ሉቃሳ 14
14
የሱሲ ፋርሳውያ ሶን
1እስ ሳምባታ ጋላስ የሱሲ እስ ፋርሳወታ ሀላቃ ሶ ካ ማናዉ ገልያ ዎደ አሳይ ጫድ ፄሎሶና። 2ሄ በሳን ሻዉሄ ሀርገን ዋየትያ እስ አስ እያዉ ስን ባጋራ ዝንእስ። 3የሱሲ ፋርሳወታነ ህገ አስታማረታ፥ “ሳምባታ ጋላስ ሀርጋንቾ ፓሶይ ዎገየ ዎጋ ግደኔ?” ያግድ ኦይችስ። 4ኤንቲ ስእ ግዶሶና። የሱሲ ሀርገትያ ኡራ ቦች ፓድ ሞይዝስ።
5“ቃስካ ህንተፈ እሱዋስ ናእ ዎይኮ ቦር ሳምባታ ጋላስ አፎን ዉልኮ፥ ኤለስድ ከሶናይ ኦኔ?”#ማቶ 12:11. ያግድ ኦይችስ። 6ኤንቲ እስባካ ዛራናዉ ዳንዳእቦኮና።
7የሱሲ እማቱዋስ ፄገትዳይሳት ቦንቾ በሲ ዶርሽን በእድ፥ ሀ ሌምሱዋ ኦድስ፦ 8“እስ አስ ነና ያጋኖ ፄግኮ ቦንቾ በሳን ኡቶፋ። ኔፐ አድ ቦንቸትያ አስ ፄገታናዉ ዳንዳኤስ።#ሌም 25:6-7. 9ህንተና ናምአታካ ፄግዳይስ ይድ፥ ‘ነ በሳ ሀ እማስ የዳ’ ግያ ዎደ ኔኒ ዬላታሸ ዝቃ በሲ ዎሳ። 10ግዶሽን፥ ነ ፄገትዳ ዎደ ኮይሮታዳ ዝቃ በሲ በአዳ ኡታ። ፄጎይስ ይድ፥ ‘ታ ላግያዉ፥ ሀ ቦንቾ በሳን ኡታ’ ያጋና። ሄ ዎደ ኔራ እስፈ ፄገትዳ አሳ ኡባ ስንን ነ ቦንቸታና። 11ባና ቁ ቁ ኦያ ኡባይ ካዉያና፤ ባና ዝቅ ዝቅ ኦያ ኡባይ ቁ ቁ ጋና።”#ማቶ 23:12፤ ሉቃ 18:14.
12ቃስ የሱሲ እያ ሞክዳ ኬ አዋኮ፥ “ቁማ ዎይኮ ካሆ እማቶ ፄግያ ዎደ፥ ኔኒ ኩሸ ዛሮ ፄጎና መላ ነ ላገታ ዎይኮ ነ እሻታ ዎይኮ ነ ዳቦታ ዎይኮ ነ ዱረ ሾሮታ እማቶ ፄጎፓ። 13ግዶሽን፥ ነ እማቶ ጊግስዳ ዎደ ማንቆታ፥ ዎበታ፥ ጉንዳታነ ቆቀታ ፄጋ፤ ኔኒ አንጀታና። 14ሀይሳቲ ኩሸ ዛራናዉ ዳንዳኦና ግሾ ኩሸ ዛሮይ ጌሻታ ደንዶ ጋላሳን ነዉ ስማና” ያግስ።
ግታ እማቶ ሌምሶ
(ማቶ 22:1-10)
15የሱሳራ ዎላ እማቶ ቦላ ኡቶይሳታ ግዶፈ እሶይ፥ ሄሳ ስእድ፥ “ፆሳ ካዎተን እማቶ ቦላ ኡተይስ አንጀትዳይሳ” ያግስ።
16የሱሲ፥ “እስ አስ ግታ እማቶ ጊግስድ ዳሮ አሳታ ፄግስ። 17እማቶይ ሞከትያ ሳተይ ጋክያ ዎደ፥ ፄገትዳ እማታ፥ ‘ሄኮ ኡባባይ ጊግስ፥ ሃ ዪተ’ ያግድ ፄጋናዳ ባ አይልያ ኪትስ።
18“ሽን ኡባይካ ባንታ ጋሶ ጋሶ መዶሶና። እሶይ፥ ‘ሀእ ቡሮ ጋደ ሻምዳ ግሾ፥ ባዳ በአናዉ ኮሼስ፤ ሀያና ታና አጋርክ ያጋ’ ያግስ። 19ሀንኮይ፥ ‘እቻሹ ዋ ቦር ሻማስ፤ ኤንታና ዋፃ በአና ግሾ ሀያና ታና ላንጮፋ’ ያግስ። 20ቃስ ሀራይ፥ ‘ታኒ ቡሮ መዳን ደእያ ግሾ፥ ያናዉ ዳንዳእከ’ ያግስ።
