ሉቃሳ 24
24
የሱሳ ሀይቆፐ ደንዱዋ
(ማቶ 28:1-10፤ ማር 16:1-8፤ ዮሀ 20:1-10)
1ሳምንታፈ ኮይሮ ጋላስ፥ ዎጋ ዎደ ዎንታ ዳሮ ጉራ፥ ማጫሳት ባንታ ጊግስዳ ሽቱዋ ኤክድ ዱፉዋ ብዶሶና። 2ኤንቲ ያ ጋክያ ዎደ ዱፉዋ ዶናን ደእያ ሹቻይ ጎንደረትድ ክቾይሳ ደምዶሶና። 3ኤንቲ ዱፉዋ ጋ ገልዶሶና፥ ሽን ጎዳ የሱሳ አሀ ደምቦኮና። 4ኤንቲ ያን ኤቅድ አይብ ሀንደ ግድ ቆፕሽን አኬኮና ዳሮ ጶልያ አፍላ ማእዳ ናምኡ አሳት ኤንታ ማታን ኤቅዶሶና። 5ማጫሳት ያሸትድ ባንታ ሁጵያ ሳአን ዝቅ ኦድ ደእሽን፥ አሳት ኤንታኮ፥ “ደኦን ደኤይሳ ሀይቆታ ግዶን አይስ ኮዬቲ? 6-7እ ሀይሳን ዴና፤ ሀይቆፐ ደንድስ፥ ‘አሳ ናአይ ናጋራንቾታ ኩሸን አድ እመታና፤ ኤንትካ እያ ካቃና።#ማቶ 16:21፤ 17:22-23፤ 20:18-19፤ ማር 8:31፤ 9:31፤ 10:33-34፤ ሉቃ 9:22፤ 18:31-33. እ ሄን ቃማን ሀይቆፐ ደንዳና’ ያግድ፥ እ ህንተራ ጋልላን ደእሸ ህንተዉ ኦድዳ ቃላ ቆፕተ” ያግስ።
8ማጫሳት ሄ ዎደ እያ ቃላ ቆፕዶሶና።
9ማጫሳት ዱፉዋፐ ስሚድ ሀንዳባ ኡባ ታማነ እሶታስነ ሀራታስካ ኦድዶሶና። 10ሄሳ ሀዋረታስ ኦድዳይ ማግደላ ማይራሞ፥ ዮሃና፥ ያይቆባ አይዉ ማይራሞነ ኤንታራ ደእያ ሀራ ማጫሳታ። 11ሽን ኤንታዉ ማጫሳት ኦድዳይስ ኤልሞ ዳንን አማንቦኮና። 12ሽን ጰፅሮስ ደንድ ዎፅድ ዱፎ ብስ። ሄ በሳ ጋክድ፥ ሆክድ ጋ ፄልያ ዎደ ሞጎ አፍላ ፃላላ በእስ። ሀንዳባን ማላለትሸ ባ ሶ ስምስ።
ኤማሆሰ ኦገ ቦላ
(ማር 16:12-13)
13ሄ ጋላስ ካልያ ታማረታፐ ናምአት የሩሳላመፐ ታማነ እስ ክሎ ምትረ ሃክያ ኤማሆሰ ጉታ ቦሶና። 14ኤንቲ ዎላ ሀንዳባ ኡባ ኦደቶሶና። 15ኤንቲ ሄ ሀኖታባ ቆፕሸነ ኦደትሸ ብያ ዎደ የሱሲ ባ ሁጰን ሺቅድ ኤንታራ ቤስ። 16ሀኖሽን፥ ኤንቲ እያ ኤሮና መላ ኤንታ አይፈይ ኦይከትስ።
17እ፥ “ህንተ ዎላ ኦገ ቦላ ደእሸ ኦደተይስ አይቤ?” ያግስ።
ኤንቲ አዛንድ ስእ ግድ ኤቅዶሶና። 18ኤንታፈ እሶይ ቀልዮጰ ጌተተይስ፥ “ሀ ቃማታ ግዶን የሩሳላመን ሀንዳባ ኤሮናይስ፥ ነ ቢታስ እማዬ?” ያግስ።
19እ ዛሪድ፥ “እ ሀንዳይስ አይቤ?” ያግድ ኦይችስ።
ኤንቲ፥ “ፆሳ ስንንነ አሳ ስንን ኦሶንነ ኦዳን ምኖ ናበ ግድዳ ናዝረተ የሱሳባ። 20እያ ካህነ ሀላቃትነ ሃረይሳት ሀይቆ ፕርዳስ አ እምድ፥ ካቅዶሶና። 21ኑኒ እስራኤለ አሳ ዎዛንደ ግድ ኡፋይትድ ናግዳሽን ሀይስ ሀንን ሀች ሄን ቃማ። 22ቃስ ኑ ግዶፈ እስ እስ ማጫሳት ኑና ማላልስዶሶና። ኤንቲ ሀች ዎንታ ጉራ ዱፉዋ ብዶሶና። 23እያ አሀ ይዳ ዎደ ስም ይድ፥ ‘እ ፓፃ ደኤስ’ ግያ ኪታንቾት ቆንጭን በእዳ ያግድ ኦድዶሶና። 24ኑ ግዶፈካ እሶት እሶት ዱፉዋ ብድ ማጫሳት ኦድዳይሳ ሀንን በእዶሶና፥ ሽን እያ በእቦኮና” ያግስ።
25እ ኤንታኮ፥ “ህንተኖ፥ አኬኮና አሳቶ፥ ህንተ ዎዛናይ ናበት ኦድዳባ ኡባ አማናናዉ ጋምኤይሳቶ፥ 26ክርስቶስ ሀ መቱዋ ኤካናዉነ ባ ቦንቹዋን ገላናዉ በሰኔ?” ያግስ። 27ሙሰፐነ ናበታ ኡባፈ ደንድድ ጌሻ ማፃፋን እያባይ ፃፈትዳይሳ ኡባ ኤንታዉ ቆንጭስስ።
