मर्कुस 2
2
इसुले लुल्यापण्या मन्सलाइ निको पाड्यो
(मत्ति ९:१-८; लुका ५:१७-२६)
1केइ दिनपाछा इसु कफर्नहुम सहरमि फर्किया, रे मान्सले उन घरइ छन् भन्न्या सुन्यो। 2ताँ भउतइ मान्स इसुका वाँ आया रे मान्सका भिडले अद्दा देलि बाइर लइ बस्या ठउँर भएइन, रे तइबेला उनुले तिनुलाइ परमेस्वरको बचन प्रचार अद्दाथ्या। 3तसइबेला चार जना मान्सले एक जनो लुल्या पण्या मान्सलाइ ओछ्यानसमेत बोकिबर लेया। 4मान्सका भिडले अरन्ज्या, बाटो नपायाहुनाले बिमारिलाइ भित्तर इसुका वाँ ल्याउन सकेइन। तसो भयाहुनतक इसु बस्या घरको पाखो उचेडिबर, बिमारिलाइ ओछ्यानसितइ इसुका अगाडि ओरालिदियो। 5तिनु मान्सको यसो बिस्वास धेकिबर, इसुले लुल्या पण्या मान्सलाइ भुन्यो, “ए भाइ, तेरा पाप छिमा भयाछन्।”
6यो भन्या सुनिबर ताँ भया धर्म-गुरुले मनमनइ यसो भुन्न लाग्या, 7“यइ मान्सले यसरि क्यालाइ बोल्लछ। परमेस्वरको निन्दा अद्या यो को हो? परमेस्वर बाहेक अउर कसइले लइ पाप छिमा अद्द सक्दइन!”
8इसुले तिनरा मनइनका कुरा बुझिबर तिनुलाइ भुन्यो, “तमु क्यालाइ यसो बिचार अरन्छउ? 9एइ लुल्या पण्या मान्सलाइ, ‘तेरा पाप छिमा भया भन्नु’ रे ‘उठिबर हिट, भन्नु क्या सजि छ भुन?’ 10तर हेर, यइ धर्तिमि मान्सका चेलालाइ पाप छिमा अद्या अधिकार छ भन्न्या कुराको प्रमाण मु तमुलाइ दिनउ। तबइ इसुले तइ लुल्या पण्या बिमारिलाइ भुन्यो, 11‘मु तुखि भुन्नउ उठ, रे आफनो ओछ्यान बोकिबर घर जा!’”
12सप्पइले हेद्दा हेद्दाइ त्यो मान्स जुणुक्क उठ्यो, रे आफनो ओछ्यान बोकिबर हिट्यो। तिनु सप्पइ मान्स अचम्म पड्या, रे “हामुले त यसो कइलेइ धेक्या थेएइन्” भुन्नाइ तिनु परमेस्वरको प्रसम्सा अद्दलाग्या!
इसुले लेबिलाइ बोलायो
(मत्ति ९:९-१३; लुका ५:२७-३२)
13इसु अज गालिल समुन्दरका किनारमि गया। मान्सको ठुलो भिड उनरा वा आयो, रे उनुले तिनुलाइ सिछ्या दिन लाग्या। 14ताँबटहइ जान्याबेला इसुले एक जनो कर उठाउन्या मान्सलाइ कर उठाउन्या ठउँरलाइ बसिरया धेक्यो। त्यो अल्फायसको चेलो लेबि थ्यो, इसुले तइखि भुन्यो, “मेरापाछा लाग्।” यो सुनिबर लेबि उठ्यो रे इसुका पाछा लाग्यो।
15इसु लेबिका घर पाउना भइबर गया। रे सिस्यासङइ बसिबर खान लाग्या। ताँ उनरा सिस्यासित कर उठाउन्या रे पापि लइ बसिरइथ्या क्यालाइकि उनरा पाछालाग्द्या भउतइ मान्स थ्या। 16इसु पापि रे कर उठाउन्यासङ खान्नारया धेकिबर, फरिसि दलका धर्म-गुरुले उनरा सिस्यालाइ भुन्यो, “तिन क्यालाइ कर उठाउन्या रे पापिसित बसिबर खानाहान?”