21“አይለይ ስም ይድ ሄ ኡባ ባ ጎዳስ ኦድስ። ሄ ዎደ ያጋኖ አዋይ ሀንቀትድ አይልያኮ፥ ‘ኤለሳዳ ካታማን ደእያ ዎጋ ኦገታነ ዳጋላታ ባዳ፥ ማንቆታ፥ ዎበታ፥ ቆቀታነ ጉንዳታ ሃ ኤሀ’ ያግስ።
22“አይለይ፥ ‘ታ ጎዳዉ፥ ነ ኪትዳይስ ኡባይ ፖለትስ፥ ሽን ሀእካ በሲ ደኤስ’ ያግስ።
23“ጎዳይ አይልያኮ፥ ‘ሆሮጋታ ቦላነ፥ ጋደ ግዶ ኦገታ ከያ፥ ታ ኬይ ኩማና ጋካናዉ ደምዳ ኡባ ያና መላ ኦ። 24ታ ህንተዉ ኦዳይስ፤ እማቶ ፄገትዳይሳታፐ ኦንካ ታ ግብራፐ ሞናይሳ ኤርተ’ ግስ” ያግስ።
ጎዳ ካሎይ ጭግስያ ጋተ
25ዳሮ አሳይ እያራ ዎላ ብሽን፥ የሱሲ ኤንታኮ ጉየ ስሚድ፥ 26“ታኮ ያ ኡባይ ባ አዋነ ባ አይዉ፥ ባ ማችዉነ ባ ናይታ፥ ባ እሻታነ ባ ምቸታ፥ ሀር አቶሽን ባ ደኡዋ እፆናይ ታ ታማረ ግዳናዉ ዳንዳኤና።#ማቶ 10:37. 27ባ ማስቃልያ ቶክድ ታና ካሎናይ ታ ታማረ ግዳናዉ ዳንዳኤና።#ማቶ 10:13፤ 16:24፤ ማር 8:34፤ ሉቃ 9:23.
28“ህንተፈ እስ አስ ሹቻ ኬ ኬፃናዉ ኮይኮ፥ ኬ ኬፅድ ኦንጋናዉ አይ መላ ሚሸ ኮሽያኮ ኮይሮትድ ኤራናዉ ቆፕ በኦናይ ኦኔ? 29ሄሳ ግዶና እፅኮ፥ ሀ ኡራይ ባሶ ሹቹ ሂፅን ቁስተ ፆንኮ፥ 30በእያ ኡባይ፥ ‘ሀ ኡራይ ግምበ ኦይክን ቁስታናዉ እያ ፆንስ’ ያግድ ቦሮሶና።
31“ዎይኮ እስ ካዎይ ሀራ ካዎራ ኦለታናዉ ደንድሸ ላታሙ ሙኩሉ ኦላንቾታ ኤክ ያ ካዉዋራ ታሙ ሙኩሉ ኦላንቾታራ ኤቀታናዉ ዳንዳአናይሳነ ዳንዳኦናይሳ ኡትድ ዞረቶናይ ኦኔ? 32ኤቀታናዉ ዳንዳኤቶናባ ግድኮ፥ ሄ ካዋራ ሃሆን ደእሽን ጊጋናዉ ኮይሮትድ ጭማ የድድ ኦይቼስ። 33ሄሳዳካ፥ ህንተፈ ኦንካ ባዉ ደእያባ ኡባ አጎና እፅኮ፥ ታ ታማረ ግዳናዉ ዳንዳኤና።
34“ማፅነይ ሎኦ፥ ሽን ማፅነይ ባ ማልኡዋ አግኮ፥ ዋንድ ማፅነ ጌተታናዉ ዳንዳኢ? 35ቢታተስነ አራዳተስ ማዶና ግሾ ዎራ የገቴስ። ህዛ፥ ስእያ ሀይ ደእያ አስ ስኦ” ያግስ።
Pilihan Saat Ini:
ሉቃሳ 14: GFBEVF
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Word for the World International and The Word for the World Ethiopia
