ሉቃሳ 22
22
ይሁድ የሱሳ አድ እማናዉ ማቀትስ
(ማቶ 26:1-5፥ 14-16፤ ማር 14:1-2፥ 10-11፤ ዮሀ 11:45-53)
1ሄ ዎደ “ፓስካ” ግያ ኡይ ባለይ ማትስ።#ከሳ 12:1. 2ካህነ ሀላቃትነ ህገ አስታማረት አሰ ያይያ ግሾ፥ ዋትድ የሱሳ ባንታ ግዶፈ ይሳነኮ ኦገ ኮዮሶና። 3ፃላሄይ ታማነ ናምአታፐ እሱዋ ግድዳ አስቆሮታ ይሁዳ ጌተተይሳ ግዶ ገልስ። 4ይሁድ ካህነ ሀላቃታኮነ ፆሳ ኬ ናገይሳታ ሀላቃታኮ ብድ የሱሳ ዋት አድ እማነኮ ኤንታራ ማቀትስ። 5ኤንትካ ሄሳን ኡፋይትድ ሚሸ እማናዉ እያራ ዞረትዶሶና። 6እካ ዞረተን ጊግስ። አ ኤንታዉ እማናዉ አስ ባይና እንጀ ዎደ ናግሸ ደኤስ።
ዉርሰ ካሆ
(ማቶ 26:17-25፤ ማር 14:12-21፤ ዮሀ 13:21-30)
7ሄሳፈ ጉየ፥ ፓስካ ዶርሳይ ሹከትያ ኡይ ባለይ ጋክስ። 8የሱሲ፥ “ፓስካ ካሁዋ ማና መላ ብድ ኑስ ጊግስተ” ያግድ ጰፅሮሳነ ዮሃንሳ ኪትስ። 9ኤንቲ፥ “ኑ አዉን ጊግሳና መላ ነ ኮያይ” ያግድ ኦይችዶሶና። 10እ ኤንታኮ፥ “ሄኮ ህንተ ካታማ ገልሽን ሃ ኦቶ ቶክዳ አደይ ህንተራ ጋሄታና። እ ብድ ገልያ ኬ እያ ካልድ ገልተ። 11አስታማረይ ጎዳኮ፥ ‘ታ ታ ታማረታራ ዎላ ፓስካ ካሁዋ ማናዉ እማ ኬ አዉኔ? ያግስ’ ጊተ። 12እ ፖቅያ ቦላ ሂፀትድ ጊግድ ደእያ ዳልጋ ክፍለ ህንተና በሳና፥ ያን ጊግስተ” ያግስ። 13ኤንቲ ብድ የሱሲ ግዳይሳዳ ሀንን ደምዶሶና። ፓስካ ባኣለ ካሁዋ ያን ጊግስዶሶና።
14ሳተይካ ጋክዳ ዎደ የሱሲ ሀዋረታራ ዎላ ካሁዋ ቦላ ኡትስ። 15እ ኤንታኮ፥ “ታ ዋየ ኤካናፐ ስን ሀ ካሁዋ ህንተራ ማናዉ ዳሮ አሞታስ። 16ህዛ፥ ስእተ! ፆሳ ካዎተን ሀይሳስ ብርሸይ ፖለታና ጋካናዉ ሀ ካሁዋ ዛራዳ ሚከ” ያግስ። 17ኡሻ ኤክድ ጋላት ስሚድ፥ “ሄእተ ሀይሳ ህንተ ግዶን ሻከትተ። 18ስእተ! ፆሳ ካዎተይ ያና ጋካናዉ ሀችፈ ዶማዳ ሀ ዎይነ ኡሻፈ ዛራዳ ኡይከ” ያግስ።
19ኡይ ኤክድ፥ ጋላት ስሚድ፥ “ሀይስ ህንተዉ እመትያ ታ አሹዋ። ሀይሳ ኦሸ ታና ቆፕተ” ያግድ መንድ ኤንታዉ እሚስ።
