Matiu 6
6
Nyẹ Pa Kị́nị́ Pịrị Dienyẹ
1<<Ọmịnị ọmịna ḅụ ẹbị sị ọmịnị ọmịna ibiamịẹnyẹ fịrị nwángịgha túminị́ tórúku sị nnị ọmịnị árị bẹ ḅara. Ọmịnị ọkọ mịẹmịẹ, ọmịnị gbẹ́nyẹ nyánáḅobịgha ọmịna sobie Daḅọ ḅara.
2<<Anịgo ọ nyẹ pa nyẹ ḅụ kụrọapụ pịrịarị sáá ọdụ ofuro pa anị ilúghú págháma ma, mmẹẹ́ a tọ́rụ kingiapụ mịẹmịẹ ḅara Juuapụ kobiri yọ ma ḅụ na pịghị asọogbo, túminị́ kuu pa n pịrịbẹ ḅara. A karakárányẹ ma dugho ọ pịrịm nnị bi ḅara pa nna gbẹ́nyẹ nyanaḅomam. 3Kụ́ma ọ nyẹ pa nyẹ ḅụ kụrọapụ pịrịarị sáá minima sị ị́yẹ́ ẹ́rẹ́ḅara nimi ị́yẹ́ ámáḅara mịẹarịnyẹ, 4si ị́yẹ́ nyẹ pa kị́nị́ pịrị ma ḅọghu ḅara ḅụ fịnị bẹ ḅara. Anịsáa ị́yẹ́ Daá ḅọghu angaá ḅụ mịẹnyẹ árịarị ḅo ị́yẹ́ gbẹ́nyẹ pa ị gbẹ́bẹm.
Tẹ́ghẹ̄ Gboloma Dienyẹ
(Luk 11.2-4)
5<<I tẹ́ghẹ̄ bẹ sáá, mmẹẹ́ a tọ́rụ́ kingiapụ ma kịkama, n bim ḅẹ́ n sẹ́fị́nị sị tẹ́ghẹ̄ Juuapụ kobiri yọ ma ḅụ na pịghị asọogbo angásá túminị́ nnị árị bẹ ḅara. A karakárányẹ ma dugho ọ pịrịm nnị bi ḅara pa nna gbẹ́nyẹ nyanaḅomam. 6Kụ́ma ọ tẹ́ghẹ̄ bẹ sáá, ọmịnị ọmịna wárịbie sọọ, ḅụ́pọ́ ma gbẹ́ẹ̄ sị ọmịna Daá tọ́rụ́arịghaḅọ ma tẹ́ghẹ̄. Anịsáa ọmịna Daá, ḅọghu angaá mịẹnyẹ árịarị ḅo, ma ọ gbẹ́bẹm. 7Ọ tẹ́ghẹ́arị sáá, ọmịnị ofori ofori ẹ́gẹ́rẹ́kọọ ma Tamuno nímighaapụ ma mịẹmịẹ ḅara, tegó nnị sịm ḅẹ́ Tamuno n naábẹm nnị dugho mánámāná ẹ́gẹ́rẹ́ gosi. 8Ọmịnị n dua ma, ḅẹ́ ọ́ mịná Daá nimim ọ binyẹ na ọmịnị ọ ḅara anị biigha sáá, 9Mịị ḅara ma anịị ọ tẹ́ghẹ̄ bẹ ḅara:
<< <Wámịna Daá sobie fịnịḅọ,
kuu fịnị ị́yẹ́ ẹ́rẹ́ pịrịị,
10ị́yẹ́ ásẹ́mẹ́kiri ḅoo,
i dọghụnyẹ tuminikiri mịẹ
anị sobie fịnị ḅara.
11Pa wa pịrị mịmgba éné
wámịna éné bie fị́nyẹ.
12Wámịna sii ḅụ ḅárási wa pịrị
wamịnị sọ sii wáriso siinyẹ
pa wa mịẹapụ pịrịmaá ḅara.
13Wa daa pa daádighi bie suu ma,
kụ́ma sii tumḅọ ma ḅarabie wa dụaḅọ́rọ́ma.>#6.13 Jẹa áyá diri mịma sua gbolomam: Kọnsịn ma i nyẹ ẹrẹ́sị kụrọ ma na ipine ma na muu bẹ sa bẹ sa láa. Anị ọkọ fịnị.
14<<Ḅọ́rọ́ o sii wáriso siinyẹ pa ọ mịẹapụ pịrị pịrị, ọmịna Daá sobie fịnịḅọ sọ sii wáriso ọ pịrịbẹm. 15Kụ́ma ḅọ́rọ́ ọ sii wáriso siinyẹ pa ọ mịẹapụ pịrịgha, ọmịna Daḅọ ọmịna sii wáriso ọ pịrịbịgha.
Ḅurukụ́ma Dienyẹ
16<<Ọ ḅurukumáarị sáá, ọ minima túminị́ nimi mmẹẹ́ a tọ́rụ́ kingiapụ ma ḅara, ḅẹ́ nnị nna tórúku pa jẹ́ ḅara warịmabẹm pa túminị́ die ḅẹ́ nnị ḅurukumáarị. A karakárányẹ ma dugho ọ pịrịm nnị bi ḅara pa nna gbẹ́nyẹ nyanaḅomam. 17Kụ́ma ị ḅurukụ́ma bẹ sáá, pulo pa ị sịbị sara sị mingi pa ị tórúku sịrịị. 18Anị túminị́ diebịgha ḅara ḅẹẹ ị ḅurukumáarị, kụ́ma ị́yẹ́ Daḅọ ngéré, túminị́ arịgha ḅọ ma; anịsáa ị́yẹ́ Daḅọ ma ḅọghu angaá mịẹnyẹ árịarịḅọ ma, gbẹ́nyẹ pa ị gbẹ́bẹm.
