ኡትዳሽን፥ ጰፅሮስ፥ ያይቆብ፥ ዮሃንስነ እንድርያስ ባንታርካ እያኮ ይድ፥ 4“ሀይስ አዉደ ሀናኔኮ፥ ኑስ ኦዳ፤ ሀ ኡባይ ፖለታና ዎድያ ኤርስያ ማላታይ አይቤ?” ያግድ ኦይችዶሶና።
5የሱሲ ቃስ ኤንታኮ ሀይሳዳ ያግድ ኦድስ። “ህንተና ኦንካ ባለና መላ ናገትተ። 6ዳሮ አሳት ታ ሱንን፥ ‘ታኒ ክርስቶሳ’ ያግድ ታማርስሸ ይድ፥ ዳሮ አሳ ባለና። 7ማታን ደእያ ኦላነ ሃሆን ደእያ ኦላ ዎረ ህንተ ስእያ ዎደ ህርጎፍተ። ሄሳ መላባይ ሀናናዉ በሴስ፥ ሽን ዉርሰይ ቡሮና። 8እስ ቢታ አሳይ ሀራ ቢታ አሳራ ኦለታና፤ ቃስ እስ ካዎተይ ሀራ ካዎተታራ ኦለታና፤ ቢታ ቃፆይ ኡባ በሳን ሀናና፤ ኮሻይ ዳና፥ ሽን ሄስ ኡባይ የሎ እቀስ ዞከ መላ።
9“ሽን ህንተ፥ ህንተ ሁጰን ናገትተ። አይስ ጊኮ፥ አስ ህንተና ኦይክድ፥ ፕርዳ ኬስ አድ እማና፤ ቃስ አይሁደ ዎሳ ኬታንካ ህንተና ልሶን ጋራፋና፤ ደርያ ሃረይሳታ ስንንነ ካዎታ ስንን ታ ግሾ ህንተ ማርካታናዉ ኤቃና።#ማቶ 10:17-20፤ ሉቃ 12:11-12. 10ዉርሰይ ጋካናፐ ስን ዎንገላይ ኮይሮ ደረ ኡባስ ኦደታናዉ በሴስ። 11ኤንቲ ህንተና ፕርዳ ኬ ኤህያ ዎደነ አድ እምያ ዎደ፥ ዎይግድ ኦዳነኮ ኮይሮ ህርጎፍተ፤ ሄ ሳትያን ፆሳይ ህንተዉ እምያባ ኦድተ። ህንተናን ጌሻ አያናይ ኦደቴስፐ አትሽን፥ ህንተና ግደከታ።
12“እሻይ ባ እሻ፥ አዋይ ባ ናኣ ዎሳና። ናይት ባንታና የልዳይሳታ ቦላ ደንድድ፥ ኤንታ ዎሳና። 13አሳ ኡባይ ህንተና ታ ሱን ግሾ እፃና፥ ሽን ዉርሰ ጋካናዉ ምንዳይ አታና።#ማቶ 10:22.
ያና ኢታ መቱዋ
(ማቶ 24:15-28፤ ሉቃ 21:20-24)
14“ሽን ዮ ቱናተይ ኤቃናዉ በሶና በሳን ኤቅዳሽን ህንተ በአና።” (አኬክሶ፦ ሄስ ዎይ ጉሰኮ ናባበይስ አኬኮ!) “ይሁዳ ቢታን ሄ ዎደ ደኤይሳት ደርያኮ ባቃቶ።#ዛረ 9:27፤ 11:31፤ 12:11. 15ኬ ሁጰን ደእያ ኡራይካ እስባ ኤካናዉ ዱገ ዎድ፥ ባ ሶ ገሎፖ።#ሉቃ 17:31. 16ጋደን ደኤይስ ባ ማኡዋ ኤካናዉ ጉየ ስሞፎ። 17ሄ ዎደ ቃንትዳ ማጫሳታስነ ንያ ማጫሳታስ ዳሮ ኡንአ ግዳና። 18ሽን ሀይስ ኡባይ ሀንያ ዎደይ ባልጎ ግዶና መላ፥ ፆሳ ዎስተ። 19አይስ ጊኮ፥ ፆሳይ አላምያ መዳ ዎድያፐ ዶምድ፥ ሀእ ጋካናዉ ሀንቦና መቶይነ ስንፈካ ሀኖና መቶይ አሳ ቦላ ሄ ዎደ ሀናና።#ዛረ 12:1፤ ቆን 7:14. 20ጎዳይ ሄ ጋላሳታ ታይቡዋ ጉናኮ፥ አሰ ግድዳይ ኦንካ አተና። ሽን እ ባ ዶርዳ አሳ ግሾ፥ ሄ ጋላሳታ ታይቡዋ ጉስ።
21“ሄ ዎደ ኦንካ ህንተና፥ ‘ሄኮ፥ ክርስቶስ ሀይሳን ደኤስ ዎይኮ ክርስቶስ ህንን ደኤስ’ ያግኮ፥ ሄሳ አማኖፕተ። 22ዎርዳንቾ ክርስቶሳትነ ዎርዶ ናበት ደንድድ ባንታዉ ዳንዳኤትኮ፥ ሀር አቶሽን ፆሳይ ዶርዳይሳታካ ባለናዉ ማላታታነ ማላልስያባታ በሳና። 23ሽን ህንተ ናገትተ፤ ታኒ ህንተዉ ኡባባ ካሰታዳ ኦዳስ።
አሳ ናአ ናምአን ዩሳ
(ማቶ 24:29-31፤ ሉቃ 21:25-28)
24“ሽን ሄ ዎደ ሄ ዋያፐ ጉየ፥
አዋይ ማና፤
አጌናይ ፖኡዋ አጋና።#እሳ 13:10፤ ኤርም 2:10.
