Gẹnẹsis 2
2
1A keghi do yi otọe kevbe iso fo. 2Vbe ikpẹdẹ ne ogihinrọn, Osanobua keghi winna iwinna ne ọ gha winna hia fo, ọ keghi dobọ iwinna yi. 3Rẹn keghi fiangbe ikpẹdẹ ne ogihinrọn, ọ keghi zọe ye otọ zẹ vbe ẹdẹ kpataki, rhunmwuda ẹdẹ nẹdẹrriọ ọre ọ winna iwinna emwi ne ọ yi fo, ọ na dobọ iwinna yi. 4Vberriọ ọre a ya yi otọe vbe ukhunmwu.
Ogba Idẹni
Ẹghẹ ne Nọyaẹnmwa Osanobua na yi otọe vbe ukhunmwu, 5erhan rhọkpa ma gha rre otọe, emwi rhọkpa ma he vbe zọọ, rhunmwuda, rẹn ma he gie amẹ he rhọ, ọmwa rhọkpa i vbe rrọọ ne ọ gha kọ emwi ye otọe. 6Sokpan amẹ kegha rọn ke uwe otọe rre, ọ keghi lẹ guagua otọe. 7Ọre Nọyaẹnmwa Osanobua na rhie ekẹn vbe otọe, ọ keghi yae ma okpia, ọ keghi hiọnrọn uhiọnrọnmwẹ arrọọ ye ọre uvun ihue, okpia nii keghi khian ne ọ ghi rrọọ.
8Nọyaẹnmwa Osanobua ke do mu ogba ọkpa ye Idẹni, vbe odẹ ahọ ọ ke rhie okpia ne irẹn maẹn nii ye evba. 9Ọ keghi ruẹe ne erhan ughughan hia zọ, ne mose mose kevbe ni mọ ọmọ. Erhan ne ọ rhie arrọọ ke ẹwaẹn ne a ya rẹn emwi ne ọ maa ke ne ẹ i maa ne ọmwa kegha rre adesẹneva ogba nii. 10Ẹzẹ ọkpa lẹ ke uwe Idẹni ladian do gba amẹ khakha ogba nii, ọ ghi gberra Idẹni nẹ, ọ keghi fian egbe ye ẹzẹ enẹ. 11A kegha tie ẹzẹ ne okaro Pisiọn; ọnii ọre ọ lẹ la odẹ Havila. 12(Emwana ọre a na miẹn igoru nigoru ke emwi ni winhin eso, kevbe okuta ighobioye.) 13A ke gha tie ẹzẹ ne ogieva Gihọn, ọnii ọre ọ lẹ la odẹ avbe Kushi. 14Ẹzẹ ne ogieha keghi re Taigris, ọnii ọre ọ lẹ la asefẹn ahọ Asiria. Ẹzẹ ne ogienẹ keghi re Yufretes.
15Ẹre Nọyaẹnmwa Osanobua na rhie okpia nii, ye uwe ogba Idẹni ne ọ gha gbe ẹre ugbo kevbe ne ọ gha gbearoghe ẹre. 16Ọ keghi tama okpia nii wẹẹ, “U sẹtin gha rri avbe ọmọ erhan hia ni rre uwe ogba na. 17Sokpan ọnii ne ọ rhie ẹwaẹn ne a ya rẹn emwi ne ọ maa kevbe ne ẹ i maa ne ọmwa, ghe rri ọmọ rẹn. U gha rriọe, u gha wu ẹdẹ nẹdẹrriọ zẹẹ.”
18Ẹre Nọyaẹnmwa Osanobua na kha wẹẹ, “Ọ ma kei ne okpia na vbe ẹhi ẹre ọkpa kẹkan gha rrọọ. I gha yi ogieva ẹre ne ọ maẹn rhie nẹẹn ne ọ gha yi ọre obọ.”
19Rhunmwuda ọnii, ọ ke fian ekẹn vbe otọe, ọ na ya mannọ avbe aranmwẹ kevbe ahianmwẹ hia, ọ keghi viọ iran bu okpia ni gha dee ne ọ he iran eni, emwi ne okpia nii he iran re ọ hin iran. 20Ọre okpia nii na do he avbe aranmwẹ nii hia eni, kevbe ahianmwẹ sokpan a ma miẹn ọkpa vbe uwe iran ne ọ sẹtin gha re ogieva ẹre ne ọ maẹn.
21Ẹre Nọyaẹnmwa Osanobua na bọ okpia nii ye ovbe nọkhua. Ugbẹn vbe ọ ghi vbiẹ, rẹn keghi rhie ọkpa vbe ifẹnmwaguẹ okpia nii, ọ keghi vbe mama efun egbe ne ọ rre evba kugbe. 22Ọ keghi ya ifẹnmwaguẹ ne ọ rhie vbe egbe okpia ma okhuo, ọ na rhie ẹre bu ẹre gha dee. 23Ẹre okpia ni na kha wẹẹ,
“A ghi he vbe miẹn ne ima gba re ọkpa,
ugboloko ne a rhie vbe ugboloko mwẹ kevbe efun ne a rhie vbe efun mwẹ
‘Okhuo’ ọre a gha tie ẹre rhunmwuda egbe okpia ọre ọ ke rre.”
24Ọna ọre ọ zẹe ne okpia gha na sẹ erha ẹe kevbe iye ẹe rae, ọ ghi rhikhan mu amwẹ ọnrẹn, iran ghi gha re ọkpa.
25Irhunmwirhun ọre okpia nii kevbe okhuo nii gha ye, sokpan ekhue ma mu iran.
Pilihan Saat Ini:
Gẹnẹsis 2: EDO96
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
@ The Bible Society of Nigeria, 1996