ሉቃሳ 11
11
የሱሲ ዎሳባ ታማርስስ
(ማቶ 6:9-13፤ 7:7-11)
1እስ ጋላስ የሱሲ እስ በሳን ዎሴስ። ዎሳ ዉርስዳ ዎደ እያ ታማረታፐ እሶይ፥ “ጎዳዉ፥ ዮሃንስ ባ ታማረታ ዎሳ ታማርስዳ መላ ነካ ኑና ዎሳ ታማርሳ” ያግስ።
2የሱሲ፥ “ሀይሳዳ ያግድ ዎስተ፦
“ ‘ሳሎን ደእያ ኑ አዋዉ
ነ ጌሻ ሱንይ አንጀቶ፤
ነ ካዎተይ ዮ።
3ኑ ጋላሳ ካ ሀች ሀች ኑስ እማ።
4ኑና ቆሄይሳታ ኑኒ አቶ ገይሳዳ፥
ኑ ናጋራ አቶ ጋ፤
ፓጨን ኑና ገልሶፋ’ ያግተ” ያግስ።
5ካልድካ፥ የሱሲ ባ ታማረታኮ ያግስ፦ “ሌምሶስ ህንተፈ እሱዋስ ላገይ ደኤስ። እ ግድ ብላሄ ባ ላግያ ሶ ብድ፥ ‘ታ ላግያዉ፥ ምያባይ ደእኮ ታዉ እማርክ። 6ታዉ ላገ ግድዳ እስ አስ ኦገፐ ይን፥ እያዉ አያባ ያስ’ ያግኮ፥
7“እያ ላገይ ኬ ግዶን ግድድ፥ ‘ሀያና ታና ዋይሶፓ፥ ፐንገይ ጎርደትስ። ታ ናይትካ ታራ አርሳ ቦላ ዝንእዶሶና። ያንያ ግሾ፥ ደንዳዳ ነ ኮያባ እማናዉ ዳንዳእከ’ ያግዬ? 8ታ ህንተዉ ኦዳይስ፤ ላገተ ግሾ ደንድድ እማናዉ ኮዮና እፅኮካ ዎሳን ሳለዳ ግሾ፥ ደንድድ ኮሽያባ ኡባ እሜስ።
9“ሄሳ ግሾ፥ ታኒ ህንተዉ ኦዳይስ፤ ዎስተ ህንተዉ እመታና፤ ኮይተ ህንተ ደማና፤ ካረ ይድ ፄግተ ህንተዉ ዶየታና። 10ጋሶይካ፥ ዎስያ ኡባይ ኤኬስ፤ ኮየይ ደሜስ፤ ካረ ይድ ፄገይሳስ ዶየቴስ።
11“ህንተኖ፥ አዋቶ ህንተ ግዶፈ ናእ ኡይ ዎስን፥ ሹቹ እመይ ኦኔ? ሞሎ ዎስን ሾሽ እመይ ኦኔ? 12ዎይኮ ጱጱለ ዎስኮ ኮርነ እሚ? 13ህንተ ኢታታ ግድሸ ህንተ ናይታስ ሎኦባ እሞ ኤርኮ፥ ሳሎን ደእያ ህንተ አዋይ ዎሰይሳታስ ጌሻ አያና ዋትድ አድ እመኔ?” ያግስ።
የሱሳነ ብኤል-ዘቡላ
14እስ ጋላስ የሱሲ፥ ዶና ሙምስዳ ቱና አያና እስ ኡራፐ ከስስ። ቱና አያናይ ከይዳ መላ ሙመ ኡራይ ኦደትስ። አሳይካ ማላለትስ። 15ሽን እሶት እሶት፥ “ቱና አያና ሀላቃ፥ ብኤል-ዘቡላ ዎልቃን ቱና አያናታ ከሴስ” ያግዶሶና።#ማቶ 9:34፤ 10:25. 16ሀራት ቃስ ፓጬስ ሳሎፐ ማላ በሳና መላ ኮይዶሶና።#ማቶ 12:38፤ 16:1፤ ማር 8:11.