20ሄሳዳካ፥ ካሁዋፐ ጉየ፥ ኡሻ ኤክድ፥ “ሀ ኡሻይ ህንተዉ ጉክዳ ታ ሱን ግድያ ኦራ ጫቁዋ።#ኤርም 31:31. 21ግዶሽን፥ ታና አድ እማና ኡራ ኩሸይ ታራ እስፈ ጋይታና።#ማዝ 41:9. 22አሳ ናአይ እያዉ ጌተቶይሳ መላ ሀይቃናዉ ደኤስ፥ ሽን እያ አድ እምያ ኡራ አየ!” ያግስ። 23ኤንቲ ባንታ ግዶን፥ “ሀይሳ ኦን ኦኔ” ግድ ዎል ኦይችዶሶና።
24ቃስ ኤንታ ግዶን ግታ ግዳናይ ኦነ ግያ ፓላም መትስ።#ማቶ 18:1፤ ማር 9:34፤ ሉቃ 9:46. 25የሱሲ ኤንታኮ፥ “ደርያ ካዎት ባንታ አሳ ዎልቃን ሃሮሶና፤ ባንታ ደርያ ቦላ ጎዳተይሳታስካ ባንታና፥ ‘ሎኦ ኦይሳታ’ ያግድ ፄጎሶና።#ማቶ 20:25-27፤ ማር 10:42-44. 26ሽን ህንተ ግዶን ሄሳ መላ ግዶፖ። ህንተ ግዶን ባይራተይ ካሎዳ ሀኖ፤#ማቶ 23:11፤ ማር 9:35. ካለይስ ካለይሳዳ ሀኖ። 27ሀኖሽን፥ ሞከይሳፈነ ሞከተይሳፈ አዉስ አ? ሞከተይሳ ግደነዬ? ሽን ታኒ ህንተ ግዶን ሞከይሳ መላ።#ቆን 13:12.
28“ህንተካ ታ መቱዋን ታፐ ሻከቶና ታራ ምንድ ኤቅዳይሳታ። 29-30ህንተ ታ ጋይታፐ ማና መላ፥ ኡያና መላነ አራታታ ቦላ ኡትድ ታማነ ናምኡ እስራኤለ ሼሻታ ቦላ ፕርዳና መላ ታ አዋይ ታና ሹምዳይሳዳ ታካ ህንተና ታ ካዎተን ሹማና” ያግስ።#ማቶ 19:28.
31ካልድካ የሱሲ፥ “ስሞና፥ ስሞና፥ ፃላሄይ ህንተና ግስተዳ ሀርቃናዉ ዎስስ። 32ሽን ታኒ ነ አማኖይ ዮና መላ ነዉ ጋናታስ። ነካ ስምዳ ዎደ ነ እሻታ ምን” ያግስ።
33ስሞን፥ “ጎዳዉ፥ ታኒ ኔራ ቃሸታናዉነ ሀይቃናዉ ጊገታስ” ያግስ።
34የሱሲ ጰፅሮሳኮ፥ “ታ ነዉ ኦዳይስ፤ ሀች ኩቶይ ዋሳናፐ ስን ነ ታና ሄ ቶሆ ካዳና” ያግስ። 35ካልድካ፥ የሱሲ ኤንታኮ፥ “ታኒ ህንተና ኮሮጆይ፥ ካርፂትነ ጫም ባይና ኪትዳ ዎደ ህንተዉ ፓጭዳባይ ደኢ?” ያግድ ኦይችስ።#ማቶ 10:9-10፤ ማር 6:8-9፤ ሉቃ 9:3.
ኤንቲ ዛሪድ፥ “አይኮይካ ፓጭቤና” ያግዶሶና።
36እ ኤንታኮ፥ “ሀእ ኮሮጆይነ ካርፂት ደኤይ ኦይኮ፤ ማሽ ባይናይ ባ አፍላ ባይዝድ ማሻ ሻሞ። 37ሃ ስእተ! ‘ጌላታራ ታይበትስ’ ጌተትድ ፃፈትዳይስ ታናን ፖለታናዉ በሴስ። ኤ፥ ታ ግሾ ፃፈትዳባይ ፖለተይስ ቱማትስ” ያግስ።#እሳ 53:12.