28ኤንቲ ብያ ጉታኮ ማታትዳ ዎደ የሱሲ አድ ሃሆ ሶ ብያ ዳንን፥ 29ኤንቲ፥ “ሳአይ ቃምዳ ግሾ ኑራ አቃ” ያግድ ምንድ ዎስዶሶና። ሄሳ ግሾ፥ ኤንታራ አቃናዉ ገልስ።
30ኤንታራ እስፈ ጋይታ ቦላ ኡትድ፥ ኡይ ደንድ፥ መንድ፥ አንጅድ ኤንታዉ እሚስ። 31ሄ ዎደ ኤንቲ ኤራና መላ ኤንታ አይፈይ ዶየትስ። ኤንትካ ኤርዶሶና። ሽን እ ኤንታፈ ጌምስ። 32ኤንቲ፥ “ኑ ኦግያ ቦላ ደእሽን እ ኑስ ጌሻ ማፃፋ ብርሽሽንነ ኑና ኦድስሽን፥ ኑ ዎዛናይ ፁገትቤኔ?” ያግዶሶና። 33ሄ ዎደ ደንድድ ጉየ የሩሳላመ ይዶሶና። ታማነ እሶትነ ሀራት እስ ቦላ ሺቅድ ደእሽን ደምዶሶና። 34ኤንቲ፥ “ጎዳይ ቱማ ደንድስ፤ ስሞናስ ቆንጭስ” ያግዶሶና።
35ሄ ናምኡ ታማረት ኤማሁሰ ኦግያ ቦላ ደእሽን ሀንዳይሳነ ኡይ መንዳ ዎደ ዋት እያ ኤርዳኮ ኤንታዉ ኦድዶሶና።
የሱሲ ባ ታማረታስ ቆንጭስ
(ማቶ 28:16-20፤ ማር 16:14-18፤ ዮሀ 20:19-23፤ ሀዋ 1:6-8)
36ናምኡ ታማረት ሄሳ ኦዳ ቦላ ደእሽን፥ የሱሲ ኤንታ ግዶን ኤቅድ፥ “ሳሮይ ህንተዉ ግዶ” ያግስ።
37ግዶሽን፥ ኤንቲ ዳጋምድ፥ ሞይትለ በእዳ ዳንን ያይዶሶና።
38እ ኤንታኮ፥ “አይስ ባብደቲ? አይስ ስይ ህንተ ዎዛናን ገልዴ? 39ታ ኩሽያነ ታ ቶሁዋ በእተ፤ ታኒ ታና። ቃስ ኦይክድ በእተ፤ ታናን ህንተ በኤይሳዳ፥ ሞይትለስ አሾይነ መቀ ባዋ” ያግስ። 40ያግድ፥ ባ ቶሁዋነ ባ ኩሽያ ኤንታ በስስ። 41ኤንቲ ኡፋይሳፈ ደንዶይሳን አማኖና ማላለተን ደእሽን፥ የሱሲ ኤንታኮ፥ “ሀይሳን ህንተዉ ምያባይ ደኢ?” ያግስ። 42ኤንቲ እስ ጫጨትዳ ሞሎ እያዉ እምዶሶና። 43እ ኤክድ ኤንታ ስንን ምስ።
44እ፥ “ታ ህንተራ ጋምእዳ ዎደ ኡባን ሙሰ ማፃፋታን፥ ናበታ ማፃፋታንነ ማዝሙረ ማፃፋታን፥ ታ ግሾ ፃፈትዳባይ ኡባይ ፖለታናዉ በሴስ ያጋዳ ታ ህንተዉ ኦድዳ ቃላይ ሀይሳ” ያግስ።
45ሄ ዎደ ጌሻ ማፃፋታ አኬካና መላ ኤንታ ዎዛና ዶይስ። 46ሄሳዳካ፥ “ክርስቶስ ዋየ ኤካና፥ ሄን ቃማን ሀይቆፐ ደንዳና ያግድ ፃፈትስ። 47የሩሳላመፐ ደንድድ አሳ ኡባስ ናጋራፐ ማሮተይነ አቶተይ እያ ሱንን ማርካታና። 48ህንተ ሄሳስ ማርካታ። 49ሄኮ፥ ታካ ታ አዋይ እምዳ ኡፋይሳ ህንተዉ የዳና። ህንተ ሳሎፐ ዎልቃ ማአና ጋካናዉ የሩሳላመ ካታማን ጋምእተ” ያግስ።#ሀዋ 1:4.
የሱሲ ፑደ ሳሎ ብስ
(ማር 16:19-20፤ ሀዋ 1:9-11)
50ሄሳፈ ጉየ፥ ብታነ ካታማ ኤንታና ኤክድ ብስ። ባ ኩሽያ ደንድ አንጅስ።#ሀዋ 1:9-11. 51ኤንታና አንጅሸ ኤንታፈ ሻከትድ ፑደ ሳሎ ኤከትስ። 52ኤንቲ ዝግ ጎይንድ ዳሮ ኡፋይሳን የሩሳላመ ስምዶሶና። 53ፆሳ ኡባ ዎደ ጋላትሸ ፆሳ ኬን ጋምእዶሶና።
Pilihan Saat Ini:
ሉቃሳ 24: GFBEVF
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Word for the World International and The Word for the World Ethiopia
