Gẹnẹsis 18
18
A Tae Ighẹ A Gha Biẹ Aizik
1E Nọyaẹnmwa keghi rhiegbe ma Ebraham vbe ọkpẹn avbe erhan iruemwi ọghe Mamrẹ, Ebraham keghi tota ye onurho owa ukpọn rẹn vbe ogiavan ogioghogho, 2ọ ghi tọn aro mu vbe ọwarọkpa, ọ keghi ya dẹghe ikpia eha vbe iran mudia vbe evba. Ọwarọkpa nii vbe ọ ghi wa bẹghe iran, ọ keghi rhulẹ ke onurho owa ukpọn rẹn kpao ya vba iran. Ugbẹn vbe ọ ghi diguẹ mu aro rhuotọ nẹ, ọ wẹẹ, 3“Wa Dọmọ ọ, ugamwẹ uwa ọre I rre ba, lahọ wa ghẹ rhiegberra owa mwẹ vbe na i na yakọ hiehiere. Ọguọmwadia ruẹ ọre I khin. 4Gunmwẹ wẹ ne iran sa amẹ ya kpe uwa owẹ, wa sẹtin hẹwẹ vbe emwana, vbe ototọ erhan na. 5I gha mu evbare eso rre. Ọna gha rhie ẹtin ne uwa ya deyan okhian uwa. Owa mwẹ ọre uwa rre, mẹ vbe mu egbe ne I ya mu ọghọ ye uwa egbe.” Iran wanniẹn tama rẹn wẹẹ, “Ọ maa, ya ru vbene u khare.” 6Ebraham keghi rhulẹ la uwe owa ukpọn, ọ keghi tama Sera wẹẹ, “Mu ẹkpo ọghe irhuarhua ruẹ ne ọ maa sẹ, dọlọe yi ne u ya le ebrẹd.” 7Iyeke ọnii, ọ keghi rhulẹ la erhu emwirri ẹnrẹn, ọ keghi dobọ mu ekhuia ẹmila ne sọguọsọguọ ne ọ vbe mwẹ egbe, ọ keghi mu ne ọguọmwadia ọkpa ne ọ zẹgiẹ mwamwa ẹn. 8Ọ keghi rhie ewẹn ẹmila ọgbọn kevbe emiowo nii, ọ keghi viọ ẹre yotọ vbe odaro emwa nii. Iran ghi rri evbare nẹ, ọ keghi mudia ke iran vbe ototọ erhan nii.
9Iran keghi nọ rẹn wẹẹ, “E Sera ne amwẹ ọn vbo yi?” Rẹn wanniẹn tama iran wẹẹ, “Ọ rre uwe owa ukpọn vbe evba.” 10Ọkpa vbe uwe iran keghi wẹẹ, “I tama ruẹn nian, vbe uki ihinrin ne ọ dee mẹ gha dọlegbe rre, e Sera ne amwẹ ọn gha biẹ ọmọ okpia.” Sera kegha danmwehọ vbe odieke iran vbe onurho owa ukpọn. 11Ebraham vbe Sera wa khian ọmaẹn ẹsẹse. Sera i ghi vbe mu obọ mwẹ. 12Rhunmwuda ọnii, e Sera keghi hẹko gha giẹ, ọ wẹẹ, “Eban I khian ọmaẹn gbe ne ọ ghi biẹ, ẹghẹ na ọre I gha na ye gha miẹn okpia ra? Yevbe sẹ ọnii, ọdafẹn mwẹ khian ọmaẹn nẹ.” 13Ẹghẹ nii ọre Nọyaẹnmwa na nọ Ebraham wẹẹ, “Vbọzẹ ne Sera na giẹ yi, ne ọ na kha wẹẹ, ‘Mẹ gha ye sẹtin biẹ vbe I khian ọmaẹn nẹ ra?’ 14Emwi ọkpa rrọ ne ọ lọghọ ne Nọyaẹnmwa ra? Vbe ẹghẹ ne ọ ke yi, vbe uki ihinrin ne ọ dee, I gha dọlegbe bu ruẹ rre, e Sera gha biẹ ọmọ okpia.” 15Rhunmwuda ne ohan na mu Sera, ọ keghi siẹn wẹẹ, “I ma giẹ,” rẹn wanniẹn tama rẹn wẹẹ, “U giẹe vbe ne ẹmwata, u giẹe.”
