Gẹnẹsis 7
7
Uromwẹ Amẹ
1E Nọyaẹnmwa keghi tama Noa wẹẹ, “La uwe okọ ke uwẹ kevbe ẹgbẹe ruẹ hia. I miẹn wẹ vbe uwe avbe emwa na hia, wẹ ọkpa kẹkan ọre uyinmwẹ ọnrẹn la mwẹ aro vbọ. 2U ghi viọ ọdọ vbe amwẹ ukhukhu ihinrọn ọghe aranmwẹ ne ẹ i mwẹ awua, sokpan avbe aranmwẹ ni mwẹ awua, u ghi viọ iran ọdọ vbe amwẹ kẹkan. 3U ghi vbe viọ ọdọ vbe amwẹ ukhukhu ihinrọn ọghe dọmwadẹ ahianmwẹ. U ghi ruẹe vberriọ ne avbe aranmwẹ ughughan, kevbe avbe ahianmwẹ ughughan ghẹ fuan ne iran miẹn ehe na dọlegbe gha biẹlẹ ye agbọn. 4Vbe ẹdẹ ne ẹdẹ ihinrọn ẹre, I gha gie amẹ ye avan iyeva kevbe asọn iyeva rhọ ye agbọn, ne ọ miẹn ehe na fuẹn emwi hia ne I yi ni rre agbọn.” 5Noa keghi ru emwi hia ne Osanobua tama rẹn.
6Ukpo arria eha (600) ọre Noa gha ye vbe amẹ do ro ye agbọn. 7Rẹn kevbe amwẹ ọnrẹn, ivbi ẹre nikpia kevbe amwẹ iran keghi la okọ ne iran miẹn ehe na miẹn uhunmwu vbe obọ uromwẹ amẹ. 8Ọdọ vbe amwẹ ọghe dọmwadẹ aranmwẹ ne ẹ i mwẹ awua kevbe ne ọ mwẹ awua kevbe avbe ahianmwẹ kevbe aranmwẹ negiẹrẹ keghi 9lele Noa la okọ zẹ vbene Osanobua khare. 10Ikpẹdẹ ihinrọn ghi gberra nẹ, uromwẹ amẹ keghi rre.
11Ẹghẹ ne Noa na gha rre ukpo arria eha (600), vbe ikpẹdẹ ehairrọvbugie ọghe uki nogieva, uhunmwu ẹzẹ ọghe okun nekhua hia ni rre uwe otọ keghi vuaa, uvun ni rre iso hia keghi kie rua.
12Amẹ keghi ye avan iyeva kevbe asọn iyeva rhọ ye agbọn.
13Vbe ẹdẹ ne ẹdẹrriọ nii, e Noa kevbe amwẹ ọnrẹn, ivbi ẹre nikpia eheha Siẹn, Ham kevbe Jafẹt kevbe amwẹ iran keghi la uwe okọ. 14Dọmwadẹ aranmwẹ oha ughughan kevbe emwirri, aranmwẹ ni kọnkọn kevbe negiẹrẹ, kevbe ahianmwẹ ughughan hia keghi lele iran. 15Ọdọ vbe amwẹ ọghe emwi ughughan ni rre agbọn hia keghi lele Noa la uwe okọ. 16Zẹ vbene Osanobua khare. Ẹghẹ nii, ọre Nọyaẹnmwa na khui urho ke Noa yi. 17Uromwẹ amẹ keghi ya ikpẹdẹ iyeva vbotọ, amẹ ni keghi do bun sẹ ne ọ gha sẹtin tọn okọ mu vbe otọ. 18Amẹ nii kegha dinmwi yọ, okọ ghi na gha lẹ vbe uhunmwu amẹ. 19Ọ keghi dinmwi sẹrriọ wẹ, ọ na ro gue avbe oke ne ọ ghi yo sẹ hia. 20Ọ keghi ye vbe ro akhuẹn obọ isẹnyan ugie vbe udinmwimwẹ ba egbe ne ọ ya yo sẹ uhunmwu avbe oke ni yosẹ hia. 21Emwi hia ni hiọnrọn vbe agbọn keghi wulo, avbe ahianmwẹ, emwirri, avbe aranmwẹ negiẹrẹ kevbe emwa nagbọn hia. 22Emwi hia ni ghi hiọnrọn ni rre agbọn keghi wulo. 23Nọyaẹnmwa keghi fuẹn emwi ni ghi hiọnrọn ni rre otọ agbọn hia a, yasẹ egbe emwa nagbọn, emwirri, aranmwẹ kevbe avbe ahianmwẹ. Noa vbe iran ni lelẹe la uwe okọ ọkpa ọre a ghi sẹrae ne a ma fuan an. 24Ikpẹdẹ igbe yan ikiọkhọe (150) ọre amẹ ya gha ro yọ vbe otọ agbọn.
Pilihan Saat Ini:
Gẹnẹsis 7: EDO96
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
@ The Bible Society of Nigeria, 1996