25ፆልንቶት ሳሎፐ ኩንዳና፤
ቃስ ሳሎን ደእያ ዎልቃትካ ቃፃና።#እሳ 34:4፤ ቆን 6:13፤ ኤርም 2:10.
26ሄ ዎደ አሳ ናአይ፥ ግታ ዎልቃራነ ቦንቹዋራ ሻራ ግዶራ ይሽን ኤንቲ በአና።#ዛረ 7:13፤ ቆን 1:7. 27ሄ ዎደ ታኒ ኪታንቾታ ሳአ ኦይዱ ባጋ ኪታና፤ ሳአ ጋፃፐ ሳሎ ጋፃ ጋካናዉ፥ ፆሳይ ዶርዳ አሳ ሺሻና።
ባላሰ ምፈ ታማርተ
(ማቶ 24:32-35፤ ሉቃ 21:29-33)
28“ሌምሱዋ ባላሰ ምፈ አኬክተ፤ ባላስያ አጭያ ዎደነ እ ሀይይ ጭልእያ ዎደ፥ ቶርቸይ ማታትዳይሳ ህንተ ኤሬታ። 29ሄሳዳካ፥ ህንተ ሄ ኡባባይ ሀነይሳ በእያ ዎደ፥ እ ማትድ ፐንገ ጋክዳይሳ ኤርተ። 30ታኒ ህንተዉ ቱማ ኦዳይስ፤ ሀ ኡባባይ ሀናና ጋካናዉ ሀይሳን ደእያ አሳ ኡባይ ሀይቀና። 31ሳሎይነ ሳእ አና፥ ሽን ታ ቃላይ አና።
የሱሲ ያና ጋላሳይ ኤረተና
(ማቶ 24:36-44)
32“ሽን ሄ ጋላሳነ ሄ ሳትያ አዋ ፃላላፐ አትሽን፥ ሀር አቶሽን ሳሎን ደእያ ኪታንቾታ ግድን ዎይኮ ናኣ ግድን ኦንካ ኤረይ ባዋ።#ማቶ 24:36. 33ሄ ዎደይ አዉደ ግዳኔኮ፥ ህንተ ኤሮና ግሾ፥ ናገትተነ ምንተ። 34ታ ዩሳይ፥ ባ ኬ አግድ፥ ኦገ ብያ አሳ መላ። ኡራይ ባ አይለታስ ሁጰን ሁጰን ኦሶ እምድ ኤንታ ባ ኦሱዋ ቦላ አዋ ኦስ፤ ቃስ ናገይስ ምንድ ናጋና መላ ኪትስ።#ሉቃ 12:36.
35“ሄሳ ግሾ፥ ምንተ። አይስ ጊኮ፥ ጎዳይ ኦማርስ ግድን ዎይኮ ግድ ብላሄ ግድን ዎይኮ ኩቶ ዋሶ ግድን ዎይኮ ዎንት ማ ግድን አዉደ ያነኮ፥ ህንተ ኤረከታ። 36ህንተ አኬኮና እ ይድ ህንተ ስክድ ደእሽን ደሞና መላ ምንተ። 37ታኒ ህንተዉ ኦደይሳ አሳ ኡባስ ኦዳይስ፤ ምንተ” ያግስ።
Pilihan Saat Ini:
ማርቆሳ 13: GFBEVF
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Word for the World International and The Word for the World Ethiopia