Ebraham Rinmwian Ne Sọdom
16Ẹre emwa nii na kpao, iran na gha rrie ehe ne iran gha ke sẹtin dẹghe Sọdom. Ebraham keghi lele iran ne ọ su iran sẹ odẹ. 17E Nọyaẹnmwa keghi tae vbe ekhọe ẹre wẹẹ, “I i sẹtin rhie emwi ne I ra ru lẹre ne Ebraham. 18Uniẹn ọnrẹn gha do khian agbọn ẹvbo nọkhua ne ọ mwẹ ẹtin, avbe uhunmwu otọ agbọn na hia, obọ ẹre ọre I ra la fiangbe iran. 19I hannọ ọẹn zẹ nẹ ne ọ miẹn ehe na gha yi iyi ne ivbi ẹre kevbe emọ ne ọ gha la uniẹn ọnrẹn rre, ne iran gha họn ẹmwẹ mẹ, ne iran vbe gha ru emwi ne ọ ọhẹnhẹn. Ẹghẹ nii, I ghi do ru nẹ zẹ vbe ne I ve ẹre re hia.”
20Ẹkpo nii ọre Nọyaẹnmwa na khama Ebraham wẹẹ, “Emwa wa guan ẹmwẹ emwi dan ne Sọdom kevbe Gomorra ru, orukhọ iran vbe kpọlọ. 21I ra do ya ghe deghẹ ẹmwẹ ne iran ta yọ mwẹ ehọ vbe ekpa ẹre, deghẹ ẹmwata nọ. I ra ya gualọ otọ ẹre.”
22Avbe ikpia eva nii keghi kpao, iran keghi mu aro da Sọdom sokpan Nọyaẹnmwa keghi mudia ke Ebraham. 23Ebraham keghi sikẹ Nọyaẹnmwa, ọ nọ rẹn wẹẹ, “Te u ra gele fuẹn nọ ma rukhọ ba eni rukhọ ra? 24A deghẹ a miẹn arhunmwu ekigbesiyeha nọ ma rukhọ vbe evba nii, u gha ye fuẹn ẹvbo nii hia ra? U i sọrae ra ne u miẹn ehe na sinmwi arhunmwu ekigbesiyeha nii? 25Vbe na i na gbe awẹawẹ u i ra gbe ni ma rukhọ ba eni rukhọ. Ọnii i gia ru wẹ i sẹtin ru vberriọ. Ẹghẹ nii, a ghi rri eni ma rukhọ oya zẹ vbe eni rukhọ. Ọnii i gia ru, enọbuohiẹn otọ agbọn hia, te ọ gha ru emwi nọkere.” 26E Nọyaẹnmwa keghi wanniẹn wẹẹ, “A deghẹ I miẹn arhunmwu ekigbe siyeha ni maa vbe Sọdom, I gha rhunmwuda ekigbe siyeha nii sẹ ẹvbo nii rae.”
27Ebraham kevbe dọlegbe guan wẹẹ, “Lahọ, ghẹ gui ye udinmwẹ ne I ye ya guẹ guan na Nọyaẹnmwa. Ọmwa kẹkan ọre I khin, I i mwẹ asẹ ne I gha ya ta ẹmwẹ rhọkpa. 28Sokpan, a deghẹ arhunmwu isẹnyan iyeva ni maa ọre a miẹn vbọ ighẹ ẹi re ekigbe siyeha, u gha ye fuẹn ẹvbo nii rhunmwuda ighẹ isẹn ma giẹe gba?” E Nọyaẹnmwa wanniẹn wẹẹ, “Mẹ i ra fuẹn ẹvbo nii uan, a deghẹ I miẹn arhunmwu isẹn yan iyeva ni maa vbọ.” 29Ebraham kevbe dọlegbe guan, “U ghaghe iyeva ọkpa ọre ọ rrọọ.” Rẹn keghi wanniẹn wẹẹ, “I i ra fuẹn ọnrẹn a deghẹ a miẹn iyeva vbọ.” 30Ebraham keghi kha wẹẹ, “Lahọ ghẹ gie ohu muẹn Nọyaẹnmwa, I gha ye guan. A deghẹ ọgban kẹkan nọ vbo?” Rẹn wanniẹn wẹẹ, “I i ra ruẹe a deghẹ I miẹn ọgban vbọ.”
31Ebraham keghi kha wẹẹ, “Lahọ ghẹ gui ye udinmwẹ ne I ye ya guẹ guan na Nọyaẹnmwa. A deghẹ ugie kẹkan ọre a miẹn vbọ vbo?” Rẹn keghi kha wẹẹ, “I i ra fuẹn ẹvbo nii uan a deghẹ I miẹn ugie vbọ.”
32Ebraham keghi kha wẹẹ, “Lahọ ghẹ mu ohu Nọyaẹnmwa, I gha ye guan uhukpa na kẹkan. A deghẹ igbe kẹkan ọre a miẹn vbọ vbo?”
Rẹn keghi kha wẹẹ, “I i ra fuẹn ọẹn ruan a deghẹ a miẹn igbe vbọ.” 33Ugbẹn vbe ọ ghi gu Ebraham guan fo nẹ, e Nọyaẹnmwa keghi kpao, ọre Ebraham na gha rrie owa.
Pilihan Saat Ini:
Gẹnẹsis 18: EDO96
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
@ The Bible Society of Nigeria, 1996