38እያ ታማረት፥ “ጎዳዉ ሀይሳን ናምኡ ማሻት ደኦሶና” ያግዶሶና።
እ፥ “ግዳና” ያግስ።
የሱሲ ሻማሆ ደርያ ቦላ ዎስስ
(ማቶ 26:36-46፤ ማር 14:32-42)
39የሱሲ ካሰ ሜዘትዳይሳዳ ደንድድ ሻማሆ ዙማ ቦላ ከይስ። እያ ታማረት እያ ካልዶሶና። 40ሄ በሳ ጋክዳ ዎደ፥ “ፓጨን ገሎና መላ ዎስተ” ያግስ። 41ኤንታፈ ሹች ሆልን ጋክያ ሶ መላ ሃክድ ጉልባትድ ዎስስ። 42“ታ አዋዉ፥ ነ ሸነ ግድኮ ሀ መቱዋ ታፐ አ። ሽን ታ ሸነ ግዶፖ ነ ሸነይ ሀኖ” ያግድ ዎስስ። 43ኪታንቾይ ሳሎፐ ቆንጭድ ምንስ። 44ዳሮ ኡንኤትድ ምንድ ዎሴስ። እያ ጫዋይካ ሱ ፆክያዳ ሳአን ፆኬስ።
45የሱሲ ዎሳ ዉርስድ ባ ታማረታኮ ይስ። ኤንቲ፥ አዛኖፐ ደንዶይሳን ዳቡርድ ስክዳሽን ደምድ፥ 46“አይስ ስከቲ? ፓጨን ገሎና መላ ደንድድ ዎስተ” ያግስ።
የሱሲ ኦይከትስ
(ማቶ 26:47-56፤ ማር 14:43-50፤ ዮሀ 18:3-11)
47እ ቡሮ ኦዳ ቦላ ደእሽን ዳሮ አሳት ይዶሶና። ታማነ ናምአታፐ እሶይ ይሁዳ ጌተተይስ ኤንታና ካለስ። እ የሱሳ ዬራናዉ ማት ሺቅስ። 48ሽን የሱሲ፥ “ይሁዳ፥ አሳ ናኣ ዬራዳ አ እማኔ?” ያግስ።
49የሱሳ ታማረት ሄ ሀኑዋ በእድ፥ “ጎዳዉ ማሻን ሾጭኖ?” ያግዶሶና። 50ኤንታ ግዶፈ እሶይ ካህነ ሀላቃ ኦሳንቹዋ ሾጭድ ኡሻቻ ሀይ ቃንፅድ የግስ።
51ሽን የሱሲ፥ “አጋ! ድጎፍተ”#22:51 አጋ! ድጎፍተ፦ የሱሲ ሀ በሳን አጋ ያግዳይ እያ አሻናዉ ግድ አሳት ኡራ ሀይ ቃንፆይሳ አጋ ቃንፆፋ ግዳይሳነ፥ ሀራት እያ ኦይካናዉ ይዳይሳታ ድጎፍተ ሀእ ኤንታ ዎደ ያግዳይሳ ናምኡ ቆፋታ ዎል ጋድ ኦይክስ። ያግስ። ኡራ ሀይ ቦችድ ፓስ።
52ሄሳፈ ጉየ፥ የሱሲ ባና ኦይካናዉ ይዳ ካህነ ሀላቃታኮ፥ ፆሳ ኬ ናገይሳታ ሹማታኮነ ጭማታኮ፥ “ፓኖ ኦይክያ አሳዳ ማሸነ ፃምአ ኦይክድ ይደቲ? 53ኡባ ጋላስ ፆሳ ኬን ታ ህንተራ ደእያ ዎደ ታ ቦላ ኩሸ ዎቤከታ። ሽን ሀይስ ማ ካዎተይ ሃርዳ ዎደነ ህንተ ዎደ” ያግስ።#ሉቃ 19:47፤ 21:37.