17ሽን የሱሲ ኤንታ ቆፋ ኤርድ ኤንታኮ፥ “ዎል ግዶን ሻከትያ ካዎተ ኡባይ ዬስ፤ ዎል ግዶን ሻከትያ ኬ ኩንዴስ። 18ፃላሄይ ዎል ግዶን ሻከትኮ እያ ካዎተይ ዋንድ ምንድ ኤቃኔ? ህንተ ታና፥ ‘እ ቱና አያናታ ብኤል-ዘቡላ ዎልቃን ከሴስ’ ያጌታ። 19ህዛ፥ ታኒ ቱና አያና ብኤል-ዘቡላ ዎልቃን ከስያባ ግድኮ ህንተ ናይት ኦደ ዎልቃን ከሶናሻ? ሄሳ ግሾ፥ ኤንቲ ህንተ ቦላ ፕርደይሳታ ግዳና። 20ሽን ታኒ ቱና አያናታ ፆሳ ብራን ከስያባ ግድኮ፥ ህዛ፥ ፆሳ ካዎተይ ህንተኮ ማትዳይሳ ኤርተ።
21“ምኖ አስ ቶራነ ጎንዳለ ኦይክድ፥ ባ ኬ ናግያባ ግድኮ፥ እያ ሻሎይ ቦሸተና። 22ሀኖሽን፥ እያፐ አድ ምኖ ግድዳ አስ ይድ፥ እያ ቆህድ ፆንኮ፥ አማነትዳ ቶራነ ጎንዳለ ዎስስ ኤክድ፥ እያ ሻሉዋ ቦንቅድ ሀራስ ሻኬስ።
23“ታራ ግዶናይስ ታና እፄስ፤ ታራ ሺሾናይስ ላሌስ።#ማር 9:40.
24“ቱና አያናይ አሳፐ ከይዳ ዎደ ሸምፕያ በሲ ኮይድ ሃ ባይና ሶራ ዩዬስ። ሸምፕያ በሲ ይዳ ዎደ፥ ‘ታ ከይዳሱዋ ስማና’ ያጌስ። 25እ ስምያ ዎደ ኬይ ፕተትድ ሎእድ ደእሽን ደምስ። 26ሄሳፈ ጉየ፥ ብድ እያፐ አድ ኢትዳ ሀራ ላፑን ቱና አያናታ ኤክድ ዬስ። እያን ገልድ ዱሱ ኦይኬስ። ሄ ኡራስ ኮይሮይሳፈ አድ ጉየይስ ኢታ ግዴስ” ያግስ።
27የሱሲ ሄሳ ኦዳ ቦላ ደእሽን፥ እስ ማጫስ አሳ ጋፈ ደንዳዳ፥ ባ ቃላ ቁ ኦዳ፥ “ነና ቶክዳ ኡሎይነ ኔኒ ምዳ ንት አንጀትዶሶና” ያጋሱ።
28ሽን እ፥ “አንጀትዳይሳት ፆሳ ቃላ ስእድ ኪተተይሳታ” ያግስ።
ዮናሳ ማላታ
29ዳሮ አሳይ ሺቅዳ ዎደ የሱሲ፥ “ሀ የለተይ ኢታ የለተ፤ ኦራ ማላ ኮዬስ። ሽን ዮናሳ ማላታፐ አትሽን፥ ሀር ኤንታዉ እመተና።#ማቶ 16:4፤ ማር 8:12. 30ዮናስ ናናወ አሳስ ማላ ግድዳ መላ አሳ ናእካ ሀ የለተስ ማላ ግዳና።#ዮሀ 3:4. 31ዱገሀ ካውያ ፕርዳ ጋላስ ሀ የለተራ ደንዳዳ ፕርዳና። ጋሶይካ፥ እያ ሶሎሞነ ጭንጫተ ስአናዉ ቢታ ጋፃፐ ደንዳዳ ያሱ። ሄኮ ሶሎሞነፐ አይ ሀይሳን ደኤስ#1 ካዎ 10:1-10፤ 2 ታር 9:1-12. 32ናናወ አሳት ፕርዳ ጋላስ ሀ የለተራ ደንድድ ኤንታ ቦላ ፕርዳና። ጋሶይካ፥ ዮናሳ ስብካትያን ማሮታ ገልዶሶና። ሄኮ፥ ዮናሳፐ አይ ሀይሳን ደኤስ” ያግስ።#ዮሀ 3:5.