17यो सुनिबर इसुले तिनुलाइ भुन्यो, “निरोगिलाइ बइद्दको खाँचो हुनइन्, तर रोगिलाइ मात्तरइ बइद्दको खाँचो पणन्छ। मु धर्मिलाइ हइन, तर पापिलाइ बचाउन आया हुँ।”
उबास बस्स्या बिसयमि सोध्यो
(मत्ति ९:१४-१७; लुका ५:३३-३९)
18युहन्नाका सिस्या रे फरिसि उबास बसिरइथ्या। मान्सले आइबर इसुलाइ भुन्यो, “युहन्नाका सिस्या रे फरिसिका सिस्या उबास बस्साहान्, रे तमरा सिस्या क्यालाइ उबास बस्साइन्?”
19इसुले तिनुलाइ भुन्यो, “क्या ब्याउलो बर्यातिसंङ हुन्याबेला बर्याति उबास बस्साहान? जन्ज्यासम्म ब्याउलो बर्यातिसंङइ हुन्छ, तिनुले उबास बस्स पड्इन। 20तर यसो दिन लइ आउन्या छ, जबइ ब्याउलो बर्यातिबटहइ अलग अरिन्या छ, तबइ बर्याति तइ दिन उबास बस्या छन्।
21“कसइले लइ पुराना लत्तामि नयाँ टालो हाल्लइन्। नति नयाँ टालो हाल्या लइ टालो खुम्चिबर पुराना लत्तालाइ चिरिदिन्छ रे झिग ठुलो दुलो पाणिदिन्छ। 22रे कसइले लइ नयाँ दाखमध्य पुराना छालाका थइलामि हाल्लाइन, क्यालाइकि तइ नयाँ दाखमध्यले पुरानो छालाको थइलो फुटाइदिन्छ, रे दाखमध्य पोखिन्छ, दाखमध्य रे छालाको थइलो दुएइ नास हुनाछन्। तसो भयाहुनतग नयाँ दाखमध्य नयाँइ छालाका थइलानु हालिन्छ।”
बिस्रराम दिनका प्रभु
(मत्ति १२:१-८; लुका ६:१-५)
23एकबेर बिस्राम दिनमि इसु गहुँका गड्यानबटहइ भइबर जान्नाथ्या। जानाजानाइ उनरा सिस्या गहुँका बाला टिप्द लाग्या। 24यो धेकिबर फरिसि भन्न्या धार्मिक समुहका मान्सले इसुलाइ भुन्यो, “हेर, बिस्राम दिनमि ब्यबस्थाले नअद्दु भन्या काम तमरा सिस्याले क्यालाइ अद्दहान्?”
25इसुले भुन्यो, “दाउद राजा रे तिनुसित भयाहुन्यासंङ खानाइ केइ नभयाबेला उनुले क्या अर्याथ्यो? क्या तमुले पड्या आथिनउ? 26ठुला पुजारि अबियाथारका पालामि परमेस्वरका भबनमि दाउद पस्या, रे परमेस्वरलाइ चडाया रोटो तिनुले खायो। जो पुजारि बाहेक अउरले खान मिल्लइन थ्यो। रे त्यो रोटो दाउदले तिनसंग हुन्यालाइ लइ खानइदियो।”
27इसुले तिनुलाइ भुन्यो, “मान्स बिस्राम दिनखिलाइ बन्या हइन, तर बिस्राम दिन मान्सखिलाइ बन्या हो 28तबइलाइ मान्सको चेलो बिस्राम दिनको लइ प्रभु हो।”
Pilihan Saat Ini:
मर्कुस 2: DOTY
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2024 (Active), Mother Tongue Translators Society and Wycliffe Bible Translators, Inc. All rights reserved.