ጰፅሮስ የሱሳ ካድስ
(ማቶ 26:57-58፥ 67-75፤ ማር 14:53-54፥ 66-72፤ ዮሀ 18:12-18፥ 25-27)
54ሄሳፈ ጉየ፥ የሱሳ ኦይክድ ካህነ ሀላቃ ዛባ ኤፍዶሶና። ጰፅሮስ ሃሆን የሱሳ ካሌስ። 55አሳት ካህነ ሀላቃ ዛባን ታማ ኤድ ዎላ ኡትዳሽን ጰፅሮስ ኤንታራ እስፈ ኡትስ። 56እስ ጋንዲያ ጰፅሮስ ታማ ማታን ኡትዳይሳ ጫዳ ፄላዳ፥ “ሀ ኡራይ እያራ ደኤስ” ያጋሱ።
57ሽን ጰፅሮስ፥ “ሀ ማጫሰተ ታ ሄ ኡራ ኤርከ” ያግድ ካድስ።
58ጉ ዎደፐ ጉየ እስ ሀራ አደይ እያ በእድ፥ “ነካ ኤንታፈ እሱዋ” ያግስ።
ሽን ጰፅሮስ፥ “ሀ አድያዉ ታና ግድከ” ያግስ።
59እስ ሳተ መላ ጋምእዳፐ ጉየ እስ ሀራ አደይ ትልስድ፥ “ሀ ኡራይ ጋልላፐ ግድያ ግሾ ስይ ባይና እያራ ደኤስ” ያግስ።
60ሽን ጰፅሮስ፥ “ሀ አድያዉ፥ ነ ገይሳ ታ ኤርከ” ያግስ። እ ሄ ኦዳ ኦንጎና ደእሽን ኩቶይ ዋስስ።
61ጎዳይ ጉየ ስሚድ ጰፅሮሳ ፄልስ። ጰፅሮስ፥ “ሀች ኩቶይ ዋሳናፐ ስን ነ ታና ሄ ቶሆ ካዳና” ያግድ፥ ጎዳይ ኦድዳ ቃላ አኬክስ። 62ጰፅሮስ ካረ ከይድ ዳሮ ኮኮርድ ዬክስ።
63የሱሳ ናግያ አሳት እያ ለቅሶነ ደሸ ኦይክዶሶና። 64እያ አይፍያ ጎዝድ “አነ ትንብተ ኦዳ፤ ነና ደችዳይ ኦኔ?” ያግድ ኦይቾሶና። 65ሀራ ዳሮ ጫሸ ጫይድ ካዉሾሶና።
የሱሲ ፕርዳ ሻንጎ ስንን
(ማቶ 26:59-66፤ ማር 14:55-64፤ ዮሀ 18:19-24)
66ሳእ ዎንትያ ዎደ አይሁደ ቢታ ጭማት፥ ካህነ ሀላቃትነ ህገ አስታማረት ሺቅድ፥ የሱሳ ባንታ ስን ሺሽዶሶና። 67ኤንቲ፥ “ኔኒ ክርስቶሴ? አነ ኑስ ኦዳ?” ያግድ ኦይችዶሶና።
የሱሲ፥ “ታ ኦድያኮ አማነከታ። 68ታ ኦይችያኮ ዛረከታ። 69ሽን አሳ ናአይ ሀይሳፈ ገደ ባጋን ዎልቃማ ፆሳ ኡሻቻ ባጋን ኡታና” ያግስ።
70ሄ ዎደ ኡባይ፥ “ያትን፥ ኔኒ ፆሳ ናኤ?” ያግዶሶና።
እ፥ “ታ ፆሳ ናአ ግደይሳ ህንተ ግደታ” ያግስ።
71ኤንቲ፥ “ህዛ፥ ሀራ ማርካ አይ ኮሺ? እ ባ እንፃርሳን ኦድሽን ኑ ስእዳ” ያግዶሶና።
Pilihan Saat Ini:
ሉቃሳ 22: GFBEVF
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Word for the World International and The Word for the World Ethiopia