Sobie Ngọ Dienyẹ
(Luk 12.33,34)
19<<Tuminikiri ngọ koko ịḅụ pịrịma, ọbịọfịnyẹ na ajarị anị sima bẹ angaá na pịghị furuapụ fomká sị furubịgha angaá. 20Kụ́ma sobie ngọ koko ịḅụ pịrị, ọbịọfịnyẹ na ajarị ine simabịgha angaá, furuapụ so ine fomká sị furubịgha angaá. 21Ḅẹẹ ị́yẹ́ ngọ fịnị angaá anịị ị tẹ́mẹ́ sọ fịnị bẹ angaá.
Oju Ma Baá
(Luk 11.34-36)
22<<Tọ́rụ ma anịị oju ma tọndọ. Ḅọ́rọ́ ọmịna tọ́rụ ibi ibi baá ọmịna oju gbọrụ ḅụ biibẹm. 23Kụ́ma ḅọ́rọ́ ọmịna tọ́rụ si si, kánákáná ọmịna oju gbọrụ ḅụ biibẹm. Ḅọ́rọ́ anịsáa ị́yẹ́ oju bie fịnị baá ma kánákánám, dighi nị ị́yẹ́ kánákáná ma dụḅa láa ḅara!
Ngọ Nyáná Na Tamuno Na
(Luk 16.13; 12.22-31)
24<<Gbẹ́rẹ́ḅọ sọ ine fịrịnwangị mmẹẹ́ kị́nị́nyánáapụ pịrịbịgha. N ḅo gbẹ́rẹ́ḅọ ḅẹ́lẹ́mabẹm sị ịsiḅọ tarịbịgha anịgha n ḅo, n ḅo sáá mamgba pa gbẹ́rẹ́ḅọ pịrịbẹm sị isi ngaaḅọ dighisima. Ị ine fịrịnwangị Tamuno na igbii na pịrịbịgha.
Ḅụḅáláḅálá Pa Ḅụ Pịrị Dienyẹ
25<<Anịgosi a dugho ọ pịrịm ọ ḅụḅáláḅálá pa ọmịna duma pịrịma, ọ tẹ́ fị bẹ, ọ tẹ́ ḅuu bẹ; anịgha oju ma gbólómanyẹ bẹ ọ tẹ́ sua bẹ. Duma ma anị nyẹ́láḅa fị́nyẹ nẹ́ngịgha, oju ma anị pịghị nyẹ́láḅa bịtẹ nẹngịgha? 26Fọ́rụ bie fiighiarị fíní ma dighi, nnị dua dipigha anịgha duasughu anịgha sughu nyẹ koko angaá nyáná, anịsọ ọmịna Daá sobie fịnịḅọ nnị siḅearị ọ nyẹ́la mịnaapụ ma nẹ́ngịgha? 27Ọmịna bie, tụọ ḅụḅáláḅálá pa n ḅọ ḅụ pịrị ḅụ gbẹ́rẹ́ kálá sáá tụ́wọ pa n ḅọ duma mịẹ nángwọ́ma bẹ?
28<<Ọ tegó ḅụḅáláḅálá pa ọmịna ḅụ pịrịarị suabịtẹ gosi? Dighi nị piri ogunu ma sẹnịarị ḅara, n fịrị nwángịgha anịgha nna bịtẹ dori. 29Ḅẹẹ a dugho ọ pịrịm ḅẹ́ Solomọn ori ngọ mamgba ḅụ ọ bịtẹ sua ọ ḅụ birimagha mịná ogunu ma fíafía ḅara. 30Ḅọ́rọ́ anịị Tamuno bịtẹ pa piri osuka ma sua ḅara, mịmgba ọmịnị anị arịm, ḅá nnị anị gbii fịnịbie suamam, ọ mịma nẹ́ngị ḅara pa bịtẹ pa ọ suabịgha, ọmịnị minini ịrụapụ? 31Anịgosi, ọ ḅụḅáláḅálá pa ọḅụ pịrịma ḅẹarị ḅẹẹ, <Wa tẹ́ fị bẹ?> Anịgha <Wa tẹ́ ḅuu bẹ?> Anịgha <Wa tẹ́ sua bẹ?> 32Ḅẹẹ Tamuno nímighaapụ ma mangị ikelekele mịnanyẹ mamgba pịrịm, ọmịna sobie Daḅọ nimitẹ́lẹ́mam ḅẹ́ ọ mị́na nyẹ mamgba bim. 33Kụ́ma Tamuno ásẹ́mẹ́kiri ma dọghụ na pịghị ọ dọghụnyẹ, anịsáa nnị mịnanyẹ mamgba pa ọ pịrịbẹm. 34Anịgosi, ḅáa gbolomanyẹ pa ḅụḅáláḅálá pa ịḅụ pịrịma, ḅẹẹ ḅáa anị ḅụḅáláḅálá pa anị ḅụ pịrịbẹm. Ḅẹẹ éné éné anị na káara ḅụḅáláḅálá nyána anị ḅụ pịrịm.
Pilihan Saat Ini:
Matiu 6: IBY
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
©2024 Luke Initiative for Scripture Translation