አሳተ ፖኦ
33“ፆምፐ ኦይድ ቆሳ በሳን ዎይኮ ኦቶ ግዶን ዎያ አስ ዴና። አስ ፖኡዋ በአና መላ ቃ በሳን ዎስ።#ማቶ 5:15፤ ማር 4:21፤ ሉቃ 8:16. 34ነ አሳተስ ፖኦይ ነ አይፍያ። ነ አይፈይ ሎኦ ግድኮ፥ ነ ኩመ አሳተይ ፖኤስ። ነና አይፈይ ሳክኮ ነ አሳተይ ኡባይ ሜስ። 35ሄሳ ግሾ፥ ነ ጋርሳን ደእያ ፖኦይ ሞና መላ ናገታ። 36ህዛ፥ ነ ኩመ አሳተይ ፖኦ ግድኮ፥ ነ አሳተንካ ሀር ማ በሲ ይኮ፥ ነ አሳተ ኩመይ ዎልለ ፖኦ መላ ግዴስ” ያግስ።
ኡሱፑን አየታ
(ማቶ 23:1-36፤ ማር 12:38-40)
37የሱሲ ባ ኦዳ ኦንግዳ መላ እስ ፋርሳወይ ባራ ካ ማና መላ ፄግስ። የሱሲ፥ እያራ እስፈ ገልድ ግብራ ቦላ ኡትስ። 38ፋርሳወይ የሱሲ ካ ማናፐ ስን ኩሸ ሜጮናይሳ በእድ ማላለትስ።
39ጎዳይ እያኮ፥ “ህንተ ፋርሳወት ቁለስነ ሻተስ ቦላ ባጋ ሜጨታ። ሽን ህንተ ጋይ ኡዘተንነ ኢታተን ኩምስ። 40ህንተኖ፥ ኤያቶ፥ ካረ ባጋ መዳይ፥ ጋ ባጋ መዳይ እያ ግደኔ? 41ሽን ቁልያንነ ሻትያን ደኤይሳ ማንቆታስ እምተ። ሄ ዎደ ህንተዉ ኡባባይ ጌሽ ግዳና።
42“ፋርሳወቶ ህንተና አየ! ሳዎፐ፥ ፃሎተፐነ ሄሳ መላባፐ አስራታ ከሴታ። ሽን ፅሎተነ ፆሰ ዶሶይ ህንተናን ባዋ። ሀራታ አጎና ሀይሳታካ ኦናዉ በሴስ፥ ሽን አግደታ።#ሌወ 27:30.
43“ፋርሳወቶ ህንተና አየ! አይሁደ ዎሳ ኬን ቦንቾ ኦይደ፥ ግያ ግዶን ቦንቾ ሳሮ ዶሴታ።
44“ማል ይን፥ አሳይ ኤሮና ቦላራ ብያ ዱፎ ዳነይሳቶ ህንተና አየ!” ያግስ።
45ህገ አስታማረይ ዛሪድ፥ “አስታማርያዉ፥ ነ ሄሳ ጋሸ ኑና ጫያሳ” ያግስ።
46የሱሲ፥ “ህንተኖ፥ ህገ አስታማረቶ፥ ህንተናካ አየ! አሳይ ቶካናዉ ዳንዳኦና ዴፆ ቶሆ ቶሰታ፥ ሽን ህንተ ህንተ ሁጰስ ሀር አቶሽን ብራ ፄራንካ ቦቸከታ።
47“ህንተ አዋት ዎዳ ናበታ ዱፉዋ ህንተ ጊግስያ ግሾ፥ ህንተና አየ! 48ህዛ፥ ህንተ አዋታ ኦሱዋ ምንናዉ ኤንቲ ዎዳ ናበታ ዱፉዋ ህንተ ሎይያ ግሾ፥ ኤንታ ኢታ ኦሱዋስ ህንተ ማርካ። 49ሄሳ ግሾ፥ ፆሳይ ባ ጭንጫተን፥ ‘ናበታነ ሀዋረታ ታ ህንተዉ ኪታና፥ ሽን ህንተ ባጋታ ዎና፤ ሀራታ ጎዳና’ ያግስ። 50ሀ የለተይ አላመይ መቶሳፐ ሀኖ ጋካናዉ ጉክዳ ናበታ ኡባ ሱስ ኦይሸታና። 51አበላፐ ዶምድ ያርሾ በሳስነ ፆሳ ኬፈ ግዱዋን ጉክዳ ዛካርያሳ ሱ ግሾ ሀ የለተይ ኦይሸታና።#መ 4:8፤ 2 ታር 24:20-21.
52“ህገ አስታማረቶ፥ ህንተና አየ! ኤራተ ቁልፕያ ህንተ ኩሸን ኦይክደታ፥ ሽን ህንተዉ ገለከታ ሀራታካ ገልሰከታ” ያግስ።
53የሱሲ ያፐ ባናዉ ከይያ ዎደ፥ ህገ አስታማረትነ ፋርሳወት እያራ ኤቀትድ ኦይሾን ዋይሶሶና። 54እያ ዶናፐ ከይያ ቃላን እያ ኦይካናዉ ኮይድ ሄሳ ኦዶሶና።
Pilihan Saat Ini:
ሉቃሳ 11: GFBEVF
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Word for the World International and The Word for the World Ethiopia
